1. Nikuluvelo gani ninavaha Yehova abale attegile nanda atxinuwa-wene?

 EBARIBARI wi Yehova ddi Muttanddi wehu, ddi Mwene wehu, ddinnivaha malamulo iyene vina ddi Babi wehu wa wirimu. (Masal. 100:3; Iza. 33:22) Nigamuttegela nanda nitxinuwa-wene, iyene ottiya okanavi owodha wa olevelela onofuna onilevelela. (Masal. 86:5) Amulabihedhaga namavuhulela Izaiya, Yehova ononipangarhaza na mazu aba: “Masiki dhothega dhenyu kokala dhofila-fila, dhigatxena ninga nthoje.”—Iza. 1:18.

2. Akala ninofuna wiwanana na attu ena txini enfwanyelihu okosa?

² Iyo notene nili attu ohiligana, mudhidhi mwina ninele okosa obe ologa elobo enanyimule attu ena. (Tia. 3:2) Mbwenye eji kintapulela wi nihiwananege pama na attu ena. Enanikamihedhe kukala attu olevelela. (Gano 17:9; 19:11; Mt. 18:21, 22) Masiki akala yoddawaya enikoseli muttu kiyunuwile, Yehova onfuna wi iyo nimulevelele. (Kol. 3:13) Nihikaana sabwa dhinji dhinnittukulela okosa ejuwene sabwani Yehova ‘ononilevelela kakamwe.’—Iza. 55:7.

3. Txini enasekeserhihu mwari mwa nsunzo ntti?

³ Mwari mwa nsunzo ntti, ninele wona mukalelo onwodheya iyo attu ohiligana osanza olevelela wa Yehova. Dhottega gani dhinfwanyela ozuzumeliwa na anddimuwa a mmulogoni? Yehova onfunela nni wi iyo nalevelelege attu ena? Vina txini  ensunza iyo na dhotagiha dha abali atabuwile na dhottega dha attu ena?

4. (a) Txini enfwanyela okosa Mukristu okosile yottega enddimuwa? (b) Anddimuwa a mmulogoni agamugilatiha muttegi yogana yawa jivi?

⁴ Nigaziwa wi mbali ohikosa yottega enddimuwa, ninofwanyela wawaddela anddimuwa a mulogo. Dhotagiha dhina dha yottega enddimuwa dhinfwanyeya va 1 Korinto 6:9, 10. Yottega enddimuwa entapulela olupa malamulo a Mulugu. Akala Mukristu onokosa yottega enddimuwa, onofwanyela omukumbirha Yehova nlevelelo akosaga nlobelo vina a’tamele anddimuwa a mmulogoni. (Masal. 32:5; Tia. 5:14) Mabasa gani ana anddimuwa a mmulogoni? Enoziweya wi Yehova ddina owodha wa olevelela dhottega, iyene onkosa ejuwene sabwa ya mukutto wa yobolo. * Masiki dhawene, Yehova wakuluvelilena anddimuwa a mmulogoni weddiha makani aba a yottega enddimuwa mowiwanana na malago a mBibiliani. (1 Kor. 5:12) Mwa dhilobo dhina dhinzuzumela anddimuwa a mmulogoni, ja otanaalela wi afwanye dhowakula dha mavuzo aba: Muttuya wile otadela yottega yaye? Ohavubela attu ena yottega ekosiliye? Iyene ohidha akosaga yottega yawopiha mwa mudhidhi mwinjene? Yamakamakaya, onolagiha wi ohitxinuwa-wene? Vahikala ezinddiyelo enoniha wi Yehova ohimulevelela?—Mer. 3:19.

5. Mabasa ankosa anddimuwa a mmulogoni andhana dhopurelamo gani?

⁵ Anddimuwa a mmulogoni agamugilatiha mbali okosile yottega, yogana yawa enofwanyela okala yakene eganile Yehova wirimu. (Mt. 18:18) Mabasa aba a anddimuwa a mmulogoni anokamihedha mulogo, sabwani muttu ottegile ohitxinuwile agaburutxiwa mmulogoni mabila a Yehova anobareleya. (1 Kor. 5:6, 7, 11-13; Tito 3:10, 11) Eji enomukamihedha muttegiya otxinuwa vina oleveleliwa na Yehova. (Lk. 5:32) Anddimuwa a mulogo anomulobelela amukumbirhaga Yehova wi amukamihedhe ovulumuwa mpaddi womuyani.—Tia. 5:15.

