NSUNZO 11
Kavuruwana Lizu na Yehova
“Oddu ddimwanaga . . . Munvuruwanege.”—MT. 17:5.
JIBO 6 Nlobelo na Mudhari wa Mulugu
DHINASUZE IYO *
1-2. (a) Yehova olabihedhi nni wila aloge na attu? (b) Txini enasekeserhe iyo mwari mwa mutoma obu?
YEHOVA onoziveliwa vaddiddi ologa na iyo. Masaka a mundduni iyene wahalabihedha anamavuhulela, anju, vina mwanaye Yezu wila aloge na attu. (Am. 3:7; Gal. 3:19; Ovuh. 1:1) Masaka abano, Yehova onloga na iyo alabihedhaga Nzu naye, Bibilia. Modhela Bibilia enowodheya oziwa enubuweliye vina mukalelo onkosiye dhilobo.
2 Yezu bali velaboni ya vati, Yehova wahiloga na iyene ovenyedha wirimu dila dhowakwana ttaru. Ninfuna nisekeserhe elogile Yehova na Yezu, ninsunzavo nni na mazu aye vina ninapuremo nni na elogiliye.
‘WEYO OLI MWANAGA WOKWELEYA’
3. Ninga munlogela nivuru na Marko 1:9-11, Elobo gani elogile Yehova mudhidhi obatiziwe Yezu, mazu aba anakwanihedha elobo gani?
3 Nivuru na Marko 1:9-11 ninologa dila yoroma elogile mwinyene Yehova ovenyedha odhulu. (Kengesa.) Iyene ohiloga: “Weyo oli mwanaga onimukwelitximi, onziveliwanemi.” Kobuwela mukalelo wewilemo Yezu lizu na Babe nilogaga wi onimukwelitximi! Mazu a Yehova anowakwanihedheya dila ttaru ttangwi ya dhologa dha Yezu. Dila yoroma enloga wi Yezu ddi Mwanaga. Dila yanawili enloga weyo oli Mwanaga wokweleya. Dila Yaneraru enloga wi oddu ddi Mwanaga onziveliwanemi. Ovano ninele osekeserha modha-modha.
4. Mmalile Yezu obatiziwa wiwanana gani wina odhile woneya?
4 “Weyo oli Mwanaga.” Mazu aba anlagiha wi Yehova wannimukwela mwanaye, vina anowoniha wiwanana oswa wa Yehova na Mwanaye. Vali Yezu wirimu iyene wali mwana wa Mulugu womuyani. Mmaleliye obatiziwa iyene ohisadduwa bakala mwana wa Mulugu wottikitteliwa na muya wokoddela. Mudhidhine obule, Yezu ohittomiwa ninga Mwana wottikitteliwa, etonyihedhaga wi kowiyelela wirimu agahittomeliwa okala mwene wa Omwene wa Mulugu vina Namakutta Munddimuwa. (Lk. 1:31-33; Aheb. 1:8, 9; 2:17) Mmalile Yezu obatiziwa Babe wahikaana ttima yologa: “Weyo oli mwanaga.”—Lk. 3:22.
Nigatamaleliwa vina nigalibihiwa ninoziveliwa (Koona ddima 5) *
5. Ninamutagihe dhavi Yehova na mazu alogiliye na mwanaye wi onimukwelitximi?
5 “Weyo oli . . . onimukwelitximi.” Yotagiha eji ya Yehova yologa wi onimukwelitximi enonisunziha elobo, ya watamalelena obe walibiha attu ena. (Jo. 5:20) Nigakela ntamalelo na muttu mwina obe akala attu ena anotonyihedha onikwela, ejo enolibiha enonivaha ttima. Na mukalelo wakene, abalihu na arogora a mmulogoni otaganyiha na anamudhi anofuna vina otonyihedhiwa okwela na olibihiwa. Nigatamalela attu ena, ninowaraliha nroromelo nawa vina ninowakamihedha odhowavi bagamulabela Yehova na ororomeleya. Amambali anofuniwana walibiha anawa. Akala amambali anowalibiha aniwa atonyihedhaga okwela, enela okamihedha wunuwa wawa wa muyubuweloni.
