1. Nlago gani nofwanyelela navahile Yezu anamafwara aye? (Kang’ana foto ya kapa.)

OMATTIYU womariha ahinakwa, Yezu wahavaha anamafwara nlago nofwanyelela. Iyene wahiloga dhahi: “N’ekalelo yukwelilenina miyo, nyuwo vina mukwelanege.” Osogorhowa wahenjedhedha dhahi: “Mugakwelanaga, athu etene anoziwa wi muli anamasunza aga.”—Jo. 13:34, 35.

2. Ekalele nni yamakamaka olagiha okwelana muttu na mukwaye?

² Yezu wahiloga wi anamafwara aye agazinddiyeliwe kotonyihedha okwela na mukalelo walagihiliye. Malago aba bofuneya nsaka nttino dhahene ninga mwakalelani ofuneya vyaka zana dhoroma. Masiki ekalaga yorutxa, ninofwanyela ovilibihedha olagiha okwela!

3. Txini enasunzehu na mutoma obu?

³ Sabwa yokala attu ottega ninorutxiwa olagiha okwela na murima wotene. Masiki dhawene, ninofwanyela ovilibihedha wi nimutagihe Kristu. Mwari mwa mutoma obu ninele osunza mukalelo onanikamihedhe okwela, okala attu antamela murenddele, ohikana nsakulano vina okala anamakela aleddo. Ogasunzaga makani aba, ovikose nivuzo ntti: ‘Ddinsunzavo eni na yotagiha ya abali vina arogora alagihilevi okwelana masiki na makattamiho agumanilanina?’

4. Mowiwanana na Mateu 5:23, 24, ninfwanyelela nni otamela murenddele na mbali onniddawela?

⁴ Yezu ohinisunziha wi enofuneya otamela murenddele na mbali onniddawela. (Kengesa Mateu 5:23, 24.) Iyene ononihedhamo wi ninawodhe omwagalaliha Mulugu nigakaana mandano  apama na attu ena. Yehova onoziveliwa nigavilibihedha otamela murenddele na abalihu. Iyene kanarumeele webedha wehu nigamukoyela ntxiga muttu mwina obe nigakodda otamela murenddele.—1 Jo. 4:20.

5. Txini emurutxihile mbali dhahi otamela murenddele?

⁵ Enokalaga yorutxa otamela murenddele. Sabwaya? Koona empadduweli Mark. * Mbali dhahi wahinpambiha vina wahimuloga bure vari va abali ena a mmulogoni. Txini ekosile Mark? Iyene ohiloga: “Ddahisilidhiwa vaddiddi na iyene ofiyedha wakulana.” Osogorhowa, Mark wahitxinuwa, wahimutamela mbaliya wi amukumbirhe nlevelelo vina ateyihane. Masiki na ovilibihedha wa Mark mbaliya karumelile. Vamaromo, Mark wahubuwela, ‘Sabwaya jani entabuwela miyo otamela murenddele oku mukwagaya akoddaga?’ Mbwenye nameddelela milogo wahimulibiha Mark, okalela ntidi. Txini yakosile Mark?

6. (a) Mark ovilibihedhi dhavi otamela murenddele? (b) Mark ovirihilemo dhavi nlebo na Kolosi 3:13, 14?

⁶ Vasekeserhile Mark mukalelo waye wawubuwela, wahinonelamo wi wahikaana ekalelo yovisiba nona wanfwanyela oviyeviha. Iyene wahiziwa wi enofuneya otxinja mweddelo waye. (Kol. 3:8, 9, 12) Na oviyeviha Mark wahinfiyedha mbali oddule vina wahimukumbirha wili nlevelelo. Iyene wahimulebela makarta aloga wi wahitxinuwa vaddiddi na ejile yapadduwile nona wanfuna wiyelela wili mandano awa. Mark wamperhengeza mivaho dhoniye wi mbaliya agahiziveliwa. Mokubanyiha-mwene, mbaliya walivi wonyimuwene. Masiki dhawene, Mark wandowavi ewelelaga nikokomezo na omukwela mbalaye vina omulevelela. (Kengesa Kolosi 3:13, 14.) Masiki na ovilibihedha wehu wa otamela murenddele, attu ena txino kanarumeele. Mbwenye nigakala attu okwela ninga Yezu, ninele walevelela vina ninelege olobela wila nikane wili murenddele nawene.—Mt. 18:21, 22; Gal. 6:9.

