1. Mukalelo mmodha wa Yezu oli wattima buvi? Katapulela.

MUKALELO mmodha wa Yezu oli wattima, ewodhelo ena iyene yononelamo makattamiho angumanana attu. Agali velaboni ya vati, Yezu wanwodha ‘ottaba na abale anttaba, wunla nabale anunla.’ (Rom. 12:15) Motagiha, anamasunza 70 vadhowilani olaleya, ahiyela nowagalala, ahimwaddela dhilobo dhaderetu dhapadduweli omalaleyoniwa, ‘venevo Yezu, ottaba na dhirile muya wokoddela.’ (Lk. 10:17-21) Mudhidhi okwile Lazaro, Yezu ohona wiwopa wa attu amukwela Lazaro, “oheddiwa thagaraga, ogulugudheya murima.”—Jo. 11:33.

2. Masiki Yezu akalaga oligana txini emukamihedhile watanalela attu?

² Masiki akalaga muttu woligana Yezu wanaweeddiha attu ohiligana na nriho. Txini yamuttukulele okosa ejene? Yamuttukulele yali okwela ona iyene na attu. Ninga monelihu nsunzo nivirile iyene ‘wanziveliwa okala na malogo a attu.’ (Gano 8:31) Okwela oku omuttukulela Yezu ononelamo mukalelo onubuwela attu. Murumiwi Joau ohitapulelamo: Yezu “wanona dha murima-murima.” (Jo. 2:25) Iyene wannonelamo dhiniwa muttu ddi muttu. Attu agonaga mukwelelo wa Yezu, antamela wiwa dhalogiye mwaha wa miselu dha Omwene. Iyo vina nigatonyihedhaga okwela wakakene ninele ofwanya dhopurelamo dhapama mmabasani a olaleya.—2 Tim. 4:5.

3-4. (a) Nigakana ntanalelo ninawonege dhavi mabasa olaleya? (b) Elobo gani enasekeserhe iyo mwari mwa nsunzo ntti?

³ Murumiwi Paulo wanziwa wila wahittomeliwa olaleya, iyo vina nihittomeliwa. (1 Kor. 9:16) Mbwenye nigatanalelaga  attu ena kaninawone mabasa aba ninga elobo yodideliwa. Ninele ofuna wakamihedha attu sabwani ninowazuzumela. Iyo ninoziwa wi “ovaha onothabiha opitha ovahiwa.” (Mer. 20:35) Nigalaleyaga nubuwelaga mazu aba ninele wagalala na mabasa ankosihu.

⁴ Mwari mwa nsunzo ntti ninele wona mukalelo onatonyihedhe iyo ntanalelo mmalaleyoni. Voroma ninele wona mukalelo walagiha Yezu ntanaalelo mmalaleyoni. Ninele osekeserha mpaddi minayi dhinanikamihedhe osaza yotagiha yaye.—1 Ped. 2:21.

5-6. (a) Yezu watonyihedhela nni ntanalelo? (b) Yezu waweddelela nni ttagaraga attu abale alaleya iyene, ninga mwalogele Izaiya 61:1, 2?

⁵ Ndoweni none yotagiha modha entonyihedha wila Yezu muttu ona ntanalelo. Mudhidhi dhahi Yezu na anamafwara aye ahilaleya vaddiddi ofiyedha “ohona mudhidhi woja.” Apo Yezu ologa ‘ndoweni vehu-vene’ wi ‘navume vang’onovi.’ * Mbwenye muttitti wahafwara mburo wadhowani ovuma. Mufiyedhi Yezu na anamafwara aye b’ona muttitti obule wa attu, txini ekosiliye? “Thagaraga emwedda vowi aladdana na mabila ahina mukumbuzi. Venevo oroma wasunziha dhinjidhene.”—Mk. 6:30-34.

