1-2. Niwobo gani ninkosa Yehova wa alabeli aye ororomeleya?

 MUTTU kowuvuza Yehova bani, ogakulile dhavi? Txino ogahakula dhahi, ‘Iyene ddi Babi waga, Mulugu waga, vina Marho waga.’ Ahikalawo vina mazina mena a ettomo, antapulela ekalelo eli Yehova. Weyo wahiromaga otanalela wi Yehova onowuwoba wi okale muleddo vatakulu vaye?

² Alogaga mwaha wa mandano na Yehova, Mwene Davidi ohimuladdaniha Yehova na namawoba vina alabeli aye na aleddo. Davidi ohivuza: “Nabuya [Yehova], bani onfwanyelela okala mba mwenyu, ofwasa vamwangoni venyu wokoddela?” (Masal. 15:1) Modhela versu eji, ninonelamo wi enowodheya iyo okala aleddo vatakulu va Yehova—kuloga okala amarho aye. Weyo kunona wi okonvidariwa na Yehova gari enddimuwa vaddiddi?

YEHOVA ONOWAKONVIDARI ALEDDO AYE

3. Bani wali muleddo woroma vatakulu va Yehova vina mandano awa ali dhavi?

³ Yehova ahinatti ottandda dhilobo dhotene wali yeka. Mbwenyi vasogorhova iyene omuttandda Mwanaye woroma, ekalaga ninga Yehova wamukonvidari Yezu vatakulu vaye. Vamuwobiliye muleddo waye woroma vatakulu vaye, iyene wahagalala sabwa ya okosa ejuwene. Bibilia onologa wi Mwana wa Yehova “[wantota] oziveliwa waye.” Mwanaye vina “[wanvega] vamentoni vaye midhidhi dhotene.”—Gano 8:30.

4. Bani ena adhile okala aleddo vatakulu va Yehova?

⁴ Musogorhomwa Yehova ohapaddutxa anju, ali aleddo vina vatakulu vaye. Anju anokuweliwa ninga ana a Mulugu vina anologiwa mBibiliani ninga attu ohagalala sabwa yokala vamodha na Yehova. (Job 38:7; Dan. 7:10) Mwa vyaka dhinjene,  aleddo a Yehova àli bahi abale akala na iyene wirimu. Musogorhomwa, Yehova ohunuwiha nyumba yaye wi attu a velaboni ya vati akale aleddo aye. Ena mwa abuwene baba: Enoki, Nowé, Abrahamu vina Job. Bibilia onologa wi awene àli amarho a Mulugu, sabwani annimwiwelela vina anedda na Mulugu webaribari.—Wita 5:24; 6:9; Job 29:4; Iza. 41:8.

5. Txini ensunzihu na nivuhulo na Ezekiyel 37:​26, 27?

⁵ Mwari mwa vyaka mazana menjene, Yehova onowakonvidari amarho aye wi akale aleddo vatakulu vaye. (Kengesa Ezekiyel 37:​26, 27.) Motagiha, mu nivuhuloni na Ezekiyel ninosunza wi Yehova onofuna wi alabeli aye akane mandano oliba a iyene. Yehova onopikirhela okosa nipagano na murenddele na awene. Nivuhulo ntti ninologa mudhidhi onakele attikitteliwi vina abale anna njedhelo nokala velaboni ya vati mumodhani vatakulu va Yehova ninga “nikuru nimodha.” (Jo. 10:16) Nivuhulo ntti ninowakwanihedheya masaka abano!

KINTANALA MBURHO ONKALIHU YEHOVA ONONIZUZUMELA

6. Muttu onkala dhavi muleddo vatakulu va Yehova vina nyumbaya eli wuvi?

⁶ Nsaka na Bibilia, musasa wali mburho muttu wawodhiye ovuma vina wakaliye wobareleya na dhilobo dhapadduwa otakulu. Muttu wali muleddo mmusasani wakala wofwaseyene aziwaga wi agahikala wobareleya. Nigamperhekela egumi yehu Yehova, ninokala aleddo mmusasani mwaye wa nladdaniho. (Masal. 61:4) Mmusasani mpu nihikana oja womuyani onfunihu wi nidhowegevi nikalaga amarho a Yehova vina mumodhani na abale ali vatakulu va Yehova. Kintanala mburho onkalihu, iyo notene enowodheya okala aleddo vatakulu va Yehova. Txino weyo wahikosaga oleddo wi odhowe elabo yina, motagiha wi odhowe wone matugumano a ttattamwa a vawoka vina wahaziwa ena ankana wagalala sabwa yokala aleddo vatakulu va Yehova. Nyumba ya Yehova eli dhipaddi dhotene muli alabeli aye.—Ovuh. 21:3.

