1. Txini ennisunziha Kohelét 3:1, 7?

ENA mwa iyo anoziveliwa ologa vaddiddi. Enagu anoziveliwa okala womaalene. Nlebo na mutoma wa nsunzo ntti, ninotonyihedha wi ohikalawo mudhidhi wologa vina mudhidhi womala. (Kengesa Kohelét 3:1, 7.) Txino nigahifuna wi abali na arogora ena alogege venjene oku ena alogege vang’onovi.

2. Bani onnivaha magano apama mwaha wa mudhidhi wologa vina mukalelo onfwanyelihu ologa?

² Ologa mvaho wa Yehova. (Obud. 4:10, 11; Ovuh. 4:11) Bibilia ononikamihedha ononelamo mukalelo wolabihedha nofwanyelela mvaho obu. Mwari mwa mutoma obu, ninele osekeserha dhotagiha dha mBibiliani dhinanikamihedhe oziwa mudhidhi wologa vina womala. Ninele wona vina txini enubuwela Yehova nigalogaga na attu ena. Voroma, ndoweni none mudhidhi gani onfwanyelihu ologa.

3. Mowiwanana na Roma 10:14, mudhidhi gani onfwanyelihu ologa?

³ Ninofwanyela okala womala-nawale wi niwodhe ologa miselu mwaha wa Yehova vina Omwene waye. (Mt. 24:14; kengesa Roma 10:14.) Nigakosa dhahene ninomutagiha Yezu. Mwaha mmodha wamakamaka wadhele Yezu velaboni ya vati, wali wawaddela attu ena ebaribari sabwa ya Babe. (Jo. 18:37) Mbwenye kanidduwale, ninofwanyela okalela txenjewa mukalelo wehu wologa. Nona nigalogaga na attu ena mwaha wa Yehova, ninofwanyela okosa “na mukalelo woleleya, wanriho” vina ninofwanyela watonyihedha ntanaalo attu mwaha wa esile dhinrumeelani na dhinubuwelani. (1 Ped. 3:16) Nigakosa  dhawene kaninakalele ologavi bahi, ninele owodha ologa mazu anaddiginye mirima dhawa.

4. Ninga munlogela Gano 9:9, dhologa dhehu dhinakamihedha dhavi attu ena?

⁴ Anddimuwa a mulogo kanfwanyela okana manyazo a ologa agamona mbali obe murogora onfuna malago. Ebaribari wi awene anofwanyela osakula pama mudhidhi wologa vina orabela omutota manyazo muttuya. Awene anofwanyela otamela mburo wofwasa wi anazuzumihe attu ena. Anddimuwa a mmulogoni anofwanyela ovilibihedha ologa na mukalelo onlagiha wi anomuriha muttuya onloganina. Mbwenye kankana manyazo a watonyihedha attu ena magano a mBibiliani anakamihedhe wedda na eziwelo. (Kengesa Gano 9:9.) Ekaleleni yamakamaka oliba murima egakala yofuneya ologa na muttu? Ninele osekeserha dhotagiha bili dhottiyana; yoroma, ja mulobwana onfwanyela wasaddeya anaye; yanawili, ja muyana omusisigule muttu wafuna okala mwene.

5. Namakutta Munddimuwa Elí wavonyile mudhidhi gani wafwanyeliye ologa?

⁵ Namakutta Munddimuwa Elí, wahikana aima eeli abuwene akweliye vaddiddi. Ana Elí, kamuriha Yehova. Awene ahikana mabasa a makamaka sabwani alaba ninga anamakutta a mmusanani. Mbwenye awene alabihedha mwaburevi ettomo yanani kariha mikutto dhakutteliwa Yehova, vina ankosa mararuwo. (1 Sam. 2:12-17, 22) Mowiwanana na Nlamulo na Mizé, ana Elí anfanyela opiwa, mbwenye Elí wela walaga bahi vina wahattiya olabagavi mmusanani. (Olib. 21:18-22) Yehova wonamo dhavi ejile yakosile Elí? Iyene wahimwaddela dhahi Elí: “Onariyetxa anawo opitha miyo.” Yehova wahigana wapa alobwana abale oheli vowi ali abure.—1 Sam. 2:29, 34.