⁶ Koona emuttukulele Yezu watanalela attu ena. Iyene wahoona wi attu abale “aladdana na mabila ahina mukumbuzi.” Enkala ninga Yezu wahiziwa wila ena anlaba vaddiddi wila adhena yoja vatakulu. Obe enagu aniwopa mwaha wokweliwa munammudhi. Yezu wahikana ewodhelo yononelamo makattamiho awa. Ninga moonile iyo nsunzo nivirile Yezu wahigumanana makattamiho oligana. Iyene wanazuzumela vaddiddi attu nona wanfuna wasunziha  miselu dha nipangarhazo.—Kengesa Izaiya 61:1, 2.

7. Ninamutagihe dhavi Yezu?

⁷ Elobo gani ensunza iyo na yotagiha ya Yezu? Moligana na Yezu iyo ninowawona attu ali ninga “mabila ahina mukumbuzi.” Awene anogumanana makattamiho menjene. Nanda iyo nihikana enfunani—miselu Dhomwene. (Ovuh. 14:6) Nigamutagiha Yezu iyo ninele olaleya miselu dhapama sabwani ‘ninowatanalela attu oyelega vina ahina dhawa.’ (Masal. 72:13) Ninokubanya awene agatabuwaga vina ninokosa elobo-txilobo wila nakamihedhe.

8. Mukalelo mmodha wolagiha ntanalelo omalaleyoni buvi? Kavaha yotagiha.

⁸ Txini enanikamihedhe watanala attu otene analaleya iyo? Ninofwanyela ov’eka vamburoni va muttuya, nimweddihaga ninga mugafunile iyo weddihiwa. * (Mt. 7:12) Ninfuna none dhipaddi nayi dhokosa ejene. Yoroma, Katanalela dhofuna dha muttu-muttu. Mabasehu a olaleya anoladdanihiwa na a dotoro. Dotoro weziwelo onotanalela dhofuna dha muredda. Iyene ononvuza vina onofwaseyela wiwa dhinloga mureddaya. Kanimulebela mureddaya murobwe-murobwevi onubuweliye. Enofuneya mudhidhi wila aziwe eniweye, wi anvahe mirobwe dhofwanyelela. Na mukalelo wakakene ninofwanyela otanalela dhofuna dha muttu-muttu. Niziwege ottiyaniha miselu dhinavaha iyo attu mmalaleyoni mowiwanana na mikalelo dhattuya.

9. Elobo gani enfwanyela iyo orabela nigalogaga na muttu dila yoroma? Katapulela.

⁹ Ogamulaleya muttu dila yoroma, kuttamagele wubuwela wi onoziwa dhinubuwela iyene, dhilobo dhinrumeliye na sabwaya enrumeeleliye. (Gano 18:13) Ottiya ejo, kakosa mavuzo wi awukamihedhe omuziwa iyeneya. (Gano 20:5) Akala jorumeeliwa na yeddelo ya vamuruddani vawo, kakosa mavuzo aniwanana na mabasa ankosiye, anamudhi aye, dhingumanana na iyene mwigumini mwaye, otaganyiha na esile dhinubuweliye. Nigakosa dhawene ninele ononelamo dhilobo dhinfwanyela iyene osunza mowiwanana na miselu dha pama. Nigamala oziwa ninele wodha omutonyihedha ntanalelo nofwanyelela ninga yakosa Yezu.—Koona nlebo na 1 Korinto 9:19-23.

10-11. Mowiwanana na 2 Korinto 4:7, 8, Mpaddi wanawili wotonyihedha ntanalelo buvi? Kavaha yotagiha.

