1. Dhilobo gani dhigadhile onittukulela wova?

 NOTENE ninele ogumanana dhilobo mwigumini mwehu dhinanittukulele wova. Ndoweni none yotagiha ya Nestor na mwadhiye María, afuna okamihedha wego onjombeliwa anamalaleya. * Wila akwanihedhe yogana ejile, anfwanyeela ovevutxa egumi yawa. Mbwenye awene annova orimeliwa wagalala sabwa ya okalawo na kobiri eng’onovi. Vamalile Biniam okala Munamoona wa Yehova, elabo yakaliye yankoddihiwa mabasa ehu, nona iyene wanziwa wi agahifwara-fwariwa sabwa ya okosa mpaddi wa nlogo na Mulugu. Iyene wannova sabwa ya ejuwene. Elobo yina yamuttukulela wovetxa, yali sabwa yohiziwa txini egakosile anamudhi aye koziwa wi iyene okana relijiau eswa. Valérie wahifwanyiwa eredda ya kanseri, yahirutxa onfwanya dotoro agamukosile operasau ahilabihedhaga nikami, arihaga magano a Bibilia anrumeela Valérie. Iyene wawova venjene okwa.

2. Ninfwanyelela nni wang’anela wova wehu?

² Wahiromaga ofwanyiwa makattamiho awuttukuleli wova? Enjene wa iyo ahifwanyiwa. Akala kaninang’anela wova wehu, eji enele onittukulela okosa dhosakula dhohikala esuwene dhinanonge mandano ehu na Yehova. Jijuwene enfuna Satana. Iyene onfuna wi wova onittukulele ottiya wiwelela malamulo a Yehova, mwa malamulo aba nimodhana tta olaleya miselu dhapama. (Ovuh. 12:17) Satana dwabure, wawopiha vina wa guru. Weyo onofwanyela ovibarela. Onakose dhavi?

3. Txini enanikamihedhe okwaranya wova?

³ Iyo nigakaana ebaribari wila Yehova ononikwela—vina oli  mpaddi wehu—Satana kananittukulele wova. (Masal. 118:6) Motagiha, namaleba wa Masalmo 118 wahifwanyiwa makattamiho menjene. Iyene wahikana amwiddani enjene, ena ali attu ovuwa (versu 9, 10). Mudhidhene obo iyene wahifwara-fwariwa vaddiddi (versu 13). Vina iyene wahilagiwa venjene na Yehova (versu 18). Masiki dhahene munasalmo ohifiyedha ologa: ‘Miyo kaddinove elo.’ Txini yanvaha nikuluvelo ntti? Iyene wanziwa wi masiki valagiwiye na Yehova, Babi waye wa wirimu wannimukwela vaddiddi. Iyene wankuluvela wi Mulugu waye wokwela agahimukamihedha mmakattamihoni mwaye.—Masal. 118:29.

4. Dhilobo gani ttaru dhinawodhe iyo opemberha, nigakuluvela wi Yehova ononikwela?

⁴ Iyo ninofwanyela okana nikuluvelo na wi Yehova ononikwela. Nikuluvelo ntti, ninele onikamihedha okwaranya wova dhilobo ttaru: (1) wova ohiwodha osapela murala wehu, (2) omova muttu (3) wova okwa. Abali aba alogiwe ddima yoroma, awodhile okwaranya wova wawa sabwa ya okuluvela wi Mulugu onowakwela.

5. Makattamiho gani agadhile omuzuzumiha musorho wa ntakulu? (Koona foto ya kapa.)

⁵ Musorho wa ntakulu oli Mukristu onofwanyela ohivegana muttorho wa osapela ntakulu naye. (1 Tim. 5:8) Akala weyo wa musorho wa ntakulu, txino sabwa ya eredda eji ya Covid-19, ohiyelela gano yawo vina kunwodha ofwanya yina. Weyo onozuzuma sabwa ya ohiwodha odhana oja vatakulu vina opitxela numba. Dhahene ninga Nestor na María, txino weyo onowova ovevutxa egumi yawo wila muwodhe okalawo na kobiri eng’onovi. Satana onopura wova oku wi attukulele attu enjene ottiya omulabela Yehova.

6. Satana onfuna wi iyo nubuwelege eni?

⁶ Satana onfuna wila iyo nubuwele wi Yehova kannikwela vina kananikamihedhe osapela murala wehu. Yodhelavoya, nigahidha wubuwela okosa elobo-txilobo wila nihiyelele ganyo yehu, masiki akala okosa ejuwene enonittukulela olupa malamulo a Yehova.

