1-2. Ninga munlagiha Merelo 8:27-31, 35-38, txini yamuttukuleli mukadda Etiopia obatiziwa?

WEYO onofuna obatiziwa wi okale namafwara wa Kristu? Okwela na otamalela ohattukulela attu enjene okosa yosakula eji. Katanalela yotagiha ya munddimuwa wamulabela nyanyi wa elabo ya Etiopia.

² Mmalele mukadda Etiopia osunza Malebo mohigonela wahigana obatiziwa. (Kengesa Merelo 8:27-31, 35-38.) Txini yamuttukulele obatiziwa? Jowooneya wi iyene wanvaha ttima Mazu a Mulugu; nona wannengesa versu dha nivuru na Izaiya akosaga oleddo waye. Mmalele Filipi omutapulelamo dhengesiye, mulobwana oddule wahitonyihedha ntamaalo mwa esile dhamukosele Yezu. Txini yamuttukulele mukadda Etiopia odhowa o Jeruzalemi? Sabwani iyene wahunuwiha omukwela Yehova. Ninziwa dhavi? Iyene wadhowile o Jeruzalemi wi amwebedhe Yehova. Enkala ninga mulobwana oddule wahitxinja kapela yaye vina wahidhowa ovitaganyiha na nlogo namwebedha Mulugu webaribari. Iyene wahikosa matxinjo aba sabwa ya omukwela Yehova, okwela oku ohimuttukulela ttarho yina yamakamaka, ya obatiziwa ninga namafwara wa Kristu.​—Mt. 28:19.

3. Txini egawodhile ombarela muttu wi ahibatiziwe? (Kang’ana kasha “ Txini Eli Mmurimani Mwawo?”)

³ Omukwela Yehova onele wuttukulela obatiziwa. Mbwenye okwela wakakene onodha wubarela wi ohibatiziwe. Na mukalelo  gani? Katanalela dhotagiha dhing’onovi. Txino weyo onowakwela vaddiddi amudhawo na amarho awo ahili Anamoona a Yehova, sabwa ya ejuwene, onozuzuma wubuwelaga wi ogabatiziwa awene anele wuwidda. (Mt. 10:37) Obe weyo onokwela elemelelo enziwiwe wi Mulugu onowidda vina onorutxiwaga otxatxama elemeleloya. (Masal. 97:10) Obe onowubuwela elemelelo yaniwena ya oja mattanga a relijiau yottambi. Txino onoziveliwa ogobuwela dhilobo esi dhakosiwe wale. Yodhavoya jawi, enowurutxa ottiya dhilemelelo eso dhinimusilidha Yehova. (1 Kor. 10:20, 21) Nona kavivuze, “Txini vina bani onimukwelimi vaddiddi?”

4. Elobo gani yamakamaka enottukulele obatiziwa?

⁴ Dhihikalawo dhilobo gwé dhapama dhinkweliwe ofiyedha otamalela. Motagiha, ohinaroma osunza na Anamoona a Yehova, txino weyo wannimuriha Bibilia. Weyo vina wahiroma omukwela Yezu. Ovano mwaziweliwe Anamoona a Yehova, txino onoziveliwa otugumana na awene. Japama okwela dhilobo esi, mbwenye kadhinawuttukulele oviperhekela wa Yehova mpaka obatiziwa. Elobo yamakamaka enottukulele obatiziwa ku omukwela wawo Yehova Mulugu. Ogamukwela Yehova opitta elobo-txilobo, kayiwo enawutximihe omulabela iyene mwigumini mwawo. Omukwela Yehova onele wuttukulela obatiziwa vina ogamala obatiziwa onele wukamihedha okalavi wororomeleyene.

5. Mavuzo gani anfunihu wakula?

⁵ Yezu wahiloga wi ninofwanyela omukwela Yehova na murima wehu wotene, ttontto yehu, vina na guru dhehu dhotene. (Mk. 12:30) Onawodhe dhavi omukwela vina omuriha Yehova vopitta? Otanalela okwela wa Yehova ononittukulela omukwela iyene. (1 Jo. 4:19) Dhubuwelo gani na mereloya anakaniwe ogonuwiha omukwela Yehova? *

6. Mowiwanana na Roma 1:20, mukalelo mmodha wa osunza mwaha wa Yehova buvi?

⁶ Osunze mwaha wa Yehova modhela dhottandda dhaye. (Kengesa Roma 1:20; Ovuh. 4:11) Katanalela eziwelo ya Yehova elabihedhiye attanddaga miri na dhinama. Kasunza vang’onovi mukalelo wotikiniha ottanddiwe maningo ehu. (Masal. 139:14) Kobuwela guru evahile Yehova nzuwa, masiki ekalaga neneri modha mwa mabiliau a vineneri dhina. * (Iza. 40:26) Ogatanaalela dhilobo esi dhotene, onele wunuwiha omukwela wawo Yehova. Mbwenye oziwavi wi Yehova ddwa eziwelo vina ddwa guru, kinakwana. Eji enkosa epaddi ya matibelo anawukamihedhe okana mandano oliba na iyene. Wila wunuwihe omukwela wawo Yehova, enofuneya osunza venjene mwaha wa iyene.