¹⁰ Yanewili, otamele oziwa makattamiho angumanana muttu ddi muttu mwigumini  mwaye. Nigakosa dhahene ninele owodha ononelamo dhiniwani. Vowi nili attu ohiligana ninogumanana makattamiho akene. (1 Kor. 10:13) Iyo notene ninoziwa wila okalawo masaka abano omariha elobo yorutxa. Kohikala nikamihedho na Yehova kanigawodhile okwaranya makattamihoya. (Kengesa 2 Korinto 4:7, 8.) Karoma omubuwela muttu ohimuziwile Mulugu. Kayiwo elobo enimukamihedha owanana makattamiho angumanana iyene. Nigakanela ttagaraga ninele okosa ninga Yezu wattukulela ‘miselu dhapama dhinttabiha.’—Iza. 52:7.

¹¹ Ndoweni none yotagiha ya mbali Sergey. Ahinatti osunza ebaribari wali muttu wa manyazo. Kawodha ologa na attu ena. Namudhidhi iyene wahiroma omusunza Bibilia. Ohiloga: “Mwasunzemi ddihona wila Akristu anokokomeziwa wapanga attu ena dhinroromelani.” Owenjedhedha: “Mologa ebaribari kaddobuwela wila ddigawodha okosa mabasa aba.” Ottiya ejenevi, iyene wanawubuwela attu ali ahinatti wiwa ebaribari vina mukalelo wa egumi yawa. Sergey ohiloga: “Dhilobo dhiswa dhasunzemi dhanddivaha wagalala na murenddele.” “Miyo ddanziwa wila attu ena anofwanyela oziwa ebaribari.” Ttagaraga emuttukulela Sergey oliba murima wi alaleye. “Ologa ebaribari wawaddela attu mazu a Mulugu ehiddilibiha vina eddikamihedha wunuwiha elemelelo eji eswa mmirimani mwaga.” *

12-13. Ninfwanyela nni okala attu okurumuwa mmalaleyoni? Kavaha yotagiha.

¹² Yaneraru, okale wokurumuwa ogasunzihaga. Ninonelemo wila attu kanziwa ebaribari ya mBibiliani ninga munziwela iyo. Attu ena anokwela vaddiddi religiau yawa. Anoziwa wila enawandaniha vamuralani, mmuruddani relijiau enani. Ninakamihedhe dhavi?

 ¹³ Kobuwela yoladdaniha eji: Elobo gani empadduwa na muratto wonyongeya ogafuniwaga ogujuliwa wila osasanyiwe mwina muswa? Kunttamageliwa ogujuliwa ohinatti osasanyiwa mwina muswa. Enromiwaga osasanyiwa muswa ogamala bugujuliwa obule wonyongeya. Na mukalelo wakakene, ahinatti ottiya dhilemelelo dha relijiau yaye “yawale” ninofwanyela omukamihedha ononelamo ebaribari “eswa”—eli mBibiliani yakoddiye ononelamo. Agaroma okwela ebaribari, pavenevo vanawodhe iyene ottiya religiau yaniye.—Rom. 12:2.

14-15. Ninakamihedhe dhavi attu ononelamo njedhelo nokala mparaizu musogorho? Kavaha yotagiha.

¹⁴ Nigakala okurumuwa na attu mmabasani a olaleya, kanijedhele wila awene anele wiwa vina orumela ebaribari ya mBibliani dila yoroma enlogihu n’awene. Ntanalelo ninokamihedha olabihedha malebo nofwaseya, abuwene anadhena yopurelamo na mudhidhiya. Motagiha, nubuwele marhe omutapulela muttu-ddi-muttu njedhelo yokala mparaizu velaboni ya vati. Enjene anononelamo vang’ono obe kannonelamo elobwene mwaha wa nsunzo ntti. Awene anubuwela wi agakwa kana njedhelo nokalawo wili. Obe attu etene aderetu agakwa andowa wirimu. Ninakamihedhe dhavi attu aba?