7. Yezu onikuluvelihile eni?

⁷ Kawo muttu mwina onimuziwa pama Yehova opitta Yezu; nona iyene ononikuluveliha: “Babinyu onoziwa enfunenyu, muhinatti-wene omukumbirha.” (Mt. 6:8) Yezu onononelamo wi Yehova, onoziwa dhojombeliwa dhehu vina onokosa elobo-txilobo wila akwanihedhe. Ninga Akristu, iyo ninokosa mpaddi wa murala wa Yehova. Akala wa Musorho wa ntakulu, kakana nikuluvelo wi Yehova onele wakwanihedha mazu anfwanyeya va 1 Timóteo 5:8.

8. (a) Txini enanikamihedhe opemberha wova ohiwodha wasapela amudhehu? (Mateu 6:31-33) (b) Ninga munlagihela foto, ninawodhe dhavi watagiha atelani andowa onvaha murogora mwina dhoja?

⁸ Iyo txibarene nigakuluvela wi Yehova ononikwela vina anowakwela amudhihu, kaninaganyedhe wi iyene onelege onivaha dhilobo dhinnijombela mpaddi womaningoni. (Kengesa Mateu 6:31-33.) Yehova onowodha onivaha dhinfunihu vina kuli muttu mwina onwodha okosa ejuwene opitta iyene. Motagiha, muttanddiliye elabo, iyene kanivahile bahi dhilobo dhinwodha onikalihawo. Ohidhaaliha mwilaboni dhilobo dhinnidhelana wagalala. (Wita 2:9) Masiki dila dhina, akala nikana dhilobo dhing’onovi bahi wila niwodhe okalawo, kanidduwale wi esodhá onivahile ddi Yehova. (Mt. 6:11) Kanidduwale wi guru-guruvi enkosihu wila nikane dhilobo dhinnijombela, kinladdana na esi dhinnivaha Yehova ovanene vina dhinanivahiye musogorho. Jijuwene enonelemo Nestor na María.—Iza. 65:21, 22.

9. Txini esunziliwe na yotagiha na Nestor na María?

 ⁹ Nestor na María ahikana egumi yottugareya mpaddi womaningoni elabo yo Colombia. Awene ahiloga dhahi: “Iyo nahubuwela ovevutxa egumi yehu wi niwodhe okana mudhidhi mwinjene wodhowa mmabasani olaleya, mbwenye nannova oyeleeliwa wagalala sabwa ya okalagawo na dhilobo dhing’onovi.” Txini yakamihedhile atelani aba okwaranya wova? Awene ahubuwela dila dhotedhene dhalagihile Yehova okwela. Novenya atanalela wi Yehova onele odhowavi akamihedhaga. Attiya mabasa alabani attambirhani kobiri dhinjene, aguliha numba yawa, vasogorhova amwalela mpaddi wa elabo yawa wajombeliwa anamalaleya. Awene ewilemo dhavi sabwa ya matxinjo aba? Nestor ohiloga dhahi: “Iyo nihoona wakwanihedheya wa nlebo na Mateu 6:33 mwigumi mwehu. Iyo txipo kanijombeliwe elobo mpaddi womaningoni. Ovano nikana egumi yowagalala opitta wale.”

10. Ninkoddela eni otikina nigawonaga attu anawova attu ena?

¹⁰ Oromana vattegile Adamu mpaka ovano, attu anototelana makattamiho muttu na mukwaye. (Koh. 8:9) Motagiha, anamattonga anolabihedha ettomo yawa wi atabutxena attu, oku attu ena anopujiwa oskola (bullying) enagu anoweddihiwa na owali mmamiralani. Nona kanintikina, nigawonaga attu anawova attu ena! Satana onlabihedha dhavi wova oku wi anikwekwette?

11-12. Satana onlabihedha dhavi murega wa wawova attu wi anikwakwattutxe?

¹¹ Satana onolabihedha murega wa omova muttu wi nittiye mabasa a olaleya. Iyene vina onowalabihedha alamuleli wi anifwara-fware vina agomihe mabasa ehu a olaleya. (Lk. 21:12; Ovuh. 2:10) Elabo ejino enlamuleliwa na Satana, attu enjene anovuwiha miselu dhopela malago vina anowazivalela Anamoona a Yehova. Attu anrumeela dhottambi eso, anonidda vina anonilupela. (Mt. 10:36) Ninotikina nigapadduweliwaga dhilobo esi? Nne vang’ono. Oromana nsaka na Akristu oroma, Satana onolabihedha murega obo.—Mer. 5:27, 28, 40.

