DDINOWUBUWELA omembesi obule woridha, yaka dhinjene dha mundduni o Brookings, Sul Dakota, U.S.A. Ddahiroma woona wila oridha wela oromawene. Nali ang’onovi mu ramaddani dhahi moridha, nanda nahiroma ogurumela. Nali waddamela vego vali manje gwé oridha! Ddinfuna ddiloge vang’onovi dhopadduwa dha mwigumini mwaga, ogamala onele ononelamo yadhowelihu wenewo.

Ddibaliwe labo 7 na Marsu wa 1936. Nabaliwe anai, mbwenye miyo ddali womarihaya. Numba yehu yali o mundda dhahi mung’onovi ogusini w’o Sul Dakota. Amudhaga annziveliwa vaddiddi olima, mbwenye aboya kalitxi mabasa amakamaka a mwigumini mwehu. Amambalaga ahibatiziwa ninga Anamoona a Yehova yaka ya 1934. Awene ahisakula omulabela Yehova, noona eji yali elobo yamakamaka wa awene. Babani Clarence, na titiyu Alfred, aali emeleli a mabasa (aba ovanene atxemerhiwa emeleli a nikuru na anddimuwa a mulogo) mmulogoni mwehu mung’ono wali o Conde, Sul Dakota.

Murala wehu wandhowa s’ohilema omatugumanoni vina numba na numba wila apange attu enjene miselu dha Bibilia, vina mareliho apama a musogorho. Yotagiha ya amambali aga enikamihedha wunuwiha omukwela wehu Yehova. Miyo na murogoraga Dorothy, nahirumeliwa ninga anamalaleya a Omwene banina vyaka tanu na modha. Ddiwobeliwa wona Eskola ya Orumiwi wa Mulugu yaka ya 1943, eromaga-wene eskolaya.

Nanziveliwa vaddiddi wona kongeresu na asembeleya. Ddinowubuwela kongeresu yakosiwe  yaka ya 1949 o Sioux Falls, Sul Dakota. Mbali Grant Suiter, wahikosa diskursu yaloga “É mais tarde do que você pensa!” Wahiloga na ttima wila Mukristu wotene wobatiziwa, onofanyela olabihedha egumi yaye wila alaleye miselu dhapama dha Omwene wa Mulugu. Nomala, ddahimperhekela Yehova egumi yaga. Ddihibatiziwa omatugumanoni wa asembeleya o Brookings, labo 12 na Novemburu wa 1949. Noona ji sabwaya yalimi vamburoni apale voridha vaddiddi ninga mulogilemi omaromo. Nali attu anai nijeedhaga obatiziwa, mbasiyani mpule mwali manje oridha.

Novenya ddahisakula olaba ninga pionero. Ddiromile labo 1 na Janero wa 1952, baddina vyaka 15. Bibilia onloga: “Ogeda n’aziwetxi, onopura ononelamo wawa,” nanda munamudhini mwaga mwahikala aziwetxi enjene addikamihedhile na yosakula yaga ya opionero. (Gano 13:20) Dila dhinjene ddanziveliwa olaleya na titiyu waga Julius, wana vyaka 60. Masiki valiye munddimuwa vaddiddi opitta miyo, txibarene nanziveliwa olaba notene. Ddihisunza dhotagiha dhinjene dha mwigumini mwaye. Dorothy vina wahikala pionero.

Valimi muzombwe, amambali aga ahimuwoba nameddelela milogo na mwadhiye wila adhe anaredhele vanihu. Atelani abo ali Jesse na Lynn Cantwell, awene addikamihedha vaddiddi. Ahiddikuwela nanda baroma oddilibiha. Agadhowa weddelela milogo dhowaddamela, annddiwoba wila ddafware omabasani olaleya. Ddahipuramo vaddiddi mudhidhi walihu notene! Ddanfuna olaba vaddiddi mmabasani a opionero ninga awene.

Nameddelela milogo mwina wadhile wakuweliwa Bud Miller. Mwadhelani na mwadhiye Joan, weddelela mulogo waga ddana vyaka 18. Mudhidhiya obo ddahikuweliwa wila ddidhowe ddaloge na anddimuwa anang’anela mabasa anyakoddo. Awene afuna wila ddakose mabasa abo, mbwenye na monelo waga ddigahilupa nikokomezo na Yezu n’okodda okosa epaddi ya politika. Mbwenye miyo ddafuna ddilaleye miselu dhapama dha Omwene. (Joau 15:19) Noona ddahikumbirha wila addittiye ddakose mabasa olaleya.

