MUTTU waderetu dduddule ononiha oderetu waye na attu ena. Mohaganyedha, notene ninotamela woniwa noderetu n’attu ena. Mwilaboni munkala iyo attu enjene ahirimeliwa ‘okwela dhilobo dhaderetu,’ olagiha oderetu elobo yorutxa. (2 Tim. 3:3) Attu enjene anovanya magano a Mulugu ‘dhabure, anira sapama, dhapama anira sabure.’ (Iza. 5:20) Ottiya ejo okala muttu waderetu elobo yorutxa, sabwa ya mikalelo dhovanene, esile dhinnipadduwela vina sabwa yokala attu ohakwana. Txino enofuneya wubuwela ninga Anne, * omulabele Yehova mwari mwa vyaka dhinjene, iyene ohiloga: “Ddinona ninga enele okala yorutxa miyo okala muttu waderetu.”

Miselu dhaderetu oziwa wi jowodheya iyo notene osunza okala attu aderetu. Oderetu onokosa epaddi ya musapo wa muya wokoddela, muya wokoddela guru ya Mulugu namawodha-wodha. Iyene onowodha onikamihedha okwaranya makattamiho egafunile onikoddiha otonyihedha oderetu. Ovano ninfuna nisekeserhe ejile entapulela oderetu nanda ninawodhe dhavi otonyihedha siku na siku.

Mowiwanana na Bibilia, okala muttu waderetu entapulela orabela obure. Muttu waderetu onovilibihedha weddana magano apama mwa esile dhili dhofwanyelela. Onowakamihedha attu ena vina onowawirela dhoderetu akwaye.

Sabwa yokala attegi, ewodhelo yehu yotonyihedha oderetu joyeva. Masiki nakoselaga dhilobo dhaderetu anamudhi ehu obe akwehu, n’oka s’enikamihedho kaninawodhe otonyihedha oderetu webaribari. Bibilia onloga wi: “Kawo muthu wawakwana vatapano, onedda pama, ohinddawa.” (Koh. 7:20) Murumiwi Paulo ohirumela wi: “Ddiziwa wi mwari mwaga, kuloga mmwilini mwaga miyo muthegi, kamuli yapama.” (Rom. 7:18) Nona akala ninfuna nikale attu oderetu, enofuneya otamela nikamihedho na Yehova oli nipara n’oderetu.

Ddi Yehova Mulugu onlamula yapama na yabure. Mowiwanana na ejuwene ninowodha wengesa Mazu aye anologa: “Nyuwo muli wapama, wamurima wovaha; ddisunzihení dhinddifunenyuna.” (Masal. 119:68) Ovano ndoweni noone mikalelo minli dha oderetu wa Yehova onlogiwa mwari mwa versu eji.

Yehova ddwaderetu. Oderetu onokosa epaddi ya mikalelo dha Yehova. Iyene txipo kanttiya otonyihedha mukalelo obu. Kona yapadduwile mwamwaddelele Yehova Mizé: ‘Ddinere owirela nttittimiho naga notene,’ nttittimiho ntti na Yehova—nintaganyiheya na oderetu waye—lizu na Yehova nanloga na Mizé: ‘Yehova Yehova, Mulugu wattagaraga, wasupaje, wa nttebwa, waweddeyana vina webaribari, ontonyihedha okwela waye onddimuwa attu otene ahang’anaga dhoddawa dhawa mbwenye alevelelaga dhovirigana dhotene.’ (Obud. 33:19; 34:6, 7) Eji enonikamihedha ononelamo wi Yehova Mulugu woderetu. Nona mwanaye Yezu ologa: ‘kawo ona oderetu oligana na Baba.’—Lk. 18:19.