6. Enowodheya muttu oburutxiwe mmulogoni oleveleliwa? Katapulela.

⁶ Nilogeni wi anddimuwa a mmulogoni anomugilatiha muttegi onlagiha wi katxinuwile. Ejo egapadduwa enofuneya oburutxiwa mmulogoni. Akala iyeneya wile otota ngovi, anddimuwa a mmulogoni kanambarele sabwa ya dhodhelavodha. Masiki muttegiya agatxinuwa, Yehova kanambarele onele ottiya wi alamuleli a mwilaboni—amuttonge vina amutxinutxe. (Rom. 13:4) Mwa ovira wa mudhidhi agatxinuwa, Yehova onele omulevelela. (Lk. 15:17-24) Eji enopadduwa masiki akala okosile dhottega dhowopiha vaddiddi.—2 Map. 33:9, 12, 13; 1 Tim. 1:15.

7. Txini entapulela omulevelela muttu onittegeli?

⁷ Japama oziwa wi kaninfwanyela osakula bani onfwanyela oleveleliwa na Yehova! Masiki dhawene, iyo ninofwanyela okosavo elobo. Elobo gani enfwanyelihu okosa? Dila dhina, yottega ekosile muttu—enodhaga oninyimula vina oniputtula venjene—masiki akala muttuya onodha oniloba nlevelelo sabwa ya yottega ekosiliye obe nne. Egapadduwa elobo ninga ejuwene, iyo ninofwanyela omulevelela, ohikana yammirimani vina ohisilidhiwa na iyene. Okosa ejo enodhaga ottukula mudhidhi mwinjene vina enofuneya ovilibihedha. A Sentinela 15 de Setembro de 1994, ologile dhahi: “Olevelela yottega kintapulela wi ninorumeela yottega ekoseliwihu.  Ninga Akristu, olevelela entapulela ottiya makaniya mmadani mwa Yehova. Iyene Namattonga woligana wa elabo yotene, mudhidhi wofwanyelela onele ottonga makaniya.” Yehova onfuna wi iyo nikale anamalevelela vina iyene onele ogwadda makaniya na mukalelo woligana. Ninfwanyelela—eni okuluvela ejuwene?

8. Txini enakosihu nigakala attu antamaalela ttagaraga ya Yehova?

⁸ Ninele woniha wi ninomutamaalela Yehova nigakala anamalevelela. Mmusiboni mmodha ologile Yezu, ohimuladdaniha Yehova na mwene omuleveleli mudhari waye mangawu manddimuwa. Mudhari oddo txipo kagawodhile opitxa, mwa mpaddi mwina mudhari wakene kawodhile olevelela mangawu mang’onovi abolehiwiye na mudhari mwina. (Mt. 18:23-35) Txini yafuna onisunziha Yezu? Iyo txibarene nigakala attu antamaalela ttagaraga dha Yehova, ninele ottukuleleya walevelela attu ena. (Masal. 103:9) Vyaka dhinjene mundduni Mwang’aneli ologile dhahi sabwa ya makani aba: “Kintanala dila ngasi dhinalevelelihu attu ena, olevelela wehu kunladdana na mukalelo onilevelele Mulugu vina ttagaraga enilagihiliye modhela Kristu.”

9. Bani aneddeliwa ttagaraga na Yehova? (Mateu 6:14, 15)

⁹ Onlevelela onele oleveleliwa. Yehova onaweddela ttagaraga abale aneddela ttagaraga. (Mt. 5:7; Tia. 2:13) Yezu ohoniha ejuwene mwasunzihiliye anamafwara aye olobela. (Kengesa Mateu 6:14, 15.) Iyo ninosunza elobo yakene na elogile Yehova na mudhari waye Job. Mulobwana oddu wororomeleya, ohitabuwa venjene na mazu oputtula a alobwana aba Elifaz, Bildad na Sofar. Mbwenye Yehova wahimwaddela Job wi alobelele. Mukosile Job ejuwene, Yehova wahimururiha.—Job 42:8-10.