6. Ninfwanyelela nni omukuluvela Yezu Kristu?
6 “Weyo oli onziveliwanemi.” Na mazu aba Yehova ohoniha wi onomukuluvela Yezu kakamwe, kana yowaganyedha yawi iyene agamusadduwela. Akala Yehova onomuroromela Mwanaye, iyo vina ninofwanyela ororomela wi iyene onele wakwanihedha dhogana dha Yehova. (2 Kor. 1:20) Nigatanalela yotagiha ya Yezu, iyo ninela owaraliha masunziho ehu vina ofwara ttarho dhaye. Vowi Yehova onomukuluvela mwanaye, iyene onowakuluvela vina adhari aye ororomeleya wi anele odhowavi asunzaga dhotagiha dha Mwanayeya.—1 Ped. 2:21.
“MUNVURUWANEGE”
7. Mowiwanana na Mateu 17:1-5 dila yanawili elogile Yehova ovenyana wirimu jivi, nanda ologile nni?
7 Kengesa Mateu 17:1-5. Dila yanawili elogile Yehova ovenyana wirimu mudhidhi ‘osadduwile’ Yezu. Iyene wahimoba Pedro, Tiago na Joau wila adhowe omwangoni. Oraru awonihiwa elobo yotikiniha. Kove ya Yezu yang’animela ninga nzuwa, dhabalo dhaye dhanzerimela. Alobwana eli Mizé na Eliya anloga na iyene mwaha wa okwa na ovenyihiwa mukwani. Anamafwara aba araru “attiddiwa nikove” muvenyelani ahoona ezinddiyelo yina yotikiniha. (Lk. 9:29-32) Vasogorhova, akuneleya na mirabo dhozerimela, mmurabonimwa mwahiweya nzu—nzuna nali na Mulugu! Ninga epadduwile mudhidhi wabatiziwa Yezu, Yehova wahiloga wila onomukwela vina onoziveliwana, nona Yehova wahiloga: “Oddu ddi mwanaga wa vamurimani vaga.” Yehova owenjedhedha “Munvuruwanege.”
8. Yowonihiwa yampattile dhavi Yezu na anamafwara aye?
8 Woonihiwa oku ontonya guru egakanile Yezu koroma olamulela ninga Mwene wa Omwene wa Mulugu. Iyene wahinvaha Yezu guru sabwani wahalewo mudhidhi mung’onovi wila atabutxiwe mpaka opiwa ninga timbwini. Ehakamihedha vina anamafwara a Yezu sabwani agafwanyiwa yoweha enddimuwa musogorho. Osadduwa wa Yezu elobo emutikinihile Pedro ofiyedha oleba njangarha muvirelani vyaka dhowakwana 30.—2 Ped. 1:16-18.
9. Malago gani avahile Yezu anamafwara aye?
9 “Munvuruwanege.” Yehova ohiloga wila ninvuruwanege vina niwe dhinloga Mwanaye. Yezu ologile nni valiye velaboni ya vati? Iyene ologa, jamakamaka omwiwelela! Motagiha, iyene ohasunziha anafwara aye olaleya miselu dhapama, vina ohiyelela wahubutxa wi akale mento. (Mt. 24:42; 28:19, 20) Iyene ohalibiha wi avilibihedhege. (Lk. 13:24) Yezu ohapanga anamafwarha aye wila anfwanyela wakwela attu ena, akalege mumodhani ewelelege magano aye. (Jo. 15:10, 12, 13) Yezu wahavaha anamafwara aye malago olabihedheya! Jamakamaka iyo vina olabihedha masaka abuno.
10-11. Ninatonyihedhe dhavi wila ninowiwa nzu na Yezu?
10 Yezu ohiloga: “Oneddana ebaribari, onowiwa nzu naga.” (Jo. 18:37) Iyo ninotonyihedha wila ninowiwa nzu na Yezu modhela ‘ovilelana, vina olevelelana dila dhotene dhinttegelana iyo.’ (Kol. 3:13; Lk. 17:3, 4) Ninowoniha wila ninowiwa nzu na Yezu modhela olaleya miselu dhapama “midhidhi dhotene, dhinziveliwa athu peno dhihinziveliwani.”—2 Tim. 4:2.