7. Wila wunuwihe omukwela wawo Yehova txini enfanyeeleliwe okosa?

⁷ Enofuneya okuluvela Nwi Yehova onowukwela-wene. Ogagumanana makattamiho onokuluvela wi Muttanddi wa erimu na elabo ya vati onoziwa wi weyo okalawo vina onowutanaala? Bahito akala pumwenemo, kudduwale wi Yehova “kalapelane na muthu-muthu wa iyo.” (Mer. 17:26-28) Iyene “onoziwa eli mmurimani mwa muthu,” vina ohipikirhela dhahene ninga mwalogile David na Salomau, “ogamutamelaga, onoufwarela.” (1 Map. 28:9) Txibarene, sabwa yuttukuleli oroma omusunza Bibilia jawi Yehova, ‘ohukukusela  valiye.’ (Jer. 31:3) Oganonelamo dhilobo dhotene dhinukosela Yehova, omukwela wawo onelege wunuwavi.

8. Onawodhe dhavi olagiha wi onotamalela okwela wa Yehova?

⁸ Mukalelo mmodha wa wakulela okwela wa Yehova ku ologa na iyene mmalobeloni. Omukwela wawo Mulugu onele wunuwa agakosaga malobelo omwaddelaga makattamiho awo vina omutamaalelaga mwaha wa dhilobo dhinukoseliye. Ogona mukalelo onakula Yehova malobelo awo mandano awo na iyene anelege odhowavi bagonuwa. (Masal. 116:1) Dhawene onelege okuluvela wi txibarene iyene onononelamo makattamiho awo. Mbwenye wila okale ofiyedheya na Yehova enofuneya ononelamo ejile enimuzivela vina ehinimuzivela. Enofuneya ononelamo vina ejile enjeedheliye wi weyo okose. Mukalelo mmodha wa okana eziwelo eji bwa osunza Nzu naye, Bibilia.

9. Onatonyihedhe dhavi wi ononvaha ttima Bibilia?

⁹ Osunze ovaha ttima Nzu na Mulugu, Bibilia. Mbibiliani bahi pulí ebaribari mwaha wa Yehova vina efunelo yaye na weyo. Onatonyihedhe wi ononvaha ttima Bibilia ogamwengesaga masiku etene, agasasanyedhaga nsunzo na Bibilia nomwinya, vina ogavirihamo esile dhinsunziwe. (Masal. 119:97, 99; Jo. 17:17) Weyo okana masasanyedho a nsunzo na Bibilia nomwinya? Onofwara masasanyedhoya modhela otamelaga omwengesa Bibilia siku na siku?

10. Muselu gani ofwanyeya mbibilia, ogahiwodhilehu ofwanya wego wina?

¹⁰ Elobo yina yottiyana eli mBibiliani jawi mukala dhopadduwa dha attu amoonile Yezu. Kaniwo nivuru nina ninloga dhopadduwa dhawakwana mwaha wa esile dhukoseli Yezu. Osunza esile dhikosile vina dhilogile Yezu, dhinele wuttukulela ofuna okana mandano ofiyedheya na iyene.

11. Txini enawukamihedhe wunuwiha omukwela wawo Yehova?

¹¹ Osunze omukwela Yezu, wila wunuwihe omukwela wawo Yehova. Sabwaya? Sabwani Yezu onotagiha mowakwana-mwene  mikalelo dholigana dha Babe. (Jo. 14:9) Nona ogasunzagavi mwaha wa Yezu, onele omuziwa mowakwana Yehova vina onelege omutamaalela vopitta. Karoma wubuwela supaje yakanela Yezu abale apwaziwa—sabwa ya oyelega, oragala, vina sabwa yokala ahawi. Kobuwela mukalelo onkala egumi yawo ogavirihamo malago okwela avahile Yezu.​—Mt. 5:1-11; 7:24-27.