7. (a) Yezu onikokomezile okosa eni? (b) Makattamiho gani orutxa agumanilena murogora dhahi?

 ⁷ Yezu ohinikokomeza waweddiha attu ena na mukalelo wakakene onfunihu wi neddihiwege. Iyene owenjedhedha wi kaninfwanyela wakwela bahi abale annikwela. (Lk. 6:31-33) Masiki ohijeedhelaga wi eji enele wupadduwela, txini enakosiwe akala mbali wa mmulogoni onowutxatxama vina onokodda wulejela? Jijene empudduweli Lara. Iyene ohiloga: “Murogora dhahi wanddika ekotti, miyo kaddaziwa sabwaya. Omatugumanoni ddadhowawo wokubanyene sabwani eji yanddisilidha.” Vamaromo, Lara wahubuwela: ‘Miyo kaddinimutanala, sabwani kaddimukoseli yabure. Abali a mmulogoni vina anoziwa wi murogora oddu muttu worutxa.’

8. Ttarho gani dhittukulile Lara wi atamelena murenddele, nanda txini enasunzihu na yotagiha yaye?

⁸ Lara ottukula ttarho dhotamelana murenddele. Iyene wahilobela wa Yehova vina wahidhowa ologa na murogoraya. Awene ahilogela makaniya, ahikubattana vina ahiteyihana. Dhotene dhakala ninga dhinowedda deretu. Lara onowubuwela: “Mbwenye osogorhowa, murogora oddule wahiyelela okosa dhakosiye wale. Eji yahiddikumula vaddiddi.” Vamaromo, Lara wobuwela wi agakanile wagalala murogora oddule kotxinja merelolo aye. Osogorhowa, iyene wahinonelamo wi yafwanyeliye okosa yali, omweddiha murogoraya na okwela vina ‘omulevelela.’ (Ef. 4:32–5:2) Lara wahubuwela wi Akristu ebaribari anna okwela “kankoya ntxiga. Onkwela, onoziwa wavunela etene, onoaroromela etene, onovilela dhetene.” (1 Kor. 13:5, 7) Lara wahikaana wili murenddele wa muyubuweloni. Na mudhidhiya, murogora oddule wahiroma omweddiha noderetu. Kakuluvela wi ogatamela murenddele vina ogakwelaga abali na arogora ‘Mulugu onvaha okwela na murenddele onele okalavi na weyo.’—2 Kor. 13:11.

9. Mowiwanana na Merelo 10:34, 35, sabwaya jani enfwanyelihu ohikana nsakulano?

⁹ Yehova kana nsakulano. (Kengesa Merelo 10:34, 35.) Nigakala attu ahina nsakulano,  ninowoniha wi nili anaye. Iyo ninowiwelela nikokomezo na wakwela attu ena n’ekalelo enivikwelihu nanya vina ninovilibihedha okanavi murenddele na amudhihu omuyani.—Rom. 12:9, 10; Tia. 2:8, 9.

10-11. Txini ekosile Murogora dhahi wi akwaranye dhubuwelo dhohifwanyelela?

¹⁰ Attu enjene akana nsakulano vaddiddi. Motagiha, koona empadduweli murogora oniliwa Ruth. Valiye namwali wahiwana na muttu wa elabo yina, makattamiho aba ahipatta egumi yaye. Eji yampattile dhavi? Ruth ohiloga: “Miyo ddannidda dhilobo dhotene dhewanana na elabo ejile. Ddobuwela wi attu otene a wenewale anna mubuwelo wakakene, masiki abali vina arogora.” Ruth okwaranyile dhavi dhubuwelo dhaye dhohifwanyelela?