¹² Wova ofwara-fwariwa, kahiyo murega mmodha bahi onlabihedha Satana. Mwa ena, ahikana wova mwina onddimuwa opitta ofwara-fwariwa vina olupeliwa. Awene anowakwela venjene amudhawa vina ahikana  efunelo yawi amuziwe vina amukwele Yehova. Nona agafuna okala Akristu anowiwa opa onddimuwa vaddiddi, agawiwaga amudhawa alogaga bure sabwa ya Yehova vina ya abali a mmulogoni. Dila dhina, anamudhi annifwara-fwara, anofiyedha okala Akristu. Akala amudhawo anowunyanyala sabwa ya esile dhinrumeeliwe, onakose dhavi?

13. Txini ennittukulela okuluvela wi Mulugu onele onitanala, masiki akala amudhihu anoninyanyala? (Masalmo 27: 10)

¹³ Iyo ninopangarhazeya na mazu aba a pama a Masalmo 27: 10. (Kengesa.) Niganonelamo wi Yehova ononikwela venjene ninele owodha opemberha ofwara-fwariwa. Vina ninele okuluvela wi Iyene onele oniruriha sabwa ya ovilela wehu. Kawo muttu mwina onzuzumela dhubuwelo dhehu, etanalelo yehu vina dhojombeliwa dhehu mpaddi womuyani opitta Yehova! Jijuwene edhile ononelamo Biniam, ologiwe omaromo.

14. Txini ensunzihu na yotagiha ya Biniam?

¹⁴ Biniam okalile Munamoona wa Yehova mudhidhi wafwara-fwariwa Anamoona a Yehova na mulamuleli wa elaboya. Omukwela Yehova ohimukamihedha Biniam opemberha wova. Iyene ohiloga dhahi: “Ofwara-fwariwa wahivinga opitta ejile yobuwelimi. Mbwenye yovetxa miyo yali ofwara-fwariwa na anamudhi opitta ofwara-fwariwa na alamuleli. Ddanova omukubanyiha babani wahali Munamoona wa Yehova vina watotela amudhaga manyazo sabwa yosakula yakosilemi.” Masiki dhawene, Biniam wahikana ebaribari wi Yehova agahidhowavi amuzuzumelaga vina amukwelaga. Biniam ohiloga dhahi: “Miyo ddantanalela mukalelo wakamihedhile Yehova abali ena ovilela ofwara-fwariwa, otowiwa dhoja vina obubuddiwa. Mwa venevo miyo ononelamo wi Yehova agahiddiruriha sabwa ya ovilela waga. Miyo ddahifugeliwa mukambura dila dhinjidhene vina ofiyedha obubuddiwa, ddahoona na mento aga mukalelo onnikamihedha Yehova nigakalavi ororomeleya.” Yehova wahidha okala Babi wa Biniam vina abali ali ninga amudhaye.

15. Ninlogelani wi kahiyo yabure wova okwa?

¹⁵ Bibilia onloga wi okwa mwiddani. (1 Kor. 15:25, 26) Nona iyo ninowova okwa, makamaka nigazinddiyela wi nikana eredda ehina murobwe obe akala ona makattamihoya ddi mmudhehu. Txini ennittukulela wova okwa?  Sabwani Yehova onittanddile na efunelo ya okalawo namukalakala. (Koh. 3:11) Kahiyo yabure wova okwa sabwani ononikamihedha obarela egumi yehu. Motagiha, enonikamihedha osakula dhinjehu, munddamurelo wa maningo, onveda mediko nigakala aredda, oja mirobwe vina orabela wika egumi yehu vangovini.

16. Satana ompura dhavi wova wehu okwa wi aputtule mandano ehu na Yehova?

¹⁶ Satana onoziwa wi egumi jamakamaka mwa iyo. Iyene ohiloga wi ninele okosa elobo-elobovi—vina wika mandano ehu na Yehova vangovini—wila nibarele egumi yehu. (Job 2:4, 5) Oku ottambi wa Satana! Vowi iyene ‘ohikana ewodhelo ya otatamula okwa,’ onolabihedha wova oku onihu wi nikale wolapela na Yehova. (Aheb. 2:14, 15) Dila dhina Satana onowalabihedha attu wi aatxutxe Anamoona a Yehova na okwa, akala awene anokalelavi ntidi omuroromela wawa Yehova. Masaka mena onolabihedha murega obo agaziwa wi nili mmakattamihoni o’tabwa mpaddi wa egumi wi nilupe magano a Yehova. Motagiha, adotoro ena vina anamudhi ahili Anamoona a Yehova anodhaga onikwekwettela wikiwa nikami, oku bili elobo enkoddiha Yehova. Obe dila dhina, anonikwekwettela orumela mukalelo mwina wa osasanyiwa ongudulana na magano a Mulugu.

