1. Mowiwanana na Kohelét 7:20, ebaribari gani elogile Mwene Salomau?

 MWENE Salomau ohiloga: “Kawo muthu wawakwana vati apano, onedda pama, ohinddawa.” (Koh. 7:20) Eji ebaribari! Notene nili attegi. (1 Jo. 1:8) Nona iyo notene ninofuna oleveleliwa na Yehova vina na attu ena.

2. Oviwilemo dhavi mudhidhi wulevelile mukwawo?

² Kavali waganyedha wi weyo onowubuwela mudhidhi wamuddaweliwe mukwawo wofiyedheya. Weyo wahivilibihedha omukumbirha nlevelelo, osisigula yovonyaya vina ovenyihedha mandano enyu. Oviwilemo dhavi mudhidhi wulevelile mukwawo? Wahagalala? Ndde, vina wahiziveliwa vaddiddi!

3. Mavuzo gani anfuna wakuliwa mwari mwa nsunzo ntti?

³ Iyo ninofuna okana Omarho wofiyedheya na Yehova, mbwenye mudhidhi mwina ninokosa obe ninologa dhilobo dhihinimuzivela. Ninkanelani ebaribari yawi Yehova onele onilevelela? Na mukalelo gani oli Yehova namalevelela opitta iyo? Omamalelowa ninele wona bani onleveleliwa na Yehova?

4. Sabwaya jani nigaloga wi Yehova oli womala-nawale wi anilevelele?

⁴ MBibiliani Yehova ononilibiha wi oli womala-nawale wila anilevelele. Vamuttanyuwele Yehova Mizé Omwangoni Sinai modhela anju waye Iyene ohiloga: ‘Miyo ddili Yehova, Mulugu wa nttebwa, wa ttagaraga, wovilela, wapama-pama wawiwananeyana.  Ddinowavaha dhapama dhaga attu, ddinolevelela dhovirigana dhawa dhovonya dhawa vina dhottega dhawa.’ (Obud. 34:6, 7) Yehova Mulugu wapama vina oli womala-nawale wi alevelele attegi antxinuwa na murima wotene.—Nem. 9:17; Masal. 86:15.

5. Mowiwanana na Masalmo 103:13, 14, oniziwa wa Yehova onimuttukulela okosa eni?

⁵ Muttanddi wehu Yehova, onoziwa dhilobo dhinji mwaha wa iyo. Iyene onoziwa ekalelo ya muttu ddi muttu oli velaboni ya vati. (Masal. 139:15-17) Onowona dhovirigana dhotene dhiravilehu na amambali ehu. Ottiya ejuwene, Yehova onoziwa dhotene dhinnipadduwela esuwene dhintxinja egumi yehu. Eziwelo eji ena Yehova mwaha wa attu enimuttukulela okosa eni? Eji enomuttukulela oneddiha na ttagaraga.—Masal. 78:39; kengesa Masalmo 103:13, 14.

6. Yehova wonihile dhavi wi oli womala-nawale wila anilevelele?

⁶ Yehova oli womala-nawale wi alevelele dhoddawa dhehu. Iyo ninoziwa wi sabwa ya dhowira dha mulobwana woroma Adamu iyo nigwela muttegani vina mukwani. (Rom. 5:12) Sabwa ya ejuwene iyo kanina ewodhelo yovifurula nanya vina kaliwo muttu agawodhile onifurula mmakattamihoni. (Masal. 49:7-9) Mbwenye Mulugu wehu wokwela ohinilagiha ttagaraga vina ohikosa masasanyedho wi iyo nifuruleye. Txini ekosiliye? Joau 3:16 ononaddela wi Yehova ohimuruma Mwanaye woroma wi akwe vamburoni vehu. (Mt. 20:28; Rom. 5:19) Yezu ohikala vamburoni vehu—ohitabuwa vina ohikwa—wi afurule abale etene animuroromela iyene. (Aheb. 2:9) Yehova wahikubanya venjene sabwa ya wona opiwa wokubanyiha wa Mwanaye! Yehova kohikaana efunelo ya onilevelela kagamurumile Mwanaye wi anikwele.