¹¹ Ruth wahinonelamo wi yanfuneya owanana dhubuwelo dhaye dhohifwanyelela. Iyene wahengesa dhotagiha vina miselu dha Anuário dhaloga mwaha wa elabo ejile. Ruth ohiloga: “Ddahiroma okana monelo wapama mwaha wa attu a elaboya. Ddahoona wi abali na arogora a wenewo annimulabela Yehova na murima wotene. Ddahiziwelamo pama wi awene vina anokosa mpaddi wa abali a mwilaboni mwetemwene.” Vang’ono-vang’ono, Ruth wahinonelamo wi wanfwanyela watonyihedha okwela. Iyene ohenjedhedha: “Dila dhotene, vafwanyimi abali na arogora a elabo ejile ddanivilibihedha okala wofiyedheya nawene. Nanloga makani vamodha, nona ddahaziwa pama.” Txini edhile opadduwa? Ruth ohiloga: “Na mudhidhiya, ddahitxinja dhubuwelo dhaga dhohifwanyelela.”

12. Makattamiho gani anna murogora dhahi oniliwa Sarah?

¹² Attu ena anotonyihedha nsakulano oku ahiziwaga. Motagiha, Sarah, wobuwela wi kana nsakulano sabwani kaziveliwa wattonga attu ena sabwa ya ttebe, mukalelo wogumela kobiri obe ettomo enani mmulogoni. Mbwenye iyene ohiloga: “Ddahiroma wona wi mwarimwari, ddali muliba nsakulano.” Na mukalelo gani? Sarah obaliwe na anamudhi asunzile vaddiddi, nona iyene waziveliwa okosa omarho na attu asunzile ninga iyene. Sarah wahifiyedha omwaddela dhahi mukwaye: “Mbwana, miyo ddinedda na abali asunzile vaddiddi vina ddinowarabela abale ahisunzile.” Ebaribari, Sarah wanfwanyela otxinja mubuwelo waye. Na mukalelo gani?

13. Ninsunzavo eni na mukalelo otxinjile Sarah mobuwelo waye?

¹³ Nameddelela milogo dhahi wahimukamihedha Sarah wang’ananiha mobuwelo waye. Sarah ohiloga: “Iyene wahidditamalela sabwa ya ororomeleya vina eziwelo enimina ya mBibiliani na dhowakula dhinvahimi mmatugumanoni. Mmaleliye, wahitapulela wi vanunuwa eziwelo yehu, ninofwanyela vina wunuwiha mikalelo dha Okristu ninga oviyeviha, okurumuwa vina ttagaraga.” Sarah wahivirihamo esile dhaddeliwiye na nameddelela milogo. Iyene ohiloga: “Ddinonelamo wi elitxi yamakamaka ja okala attu apama vina okwela.” Yodhelavoya, Sarah wahiroma wavaha ttima abali na arogora. Sarah otapulelamo: “Ddahitamela ononelamo mikalelo dhinattukulela awene okala attu a ttima vamentoni va Yehova.” Kito iyo? Txipo kaninfuna wubuwela wi sabwa ya masunzo akosilehu nikana ttima opitta attu ena! Nigakwelaga ‘abalihu otene omuyani,’ ninele orabela nsakulano.—1 Ped. 2:17.

14. Mowiwanana na Ahebreu 13:16, Yehova ononamo dhavi nigakala anamakela aleddo?

¹⁴ Yehova onovaha ttima ekalelo ya wawakela aleddo. (Kengesa Ahebreu 13:16.) Iyene  onowona wi eji enokosa mpaddi wa webedha wehu, ttabwa-ttabwa nigakamihedha abale anjombeliwa. (Tia. 1:27; 2:14-17) Nona, Malebo anonikokomeza wi “zuzumelaní wawakela aleddo.” (Rom. 12:13) Ekalelo ya wawakela aleddo, entonyihedha wi ninowazuzumela abalihu, ninowakwela vina ninofuna omaga omarho nawene. Yehova onowagalala nigavahaga attu ena elobo-txilobo yomedhana mara ninga manje, txaya, arhimoso obe siyarhi vina mudhidhi na guru dhehu. (1 Ped. 4:8-10) Mbwenye dhihikalawo dhilobo dhina dhinnirutxiha okala anamakela aleddo.

