1. Attu eena anfanyelela eni orihiwa, nanda txini enasunze iyo mwari mwa mutoma obu?

NINLAGIHA dhavi wariha attu eena? Ninolagiha nriho nigavuruwana deretu vina nigattittimiha. Mudhidhi mwina, ninowarihaga abale ankosa dhilobo dhinfanyelela nriho, obe anna ettomo enddimuwa. Mwari mwa mutoma obu, ninele osunza bani onfanyelihu omuriha nanda sabwa yani?

2, 3. (a) Yehova omperhekeleliwa nni nriho na matamalo? (Koona foto eli omaromo.) (b) Mwana-Nibila onlogiwa va Ovuhulela 5:13 bani, vina nimutamalele dhavi?

² Ovuhulela 5:13 onologa wila ole “ogilatile vampaddoni” vina “Mwna-Nibila” aperhekeliwe nriho. “Ogilatile vampaddoni” onaddiwana Yehova. Va Ovuhulela kapitulu 4, dhottanddiwa dha wirimu dhinonivaha yubuwelo ya ejile eli Yehova, “ole ogilatile vampaddoni, oliwovi masaka otene,” avahiwe nriho. Awene anloga: “Nyuwo Nabuya Mulugu wehu muli mwinya, munofwanyela othithimihiwa, orihiwa,  vowi mupaddutxa dhetedhene, dhetedhene dhinokalawo n’ofuna wenyu.”—Ovuhulela 4:9-11.

³ “Mwana-Nibila” onlogiwa va Ovuhulela 5:13 ddi Yezu Kristu. Niziwile dhavi? Valiye velaboni ya vati, Yezu wahikuweliwa “Mwana-Nibila wa Mulugu onthimiha yothega ya elabo.” (Joau 1:29) Koddi mwene gani ovahile egumi yaye wi avune attu a nlogo naye? Eji ji sabwa enfanyeliye operhekeliwa nriho. Yezu operhekeliwa nriho sabwani “iyene ddíli Munddimuwa wothithimiheya, Mwene wa amwene, Nabuya wa anabuya.” (1 Timóteo 6:14-16) Ovano katanala dhottanddiwa dha wirimu dhibaga: “Mwana-Nibila osijeliwe mukutho, ddinfanyela osibiwana owodha, ofuma, ononelamo, guru, nriho, nthithimiho, matamalo.”—Ovuhulela 5:12.

4. Ekalelini yapama omperhekela nriho Yezu Kristu?

⁴ Va Joau 5:22, 23, vanloga Yehova omuttoma Kristu ninga namathonga wa attu a malogo otene. Eji ji sabwa yiina enfanyelihu omperhekela nriho Yezu. Nanda nigakosa dhawene ninomuriha vakavene Yehova. Nigasakula omperhekela nriho Yezu vamodha na Babe, ninele okana egumi yamukalakala.—Kengesa Masalmo 2:11, 12.

5. Ekalelini yapama okalawo middidda akala attu anorihana?

⁵ Attu asasanyiwe mu ‘nladdaniho na Mulugu.’ (Wita 1:27) Noona attu anowodha olagiha mikalelo dholigana na dha Mulugu. Motagiha, attu anowodha olagiha okwela, oderetu vamodha na okurumuwa. Attu asasanyiwe na mirugu, etanalelo enawodhiha wubuwela dhilobo dhaderetu na dhabure, okurumuwa obe wooba owali, dhofanyela obe dhohifanyela. (Roma 2:14, 15) Attu enjene anoziveliwa na dhilobo dh’oyesa na dhokoddela, anofuna vina okalagawo na murenddele na akwawa. Ejoya kahiyo elobo yorurumutxa sabwani Yehova ddi Mulugu wa murenddele. Txibarene, attu asasanyiwe na ewodhelo ya osaza mikalelo dhottiyana-ttiyana dha Yehova. Noona awene anofanyela wakela nriho na nttittimiho nehu.—Masalmo 8:5.

6, 7. Agarihaga attu eena Anamoona a Yehova anttiyana dhavi na attu a mwilaboni?