7. Ninlogelani wi adhari ororomeleya a Yehova akwile napanovi aleddo vatakulu va Yehova? (Koona vina foto.)

⁷ Kito mwa adhari ororomeleya a Yehova akwile? Ninofwanyela ologa wi awene aleddo vatakulu va Yehova? Pumwenemo! Ninlogelani dhawene? Sabwani attu aba ahikalawo muyubuweloni mwa Yehova. Yezu ohitapulela: “Mizé vina, valogiye dha nikupu nathidda, ouziwihani dha ovenya mukwani, amuromolaga dhahi Nabuya: Mulugu wa [Abrahamu], wa Izaki, wa Jakobi. Nona Mulugu kayiye  Mulugu wa athu okwa, ddwa athu okalawo, vowi onakalihawo ddi iyene.”—Lk. 20:​37, 38.

DHOPURELAMO VINA DHINFWANYELIHU OKOSA

8. Dhopurelamo gani dhinkana aleddo a Yehova?

⁸ Dhahene ninga musasa oli mburho wovuma vina wottawela, nyumba wa Yehova onowavaha aleddoya nibarelo mwa elobo-txilobo egekile vangovini epaddi yawa yomuyani vina enonivaha njedhelo na musogorho. Nigakala ofiyedheya na Yehova, Satana kanawodhe okosa elobo-txilobo enawodhe oniputtula namukalakala. (Masal. 31:23; 1 Jo. 3:8) Mwilaboni eswa, Yehova onele odhowavi àbarelaga amarho aye ororomeleya mwa dhilobo dhotene dhigekile vangovini mpaddi wawa womuyani vina womaningoni.—Ovuh. 21:4.

9. Yehova onjedhela wi aleddo aye akane mweddelo gani?

⁹ Gari enddimuwa vaddiddi okala muleddo vatakulu va Yehova—vina okana mandano ofiyedheya na iyene okala nokala-wene. Kito mweddelo gani onfwanyelihu okana wi nikale aleddo vatakulu vaye? Akala weyo onokonvidariwa na muttu, ogahitamela oziwa mweddelo wa vatakuluva. Motagiha, akala muliba vatakuluva onowukumbirha wi orule sapatto ohinatti ovolowa, weyo kugakoddile.  Na mukalelo wakene, iyo vina ninotamela oziwa ejile enajedhelana Yehova abale anfuna ovolowa vatakulu vaye. Omukwela wehu Yehova ononittukulela “[wira] dhetene dhinimuzivela.” (Kol. 1:10) Yehova Mulugu ddi Marho wehu, mbwenyi nihidduwale wi iyene ddi Mulugu wehu vina Babi wehu, nona ninofwanyela omuriha. (Masal. 25:14) Dhawene ninfuna nimulagihe nriho ninddimuwa nihidduwalaga ejile eliye. Wubuwela dhahene enele onikamihedha orabela okosa elobo-txilobo egadhile omusilidha Yehova. Mwebaribari iyo ninofuna “weddana okurumuwa” na Mulugu wehu.—Mik. 6:8.

YEHOVA KAANA NSAKULANO NA ANA IZRAYEL

10-11. Mukalelo waweddihile Yehova ana Izrayel mwiddeddereni y’o Sinai enlagiha dhavi wi Yehova kanna nsakulano?

¹⁰ Yehova kanaweddiha aleddo aye na nsakulano. (Rom. 2:11) Ninowodha ononelamo pama wi Yehova kanna nsakulano, nigoona mukalelo waweddihiliye ana Izrayel mwiddeddereni y’o Sinai.

¹¹ Mmalile Yehova ofurula nlogo naye mw’Ejipitu, iyene ohattoma anamakutta wi alabe mmusanani. Alevita ahittomiwa wi eddihe mabasa ewanana mburho obule wokoddela. Kito abale alaba mmusanani obe akala vakuvi na mburho obule, aneddihiwa na Yehova na mukalelo wa vawoka? Nne! Mwa Yehova attu otene anoligana, iyene kanna nsakulano.

12. Aweddihaga ana Izrayel mwiddeddereni, Yehova olagihile dhavi wi mwa iyene otene anoligana? (Obudduwa 40:38) (Koona vina foto.)

