1. (a) Njedhelo gani ninnivaha Yehova? ‘Omujeedhela Yehova entapulela eni’? (Koona “Mazu Mena Atapuleliwe.”)

 YEHOVA onowavaha njedhelo napama vaddiddi abale animukwela. Mohigonela iyene onele ogomiha maredda, okubanya vina okwa. (Ovuh. 21:3, 4) Iyene ‘onele wakamihedha’ attu apama osaddula elabo wi ekale paraizu. (Masal. 37:9-11) Mwilaboni eswa ninele okana mandano apama na Yehova opitta aba ana iyo ovanene. Txibarene nikana njedhelo nowagalaliha na musogorho! Sabwaya jani enkuluvelihu wi Yehova onele wakwanihedha yopikirela yaye? Sabwani Yehova txipo kanttiya wakwanihedha dhopikirela dhaye. Nona iyo nikana sabwa dhapama ya ‘omujeedhela Yehova.’ * (Masal. 27:14) Eji entapulela wi ninofwanyela omujedhela Yehova novilela vina nowagalala mpaka mudhidhi onakwanihedhiye dhopikirela dhaye.—Iza. 55:10, 11.

2. Nipikirelo gani nakwanihile Yehova?

² Yehova ohoniha wi onowakwanihedha dhopikirhela dhaye. Ndoweni nitanaalele yotagiha modha! Munivuruni na Ovuhulela Yehova ohipikirhela wi agahagumaniha attu a malogo otene, dhilogelo dhotene, vina a ttebe dhottiyana-ttiyana wi amwebedhege mumodhani. Nikuru ntto na attu masaka abano ninziwiwa ninga muttitti munddimuwa. (Ovuh. 7:9, 10) Nlogo ntto otaganyiheya wa alobwana, ayana, ayima, a vilabo dhetene, mahimo etene, a vilogelo dhetene vina a malogo etene. (Masal. 133:1; Jo. 10:16) Attu ankosa mpaddi wa muttitti  munddimuwa anolaleya miselu dhapama. Awene ali omala-nawale wi aloge na muttu-muttuvi onfuna wiwa miselu dhapama. (Mt. 28:19, 20; Ovuh. 14:6, 7; 22:17) Akala weyo onokosa mpaddi wa muttitti munddimuwa ohikana njedhelo wi musogorho mpo dhilobo dhinele okala dhapama.

3. Efunelo ya Satana jivi?

³ Ddiabo kanfuna wi weyo okaane njedhelo na musogorho. Yogana yaye jowukwekwetta wi okane muyubuweloni yawi Yehova kanutanala vina kanakwanihedhe dhogana dhaye. Satana aganiwodha baniroma orumela wi kanina njedhelo ninele okumuwa vina ninele ottiya omulabela Yehova. Ninga munonelihu Satana wahitamela ogomiha njedhelo na Job wi attiye omulabela Yehova.

4. Txini enone iyo mwari mwa nsunzo ntti? (Job 1:9-12)

⁴ Mwari mwa nsunzo ntti, ninele wona mirega dhilabihedhile Satana wi ammagelele Job ottiya weddeyana waye na Yehova. (Kengesa Job 1:9-12.) Ninele wona txini ensunzihu na yotagiha ya Job vina sabwaya enfwanyelihu okuluvela wi Yehova ononikwela nanda onele wakwanihedha dhogana Dhaye.

5-6. Txini epadduwile mwigumini mwa Job mwa mudhidhi mung’onovi?

⁵ Job wahikana egumi yofwasa. Iyene wahikana mandano ofiyedheya na Yehova, murala munddimuwa, wowiwanana vina wali mureli. (Job 1:1-5) Mbwenye labo nimodha bahi Job wahiyelela dhinjene. Voroma, iyene wahiyelela dhorela dhaye vina anaye otene akweliye venjene. (Job 1:13-17) Karoma otanalela vang’onovi. Akala amambali anokubanya venjene mwanawa mmodha agakwa. Ovano karoma wubuwela segedho dhamugwelile Job na mwadhiye. Vaziwilani wila anawa kumi ahimala okwa. Nona kinnitikiniha sabwa ya Job otaya guwo dhaye vina bagilati vambwebweni!—Job 1:18-20.