10. Okana yammirimani ekalelani elobo yabure? (Éfeso 4:31, 32)

¹⁰ Okana yammirimani enoniputtula. Okana yammirimani enkala ninga muttorho wolemela, Yehova onfuna wi nirule muttorho obo. (Kengesa Éfeso 4:31, 32.) Nona iyene aganikokomeza wi ‘nirabele owali vina onyonyeya.’ (Masal. 37:8) Okosa ejo enkala olagiha ononelamo. Okana yammirimani enoputtula maningo ehu vina dhubuwelo dhehu. (Gano 14:30) Kudduwale, nigakana yammirimani niniviputtula nanya ottiya omputtula muttu oninyimulile. Eji, enkala ninga omwa nddibwi (veneno) nijedhelaga wi muttu mwina aputtuleye. Nona, iyo ninopurelamo venjene nigalevelela ena. (Gano 11:17) Ninokana murenddele wa muyubuweloni, murima wottugareya vina ninelege odhowavi nimulabelaga Yehova.

11. Txini enloga Bibilia sabwa ya wiyedha ntxiga? (Roma 12:19-21)

¹¹ Ntxiga, mwinya ddi Yehova. Yehova kanittomele owodha w’omwiyedha muttu mwina ntxiga sabwa ya yottega enikoseliye. (Kengesa Roma 12:19-21.) Vowi nili attu ohiligana, kaninwodha omuttonga muttu mofwanyelela, Yehova bahi ddinwodha ottonga n’oligana. (Aheb. 4:13) Dila dhina dhokosa dhehu dhinonizuzumiha, nona Yehova amulabihedha Tiago oleba dhahi: “Muthu wa owali kanwodha wira mabasa apama animuzivela Mulugu.” (Tia. 1:20) Nikane ebaribari wi Yehova onele okosa dhilobo dholigana vina onele ottonga makaniya mofwanyelela.

12. Ninoonihe dhavi wi ninokuluvela muttongelo woligana wa Yehova?

¹² Nigalevelela ninowoniha wi ninokuluvela muttongelo woligana wa Yehova. Makattamiho  ehu nigattiya mmadani mwa Yehova, ninowoniha omukuluvela wehu iyene wi onele ofudha makattamiho otene atoteyile na yottega ekoseliwe iyo obe ekosilihu nanya. Iyene ohipikirela wi mwilaboni eswa, makattamiho otene annitabutxa masaka abano ‘kanobuweliwe vina.’ (Iza. 65:17) Koddi enowodheya ohimukanela yammirimani vina ohisilidhiwa na muttu onikoseli yottega yottabwa? Ninele wona dhotagiha dha abali akosile ejuwene.

13-14. Nipadduwo na José na Tony nusunzihile eni sabwa ya olevelela?

¹³ Abali na arogora enjene ahigana olevelela masiki vaputtuleyile awene na dhowira dha attu ena. Mareliho gani akelilani sabwa ya okosa ejuwene?

¹⁴ Vyaka dhinjene mundduni, Tony, * onkala elabo yo Filipina, ahinatti oroma osunza ebaribari wahizinddiyela wi mbalaye munddimuwaya wapiwe na mulobwana dhahi onkuweliwa José. Mudhidhene-obo, Tony wankosa obure vina wali muwali vaddiddi. Nona, wahigana omwiyedha ntxiga. José wahifugeliwa mukambura sabwa ya ngovi yakosiliye, masiki dhawene Tony wahipikirhela wi onele omutamela wi ampe. Iyene wahigula futti wi akwanihedhe yopikirhela yaye. Novenya Tony oroma omusunza Bibilia na Anamoona a Yehova. Iyene ohiloga dhahi, “Vansunzoni naga, ddahizinddiyela wi ddanfwanyela okosa matxinjo menjene vina ottiya okala muttu wa owali.” Mwa ovira wa mudhidhi, Tony wahibatiziwa bafiyedha okala munddimuwa wa mmulogoni. Karoma otanaalela yewilemo Tony venevo vaziwiliye wi José wahikala vina Munamoona wa Yehova! Iyene wahimukubatta vina bamwaddela wila wahimulevelela. Tony ohiloga wi sabwa ya omulevelela José ddahiviwamo deretu vina ddahikana wagalala onddimuwa. Kavali waganyedha wi Yehova ohimururiha Tony, sabwa ya okala namalevelela.

15-16. Txini esunziliwe sabwa ya olevelela na mbali Peter na murogora Sue?