17. Mowiwana na Roma 8:37-39, sabwaya jani kaninfwanyela wova okwa?

¹⁷ Kavo wa iyo onfuna okwa, mbwenye masiki ejo egapadduwa nikaaneni ebaribari wi Yehova kananidduwale vina kanattiye onikwela. (Kengesa Roma 8:37-39.) Yehova agamuyelela marho waye mukwani, iyene onomubuwela pama, vamentoni vaye onkala ninga kakwile. (Lk. 20:37, 38) Iyene onojeedha mudhidhi onamuyihedhiye okalawo. (Job 14:15) Yehova ohipitxa muttengo munddimuwa ‘wi nikane egumi yohimala.’ (Jo. 3:16) Iyo ninowona mukalelo onnizuzumela Yehova vina onnikweliye. Nona nigapattiwa makattamiho manddimuwa a oredda obe egumi yehu egakala vangovini, ninotamela nipangarhazo na Yehova, eziwelo vina ninomuloba wi anivahe guru. Jijuwene ekosile Valérie na mamune.—Masal. 41:3.

18. Txini ensunzihu na nipadduwo na murogora Valérie?

¹⁸ Valérie bana vyaka 35, dotoro wahimwaddela wi ohikana eredda ya kanseri. Koona mukalelo omukamihedhile okwela opemberha wova okwa. Iyene ohiloga dhahi: “Mukalelo wali egumi yaga, yanfuneya okosa operasau wowopiha wi ddikalewo. Nona, miyo ddahavuza adotori enjene, mbwenye otene aloga wi yanfuneya wekiwa nikami wi ddikosiwe operasau. Miyo ddanova vaddiddi mbwenye kaddafuna okosa elobo enkoddiha Yehova, orumela wikiwa nikami! Okalawo waga wotene, ddihoona wi Yehova onoddikwela. Ovano ddinfuna ddonihe omukwela waga. Mudhidhi wakela miyo miselu dhokubanyiha, ddanvilibihedha okosa dhosakula dhigamuttukuleli Yehova wagalala sabwa yaga ehili omuttiya Satana opemberha. Movira wa mudhidhi ddahikosiwa operasau senikami. Masiki makattamiho aga vahigomilani kakamwe, mudhidhi wotene ddinowoona wi Yehova onodhowavi anivahaga esile dhinnijombela. Motagiha, omamalelo wa sumana, ddihinatti waddeliwa wi ddihikaana eredda ya kanseri nahisunza mutoma wa mwang’aneli waloga ‘Enfrente Com Coragem os Problemas Atuais.’ * Nsunzo ntti niddikamihedha venjene. Iyo naniyelela wengesa dila dhinjene. Wengesa mitoma ninga esi vina okana elemelelo  yozuzumela dhilobo dhomuyani dhihiwodha onikamihedha miyo na mamunaga okana murenddele, okalavi ofwaseyene vina okosa dhosakula dhapama.”

19. Txini enapadduwe mohigonela?

¹⁹ Na nikamihedho na Yehova, abali na arogora ali ozugunuwa elabo yotene anopemberhavi makattamiho vina anomurabela Satana. (1 Ped. 5:8, 9) Weyo onowodha okosa yakene. Momaguva-mwene Yehova onele omulabihedha Yezu vina attikitteliwi wi atolotxe mabasa a Satana. (1 Jo. 3:8) Ejo egavira, nlogo na Mulugu ninakale velaboni ya vati ‘kinakalewo elobo enatotele ojeriheya nne wova.’ (Iza. 54:14; Mik. 4:4) Oku nijedhaga ofiya wa labo ntto, ninofwanyela okosa guru wi nikwaranye wova wehu.

20. Txini enanikamihedhe opemberha wova wehu?

²⁰ Ninofwanyela odhowavi nilibihaga nikuluvelo nehu nawi Yehova ononikwela vina onele wabarela emeleli aye. Enanikamihedhe okosa ejene ja otanaalela mukalelo wabareli Yehova emeleli aye a masaka awale. Vina ninofwanyela wubuwela mukalelo onikamihedhile Yehova okwaranya makattamiho a mwigumini. Na nikamihedho na Yehova ninele owodha okwaranya wova wehu!—Masal. 34:4.