⁶ Vasogorhova Satana wahibeddegela egumi ya Job. (Job 2:6-8; 7:5) Wahimutatamulela eredda yawopiha yattukulela attu wugiwa mara. Vamaromo, Job wanrihiwa na attu otene. Attu ena anda omuloba malago mbwenye mpadduwile esi dhotene, ahiroma omutxatxama. (Job 31:18) Iyene wantxatxamiwa na abalaye, amarho aye, amudhaye, vina na anamalabaya!—Job 19:13, 14, 16.

7. (a) Txini yobuwela Job sabwa ya makattamiho amugwelile, nanda elobo gani ehikosiliye? (b) Makattamiho gani oladdana agadhile omugwela Mukristu dhahene ninga munlagiha foto?

⁷ Satana wafuna wi Job obuwele wi wamutoteli makattamiho abale otene wali Yehova. Motagiha, Satana ohilabihedha pevo egujulile nyumba mwaja ayima kumi a Job. (Job 1:18, 19) Iyene vina ohigwiha motto odhulu otolotxile dhifuwo dha Job na anamalabaya. (Job 1:16) Vowi pevo vina motto dhipadduwile na mukalelo wotikiniha nanda mottoya odhile odhulu, Job odhile wubuwela wi esi Wakosile ddi Yehova Mulugu. Txini edhile opadduwa? Job wobuwela wi txino wahikosa elobo yamusilidhile Yehova. Job kasilidhiwe na Babi waye wa wirimu. Job wannonelamo wi akala iyene onowakela dhilobo dhapama wa Yehova wanfwanyela vina orumela makattamiho amutoteliye. Masiki dhawene Job ohiloga dhahi: ‘Nitamaliwegevi nzina na Yehova.’ (Job 1:20, 21; 2:10) Job vayeleliye dhorela dhaye, anaye vina vapattiwiye na eredda, makattamiho amugwihedhi Satana ali ahinatti ogoma.

8. Murega gani mwina olabihedhile Satana wi ambeddegelena Job?

⁸ Vasogorhova Satana ohalabihedha alobwana araru akala ninga ali amarho a Job, wi  amukosihe Job ohikana ttima. Alobwana aba atamela wi Job akane muyubuweloni ya wi matabuwo aye ali otxinutxiwa sabwa ya dhilobo dhabure dhakosiliye. (Job 22:5-9) Awene afuna wi Job obuwele wila masiki dhilobo dhapama dhavilibihedha iyene okosa Yehova katanala. (Job 4:18; 22:2, 3; 25:4) Atamela wi Job obuwele wi Yehova kamukwela, kamutanala vina kuli ttima ya omulabela Yehova. Mazu aba agahidha ogomiha njedhelo notene nana Job.

9. Txini emukamihedhile Job oliba murima vina okalavi pwi?

⁹ Kamubuwele Job bagilatile vambwebweni ewaga opa onddimuwa vaddiddi. Amarho abale araru ottambi alogaga wi Job kahiye muttu wapama. (Job 2:8) Vina dhilobo dhotene dhikosiliye kapurilena elo. Makattamiho otene amugwelile Job ali ninga muttorho wolemela vaddiddi, iyene wankubanyavi sabwa yowayelela anaye otene. Vamaromo, Job kakulile elo. (Job 2:13–3:1) Akala amarho abale adhile wubuwela wi omala oku wa Job yalagiha wi agahittiya omulabela Muttanddi waye ahinyengetteya vaddiddi. Mwa mudhidhi mung’onovi Job owawang’ana—baloga mazu aba: ‘Mpaka okwa waga kaddinatxelele woniha okoddela waga murima.’ (Job 27:5) Txini emukamihedhile Job oliba murima vina okalavi pwi masiki na otabuwa onddimuwa. Job valiye mmakattamihoni orutxa a egumi yaye obe ninga munlogela attu ena nena na okwa, txipo kayeleliwe njedhelo wi omamalelowa Mulugu waye wokwela agahigomiha makattamiho aye. Iyene wanziwa wi kookwa Yehova agahinvenyiha mukwani.—Job 14:13-15.

10. Txini ensunzihu na nipadduwo na Job?

¹⁰ Nipadduwo na Job ninonisunziha wi Satana kanwodha onimagelela omunyanyala Yehova vina Yehova onoziwa dhotene dhinnipadduwela.  Ninonikamihedha vina ononelamo ejile eniwanana na ororomeleya wehu. Ndowe nitanaalele dhilobo dhing’onovi dhinsunzihu na Job.