¹² Kiyatanala akala musasa wawa wakala wolapela na musana obe nne vina akala alaba mmusanani obe nne, otene anwodha okana mandano ofiyedheya na Yehova. Motagiha, Yehova ohikosa wi nlogo notene niwodhe wona murabo vina motto wakala vadhulu va musana. (Kengesa Obudduwa 40:38.) Masiki muraboya ogaroma osusela mpaddi mwina, abale akala wolapela na musana anwodha wona, mwa dhawene anamudhi anwodha ottukula dhilobo dhawa vina anttimurha na nlogo notene. (Oleb. 9:​15-23) Ottiya ejuwenevi, otene anwodha wiwa oruma wa aparhaza eli a parata avaha ezinddiyelo wi nlogo notene nanfwanyela ottimurha. (Oleb. 10:2) Kuloga, okala vakuvi na musana kiyatapulela  wi muttuya agahikana mandano ofiyedheya na Yehova opitta oddule wakala wolapela na musanaya. Mbwenyi nlogo notene nanwodha okala aleddo, wakela malago vina nibarelo na Yehova. Na mukalelo wakakene, kintanala mburho onkalihu iyo notene ninowodha ozinddiyela okwela wa Yehova vina nibarelo naye.

YEHOVA KANNA NSAKULANO MASAKA ABANO

13. Masaka abano Yehova onlagiha dhavi wi kanna nsakulano?

¹³ Masaka abano ena a nlogo na Mulugu ankala vakuvi na katti enddimuwa obe na Beteli. Ena ankala mmimburhoni esi. Mwa dhawene ena anowodha okamihedha mabasa menji anttiddiwa mmimburoni esi vina okala vamodha na abali ansogorhela nikuru na Yehova. Ena anokamihedha ninga anameddelela milogo obe mabasa mena a vawoka. Akala kuli mmodha wa aba kakana ebaribari wi Namawoba wehu Yehova onowakwela aleddo aye otene na weyo vina. Iyene onele wuvaha dhotene dhinujombela. (1 Ped. 5:7) Abale otene ankosa mpaddi wa nlogo na Mulugu anowakela oja womuyani, malago vina nibarelo ninfunani.

14. Yotagiha gani enlagiha wi Yehova kanna nsakulano masaka abano?

¹⁴ Yotagiha yina enlagiha wi Yehova kanna nsakulano vina Namawoba wapama ja okosiha wi attu orugunuwa elabo yotene akane Bibilia. Malebo Okoddela omaromo-wene alebiwe na dhilogelo ttaru: Ebrayiko, Eramayiko na Egregu. Kuloga abale anwodha omwengesa Bibilia na dhilogelo esi dhoroma ahikana mandano ofiyedheya na Yehova opitta abale ahinloga dhilogelo esi? Kahiye mwenemo.—Mt. 11:25.

15. Ezinddiyelo gani enihu enlagiha wi Yehova kanna nsakulano? (Koona vina foto.)

¹⁵ Wi nikale amarho a Yehova kaninfwanyela osunza venjene obe ologa dhilogelo dhinjidhene. Yehova onowavaha eziwelo attu orugunuwa elabo yotene vina onowandana na  awene kahiyo bahi abale asunziletxe venjene. Nzu na Yehova, Bibilia, nihitapuleliwa na dhilogelo matxikwi na matxikwi, mwa dhahene attu otene a mwilaboni anowodha wona dhopurelamo dhinkanani sabwa yovirihamo ejile ensunziha Bibilia vina anokala amarho a Yehova.—2 Tim. 3:​16, 17.

KADHOWAGAVI OKALAGA MULEDDO WA YEHOVA

16. Mowiwanana na Merelo 10:​34, 35, txini enfwanyelihu odhowagavi nikosaga wi nikale aleddo vatakulu va Yehova?

¹⁶ Gari enddimuwa vaddiddi okonvidariwa na Yehova wi nikale aleddo vatakulu vaye. Yehova Namawoba wapama, wokwela vina namakela aleddo. Ottiya ejo, mwa iyene attu otene anoligana. Iyene onowawoba attu otene kintanala mburho onkalani, mukalelo oleliwani, akala ahisunza obe nne, ttebe yawa, nihimo, yimo, akala muyana obe mulobwana. Mbwenyi abale andowavi akosaga efunelo ya Yehova banrumeliwa okala aleddo vatakulu vaye.—Kengesa Merelo 10:​34, 35.

17. Ninafwanye wuvi miselu dhina dhiniwanana na okala aleddo vatakulu va Yehova?

¹⁷ Va Masalmo 15:​1, Davidi onokosa mavuzo aba: “Nabuya [Yehova], bani onfwanyela okala mba mwenyu, ofwasa vamwangoni venyu wokoddela?” Yehova ohimulabihedha Davidi wi akule mavuzo aba. Nsunzo ninfwarela ninele wona dhilobo dhinfwanyelihu okosa wi nidhowegevi nikalaga aleddo vatakulu va Yehova.