Ddahitamalela vaddiddi muddaddeleli Mbali Miller wila wafuna odhowe na miyo o matugumanoni  a gatta ya katti. Iyene kalitxi muttu womala nne vina kopihetxa. Wannonelamo deretu Malebo. Valimi nawene ddahilibiheya vaddiddi! Musogorhomwa, yaka ya 1954, ninga yopurelamo ya matugumano a katti, yokumbirha yaga yahirumeliwa. Ovano ddali womala kakamwe wila ddikose mabasa a Yehova.

Nomala, ddahikuweliwa wila ddalabe o Fazenda ya Associação, o Betel, y’o Staten Island, Nova Iorque. Ddikala wenewale vyaka ttaru. Ddahisunza dhilobo dhinjene na dhotagihadha sabwani ddalaba na abali vina arogora eziwelo.

O fazenda wa Staten Island wahikala musora wa radiyo WBBR. Musora esi dhalabihedhiwa na Anamoona a Yehova oromana 1924 mpaka 1957. Abali 15 obe 20 bahi alaba o Betel battomeliwe wila alabege mfazenda mpule. Enjiya mwa iyo nali azombwe, nanda nahikaana eziwelo y’olabana dhipanodha. Masiki dhawene mbali wowunuwelavo vina wottikitteliwa, wakuweliwa Eldon Woodworth walaba na iyo. Iyene wali ninga babi wehu, vina wannisunziha dhilobo dhinjene. Mudhidhi mwina nigagumanana magudulano, Mbali Woodworth wanloga, “Txibarene, jotikiniha woona mukalelo onlaba Nabuya na mabasa aye.”

Mbali Frederick W. Franz wahidha vina okala na iyo nanda baganikamihedha notene. Iyene wali mbali waziwile-wene malebo a Bibilia. Wanziveliwa vina muttu-muttu wa iyo. Namapiya wehu wali Harry Peterson. Iyo nanziveliwa olabihedha nzina naye nomariha ottiya olabihedha notene Papargyropoulos. Iyene vina wali mbali wottikitteliwa nanda wanziveliwa vaddiddi mabasa olaleya. Mbali Peterson belaga wanziveliwa olaba o Betel, masiki dhawene txipo kanattiyaga odhowa mmalaleyoni. Iyene wampakaga marevista owakwana zana meri dhetene. Vina wanimuziwa deretu Bibilia, nanda wannakula mavuzo ehu menjene.

O fazendawa, nanlimawo milima dhinjene dhiina neka mmalantani. Malituru 42.600 obe (kilu 45.000) a milima vamodha na dhilobo dhiina nanika mmalantani kadda yaka wila dhittukuleliwe o Betel. Ddalaba na murogora dhahi  wokurumuwa vina weziwelo, wakuweliwa Etta Huth. Iyene wanziwa deretu mukalelo w’owika milimadha esile mmalantani. Arogora a muruddaya obule agadha onikamihedha, Etta wanawakela mabasa awa. Masiki murogora Etta vaziwiye deretu malago a wika milima esile mmalantani, wanariha deretu abali aali emeleli a mabasa a munddaya. Wali yotagiha yaderetu wa iyo.

Angela Romano wali murogora mwina wa muzombwe wadhile wila anikamihedhe mabasa omundda. Etta wahimukamihedha iyene vaziwiliye ebaribari. Miyo na Angela nihitelana mweri wa Abrili wa 1958, nanda nihipurelamo vamodha omulaba Yehova mwari mwa vyaka 58. Sabwa ya Angela omuroromela Yehova, matelo ehu anodhowavi bagaliba. Iyene muyana weziwelo, ninowiwanana masiki nifanyiwe makattamiho orutxa.

Mumaleli abali oguliha musora dha radiyo WBBR o Staten Island yaka ya 1957, ddahidhowa olaba o Betel y’o Brooklyn mudhidhi mung’onovi. Mumalelihu otelana na Angela, nahivenyawo o Beteliwa. Mwari mwa vyaka ttaru nali apionero o Staten Island. Mudhidhi dhahi ddahiwobeliwa olaba musora dhahi dha radiyo watxemerhiwa WPOW.