¹⁵ Mbali dhahi onologa enkosiye wila amutapulele munamurala njedhelo nokala mparaizu musogorho velaboni ya vati. Voroma iyene onengesa nivuru na Wita 1:28. Agamala ononvuza mwanamurala, mowoona wawo Mulugu wafuna wi attu akalege mwilaboni na mukalelo gani? Enjene anowakula wila, “Mulugu wafuna wi attu akalegewo deretu vina namukalakala.” Agamala, onowengesa nivuru na Izaiya 55:11 nanda banvuza akala Mulugu ohitxinja efunelo yaye. Mwanamurala onowakula wi, nne Mulugu katxinjile. Wi agomihe makaniya onowengesa nlebo nomariha na Masalmo 37:10, 11 agamala ononvuza, egumi ya attu enakale dhavi musogorho. Na malebo aba mbali oddu owakamihedha attu ottiyana-ttiyana ononelemo wila Mulugu onofuna wi attu aderetu akale velaboni ya vati, mParaizu.

16-17. Mowiwanana na Gano 3:27, ninalagihe dhavi ntanalo attu ena? Kavaha yotagiha.

¹⁶ Yanonai, katonyiha wi onowatanalela. Motagiha, ninakose nni nigafiya vatakulo va mwanamurala nanda baninfwanya bahina mudhidhi? Ninofwanyela okumbirha nlevelelo vina nimpage wi ninele wiyela labo nina. Koddi akala mwanamurala ononikumbirha wila nimukamihedhe okosa elobo-txilobo? Obe muredda nanda onokumbirha wila nidhowe wego? Ninakose nni?  Egapadduwa dhawene ninofwanyela omukamihedha muttuya.—Kengesa Gano 3:27.

¹⁷ Na merelo mwang’onovi enowodheya okana dhopurelamo dhinjene mmalaleyoni. Motagiha, murogora wahiwa wila murala dhahi mwaniwa wahikwa. Ttagaraga dhahimwedda nona wahalebela njagara, munjagaranimwa wahikamo malebo a mBibiliani anlibiha. Anamudhi abale mwengesilani njangarana akosile nni? Muyanaya ohiloga: “Miyo ddali okumuwene nzilo.” Owenjedhedha: “Weyo kunubuwela mukalelo onilibihile njangarana.” Kaninwodha otamalela nlibiho ninivahile weyo. “Nzilo miyo ddihegensa njangarana ddila dhowakwana 20. Ninotamalela na murima wehu wotene.” Akala ninovika vamburoni va attu antabuwa nanda banikosa elobo-txilobo wila nakamihedhe, ninokana yopurelamo yaderetu mmalaleyoni.

18. Mowiwanana na 1 Korinto 3:6, 7, Monelo gani wopimeleleya onfwanyela iyo okana?

¹⁸ Ninofwanyela okala attu ovipimelela. Ebaribari wi ninowakamihedha attu omuziwa Mulugu, mbwenye kili mmadani mwehu okosa elobo yamakamaka. (Kengesa 1 Korinto 3:6, 7.) Ddi Yehova onakwekwetta attu. (Jo. 6:44) Ddi muttu-muttu onsakula akala onele orumela ebaribari obe nne. (Mt. 13:4-8) Masaka a mundduni ahikalawo attu enjene ahirumelile dhaloga Yezu—masiki Yezu akalaga namasunziha munddimuwa! Nona kunyimuwe akala muttu wamukoseli weyo elobo-txilobo wila omukamihedhe karumelile ebaribari.

19. Dhopurelamo dhinkanihu nigalagihaga ntanalelo mmalaleyoni sivi?

¹⁹ Wazuzumela attu omalaleyoni onodhana dhopurelamo dhinjidhene. Mabasaya anonagalaliha. Ninele wona wila ovaha onottabiha opitta ovahiwa. Nikana gari ya wasunziha ebaribari abale “athomeliwe egumi yamukalakala” wi arumele miselu dhapama. (Mer. 13:48) Nona “mudhidhi wotene onwodhihu nawirele dhapama athu etene.” (Gal. 6:10) Dhahene ninele wagalala mwaha wa omuttittimiha Babihu wawirimu.—Mt. 5:16.