6. Ninsunzavo eni na ejile yakosile Elí?

⁶ Ninosunzavo elobo yamakamaka na ejile yakosile Elí. Nigamona marho obe mwanamudhi alupaga malamulo a Mulugu ninofwanyela ologana nimubutxedhaga magano a Yehova. Nomala ninofwanyela omwaddela wi atamele nikamihedho na abale avahiwe ettomo na Yehova. (Tia. 5:14) Txipo kaninfuna okala ninga Elí, narihaga amarho obe amudhihu opitta omuriha Yehova. Enofuneya oliba murima wila nimusisigule muttu onfuna osaddeyiwa, mbwenye nigavilibihedha ninokana yopurelamo yapama. Koona ottiyana olivo wa yotagiha ya Elí na muyana wa Mwizrayel wettaniwa Abigail.

7. Abigail watamelela nni ologa na David?

 ⁷ Abigail wali mwadhi mureli vina mwinya wa maddabo wettaniwa Nabal. David na alobwana aye amuttawaga Mwene Saul, ahimala mudhidhi mwinjene vamodha na akumbuzi a Nabal abarelaga mabila aye wi ambava aneye. Nabal wahitamalela nikamihedho nivahiweye? Nne. Vasongorhova mudhile David waruma alobwana aye wi adhowe amukumbirhe Nabal yoja na manje, iyene wahisilidhiwa vina waharuwana. (1 Sam. 25:5-8, 10-12,14) Txini edhile opadduwa? David wahigana wapa attu otene a ntakulu na Nabal. (1 Sam. 25:13,22) Bani agawodhile obarela ngovi yawopiha ninga eji yafuna opadduwa? Abigail wahinonelamo wi obule wali mudhidhi wafwanyeliye ologa. Nona noliba murima wahidhowa ologa na David bali na alobwana aye 400 asilidhiwe, apiwe dala vina ali namasupaddawa.

8. Ninsunzavo eni na yotweneagiha ya Abigail?

⁸ Abigail mufwanyeliye David, na oliba murima wahiloga na nriho, nona wahimuttukulela David otxinja yogana yaye. Abigail kaana muladdu, masiki dhahene wahikumbirha nlevelelo. Iyene wankuluvela wi Yehova agahimukamiyedha vina wanziwa wi David wahikana mikalelo dhapama. (1 Sam. 25:24, 26, 28, 33, 34) Ninga Abigail enofuneya oliba murima wila niloge akala ninomona muttu akosaga elobo yovirigana. (Masal. 141:6) Nikose na nriho vina noliba murima. Niganvaha muttu malago na okwela ninele olagiha wi nili amarho ebaribari.—Gano 27:17.

9-10. Txini enfwanyela anddimuwa a mulogo wubuwela agafunaga walaga attu ena?

⁹ Anddimuwa a mmulogoni anofwanyela oliba murima wi aloge na abali a mmulogoni ankosa elobo yovirigana. (Gal. 6:1) Na oviyeviha anddimuwa a mmulogoni anononelamo wi awene attu ohiligana nona na sikuna  anele ofuna ovahiwa malago. Masiki dhawenevi awene kanttiya wasaddeya abale anvirigana. (2 Tim. 4:2; Tito 1:9) Agamulagaga muttu, awene anolabihedha mvaho wologa wila amusunzihe na mukalelo wapama vina wovilela. Awene anowakwela abali, nona okwela onowattukulela okosavo elobo. (Gano 13:24) Mbwenye elobo yamakamaka enfwanyelani okosa omuttittimiha Yehova modhela ofwara malago aye vina obarela mulogo na mweddelo wabure.—Mer. 20:28.

¹⁰ Mpaka veneva nihoona wi jofuneya oziwa mudhidhi wologa. Mbwenye okalawo mudhidhi onoonihu wi jofuneya ohiloga elobwene obe okala womaalene. Makattamiho gani agapadduwile mudhidhene obo?