Dhottandda dha Yehova saderetu. Yehova ddwaderetu na dhottandda dhaye dhotene. “Nabuya  onowafewela murima athu otene, murima waye onofiyedha dhetene dhipaddutxiliye.” (Masal. 145:9) Attu otene anowodha wona oderetu wa Yehova, sabwani ddiyene wavahile egumi enakalihawo. (Mer. 14:17) Iyo vina ninowodha wona oderetu waye sabwani onolevelela dhottega dhehu. Munasalmo ohileba: ‘Nyuwo Yehova muli wapama, muli womala-nawale wi munilevelele.’ (Masal. 86:5) Nikana ebaribari wi Yehova: ‘Kanawimana dhaye abale aneddana murima womyala.’—Masal. 84:11.

Iyo nili nladdaniho na Mulugu, nona nikana ewodhelo yokala attu aderetu vina wira dhilobo dhaderetu. (Wita 1:27) Vowi enofuneya okosavo elobo, Yehova ononikokomeza wi: “Sunzaní wira dhapama.” (Iza. 1:17) Ninasunze dhavi wira dhapama? Ndoweni none dhipaddi ttaru.

Yoroma, nikana ewodhelo ya olobela nikumbiraga nikamihedho na muya wokoddela, ejo enele onikamihedha wunuwiha mukalelo woderetu. (Gal. 5:22) Muya wokoddela wa Mulugu ohikaana ewodhelo ya onikamihedha widda eli yabure okwela eli yapama. (Rom. 12:9) Bibilia onloga wi Yehova: ‘ononikamihedha na dhogana vina dhawira dhehu.’—2 Tes. 2:16, 17.

Yanawili, enofuneya omwengesaga Bibilia. Nigakosa dhawene Yehova onele onikamihedha “ofwaseyela opima eli yapama” vina wira “mabasa otene apama.” (Gano 2:9; 2 Tim. 3:17) Nigamwengesaga Bibilia nanda nitanaalele esile dhinengesa iyo, ninodhaliha mmirimani mwehu mafumo a Mulugu a dhilobo dhinfuniye okosa. Nigafunaga otonyihedha oderetu mafumo abo anele onikamihedha.—Lk. 6:45; Ef. 5:9.

Yaneraru, nivilibihedhege wi ‘nitagihege dhilobo dhaderetu.’ (3 Jo. 11) Mbibiliani muhikala dhotagiha dhinjene dhinfwanyela iyo ofwara. Joziweya wi dhotagiha dhamakamaka dha oderetu dhili na Yehova vina mwanaye Yezu. Mbwenye ohikala attu enjene aziwiwe na oderetu wawa. Mwa abaya ninowafwanyamo eli Tabita na Barnabé. (Mer. 9:36; 11:22-24) Kasunza ejile enloga Bibilia mwawene vina esile dhawirelani attu ena. Ogamala wubuwele dhilobo dhigawodhile weyo wawirela amudhawo obe abali a mmulogoni. Mwari mwa nsunzo nawo otanalele mareliho a’kelile Tabita na Barnabé sabwa yotonyihedha oderetu. Weyo vina onele opurelamo na oderetu wawo.

Masaka ovanene ahikalawo attu anivilibihedha otonyihedha oderetu. Motagiha katanaalela anddimuwa a mulogo, awene anolaba vaddiddi vina ‘anokwela dhilobo dhaderetu.’ Kudduwale vina  wi ahikalawo arogora enjene ororomeleya, mwari mwa makani awa meddelo awa, anamasunziha a dhilobo dhapama. (Tito 1:8; 2:3) Murogora dhahi onkuweliwa Roslyn ohiloga: “Mukwaga onokosa ejile enwodhiye wi akamihedhe wagalala wa abali a mmulogoni. Iyene onowatanalela vaddiddi dila dhina osasanyedha nvaho wa wagawela obe nikamihedho nawoneya. Miyo ddigamonaga iyene, yotagiha enddimuwa ya oderetu.”

Yehova onowakokomeza adhari aye wi ‘atamelege oderetu.’ (Am. 5:14) Nigatamela ‘wira dhoderetu’ kahiyo yawi iyo ninosunza bahi okwela weddana oderetu, ottiya ejo iyo nikana efunelo yokosa oderetu.