7. Dhotagiha gani dha attu ali mBibiliani aleveleliwe na Yehova?

⁷ MBibiliani muhikala dhotagiha dha attu enjene aleveleliwe na Yehova. (Ef. 4:32) Bani onimubuweliwe? Txino onomubuwela Mwene Manassé. Mulobwana oddu wabure wahikosa dhottega dhottabwa vamentoni va Yehova. Iyene osogorhela webedha wottambi. Ohapa anaye akuttelaga mukutto amilugu a’malabo. Ottiya ejo ohattukululela amilugu osemiwa mumparhani mwebedhiwa Yehova. Sabwa ya Manassé, Bibilia onloga  dhahi: ‘Ohira dhotakala vamentoni va Yehova wi amunyimule.’ (2 Map. 33:2-7) Masiki dhawene, mutxinuwile Manassé na murima wotene Yehova ohimulevelela. Ottiya ejo Mulugu ohimwiyedha mpaddo waye womwene. (2 Map. 33:12, 13) Txino weyo vina onomubuwela Mwene Davidi, iyene ohikosa dhottega dhowopiya vamentoni va Yehova ninga mararuwo vina ompa muttu. Masiki dhawene mutxinuwile Davidi vina anonelamo dhottega dhaye, Yehova ohimulevelela. (2 Sam. 12:9, 10, 13, 14) Ndde, iyo ninofwanyela okana nikuluvelo wi Yehova oli womala-nawale wila alevelele. Ninga munonelihu mukalelo onlevelela Yehova kunladdanihiwa na mukalelo onlevelelana attu.

8. Vowi Yehova ddili namattonga wofwanyelela eji empatta dhavi mukalelo waye wolevelela?

⁸ Yehova ddi “namathonga wa elabo yotene.” (Wita 18:25) Namattonga wapama onofwanyela ononelamo mowakwana-mwene malamulo. Mwa dhawene Yehova ddili Namattonga wofwanyelela sabwani iyene onononelamo malamulo mowakwana-mwene. (Iza. 33:22) Yehova ddi namattonga wehu vina iyene onononelamo mowakwana-mwene malamulo annivahiye vina kuli muttu mwina onziwa yapama vina yabure ompitta Yehova. Elobo gani yina enfuneya wi muttu akale namattonga wapama? Enofuneya anonelemo dhilobo dhotene dhiniwanana na makaniya ahinatti ottonga. Nanda mpaddene obo Yehova ddili Namattonga wofwanyelela sabwani iyene onoziwa dhilobo dhotene dhimpadduwa.

9. Miselu gani dhinziwa Yehova dhinimuttukulela onilevelela?

⁹ Muttongelo wa attu ohittiyana na muttongelo wa Yehova, sabwani iyene onoziwa dhilobo dhotene dhiniwanana na makaniya. (Wita 18:20, 21; Masal. 90:8) Iyene kanttonga dhilobo na wiwavi vina na esile dhinooniye. Yehova onononelamo kakamwe wi dhowira dhehu dhinttukuleleya sabwa ya murudda obaliwihu, ntakulu nunuwilehu, mikalelo dhokoddela dhibaliwihuna na dhubuwelo dhehu. Yehova vina onoziwa dhili mmirimani mwehu. Iyene onononelamo dhotene dhinimuttukulela muttu okosa dhilobo. Kayiwo elobo enviteya vamentoni va Yehova. (Aheb. 4:13) Nona olevelela wa Yehova oniwanana na eziwelo yotene eniye sabwa ya makaniya.

10. Ninlogela nni wi dhottonga dha Yehova soligana? (Olibiha 32:4)

¹⁰ Yehova, Mulugu ohina nsakulano. Dhottonga dhaye soligana. Yehova agagana omulevelela muttu kanang’ana kove, dhorela, ewodhelo yaye obe akala muttu wovuwa. (1 Sam. 16:7; Tia. 2:1-4) Kinwodheya ommagelela Yehova okosa elobo nne vina ombeyedhana sagwati. (2 Map. 19:7) Dhogana dha Yehova kadhiniwanana na esile dhiniwamo muttuya obe esile dhinimuzuzumiha. (Obud. 34:7) Iyo kaninaganyedha wi Yehova ddi Namattonga woligana wa elabo yotene sabwani onononelamo dhilobo dhinji mwaha wa iyo vina onoziwa esile dhinnipadduwela.—Kengesa Olibiha 32:4.

