Wi nimwagalalihe Yehova, ninofwanyela okana nroromelo. Mbwenyi Bibilia onologa wi “kahiye etene anfiyedha gari yororomela.” (2 Tes. 3:2) Mudhidhi olebile murumiwi Paulo mazu aba, iyene wawaddana “athu abure, ovuta” kuloga, attu anfwara-fwara. Mbwenyi mazu alogiliye sabwa ya nroromelo anowapatta vina attu ena. Ena anokodda orumela wi ohikalawo Mulugu opaddutxile dhilobo dhotedhene. (Rom. 1:20) Ena anologa wi anorumela okalawo wa Mulugu. Mbwenyi ejo kinakwana wi muttu amwagalalihe Yehova, sabwani kahiye nroromelo na txibarene.

Iyo ninofwanyela okuluvela wi Yehova ohikalawo vina “onoathuva” abale animuroromela. (Aheb. 11:6) Nroromelo mukalelo mmodha wa dhinbala muya wokoddela. Wi nakele muya wokoddela, ninofwanyela omukumbirha Yehova na nlobelo. (Lk. 11:​9, 10, 13) Marhe mena a wakela muya wokoddela ba wengesa Nzu na Mulugu. Jamakamaka vina otanalela enengesihu vina ovirihamo dhinsunzihu. Nigakosa dhahene, muya wokoddela wa Yehova onele onikamihedha okalawo na mukalelo ononihe wi nihikana nroromelo ninimwagalaliha Yehova.