Kobuwela, wi niwodhe okosa dhoderetu jofuneya nttokoso nddimuwa. Koona yotagiha eji: Wahiromaga omoona namasirhinga alabihedhaga muttenga mmodha obe minli wi asiringe elobo yokoddela? Kinwodheya, wi asiringe elobo yozivela mmentoni, enele ofuneya olabihedha mittenga (pincel) dhinjene. Na mukalelo woligana oderetu wehu onela wakwanela nigakoselega akwehu dhilobo dhoderetu masiki dhing’nodha.

Bibilia onologa wi ninofwanyela okala ‘wovisasasanyedha’ vina ‘womala-nawale’ wi nikose oderetu. (2 Tim. 2:21; Tito 3:1) Noona okalege txenjewa na dhilobo dhimpadduwa vego valiwe, onele ofwanya ‘gari yotonyihedha oderetu vina yawalibiha attu ena.’ (Rom. 15:2) Dila dhina txino weyo onele owodha ogawelana elobo eniwe enona weyo wi muttu mwina kana. (Gano 3:27) Obe omobela vanivawo muttu wi muje elobo-txilobo mulogaga makani ozivela. Ogaziwa wi muttu mwina muredda, enowodheya weyo omukamihedha, omperhegenza miselu obe elobo yina. Mohaganyedha ahikala marhé gwé a otonyihedha oderetu, Bibilia onloga: “Mwano mwenyu muhibudduwe-wene mazu ovuta; mubudduwege mazu apama anlabela olaleya onfuneya, anapuriha abale aniwa.”—Ef. 4:29.

Yehova onowatonyihedha oderetu attu etene, noona enofuneya omutagiha. Mukalelo mmodha wa okosa ejuwene bwa olaleya miselu dhapama s’ensakulano. Moligana na yoruma ya Yezu, iyo ninovilibihedha wawirela oderetu attu otene ofiyedha amwiddani ehu. (Lk. 6:27) Okala muttu waderetu vina wawirela oderetu attu otene elobo yofwanyela, noona Bibilia onologa wi “Kaniwo nlamulo ninimukona onvira mwenemwa.” (Gal. 5:22, 23) Nigakala attu anziwa otonyihedha oderetu, masiki nigumanege na makattamiho, ninele owodha wakamihedha attu enna orumela ebaribari vina omuttittimiha Mulugu.—1 Ped. 3:16, 17.

“Muthu wapama onothuveliwa mabasa aye.” (Gano 14:14) Marelihoya bavi? Nigatonyihedhaga oderetu attu ena, txino ena anele onirela vina oderetu. (Gano 14:22) Masiki akala kaniniyedhiwa na oderetu wehu, nalabona awene anele otxinja merelo awa.—Rom. 12:20.

Wira eli yapama vina orabela obure onodhana oderetu. Katanalela yotagiha ya Nancy. Iyene ohiloga: “Miyo ddali muttu wahakana manyazo na mweddelo wonyakuwa vina ddali muttu waharumela osaddeyiwa.” Owenjedhedha: “Mbwenye musuzelemi Bibilia baddiroma olabihedha maganoya mwa esile dhili dhapama, ddahiroma ofwanya ohagalala. Ovano ddinoziwa txini entapulela okwela.”

Elobo yina ennittukulela wira dhapama joziwa wi ninomwagalaliha Yehova. Masiki attu ena akoddege oziwa oderetu wehu, Yehova onoziwa. Iyene onoziwa elobo-txilobo yaderetu ofiyedha dhubuwelo dhehu. (Ef. 6:7, 8) Yopurelamoya txini? Muttu waderetu onofwanya orumeliwa wa Yehova. (Gano 12:2) Enofuneya okosa guru wi wunuwihe oderetu. Yehova ohigana wavaha ‘nttittimiho na murenddele abale otene anira dhilobo dhaderetu.’—Rom. 2:10.