11. Nladdaniho gani nilabihedhi Tiago, nanda nikaleleni nofwanyelela?

¹¹ Elobo yorutxa wang’anela dhologa dhehu. Namaleba wa Bibilia Tiago, ohilabihedha nladdaniho niniwanana na makattamiho aba. Iyene ohiloga: “Muthu akala kanthega na mulomo, mmurimani mwaye pokoddela-mwene; onowodha weddiha mwili waye wotene. Iyo ninowerhekwekwa mujila omulómoni wa akavalo, wi anirumélege. Dhahene ninowodha omweddiha kavalo wetene.” (Tia. 3:2, 3) Kavalo onowerhekekiwa mujila vamusorho vina omulomoni. Nameddiha kavalo agawetaga nigangona onowodha omweddiha obe omwimetxa kavaloya. Akala nameddihaya kanttidda nigango, kavaloya onoroma wedda yeka avitotelaga ngovi vamodha na nameddihaya. Na mukalelo wakakene, akala iyo ninottiya wang’anela dhologa dhehu, ejo enodha otota makattamiho. Ndoweni none mudhidhi onfwanyelelihu “wang’anela nlumi nehu” vina okala womaalene.

12. Mudhidhi gani onfunihu “wang’anela nlumi nehu” vina okala womaalene?

 ¹² Onakose elobo gani akala mbali obe murogora onoziwa muselu ohinfwanyeliye wawaddela attu ena? Ninga motagiha, txino ogumanana muttu onkala mwilaboni munkoddihiwa mabasa ehu, weyo ogahifuna onvuza mukalelo oneddihiwa mabasaya mwilabonimwa mpo? Txino oninvuzela sabwa ya wazuzumela abaliya. Iyo ninowakwela abalihu vina ninofuna oziwa dhinapadduwela. Nona ninofwanyeela walobelela awene. Mbwenye mudhidhi obo ninofwanyela “wang’anela nlumi nehu” vina okala womaalene. Akala ninomudidela muttu wi anaddele muselu ohinfwanyeliye ovuwiha, ninlagiha wi kaninna okwela—na muttuya obe abali na arogora abuwene ankuluvela wi iyene onele okoya miseludha. Txibarene iyo kaninfuna wi mazu ehu akattamihe abali vina arogora ankala mwilaboni munkoddihiwa mabasa ehu. Na mukalelo wakakene, kavo mbali obe murogora onkala mwilaboni ninga eji agafunile ovuwiha miselu mwaha wa mukalelo onlaleya Anamoona a Yehova obe oneddihani mabasa a Nikuru nehu.

13. Mowiwanana na Gano 11:13, txini enfwanyela okosa anddimuwa a mulogo nanda sabwaya jani?

¹³ Makamaka anddimuwa a mmulogoni anofwanyela ovirihamo nigano ninfwanyeya va Gano 11:13 sabwani kanfwanyela ologa miselu dhihinfwanyela oziwihiwa attu ena. (Kengesa.) Eji enokala yorutxa makamaka akala munddimuwaya wa mulogo otela. Atelani anofuna olibiha mandano awa mwa ologaga muttu na mukwaye vina oziwihana dha mmirimani, dhubuwelo vina esile dhinazuzumiha. Mbwenye munddimuwa wa mulogo onoziwa wi kanfwanyela omwaddela mwadhiye “makani oviteya” a abali a mmulogoni. Iyene agakosa ejuwene, kawo agamukuluvela vina onopigidha mweddelo waye. Abale attomeliwe mabasa okuluveleya mmulogoni kanfuniwana okana “malumi meli” obe okala attambi. (1 Tim. 3:8) Kuloga, awene kanfwanyela okala attu ohikuluveliwa obe aliba waba. Akala munddimuwa wa mulogo onomukwela mwadhiye, kanamwaddele miselu dhihinfwanyeliye oziwa.

14. Mwadhi munddimuwa wa mmulogoni onamukamihedhe dhavi mamune okana mweddelo wapama?

¹⁴ Muteliwi onamukamihedhe mamunaye okana mweddelo wapama, agarabela omudidela wi amwaddele miselu dhihinfwanyeliye oziwa. Muteliwi agavirihamo malago aba, onomukamihedha mamunaye, ottiya ejo onotonyihedha wi onowariha abale anpangile mamunaye makani oviteya. Yamakamakaya jawi onomwagalaliha Yehova sabwani iyene onokamihedha murenddele vina wiwanana mmulogoni.—Rom. 14:19.