11 Yezu ohiloga: “Mabilaga anovuruwana nzu naga.” (Jo. 10:27) Anamafwara a Yezu ottiya wiwavi nzu naye, anovirihamo. Awene kanttiya wila ‘dhofuna dha mwigumini’ dhazuzumihe. (Lk. 21:34) Mwawene, elobo yamakamaka wiwelela nzu na Yezu masiki agafwanyiwa makattamiho. Abali enjene anotabuwa mwaha wa ofwarafwariwa, oyelega, ottekenyeya wa elabo, mpulo obe pevo yamutokora. Masiki afanyiwaga makattamiho ninga aba kaniyelela mundduni anodhowavi amulabelaga Yehova. Yezu ohalibelela attu aba: “Onakele magano aga, avirihamo, oddu onoddikwela txibarene. Onddikwelayá, onokweliwa na Babaga, onokweliwa na miyo vina; miyo ddinovyoniha wa iyene.”—Jo. 14:21.
Olaleya ononikamihedha wiwa lizo na Yehova (Koona ddima 12) *
12. Mukalelo mwina ontonyihedha iyo wila ninovuruwana Yezu buvi?
12 Ohikalawo mukalelo mwina wotonyihedha wila ninonvuruwana Yezu: warumela abale attomeliwe na Yezu wila anisogorhele. (Aheb. 13:7, 17) Mwa vyaka dhomariha, mmulogoni mwa Yehova muhisadduliwa dhilobo gwé, nihikana mikalelo na dhipano dhiswa dholaleyana, mmatugumanoni ehu a sabuddu ninottambirha maswagiho maswa a mukalelo wa omaga obe ovenyihedha Numba Dhomwene. Ninotamaalela vaddiddi na malago aba okwela! Nigavilibihedha ofwara matxinjo aba maswa, Yehova onele oniruriha.
13. Maruriho gani angumanana iyo nigamwiwaga Yezu?
13 Nigavuruwana dhotene dhinloga Yezu dhintadela iyo dhinosogora. Yezu wahapanga anamafwara aye wi, wiwa dhinasunziha iyene dhinele walibiha. Ohiloga: “Dhahene munofwanya osanzaya,” owenjedhedha: “Kanga yaga kunwoma, muthorho waga kunlemela.” (Mt. 11:28-30) Munzuni na Mulugu, munofwanyeya mittaka minai dhinloga dha egumi na mabasa olaleya a Yezu; annagalaliha, annikamihedha ovadda omuyani vina annivaha eziwelo. (Masal. 19:7; 23:3) Yezu ohisunziha: “Agari thabwa-thabwa babale aniwa nzu na Mulugu, avirihagamo.”—Lk. 11:28.
‘DDINOTTITTIMIHA NZINA NAGA’
14-15. (a) Mowiwanana na Joau 12:27, 28, dila yaneraru elogile Yehova na Yezu ovenyana wirimu jivi? (b) Mazu a Yehova ampangarhazile vina amulibihile dhavi Yezu?
14 Kengesa Joau 12:27, 28. Muttaka wa Joau onologa dila yaneraru elogile Yehova ovenyana wirimu. Ahalagawo malabo mang’onovi wila Yezu apiwe, wali o Jeruzalemi ajaga mattanga a Paskwa. Venevo Yezu ohiloga: “Apa murima waga onoddiparhuwa.” Nona balobela: “Babani thithimihani nzina nenyu.” Yehova wahirumela ovenyana wirimu: “Ddimala othithimiha, ddinothithimiha vina.”
15 Yezu walogeli wila murima waye onomparhuwa sabwani wahittomeliwa mabasa menjene nona iyene wanfwanyela odhowavi bagamuroromela Yehova. Wanziwa wila agahitabutxiwa mpaka opiwa ninga timbwini. (Mt. 26:38) Masiki apadduweliwe dhilobo dhowopiha ninga esi, elobo yamakamaka yafuna Yezu yali ottittimiha nzina na Babe. Yezu wahisuttiwa vina dhanlogiwa dhilobo dhamunyimula Mulugu. Iyene kafuna wila Yehova apigidhiwe na dhilobo dhalogeliwiye, nona wahagalala na mazu alogile Mulugu! Yezu wahikana ebaribari wila nzina na Yehova ninele ottittimihiwa. Mazu a Mulugu ahimpangarhaza wi awodhe okwaranya makattamiho ajedheliye. Mudhidhi obule enkala ninga ononelimo mazu alogile Yehova wali Yezu bahi, mbwenye Yehova ohikamo mazu aba wila iyo nipurelemo.—Jo. 12:29, 30.