11. Ninlogela nni wi olevelela wa Yehova kunladdanihiwa?

¹¹ Malebo a Ebrahiko anologa wi olevelela wa Yehova kunladdanihiwa. Dila dhina nilabihedhiwe nzu na Ebrahiko mowiwanana na disionario ya Bibilia, enloga mwaha wa “mukalelo onalevelela Yehova attegi, nzu ntti txipo kanintonya mukalelo onlevelelana muttu na mukwaye abuwene ahinwodha olevelelana mowakwana-mwene ninga Yehova.”  Yehova bahi ddina owodha womulevelela kakamwe muttegi otxinuwile. Nimpurelamo eni nigaleveleliwa na Yehova?

12-13. (a) Ninkaana dhopurelamo gani Yehova aganilevelela? (b) Yehova onele onitxinutxa sabwa ya dhottega dhimaliliye onilevelela?

¹² Iyo niganonelamo vina nigarumeela wi nihileveleliwa na Yehova, ‘ninolibiheya vina ninopangarhazeya’ kuloga ninokana murenddele wa mmurimani vina mubuwelo wotxena. Iyo niniviwamo dhawene nigaleveleliwa ‘bahi na Yehova.’ (Mer. 3:19) Yehova aganilevelela ononirumeela wili wi nikale amarho aye ekalaga ninga kanikosile yottega vamentoni vaye.

¹³ Yehova agamala onilevelela, kannitxinutxa sabwa ya yottega emaliliye onilevelela. (Iza. 43:25; Jer. 31:34) Yehova onowika dhottega dhehu wolapela na iyo ninga olapelana “oli omadhelo wa nzuwa na omaddowelo.” * (Masal. 103:12) Nigatanalela mukalelo onnilevelela Yehova mirima dhehu dhinkala dhowagalalene. (Masal. 130:4) Bani onfwanyela oleveleliwa na Yehova?

14. Mpaka veneva txini esunzilihu sabwa ya olevelela wa Yehova?

¹⁴ Ninga moonelihu, onilevelela wa Yehova kunpimeya na munuwelo wa yottegaya. Nihoona vina wi Yehova ninga Muttanddi wehu, Namattonga wehu vina Oddule onnivaha Malamulo anfwanyela oneddiha, iyene ddinziwa mudhidhi onfwanyeliye onilevelela. Txini entanalela Yehova agagana omulevelela muttu?

15. Mowiwanana na Luka 12:47, 48, txini entanalela Yehova agagana omulevelela muttu?

¹⁵ Elobo yina entanalela Yehova jowi akala muttegiya wanziwa wi yakosiye yali yottega. Yezu ohoniha ejuwene va Luka 12:47, 48. (Kengesa.) Akala muttu onotadela vina onokosa elobo elogile Yehova wi jabure—enkosiye yottega enddimuwa. Muttu oddo onodhaga ohileveleliwa na Yehova. (Mk. 3:29; Jo. 9:41) Ebaribari wi iyo notene nihikosa yottega niziwaga. Nigakosa dhawene Yehova ononilevelela? Ndde! Sabwani Yehova onotanaalela elobo yina.