Miyo na Angela nahivevutxa egumi yehu, nanda nali womala na wale wila nilabe wego-wegovi wajombeliwa anamalaleya. Musogorhomwa, nahikuweliwa wila nalabe ninga apionero a vawoka Sidadi y’o Falls, elabo y’o Nebraska yaka ya 1961. Mudhowelihu wenewo, nahiwobiwa wili-wili wila nidhowe o Lansing Sul, Nova Iorque, wila nakose Eskola ya Orumiwi wa Mulugu. Nihipurelamo vaddiddi masunziho akelilehu, nanda mumalile eskolaya nahiyelela o Nebraska wakawene. Nahirurumutxiwa vaddiddi vaziwilihu wila nahittomeliwa mabasa maswa. Nadhowa nalabe mabasa a omisionario o Camboja! Elabo eji eli Omadhulu w’o Ásia, nihoona, nihiwawo vina nijawo dhilobo dhinjene dhiswa, dhahaziwa iyo. Txibarene nanziveliwa wawaddela attu eena miselu dhapama dha Mulugu.

Mbwenye magudulano a politika adha osaddula Sidadi ya Camboja, nomala nahittawela o Vietinam. Muvirele vyaka bili ddikala muredda vaddiddi, nihiyelela o Estados Unidos. Ddanfuna mudhidhi wila ddivulumuwe. Mvulumuwelimi, nahiyelela mabasa opionero vakavene.

Marsu wa 1965 nahiroma okamihedha vina weeddelela milogo. Mwari mwa vyaka 33, Angela na miyo, nihipurelamo vaddiddi mabasa a murudda na kwatti, vina nihikamihedha masasanyedho a kongeresu. Ddipurelamo vaddiddi mabasa aba, vowi mudhidhi wa kongeresu wanddihagalaliha. Mwari mwa vyaka dhing’onovi ddiheddelela milogo dhali orugunuwa Sidadi ya Nova Iorque, nanda kongeresu dhinjidha dhakosiwa o Estádio y’o Yankee.

Mwa vyaka dhinjene Angela na miyo nahittomeliwa mabasa maswa vina okattamiha vaddiddi. Yaka ya 1995, ddahittomiwa wila ddakale namasunziha  wa Eskola ya Adhari Okamihedha (Escola de Treinamento Ministerial). Vyaka ttaru musogorhomwa, nahiwobiwa wila nidhowe o Betel. Nvirelani vyaka 40, ddahagalala vaddiddi wiyelela wili o Betel, wadhowilihu oroma mabasa meena maswa a mudhidhi wotene. Mudhidhi mwinjene ddalaba o Kambirinya ya Mabasa (Departamento de Serviço) vina ddihisunziha dhiskola dhinjene. Yaka ya 2007, Nikuru Nolamulela nahimetxa Mparha wa Dhiskola dha Omwene (Departamento de Escolas Teocráticas) mparha obu wanang’anela masunziho a dhiskola dhakosiwa o Betel, nanda ddahittomiwa okala musogorheliya.

Ovanenevi, dhiskola dhinjene dhihisadduliwa o Betel. Eskola ya Anddimuwa a Mulogo eromile 2008. Movira vyaka bili, anddimuwa a milogo owakwana 12.000 ahimala osunza o Patterson vina o Betel w’o Brooklyn. Eskola eji enodhowavi bigakosiwa mimburo dhina dhinjene. Yaka ya 2010, nzina na Eskola ya Adhari Okamihedha nihitxinjiwa, niroma okuweliwa Eskola ya Bibilia ya Abali a Aziye, vina yinaya yeliwa Eskola ya Atelani a Akristu (Escola Bíblica Para Irmãos Solteiros e Escola Bíblica Para Casais Cristãos).

Mweri wa Setemburu wa 2014, dhiskola esi bili dhahitaganyihiwa bikala Eskola ya Anamalaleya a Omwene (Escola para Evangelizadores do Reino). Eskola eji ddabuno enowataganyiha atelani, vina abali na arogora ali aziye. Abali enjene ahagalala muziwilani wila eskola eji egahikosiwa mwilaboni mwawa. Johagalaliha oziwa wila abali enjene anele okaana gari y’okosa eskolaya eji. Ddinohagalala vaddiddi wawoona abali enjene akosaga matxinjo wila akaane gari y’owakela masunziho aba.

Ddigobuwela dha egumi yaga, oromana nsaka nibatiziwe miyo mbasiyani mpule mwali manje oridha mpaka ovanene, ddinomutamalela Yehova sabwa y’oddivaha attu eziwelo. Awene addikamihedha omuziwa, vina omulabela iyene mowakwana. Enaya ali azombwe vaddiddi opitta miyo, enaya ahunuwa-wene. Enjiya ali a meddelo vina dhilemelelo dhottiyana-ttiyana. Masiki dhawene, ddihisunza na merelo vina mikalelo dhawa dha omukwela kakamwe Yehova. Ddinotamalela vaddiddi sabwa ya okana amarho enjene munlogoni na Yehova, addisunzihile dhilobo dhapama.