⁶ Japama wariha attu ena, mbwenye enorutxaga oziwa nriho gani ninfanyelihu wavaha vina mudhidhi gani. Sabwa yawi nili attu ohiligana, vina enjiya arava mweddelo wabure w’elabo ejino ya Satana. Attu enjene anowawebedha alobwana obe ayana na dhokosa dhawa. Ottiya omperhekela Yehova nriho nininfanyela, attu aba anowariha vottabwa attu akwawa awoonaga ninga amulugu. Awene anosanza mwabalelo, mweddelo wa akadda politika, asogorheli a relijiau obe attu ena anawonani ninga bovuwa.

⁷ Mbwenye Akristu ebaribari anoziwa wila omuriha muttu na mukalelo ninga obuwene elobo yabure. Mwa attu otene akalilewo, Yezu ddili yotagiha yapama wi nisanze. (1 Pedro 2:21) Nubuwele wila “etene avirigana, etene arimeliwa thima  y’okala na Mulugu onvuna.” (Roma 3:23) Kavo muttu onfanyela webedhiwa. Nigavahaga attu nttittimiho na nriho n’ottabwa, ninomunyimula Yehova.

8, 9. (a) Anamoona a Yehova anawoona dhavi alamuleli? (b) Elobo gani ehinfanyelihu orumela akala alamuleli anologa?

⁸ Iyo ninowariha vina ninowattittimiha attu eena sabwa ya ettomo enanina. Motagiha ndoweni nawubuwele alamuleli, vina mabasa annikoselani. Awene anokosa guru wi ang’anelege elabo enttongani. Ninopurelamo vaddiddi mabasa ankosani. Murumiwi Paulo wahiloga wila nawonege anamattonga ninga ‘anddimuwa.’ Wahiloga wila nivirihegemo malamulo awa eraga: “Munvahe muthu-muthu enfwanyeliye wireliwa: onfuniwana musoko, mumvahe, womuriha mmurihe.”—Roma 13:1, 7.

⁹ Anamoona a Yehova anowattittimiha vina anowariha alamuleli etene a elabo. Vowila elemelelo enottiyana mowiwanana na elaboya, anamattonga elabo anoziwa wi mukalelo worihiwa wawa onele ottiyana. Masiki dhawene iyo ninowawiwelela anamattonga vamodha na mabasa ankosani. Mbwenye, akala awene anonikokela okosa elobo egamunyimulile Yehova, iyo ninokoodda. Mwa venevo iyo ninomuriha vina omuttittimiha Yehova opitta attu.—Kengesa 1 Pedro 2:13-17.

10. Emeleli a Yehova a nsaka na mundduni, anivahile yotagiha gani?

¹⁰ Ndoweni nisunze yotagiha ya emeleli a Yehova a nsaka na wale. José na Maria yotagiha yaderetu. Alamuleli a Roma valogilani wila muttu-muttu alebeliwe mwilaboni mbaliwiye, José na Maria ahikosa oleddo onddimuwa adhowaga o Belemi masiki vahalilani malabo mang’onovi wi Maria akane mwana. (Luka 2:1-5) Murumiwi Paulo vina yotagiha yaderetu ya muttu warihile alamuleli. Vazivaleliwiye wi okosa dhilobo dhabure, na nriho wahakula vamentoni va Mwene Herodi Agripa, vina va Festo mulamuleli w’o Judeya muttette w’o Roma.—Merelo 25:1-12; 26:1-3.

11, 12. (a) Sabwaya jani kaninfanyela wavaha nriho n’opitta asogorheli a marelijiau? (b) Munamoona wa Yehova w’o Austria vamurihiliye mulamuleli, txini yapadduwile?