16. Otxinuwa txini, nanda okaleleni wamakamaka wi nileveleliwe na Yehova?

 ¹⁶ Elobo yina entanalela Yehova, oziwa akala muttuya ohitxinuwa txibarene. Txini entapulela otxinuwa watxibarene? Otxinuwa watxibarene entapulela muttuya “otxinja dhubuwelo dhaye, dhokosa dhaye vina dhogana dhaye.” Eji enowiwanana na okubanya onddimuwa oniwamo muttuya sabwa ya okosa elobo yabure obe sabwa ya ottiya okosa elobo yafwanyeliye okosa. Muttu otxinuwile na murima wotene kankubanya bahi sabwa ya yottega ekosiliye iyene vina onokubanya sabwa ya ottiya mandano aye na Yehova wobana ofiyedha okosa yottega. Kobuwela wi Mwene Manassé na Davidi ahikosa dhottega dhowopiha; masiki dhawene Yehova wahalevelela sabwa yawi ahitxinuwa na murima wotene. (1 Amwe. 14:8) Eji enlagiha wi Yehova onanilevelele bahi agoona wi nihitxinuwa. Mbwenye okubanya bahi sabwa ya ottega ekosilihu kinpura elo. Ninofwanyela okosavo elobo. * Ehikalawo elobo yina entanalela Yehova agagana omulevelela muttu.

17. Txini entapulela orugunutxa murima, nanda ejo ekaleleni yamakamaka akala kaninfuna wiyelela wili dhottega dhehu? (Izaiya 55:7)

¹⁷ Elobo yina entanalela Yehova jowi akala muttegiya ‘ohirugunutxa murima.’ Kuloga iyene onoroma okosa matxinjo manddimuwa mwigumini mwaye, onottiya okosa dhilobo dhabure baroma okosa dhilobo dhinloga Yehova wi sapama. (Kengesa Izaiya 55:7.) Iyene onofwanyela otxinja mubuwelo waye wi arome weddihiwa na mubuwelo wa Yehova. (Rom. 12:2; Ef. 4:23) Muttuya onofwanyela ottiya okosa dhilobo dhabure vina avilibihedhe wi arabele dhubuwelo dhohifwanyela. (Kol. 3:7-10) Mbwenye enoziweya wi Yehova onlabihedha mukutto wa yobolo wi anilevelele vina akuputte dhottega dhehu. Yehova onalabihedhe mukutto wa yobolo wi alevelele dhottega dhehu agoona wi iyo txibarene nihitxinuwa.—1 Jo. 1:7.

18. Txini yonilihu sabwa ya olevelela wa Yehova?

¹⁸ Ninfuna nubuwele esile dhimalilihu osunza. Yehova ddi Namalevelela munddimuwa wa  elebo yotene. Ninlogela eni dhahene? Elobo yoroma, Yehova oli womala-nawale wi anilevelele. Ottiya ejo, iyene ononiziwa pama opitta muttu-muttuvi. Onoziwa dhotene sabwa ya iyo, vina kuli muttu onniziwa pama akala nitxinuwa opitta iyene. Omamalelowa, nihoona wi Yehova aganilevelela, onolevelela kakamwe. Eji enonikamihedha okana mubuwelo wotxena vina orumeliwa na iyene.

19. Masiki valihu attu ohiligana vina vandowihu nittegagavi ninkanelani wagalala?

¹⁹ Sabwa yokala attu ohiligana ninele ottegavi. Mbwenye elobo ennipangarhaza ba mazu anfwanyeya mu Estudo Perspicaz, Volume 1, pag. 210, apo ninengesavo dhahi: “Vowi na ttagaraga Yehova onotanaalela dhottega dha emeleli aye, awene kanfwanyela okalavi okubanyene mudhidhi wotene sabwa ya ottega oravilani. (Masal. 103:8-14; 130:3) Nigeddagavi nororomeleya mudila ya Yehova ninele okana wagalala. (Fil. 4:4-6; 1Jo. 3:19-22).” Otanalela ejuwene enopangarhaza venjene!

20. Txini dhinasekeserhe iyo nsunzo ninfwarela?

²⁰ Ninomutamalela venjene Yehova sabwa ya onilevela mwaha wa yottega-yottegavi enkosihu. Ninawodhe dhavi otagiha olevelela wa Yehova? Olevelela wehu onladdana dhavi na olevelela wa Yehova, nanda onttiyana na mukalelo gani? Ekaleleni yamakamaka ottiyana oku? Nsunzo ninfwarela ninele wakula mavuzo aba.