Mavuzo Ankosa Anamengesa
Sabwaya jani attu ena agalogaga wi Masalmo 12:8, [Masalmo 12:7 NM] onaddana “dhinloga Nabuya [Yehova],” va (versu 7, [versu 6 NM]) oku Tradução do Novo Mundo onawaddana “asegedheyi” anlogiwa va (versu 6, [versu 5 NM])?
Makaniya anolagiha wi versu eji onawaddana attu.
Va Masalmo 12:2-5, [Masalmo 12:1-4 NM], ninowengesa wi “aniwananeyana na nyuwo kawo; anloga dhebaribari amala orimela.” Musogorhomwa va Masalmo 12:6-8, [Masalmo 12:5-7 NM], iyene onologa.
“‘Nabuya onloga dhahi: Miyo ddinovenya ddawóbole ahawi anpujiwa,
Asegedheyi ansisimela;
Ddavune anpwaziwa.’
Dhinloga Nabuya sawakwana,
Dhilí ninga parata yoka-yoka etxithithiwe dila tanu na bili.”
Eh Yehova, nyuwo munele wakoya;
Munele wabarela muttu-muttu wa awene mwa attu abo okala nokala-wene.
Versu 6, [versu 5 NM] enologa wi Mulugu onele wavuna asegedheyi.
Versu 7, [versu 6 NM] enowenjedhedha wi “dhinloga Nabuya sawakwana, dhilí ninga parata yoka-yoka.” Iyo vina ninorumela na mazu aba.—Masal. 18:30; 119:140.
Ovano koona enloga versu 8, [versu 7 NM]: Nyuwo munele wakoya, munele wabarela muttu-muttu wa awene mwa attu abo okala nokala-wene. Nzu ntti awene onaddiwa na ani?
Vowi versu 8, [versu 7 NM] enofwarelana na versu enloga wi “dhinloga Nabuya,” txino attu ena anodhaga wubuwela wi mazu aba awene antapulela dhinloga Mulugu. Ebaribari wi Mulugu ohibarela Nzu naye, Bibilia masiki amwiddani vatamelani otolotxa, okoddiha otapulela vina ogawiwa.—Iza. 40:8; 1 Ped. 1:25.
Mbwenyi enloga versu 6, [versu 5 NM] vina ebaribari. Yehova ohakamihedha vina onelege odhowavi akamihedhaga “asegedeheyi” vina abale “anpujiwa.”—Job 36:15; Masal. 6:4; 31:1, 2; 54:7; 145:20.
Kito muttu-muttu wa awene anlogiwa va versu 7 anaddiwana ani?
Nigatalanalela Masalmo 12 ninowona-wene wi muttu-muttu wa awene anaddiwana attu.
Omaromo wa Masalmo 12 Davidi onologa mwaha wa adhari ororomeleya a Yehova anyengettiwe na attu abure. Va versu 3, [ versu 2 NM] ninowona wi Yehova onele okosa elobo na attu anloga dhottambi. Ninofwanyela okuluvela wi Yehova onele okosa ejuwene sabwani versu 7, [versu 6 NM] enloga wi dhinloga Nabuya sawakwana.
Mbwenyi versu 8, [versu 7 NM] enologa wi Yehova onele wakoya vina wabarela abale antabutxiwa obe anpujiwa na attu abure.
Mazu aba muttu-muttu wa awene anlogiwa va versu 8, [versu 7 NM] anofwanyeya mmapapini okoluveleya a Malebo a Ebrayiko. Mazu oroma a versu eji atapuleliwe na Egregu, ahilabihedha nzu ntti “iyo” dila bili, elagihaga wi nlebo ntti ninawaddana alabeli ororomeleya a Mulugu ampujiwa. Omamalelo versu 8, [versu 7 NM] onologa wi muttu-muttu wa awene, kuloga, adhari ororomeleya anele obareliwa mwa attu abo ankosa dhilobo dhabure. (Masal. 12:8,9, [Masal. 12:7,8 NM]) Bibilia dhahi wa Ebrayiko otapuleliwe na elogelo y’Eramayiko onologa dhahi va versu 8, [versu 7 NM]: “Nyuwo, NABUYA, munele wabarela aligani, nyuwo munele wakoya mwa attu abure namukalakala.” Eji enowoniha wi mazu ali va Masalmo 12:8, [Masal. 12:7 NM] kanaddana dhinloga Mulugu.
Nona Masalmo oddu ononivaha nikuluvelo nawi Mulugu onele wabarela abale ali ororomeleya.