¹¹ Kito ninaloge dhavi asogorheli a marelijiau? Awene anofanyela wakela nriho n’opitta? Awene anrihiwa na mukalelo wakakene onrihiwana attu eena. Mbwenye enokala yawopiha wavaha nriho n’opitta, masiki akala awene anjedhela ejuwene. Sabwaya? Sabwani relijiau ehili yebaribari, kinsunziha ebaribari ya Mulugu na Nzu naye Bibilia. Yezu wahatonya anamasunziha a marelijiau ottambi ninga ogwalagwambi vina asogorheli abure. (Mateu 23:23, 24) Epaddi yina, kahiyo yabure wattittimiha vina wariha alamuleli a elabo. Yopurelamoya y’okosa ejuwene jawila awene na mudhidhiya anonikamihedha.

¹² Mulamuleli mmodha mwa abuwene wali Dr. Heinrich Gleissner, wali elabo y’o Austria. Nsaka narabiwa Koddo II ya mulimau, iyene wahifugeliwa na akadda Nazista. Mudhoweliye otaganyihiwa na atxedhiwi eena, iyene wahimuziwa Leopold Engleitner, wali Munamoona wa Yehova w’o Austria. Mbali Engleitner na  nriho wahimwaddela Dr. Gleissner yimelelo yaye nanda iyene wahinvuruwana n’ofwasa. Mumaleli koddo, Gleissner wahilabihedha mabasa ettomo yaye wi akamihedhe Anamoona a Yehova o Austria. Txino weyo onoziwa dhilobo dhina dhapama dhipadduwile sabwa ya Anamoona a Yehova wariha alamuleli a elabo.

13. Bani onfanyelihu omuriha, nanda sabwa yani?

¹³ Abali na arogora ehu anofanyela nriho na nttittimiho. Ejo ebaribari makamaka mwa abali ali anddimuwa a mulogo, anameddelela milogo, abali ankosa epaddi ya Gatta ya Katti obe Nikuru Nolamulela. (Kengesa 1 Timóteo 5:17.) Aba etene anowakwaniha dhofuna dha nlogo na Mulugu, nanda Bibilia anowakuwela attu aba ninga “mivaho dhaye.” (Éfeso 4:8) Noona jaderetu wariha vina wattittimiha nihang’anaga ekalelo yawa, elabo yawa, obe eziwelo enani. Akristu awale anittiyedha yotagiha yaderetu y’ofara. Awene annariha kakamwe abale asogorhela, noona iyo ninokosa yakakene masaka abano. Nigakala na alobwana abo, kanawonege ninga angelo obe attu owopiya. Narihe vina nattittimihe sabwa ya mabasa na oviyeviha wawa.—Kengesa 2 Korinto 1:24; Ovuhulela 19:10.

14, 15. Anddimuwa a mulogo, attiyanile dhavi na asogorheli a marelijiau?

¹⁴ Anddimuwa a mulogo ali ninga akumbuzi a mabila oviyeviha. Kankosa esuwene wila arihiwege. Awene bottiyana vaddiddi na asogorheli a marelijiau a nsaka nttino vina a masaka a Yezu. Iyene wahaloga asogorheli eraga: “anothamagela mipaddo dhothithimiheyadhá vamuthuponi  na mmasinagoga, anoziveliwa olejeliwa na nriho mudila, vina withaniwa anamasunziha.”—Mateu 23:6, 7.

¹⁵ Anddimuwa a mulogo wa Okristu anofara mazu a Yezu: “Nyuwo muhirumele withaniwa ‘Anamasunziha’, vowi namasunziha wenyu ddi mmodha bahi; nyuwo motene muli obalinyu. Vati apano muhimwithane muthu na nzina na baba, vowi babinyu ddi mmodha bahi, ole oli wirimu. Muhirumele wiriwa asogorheli, vowi musogorheli wenyu ddi mmodha bahi Muthikitheliwi. Mwa nyuwo munddimuwayá, akale mwimeleli wenyu. Onvithukulela, onokurumutxiwa; onviyeviha onothithimihiwa.” (Mateu 23:8-12) Anddimuwa a mulogo agavirihamo mazu aba a Yezu n’oviyeviha, abali etene anowariha vina anowattittimiha.