Yehova onele ottittimiha nzina naye vina onele ovuna nlogo naye (Koona ddima 16) *
16. Dhilobo gani dhinnizuzumiha mwaha wa nzina na Yehova?
16 Moligana na Yezu, iyo kaninfuna wila nzina na Yehova nipigidhiwe. Ninga Yezu iyo vina ninopujiwa. Ninodha wiwa miselu dhottambi dhinvavihiwa mwaha wa iyo. Dhilobo esi dhinonisilidha sabwani ninopigidha omuttu wa Yehova vina mulogo. Dhigapadduwa dhilobo esi mazu a Yehova anonilibiha. Vina kanizuzume. Nubuwele mazu anloga “murenddele wa Mulugu, onpitha thontho ya muthu, onere okoya mirima na mobuwelo enyu, vowi muli mumodhani na Yezu Kristu.” (Fil. 4:6, 7) Yehova kanavonye onele ottittimiha nzina naye. Iyene onele olabihedha Omwene waye wi agomihe obure wotene onatatamulela Satana na elabo yaye alabeli a Yehova.—Masal. 94:22, 23; Iza. 65:17.
YOPURELAMO ENDANA LIZU NA MULUGU MASAKA ABANO
17. Mowiwanana na Izaiya 30:21 ninalabihedhe dhavi miselu esi wi ninvuruwane Yehova?
17 Yehova onologa na iyo masaka abano. (Kengesa Izaiya 30:21.) Ebaribari wila kannimwiwa alogaga mwinyene ovenyedha wirimu. Iyene oharuma attu wila alebe nzu naye, mBibiliani, Yehova onolabihedha nzu ntti wila anisunzihe. Ottiya ejene onomulabihedha “mwimeleli wororomeleya, wamalago” wi anivahe yoja yomuyani. (Lk. 12:42) Ninottambirha yoja yomuyani ninga manivuru opiddiwa obe ali mu online, miselu dhawona ninga mavidiyu vina dhovuruwana!
18. Wubuwela nzu na Mulugu enkamihedha dhavi nroromelo nawo vina oliba wawo murima?
18 Ninofwanyela wubuwela mazu alogile Yehova na Mwanaye agali velaboni ya vati! Elogile Yehova enofanyeya mBibiliani vina enonikamihedha okana ekuluvelo ya wila iyene onoweeddiha dhotene deretu, onele osasanyedha obure wetene otatamulile Satana na elabo yaye. Nisakule wiwa lizu na Mulugu. Nigakosa dhahene ninele owodha okwaranya makattamiho anagumanena iyo. Bibilia ononubutxedha wi: “Enujombelani ntidi, wi muwodhe wira enufunanina Mulugu, mudhé wakela eroromelihileye.”—Aheb. 10:36.
JIBO 22 “Yehova Mukumbuzi Waga”
^ par. 5 Vali Yezu velaboni ya vati, Yehova wahiloga ovenyedha odhulu dila ttaru. Dila yoroma, Yehova wahawaddela anamafwara a Kristu wi anvuruwanege Yezu. Masaka abano Yehova onologa na iyo modhela Nzu naye, vamodha na wiwelela mweddihedho wa nikuru naye. Mwari mwa mutoma obu ninele osunza yopurelamo ya onvuruwana Yehova vina mwanaye Yezu.
^ par. 52 FOTO YA NIKUKU: Munddimuwa wa mmulogoni onomwang’ana mbali onlaba ninga mudhari worumeliwa mmulogo, akuputtaga Numba Yomwene vina alabaga omperhekiwa manivuru. Munddimuwa wa mulogo onomutamalela.
^ par. 54 FOTO YA NIKUKU: Atelani a elabo ya Serra Leoa anonvahedha namattadda niwobo na matugumano.
^ par. 56 FOTO YA NIKUKU: Anamoona a elabo ankoddihiwa mabasa ehu, atugumanaga mba. Awene abalile guwo dhihili dhomatugumanoni wila anahoniwe.