15. Yehova wewilemo dhavi mwaha wa amarho abale araru a Job, nanda sabwaya jani?

¹⁵ Ninele osunza vaddiddi na nivuru na Job sabwa ya mudhidhi wologa. Mmaleli Job otabuwa na makattamiho ottiyana-ttiyana amukumula, alobwana anai ahidhowa ompangarhaza vina onvaha malago. Aboya ahikala mudhidhi mwinjene bali womaalene. Mbwenye dhologa dha alobwana aba araru—Elifaz, Bildad, na Zofar—dhinowoniha wi mudhidhi obule okalilani omaalene kobuwelavo marhe omukamihedhana Job. Ottiya ejo, awene obuwela mukalelo wa omoniha Job wi dhakosiye dhali dhabure. Mazu mena alogilani akala ninga ebaribari, mbwenye mazu menji alogilani mwaha wa Job vina mwaha wa Yehova ali onyakuwa obe awota. Awene ahimmagedha Job wi wali muttu wabure. (Job 32:1-3)  Yehova wewilemo dhavi? Iyene wahisilidhiwa vaddiddi na alobwana abale araru. Wahiloga wi awene ataduwa vina wahawaddela wi amukumbirhe Job wila alobelele.—Job 42:7-9.

16. Txini ennisunziha dhotagiha dhabure dha Elifaz, Bildad, na Zofar?

¹⁶ Nihisunza dhilobo dhinjene na dhotagiha dhabure dha Elifaz, Bildad, na Zofar. Yoroma, kaninfwanyela wattonga abalihu. (Mt. 7:1-5) Ottiya ejo, ninofwanyela wavuruwana nofwaseya nihinatti ologa elobwene. Dhahene ninele ononelamo makattamiho awa. (1 Ped. 3:8) Yanawili, nigalogaga ninofwanyela woniha wi mazu ehu ba ttagaraga vina dhologa dhehu sebaribari. (Ef. 4:25) Yaneraru, Yehova onofaseyela vaddiddi ovuruwana esile dhinlogihu na muttu mwina.

17. Txini ennisunziha yotagiha ya Eliyú?

¹⁷ Mulobwana wanonai wadhowile omoona Job wali Eliyú, munammudhi wa Abramu. Iyene wahivuruwana makani aloga Job vamodha na alobwana abale araru. Jowooneya wi iyene wahifwaseyela ovuruwana esile dhalogiwa, nona wahiwodha ovaha malago a ttagaraga amukamihedhile Job osisigula mobuwelo waye. (Job 33:1, 6, 17) Elobo yamakamaka yazuzumela Eliyú yali ya omuttittimiha Yehova, ottiya ovittittimiha obe omuttittimiha muttu-muttuvi. (Job 32:21, 22; 37:23, 24) Yotagiha ya Eliyú enonisunziha wi enofuneya mudhidhi wokala womaalene vina wovuruwana. (Tia. 1:19) Ninosunza vina wi nigafunaga onvaha muttu malago, yogana yehu ekale ya omuriha Yehova.

18. Ninawodhe otonyihedha dhavi wi ninovaha ttima mvaho wa ologa?

¹⁸ Nigafwara malago a mBibiliani sabwa ya oziwa mudhidhi wologa vina mukalelo wologaya, ninele olagiha wi ninovaha ttima mvaho wa ologa. Muziwetxi Mwene Salomau wahivudheleliwa oleba: “Mazu anlogiwa vanfwanyelani, anokoddela ninga yobo yaparata yabalihiwe visangu dha nddarhama.” (Gano 25:11) Nigavuruwana nofwaseya dhinloga attu ena vina nigobuwela nihinatti ologa, mazu ehu anokala ninga yobo yaparata yabalihiwe nddarhama—dhobili sattima vina sokoddela. Kintanala akala ninologa vaddiddi obe vang’ono, ninele omwagalaliha Yehova nigalogaga dhilobo dhinalibiha attu ena. (Gano 23:15; Ef. 4:29) Nigakosa dhawene ninotonyihedha wi ninotamaalela mvaho obu wa Mulugu!