11. Nigamukuluvelagavi Yehova ebaribari gani enfwanyelihu okana? (Tiago 4:7)

¹¹ Job ohoniha wi nigadhowavi nimukuluvelaga Yehova ninele owodha ovilela yoweha-yowehavi vina ninele omurabela Satana. Enapadduwe vasogorhova? Bibilia ononipangarhaza wi Ddiabo onele onittawa.—Kengesa Tiago 4:7.

12. Njedhelo na ovenyihiwa mukwani nimulibihile dhavi Job?

¹² Ninofwanyela olibihavi njedhelo nehu na ovenya mukwani. Ninga mumalile iyo wona nsunzo nivirile, dila dhinjene Satana onolabihedha murega wa wova okwa wi nittiye weddeyana wehu na Yehova. Mmakattamihoni a Job Satana bela Job agahikosa elobo-elobovi ofiyedha ottiya weddeyana waye na Yehova wi avune egumi yaye. Mbwenye Satana wahinyengetteya. Masiki Job valiye nena na okwa kattiyilevi weddeyana waye. Iyene wandhowavi akuluvelaga opama wa Yehova vina alibihagavi njedhelo naye na wi Yehova agahigomiha makattamiho aye. Job vina wahikana njedhelo nawi masiki Yehova kohigomiha makattamihoya baliwo Mulugu agahigomiha makattamiho aye mudhidhi oganvenyile Job mukwani. Job wahikana njedhelo noliba sabwa ya ovenyihiwa mukwani. Mwa mpaddi wehu nigakana njedhelo noliba sabwa ya ovenyihiwa mukwani, kintanala makattamiho-makattamihovi angumanana iyo obe otxutxiwa na okwa kaninattiye weddeyana wehu na Yehova.

13. Ekaleli nni yapama okalela mento mirega dhilabihedhile Satana mwigumini mwa Job?

¹³ Ninofwanyela okalela mento mirega dhinlabihedha Satana. Sabwani mirega dhilabihedhiliye na Job si mirega dhakene dhinlabihedhiye masaka abano. Koona mazu aba omagedha alogile Satana: ‘Muttu [kahiye bahi Job] agafuna ovivuna kinimurutxa operheka dhaye dhotene dhineye.’ (Job 2:4, 5) Na mazu aba Satana onfuna aloge wi iyo kaninimukwela venjene Yehova Mulugu, vina egapadduwa elobo enika egumi yehu vangovini kinnirutxa omuttiya Yehova. Satana ohiloga wi Mulugu kannikwela vina kantanala guru enkosihu ya omulabela. Iyo ninoziwa mirega dha Satana ninimukuluvela Yehova vina kannivittiya onyengettiwa.

14. Dhoweha dhinladdanihiwa na eni? Kaladdaniha.

¹⁴ Enowodheya wona dhoweha ninga gari ya oviziwa iyo nanya. Makattamiho apadduwile mwigumini mwa Job ahiwodha omukamihedha ozinddiyela dhowobana dhing’onovi vina osisigula. Iyene ohizinddiyela wila yanfuneya ovilibihedha wi onuwihevi oviyeviya. (Job 42:3) Enowodheya iyo vina okosa yakene nigakala mmakattamihoni. Mbali dhahi onkuweliwa Nikolay * wafugeliwe mukamburha masiki vaniyena makattamiho menjene a egumi ohiloga: “Ofugeliwa mukamburha yali ninga raio-X, ononiha mikalelo dhili mmurimani mwa Mukristu.” Mwa venevo vanzinddiyelihu dhowobana dhehu ninofwanyela ovilibihedha wi nisisigule.