16. Ninfanyelela eni odhowavi banigalagiha nriho?

¹⁶ Mudhidhi mwina enorutxa ononelamo osunza wariha attu eena. Ejo vina yampadduwa na Akristu oroma. (Merelo 10:22-26; 3 Joau 9, 10) Mbwenye guru dhetene dhinkosihu sapama. Nigariha attu eena na mukalelo onnifunana Yehova, ninele okana dhopurelamo dhinjene.

17. Nimpurelamo eni nigariha abale annisogorhela?

¹⁷ Nigariha vina wattittimiha anamattonga a mmuruddani mwehu, dila dhinjene anonikamihedha osogorhiha na nlamulo nawa mabasa ehu olaleya. Mudhidhi mwina anohagalalaga na mabasa ehu olaleya. Ejo epadduwa vyaka dhing’onovi mundduni o Alemanha, pionero dhahi ontxemerhiwa Birgit wadhowile woona mattanga a omariha yaka [graduação] oskola wa mwanaye. Anamasunziha ahimwaddela Birgit wila ahihagalala vaddiddi okana anamasunza abale ali Anamoona a Yehova mwari wa yakene ejile. Awene ahoona wila Anamoona a Yehova anawa anoriha eskola ninga mburo wapama. Birgit wahawaddela, “Anihu anokosa guru wi afare masunziho a Mulugu na mweddeloya, ejo entaganyiheya na wariha anamasunziha vina wattittimiha.” Namasunziha mmodha wahiloga wila anamasunza etene kokala Anamoona a Yehova, osunzihawa oganziva vina kugarutxa. Awene ahiziveliwa vaddiddi na mweddelo wa anamasunza ali ana a Anamoona a Yehova, nanda sabwa y’ejene anamasunziha eena ahidhowa woona matugumano a kongeresu.

18, 19. Nigarihaga anddimuwa a mulogo, txini enfanyelihu wubuwela?

¹⁸ Malamulo anfanyeya Mmazuni a Mulugu anowodha onikamihedha ononelamo  mukalelo wa wariha anddimuwa a mulogo. (Kengesa Ahebreu 13:7, 17.) Ninowodha watamalela sabwa ya mabasa ankosani. Nigavirihamo kakamwe malago annivahani, ejo enowalibiha anddimuwaya onikamihedha n’ohagalala. Bibilia onloga wi nitagihe nroromelo nawa. Mbwenye kintapulela wila nikose ninga “munkosela” awene, txino ninga mulogelo obe musunzihelo wawa. Nigakosa ejuwene ninakale ninga nili anamafara a attu ottiya Kristu. Kanidduwale wila anddimuwaya a mulogo attu ohiligana dhahene ninga elihu.

¹⁹ Nigariha vina wattittimiha anddimuwa a mulogo ottiya wawoona ninga anrihiwetxa, ninele wakamihedha. Na mukalelo gani? Enele wakamihedha awene okalavi oviyeviha ottiya okalaga wubuwelavi wila balitxi amakamaka opitta eena obe woona ninga dhinkosani saderetuvi.

20. Nigariha attu eena nimpurelamo eni?

²⁰ Wariha attu eena ononrabeliha ovittukulela vina onikamihedha okalavi woviyeviha nigavahiwaga malago. Enokala nibarelo wa iyo sabwani enonikamihedha orabela ovonya akala muttu wamuriha iyo ononinyimula. Yopuramo yina jawila ninokalavi owiwanana na nikuru na Yehova. Nikuru ntti kannimuriha vopitta muttu-muttuvi masiki akala namebedha webaribari.

21. Nigariha attu eena yopurelamoya yamakamaka jivi?

²¹ Yodhavo yamakamaka ya wariha attu eena jawila ninomuhagalaliha Mulugu. Ejoya enele onikamihedha okosavi ennifuniyena vina okalavi mudila mwaye. Vina enomukosiha Yehova omwakula Satana waloga wila kavo muttu onwodha omuroromela Mulugu. (Gano 27:11) Attu enjene mwilaboni kanziwa wariha attu eena n’oderetu. Mbwenye iyo ninotamalela vaddiddi sabwa yoziwa mukalelo wa wariha attu nifaraga malago a Yehova!