1. Adamu na Eva ayeleli nni, nanda yodhavoya jivi?

WEYO ononamo dhavi mwaha wa magano anziwiha opama n’obure? Adamu na Eva mujelani mulima wa muri onziwiha opama na obure, yali ninga ologa: Iyo kaninfuna omwiwelela Yehova na magano aye. Ahisakula magano awa akamihedha oziwa opama na obure. (Wita 3:22) Katanalela eyelelani. Awene ayelela omaro wanani na Yehova. Ayelela gari ya okalawo namukalakala mwilaboni eswa musogorho, aharaviha anawa ottega na okwa. (Rom. 5:12) Yosakula ya Adamu na Eva ehattukulela vangovini.

2-3. (a) Elobo gani ekosile mukadda Etiópi mumaleli Filipi omulaleyela? (b) Nigamala obatiziwa ninttambirha maruriho gani, mavuzo anasekeserhe iyo bavi?

² Mottiyana na Adamu na Eva, mukadda Etiópi valaleyiwiye na Filipi iyene wahirumela. Mukadda Etiópia wahitamalela emukoseli Yehova na Yezu nona momaguva-mwene wahikumbirha obatiziwa. (Mer. 8:34-38) Iyo nigamperhekela egumi yehu Yehova, ninga ekosile mukadda Etiópi nanda banibatiziwa ninowoniha wi ninofuna omulabela Yehova. Ninowoniha vina wila ninotamalela enikoseli Yehova na Yezu. Ninotonyihedha wi ninomuroromela Yehova nanda ddiyene bahi ona ewodhelo yonivaha magano anniziwiha eli yapama na yabure.

³ Kobuwela maruriho anttambirha iyo sabwa yomulabela Yehova! Iyo nihittambirha dhilobo dhotene dhiyeleli Adamu na Eva, ofiyedha gari yokalawo namukalakala. Sabwa yomuroromela wehu Yezu Kristu, Yehova onolevelela dhoddawa dhehu vina ononivaha mubuwelo wotxena. (Mt. 20:28; Mer. 10:43) Iyo ninokosa mpaddi wa murala wa Yehova  ninodha ojavo ofuru musogorho. (Jo. 10:14-16; Rom. 8:20, 21) Masiki na mareliho ninga aba akalawo attu anfiyedha omuziwa Yehova mbwenye anorutxiwa osanza yotagiha ya mukadda Etiópi. Elobo gani enakoddiha obatiziwa? Awene anawodhe dhavi opemberha makattamihoya?

4-5. Makattamiho gani agumanana azombwe aba Avery na Hannah?

⁴ Ojombeliwa nikuluvelo. Avery amambali aye Anamoona a Yehova. Mweddelo wa babe kunsumuleleya, onowaweddiha attu ena n’opama vina munddimuwa wa mulogo oli yotagiha yaderetu. Mbwenye ehikalawo elobo yambarela Avery obatiziwa. Eloboya ejo txini? Iyene ohiloga, “miyo kaddavonana ewodhelo yokosa dhilobo ninga munkosela papayaga.” Iyene wobuwela wila kanawodhe weddiha mabasa anavahiwiye musogorho. Avery owenjedhedha: “Ddinele wova ddigakumbiriwa wila ddikose nlobelo vari va anamwinji, okosa diskursu vina waweddiha abali mmabasani olaleya.”

⁵ Hannah, ona vyaka dhowakwana 18 ohitabuwa vaddiddi sabwa yotowa nikuluvelo. Iyene oleliwe na amambali amulabela Yehova. Wanaganyedha akala agawodha weddana magano a Yehova. Sabwaya? Sabwani wannivipwaza vaddiddi. Mudhidhi mwina wannivitabutxa yovene, okosa dhawene yanttabwiya wiwopa waye. Ohiloga: “Miyo kaddamwaddela muttu yakosa miyo, masiki na amambali aga,” owenjedhedha, “miyo kaddajedhela wila Yehova agahiddifuna ninga mulabeli waye sabwa ya dhilobo dhavikosela miyo.”

6. Txini yambarela Vanessa obatiziwa?

⁶ Nipakelo na mandano. Vanessa, ona vyaka 22, ologa: “Miyo ddahikana mukwaga waziveliwana miyo, wamuziwilemi wale.” Mukwaye wa Vanessa kamukamihedha okana yogana yobatiziwa. Mandano aba ahimunonga Vanessa, iyene ohiloga: “Miyo ddinona ninga enoddirutxa okana amarho, vina enoddirutxa ogwadda mandano aga, miyo kaddana njedhelo n’okana mukwaga ninga o’lene.”

7. Muyana wamuzombwe onkuweliwa Makayla wova nni?

⁷ Yottega enddimuwa. Makayla muyana ona vyaka 21 dhobaliwa, vaniye vyaka dhowakwana 5 mbalaye wamulobwana wahittamagihiwa mmulogoni. Munuweliye, wanova okosa yakene yakosile mbale. Iyene ohiloga: “Miyo ddanova obatiziwa,” owenjedhedha, “sabwani miyo kottega baddittamagihiwa  mmulogoni, ddigahittabwiha okubanya wa amambali aga.”