15. Ninfwanyela onvuruwana ani nanda sabwaya jani?

¹⁵ Ninofwanyela ofwaseyela ovuruwana enloga Yehova, ottiya dhinloga amwiddani ehu. Job wahinfaseyela onvuruwana Yehova mudhidhi walogiye. Mulugu wahitanaalela na Job ekalaga ninga waloga dhahi: ‘Weyo onowodha opima guru elabihedhilimi wi ddittandde dhilobo dhotene? Miyo ddinoziwa dhilobo dhotene dhinupadduwela. Onubuwela  ninga kaddinwodha wutanala?’ Job ohakula na oviyeviha vina na otamalela onddimuwa sabwa ya opama wa Yehova. Eji ehimuttukulela ologa dhahi: “Wadha miyo, ddawuziwileni n’ologiwavi; ddabuno ddinouwonani na mento aga.” (Job 42:5) Job wali wogilatene vambwebweni, maningo aye bali viloddavi vina ewaga opa vaddiddi sabwa ya wayeleela anaye, valogiliye mazu aba. Masiki dhawene Yehova ohimukuluveliha wi wannimukwela Job vina iyene wali orumeliwa vamentoni va Yehova.—Job 42:7, 8.

16. Mowiwanana na Izaiya 49:15, 16, txini enfwanyelihu okana muyubuweloni nigagumanana dhoweha?

¹⁶ Masaka abano attu anodhaga oniruwana vina ohinonana ttima. Anotamela opigidha omuttu wehu, nikuru nehu, ‘anonizivalela alogaga dhilobo dhotene dhili dhabure.’ (Mt. 5:11) Nipadduwo na Job ninonisunziha wi Yehova ononikuluvela wi ninelege odhowavi nikalaga oweddeyena na iyene masiki nigagumanana dhoweha. Yehova ononikwela iyene txipo kananyanyala abale animukuluvela. (Kengesa Izaiya 49:15, 16.) Kanifwaseyele ovuruwana mazu ottambi anloga amwiddani a Mulugu. James mbali wo Turquia ogumanilena dhoweha dhinjene vamodha na amudhaye ohiloga: “Iyo kowiliwa nele ofwaseyela ovuruwana dhottambi dhinlogeliwa nlogo na Mulugu nigahikumuwa. Iyo nazuzumela okosa mabasa a Yehova vina olibihavi njedhelo nehu na odha wa Omwene wa Mulugu, jijuwene enikamihedhile okanavi wagalala.” Dhahene ninga Job, nifwaseyele onvuruwana Yehova. Dhottambi dha amwiddani ehu kadhinawodhe ogomiha njedhelo nehu.

17. Txini ensunza weyo na yotagiha ya alobwana na ayana ororomeleya anlogiwa va Ahebreu 11?

¹⁷ Job mwimeleli mmodha mwa alabeli ororomeleya a Yehova, ohittiyile weddeyana waye na Yehova masiki vagumaniliyena makattamiho orutxa mwigumi mwaye. Mukartani na murumiwi Paulo nalebeliye Ahebreu ohiloga wi emeleli aba ‘attu enjene onihile nroromelo nawa.’ (Aheb. 12:1) Otene aba ahigumanana makattamiho orutxa mwigumini mwawa. Masiki dhawene ahidhowavi akalaga ororomeleya vamentoni va Yehova. (Aheb. 11:36-40) Koddi ovilela wawa na mabasa awa ahidhana dhopurelamo? Kaninaganyedha ahidhana! Masiki emeleli aba muhikalilani vyaka dhinjene wi one wakwanihedheya wa mapikirhelo a Yehova ahidhowavi amukuluvelaga Mulugu. Awene kana waganyedha wi agahona wakwanihedheya wa mapikirhelo a Yehova musogorho. (Aheb. 11:4, 5) Yotagiha yawa enowodha onilibiha wi nidhowegevi nimukuluvelaga Yehova.

18. Txini eganiliwe okosa? (Ahebreu 11:6)

¹⁸ Mwilaboni munkalihu makattamiho anodhowavi attabwaga. (2 Tim. 3:13) Vina Satana kattiyilevi weha nlogo na Mulugu. Iyo ninoziwa wila ninele ogumanana dhoweha dhinjene. Masiki dhawene nigane okalavi ororomeleya na Yehova, na nikuluvelo na wi ‘ninimuroromela Mulugu oliwo.’ (1 Tim. 4:10) Mulugu ohimururiha venjene mwimeleli waye Job. Eji enoniha wi ‘Yehova ddodhala ttagaraga na nttebwa.’ (Tia. 5:11) Enowodheya iyo vina okalavi ororomeleya na Yehova na nikuluvelo na wi ‘iyene onowattuva abale animutamela.’—Kengesa Ahebreu 11:6.