¹⁵ Yaka ya 1985, Peter na Sue aligi vamatugumanoni mu Nyumbani ya Omwene, mwa venevo ahiwa oruma wa bomba. Mulobwana dhahi ddekilemo bombaya mu  Nyumbani ya Omwene! Sue wahivoreheya venjene vina maru aye na mento aye ahipattiwa na makattamiho ahina murobwe. Oromana labonene nttile mpaka ovanene, iyene kanwodha wiwa onuka wa dhilobo. * Dila dhinjene awene anovivuzaga, ‘Muttu onofiyedha okosa elobo yabure ninga ejene?’ Mvireli vyaka dhinjene, panga oddule wahali Munamoona wa Yehova, wahittiddiwa bekiwa mukamburha wi akale mwenemo egumi yaye yotene. Muvuziwe atelani aba akala ahiwodha omulevelela panga oddule, awene alogile dhahi: “Yehova ononisunziha ohikana yammirimani vina ohisilidhiwa na muttu onikoseli elobo yabure. Sabwani nigahikose dhawene, ninotabuwa mpaddi womaningoni, ninoyeleliwa wagalala vina ninonyonyeya muyubuweloni. Nona, oromana masaka a wale iyo ninomukumbirhaga Yehova wi anikamihedhe, nihikane yammirimani vina nittiye osilidhiwa wi nidhowegevi nimulabelaga Yehova.”

¹⁶ Masiki na dhotene esi, mwa awene enokalaga yorutxa olevelela. Awene ahiloga dhahi: “Dila dhina, Sue agaroma otabuwa na makattamiho aniyena ninoroma osilidhiwa wili. Mbwenye nigavilibihedha wi nihubuweletxe, osilidhiwawa ongonela mudhidhi mung’onovi. Ninologa na murima wotene wi na sikuna mulobwana oddo agadha okala Munamoona wa Yehova, ninele omwakela na mada omeli. Nipadduwo ntti, ninonisunziha wi nigalevelela nilabihedhaga magano a Bibilia ninofuruleya kakamwe! Ottiya ejo, ninopangarhazeya oziwa wi Yehova onele ofudha makattamiho otene annitabutxa.”

17. Txini esunziliwe na murogora Myra sabwa ya olevelela?

¹⁷ Murogora Myra osunzile ebaribari bamalile oteliwa vina bana ayima eli. Mbwenye mamune karumelile osunza ebaribari. Mwa ovira wa mudhidhi, mamune wahikana muyana mwina vina wanyanyala amudhaye. Myra ohiloga: “Mamunaga vanyanyaliliye anamudhi, miyo ddaviwilemo ninga muttu-muttuvi ottiyiwe na muttu onimukweliye. Miyo kaddawodha  orumela ejile yapadduwile—ddankubanya venjene, ddahisilidhiwa, ddanvipwatteliha muladdu vina ddahitxinuwa. Masiki vamalilihu omwalana ddanniwavi opa wa omwaliwa mwari mwa myeri dhinjene, venevo ddahizinddiyela wi makattamiho aba anopatta mandano aga na Yehova vina na attu ena.” Ovano iyene ohiloga wi kansilidhiwa vina kaana yammirimani na mamune omuttiyile. Iyene ohikana njedhelo wi labo-labovi onodhaga osunza ebaribari. Myra onzuzumela dha musogorho. Iyene ohiwodha walela anaye eli mwibaribarini wi amulabele Yehova. Ovano onodhowavi amulabelaga Yehova na anaye eli vamodha na amudhawa.

18. Iyo ninfwanyela okana nikuluvelo gani sabwa ya Muttongelo Woligana wa Yehova?

¹⁸ Jowagalaliha oziwa wi kahiyo iyo onfwanyela osakula mukalelo onfwanyela ottongiwa muttu-muttu! Yehova Namattonga woligana, iyene ddinfwanyela okosa ejuwene. (Rom. 14:10-12) Nikane nikuluvelo wi Yehova onele ottonga makani otene na mukalelo woligana mowiwanana na ejile enoniye wi japama obe jabure. (Wita 18:25; 1 Anam. 8:32) Yehova txipo kanakose elobo yohiligana!

19. Txini enakose Yehova mohigonela?

¹⁹ Ninojedhela mudhidhi onagomihe Yehova makattamiho otene atoteyile na ohiligana vina yottega. Mudhidhi onapadduwe ejuwene, ninele okana egumi yapama vina wagalala onddimuwa. (Masal. 72:12-14; Ovuh. 21:3, 4) Iyo kaninatabuwege vina na makattamiho ninga aba angumanihuna ovanene. Oku nijedhaga ofiya wa siku ntto, notene ninomutamaalela Yehova sabwa ya onivaha ewodhelo ya omutagiha vina ya okala anamalevelela.