8. Muzombwe onkuweliwa Miles wovela nni?

⁸ Wova ofwarafwariwa. Miles ona vyaka dhowakwana 22 babe na madarastaye animulabela Yehova, mbwenye maye ombalile kali Munamoona. Iyene ohiloga: “Miyo ddakala na mmani mwari mwa vyaka 18,” ohiloga vina “ddanova omwaddela wila ddinofuna obatiziwa. Miyo ddahimona wi wahinyonyeya vampangile papa wila onfuna akale Munamoona. Ddanimova wila anadditotele makani.”

9. Txini enapadduwe ogasunza okwela na ovilela wa Yehova?

⁹ Adamu na Eva kasakulile omulabela Yehova sabwani konuwihile omukwela wawa Mulugu. Masiki dhawene, Yehova wahattiya okalawo mwa mudhidhi wofwanyelela wi abale aniwa vina a’lele ninga mwafunelani. Awene ahikoodda nikamihedho na Yehova, movira wa mudhidhi Mulugu wahooniha wi yosakula yawa yali y’otolo. Mwana wa muttaji wa Adamu na Eva wahimpa mbalaye mung’onoyá nanda otimbwini na omukumbela-vaye ohidhala mwilaboni. (Wita 4:8; 6:11-13) Masiki dhahene Yehova onowavuna ana Adamu na Eva ansakula omwiwelela. (Jo. 6:38-40, 57, 58) Akala onodhowavi bugasunza mwaha wa okurumuwa wa Yehova na mukalelo oli okwela wa Yehova, omukwela wawo onele wunuwa momaguva. Weyo enele okodda ofwara yirile Adamu na Eva busakula omperhekela Yehova egumi yawo?

10. Nivuru na Masalmo 19:7 ninawukamihedhe dhavi omulabela Yehova?

¹⁰ Kadhowagavi bugasunza mwaha wa Yehova. Mudhidhi onunuwiha weyo omuziwa wawo Yehova onele opurelamo ttangwi ya omulabela. Avery ologiwe ddima evirile ohiloga: “Ovano ddinororomela sabwa ya wengesa na otanalela nipikirelo ninfwanyeya va Masalmo 19:7.” (Kengesa.) Avery moneliliye mukalelo onakwaniha Yehova dholibela dhaye, omukwela waye ohunuwa  vaddiddi. Okwela ononikamihedha okana nikuluvelo vina omwiwelela Yehova na dhinfuniye. Hannah ologiwe ddima evirile ologa: “Sabwa ya omwengesa Biblia na nsunzo nomunya, dinonelamo wila ddivitabutxa vina ddimunyimula Yehova.” (1 Ped. 5:7) Hannah ovanene onovirihamo ‘Mazu a Mulugu.’ (Tia. 1:22) Yopurelamoya jivi? Iyene ologa: “Ddigamwiwelela Yehova ddinopurelamo, ddinowunuwiha omukwela waga Yehova. Ovanene ddikana ebaribari ya wila Yehova onele oddikamihedha ddigamukumbirha vina onele oddeddiha mudila mwaye.” Hannah okwaranya makattamiho yovitabutxa iyene oviperheka wi abatiziwe.

11. Vanessa okosileni wila akane amarho aderetu, weyo onsunzavonni?

¹¹ Wasakule amarho awo neziwelo. Vanessa ologiwe mundduni, wahinonelamo wi mandano aye kagamukamihile omulabela Yehova. Noona, Vanessa okosa guru ya ogomiha mandano aniye. Iyene ohatamela amarho ena a mmulogoni. Ohiloga wi yotagiha ya Nowé na amudhaye emukamihedha. “Mudhidhi obule attuya kamukwela Yehova,” iyene ohiloga “masiki dhawene Nowé na amudhaye ahikana mandano aderetu.” Mmalele obatiziwa Vanessa, ohivolowa mmabasani a opionero. Iyene onologa: “Ejo eddikamihedha okana amarho mmulogoni mwaga vina mmulogoni dhina.” Weyo ogavilibihedha omulabela Yehova onele okana amarho aderetu.—Mt. 24:14.

12. Wova gani wakoddile okana Adamu na Eva, nanda txini edhile wapadduwela?

¹² Wang’ananihe wova wawo. Dila dhina okana mubuwelo wa wova elobo yaderetu. Motagiha, ohikalawo wova wa ottawa omuttegela Mulugu. (Masal. 111:10) Keliwa Adamu na Eva animova Yehova awene agarabela onvanya. Mbwenye vowi kamova, kamwiwelele. Mmalelani omusadduwela, mento awa ahifuguwa, ahinonelamo wi ahittega. Ahifiyedha wattapuliha aniwa ngovi yottega vina okwa. Mmalele awene ononelamo deretu ekalelo yalani, Adamu na Eva ahikana manyazo vina oziwa noona ahivikunela na mataba.—Wita 3:7, 21.

13-14. (a) Mowiwanana na mazu aba anfwanyeya va 1 Pedro 3:21, Ninkoddelani ottiddiwa wova onddimuwa obe ottamagiwa marimaddi wi ninakwe? (b) Txini ennittukulela omukwela Yehova?