15-16. (a) Sabwaya jani enakosiha attu ena ohikana ekalelo ya wawakela aleddo? (b) Txini emukamihedhile Edit okala namakela aleddo?

¹⁵ Txino ninokana manyazo wawakela aleddo sabwa ya mikalelo dhehu. Katanalela yotagiha ya mamukwela oniliwa Edit. Ahinatti okala Munamona wa Yehova, iyene kafunetxa ogumana na attu ena. Edit wobuwela wi attu ena anna mikalelo dhapama banwodha wawakela aleddo.

¹⁶ Mmaleliye okala Munamona, Edit wahitxinja mukalelo waye wawubuwela. Iyene wahittukula ttarho dha okala namakela aleddo. Edit ohiloga: “Vamagiwa Numba yehu Yomwene, munddimuwa mmodha wa mulogo wahiddaddela mwaha wa atelani agadhile okamihedha mabasaya, vina wahiddivuza akala ddigahiwodha wattambirha vatakulu vaga mwari mwa sumana bili. Ddahitanalela mukalelo wamururihile Yehova mamukwela w’o Sarefa.” (1 Amwe. 17:12-16) Edit wahirumela wawakela atelani abale. Koddi iyene wahakela mareliho? Iyene ohiloga: “Ottiya okalavo sumana bili, akalilevo myeri minli. Mwari mwa mudhidhi obule, iyo nahimaga omarho wofiyedhana.” Edit onowakelavi mareliho vowi okana amarho ofiyedheya mmulogoni. Ovano iyene pionera vina onoziveliwa wawobela vatakulu vaye abale ambudduwaga na iyene mmabasani a olaleya wila aje elobo-txilobo. Vasogorova iyene ohiloga: “Ovaha onoddikamihedha okana mubuwelo wapama! Mwebaribari, ddinowakelaga  mareliho menjene sabwa yokala namavaha.”—Aheb. 13:1, 2.

17. Txini yadhile ononelamo Luke na mwadhiye?

¹⁷ Masiki banilivi anamakela aleddo enofuneya wunuwiha ekalelo eji, mbwenye ninawodhe dhavi? Motagiha, Luke na mwadhiye atelani anna ekalelo ya wawakela aleddo. Mbwenye elemelelo yawa yali ya wawobela vanivawa amambali awa, amudhawa, akwawa ofiyedheya vina nameddelela milogo na mwadhiye bahi. Luke ohiloga, “Iyo nahinonelamo wi nawobela vatakulu vehu attu abale ofiyedheya bahi.” Txini yakosile Luke na mwadhiye wila onuwihe ekalelo ya wawakela aleddo?

18. Luke na mwadhiye aganile okosa eni wi onuwihe ekalelo ya wawakela aleddo?

¹⁸ Luke na mwadhiye ahitxinja mukalelo wawa mmalelani wubuwela mazu a Yezu awi: “Nyuwo mugàkwelaga anukwelani bahi munattuveliwe nni na Mulugu?” (Mt. 5:45-47) Awene ahinonelamo wi anfwanyela omutagiha Yehova, iyene onowatonyihedha opama attu etene. Nona awene ahigana wawobela vanivawa abali na arogora akoddani wawoba. Luke ohiloga: “Iyo notene ninopurelamo midhidhi esi dhinkalihu vamodha. Attu etene anolibihana vina anowagalala.”

19. Ninakose dhavi wila nonihe wi nili anamafwara a Yezu, nanda txini eganiliwe okosa?

¹⁹ Nihisunza wi otonyihedha okwela ononikamihedha okala attu antamela murenddele, ohikana nsakulano vina wawakela aleddo. Nona ninofwanyela okwaranya dhubuwelo dhohifwanyelela mmirimani mwehu vina wakwela abali na arogora na murima wotene. Nigakosa dhawene, ninele wagalala vina ninele woniha wi txibarene nili anamafwara a Yezu.—Jo. 13:17, 35.