 ¹³ Jofuneya omova Yehova, mbwenye kanikane wova wottabwa ninga motagiha wova okwa. Yehova onfuna wila iyo nikane egumi yohimala. Nona Wahinivaha yobolo. Iyo nigattega banitxinuwa-wene Yehova onele onilevelela, ninofwanyela ororomela woboleliwa wehu onivahile Yehova modhela mwanaye. Mukalelo mmodha wolagiha nroromelo omperhekela Yehova egumi yehu banibatiziwa.—Kengesa 1 Pedro 3:21.

¹⁴ Iyo nihikana mwaha dhinjidhene dhinnittukulela omukwela Yehova. Ottiya onivaha dhilobo dhaderetu labo-labo, Yehova ononisunziha mukalelo eli iyene na efunelo yaye. (Jo. 8:31, 32) Yehova ohinivaha mulogo wila oneddihe vina onikamihedhe. Iyene ononikamihedha okwaranya makattamiho angumanana iyo masaka abano, ohilibela wila ninele okana egumi yohimala musogorho. (Masal. 68:19; Ovuh. 21:3, 4) Nigatanalela dhilobo dhotene dhinnikosela Yehova wila anitonyihedhe onikwela waye ejo enonittukulela iyo vina omukwela iyene. Okwela oku ononikamihedha okana wova wofwanyelela. Wova omuttegela oddule onimukwelitxihu.

15. Txini emukamihedhile Makayla okwaranya wova waye?

¹⁵ Makayla ologiwe mundduni, ohiwodha okwaranya wova waye nanda wahidha ononelamo olevelela wa Yehova. Ohiloga: “Ddihinonelamo wila miyo ddili muttu wohiligana vina ddinele oddawa. Mbwenye ddinoziwa wi Yehova ononikwela onele olabiyedha yobolo wila alevelele dhoddawa dhehu.” Omukwela waye Yehova omuttukulela omperhekela egumi yaye, babatiziwa.

16. Elobo gani emukamihedhile Miles okwaranya wova waniye?

¹⁶ Miles, wamova mamayaye anadhe amukoddihe obatiziwa, wahikumbirha nikamihedho na nameddelela milogo. Miles ohiloga: “Nameddelelaya vina waleliwe na murala wogaweya ninga miyo.” “Iyene wahiddikamihedha wubuwela enamwaddele miyo mmani, ddanfwanyela omwaddela wila kali papa waddikokela obatiziwa, mbwenye yali yosakula yaga.” Mumpageliye esene maye, kaziveliwe-wene. Mvireli mudhidhi, Miles wahimwala vatakulu, keyelile mundduni na yosakula yaye. Miles ohiloga: “Dddihisunza wila Yehova ohiddikosela dhilobo gwé, oziwa ejene eddiginya murima waga.” Mutanalelimi mukutto wa yobolo oniperekele Yezu ddihunuwiha ononelamo waga wi Yehova onoddikwela. Nona baddimperhekela Yehova egumi yaga baddibatiziwa.

17. Gari gani ena iyo?

¹⁷ Mwajeli Adamu na Eva musapo wa muri  waziwiha opama na obure, ahimusadduwela Yehova. Adamu na Eva mmuttegelani Yehova, ahoniha wi kavaha ttima dhilobo dhapama dhavahile Yehova. Iyo vina nikaana gari ya woniha wi yosakula ya Adamu na Eva kifwanyelele. Obatiziwa wehu onowoniha vamentoni va Yehova wi ddi iyene ona onddimuwa wa olamula eli yapama na eli yabure. Iyo vina ninowoniha wi ninomukwela Babihu webaribari Yehova.

18. Onafwanye dhavi ohagalala na omulabela wawo Yehova?

¹⁸ Makattamiho angumanana iyo nigamala obatiziwa, anoniha wi jofuneya ofwara magano a Yehova siku na siku. Attu enjene an’eddiha dhawene egumi yawa mwari mwa vyaka dhinjene. Weyo vina onele owodha watagiha awene akala onodhowavi otamelaga ononelamo Nzu na Mulugu, Bibilia, vina otamelaga otugumanaga na abali vina ovilibihedhaga wawaddela attu ena esile dhinsunza weyo sabwa ya Mulugu. (Aheb. 10:24, 25) Ogafunaga okosa yosakula oromege otanalela malago a Yehova anfwanyeya mBibiliani vina nikuru naye. (Iza. 30:21) Ogeragana dhawene dhetene dhintadela weyo dhigansogora.—Gano 16:3, 20.

19. Elobo gani enfwanyela weyo otanaalela nanda sabwaya jani?

¹⁹ Oziwe wi ogafwara Magano a Yehova, oderetuwa kwawo-wamwinya, onele owodha wunuwiha omukwela wawo vina Malamulo aye. Kinakalewo elobo enakose Satana wi auttiyihe omulabela Yehova. Karoma oviwubuwela wamwinya bukalilewo vyaka mazana menjene. Ovano ogang’ana mundduni onowodha ononelamo wi yosakula yawo ya obatiziwa elobo yaderetu.