12. Osunza mwaha wa Yezu onawuttukulele okosa elobo gani?

¹² Omukwela wawo Yezu onele wunuwa ogatanaalela mwaha wa mukutto operhekiliye na ovilevela waye wi dhoboleliwena dhottega dhehu. (Mt. 20:28) Otanalela wi Yezu ohukwela enele wuttukulela otxinuwa sabwa ya dhotega dhirilewe, vina enela wuttukulela omukumbirha Yehova nlevelelo. (Mer. 3:19, 20; 1 Jo. 1:9) Omukwela wawo Yezu na Yehova ogonuwa, onele ofuna okalaga na abale anna okwela wakakene.

13. Txini enawuvahe Yehova?

¹³ Osunze wakwela anamudhi a Yehova. Txino onkala na anamudhi vina amarho ahinnonelamo sabwaya enfuneliwe oviperhekela Yehova. Awene anodha oroma wufwara-fwara. Yehova kanawuttiye weka, iyene onele wuvaha anamudhi omuyani. Ogakala wofiyedheya na abali vina arogora a mmulogoni, onele ofwanya okwela vina nikamihedho ninfuniwe. (Mk. 10:29, 30; Aheb. 10:24, 25) Na mudhidhiya, txino amudhawo anele ogana omulabela Yehova vina okalawo mowiwanana na magano aye.​—1 Ped. 2:12.

14. Ninga munlogela 1 Joau 5:3, txini ezinddiyeliwe mwaha wa magano a Yehova?

¹⁴ Osunze otamalela vina ovirihamo magano a Yehova. Ohinatti omuziwa Yehova weyo wahikana magano awo, mbwenye ovano ohona wi magano a Yehova bapama. (Masal. 1:1-3; kengesa 1 Joau 5:3.) Kobuwela magano a Bibilia anvahiwa amamuni, ateliwi, amambali vina aima. (Ef. 5:22–6:4) Murala wawo onowagalala mwaha wa ovirihamo magano aba? Ohiwodha okala muttu wa malago sabwa ya ofwara magano a Yehova a wasakula amarho na eziwelo? Onowodha okala muttu wohagalala? (Gano 13:20; 1 Kor. 15:33) Mohaganyedha enkala ninga weyo ohakula ndde mavuzo aba.

15. Txini enakosiwe ogafuna nikamihedho na ovirihamo magano a mBibiliani?

¹⁵ Mudhidhi mwina enorutxa ozinddiyela mukalelo wovirihamo magano ansunza weyo mBibiliani. Sabwa ya ejuwene Yehova onolabihedha nikuru naye wi nuvahe manivuru andela Mbibiliani wi awukamihedhe ottiyaniha eli yapama na eli yabure. (Aheb. 5:13, 14) Ogengesaga vina ogasunzaga manivuru aba, onele wona mukalelo anfunani wukamihedha ovirihamo maganoya, vina onele oziveliwa okala wofiyedhana na nikuru na Yehova.

16. Yehova osasanyedhile dhavi nlogo naye?

¹⁶ Osunze okwela vina okamihedha nikuru na Yehova. Yehova onosasanyedha nikuru naye mmilogoni dha Akristu; Mwanaye Yezu ddili musorho wa milogo dhotene. (Ef. 1:22; 5:23) Yezu ohittoma nikuru ning’ono na alobwana ottikitteliwa wi asogorhele mabasa ali ofuneya masaka abano. Yezu ohittuva nikuru ntti nzina na “Mwimeleli wororomeleya, wamalago”; awene ahikana mabasa manddimuwa a wusapela vina wubarela mpaddi womuyani. (Mt. 24:45-47) Mukalelo mmodha onkosa mwimeleli wororomeleya wi okamihedhe, bwa wattoma anddimuwa a mulogo anusunziha vina anubarela. (Iza. 32:1, 2; Aheb. 13:17; 1 Ped. 5:2, 3) Anddimuwa a mulogo ali omala nawale wi awupangarhaze vina awukamihedhe okala wofiyedheya na Yehova. Awene  anowukamihedha wi owodhege wasunziha attu ena mwaha wa Yehova.​—Ef. 4:11-13.

17. Mowiwanana na Roma 10:10, 13, 14, ninawaddelela eni attu ena mwaha wa Yehova?

¹⁷ Wakamihedhe ena osunza omukwela Yehova. Yezu ohapanga anamafwara aye wi enofuneya wasunziha attu ena mwaha wa Yehova. (Mt. 28:19, 20) Iyo ninowiwelela nikokomezo ntti sabwa ya omukwela Yehova ottiya odideliwa. Nona omukwela wawo Yehova ogonuwa, onele owodha ologa dhahene ninga mwalogele murumiwi Pedro na Joau, mazu awi: “Iyo kaninwodha omàlana dhonilehu, dhiwalehu.” (Mer. 4:20) Kadhiwo dhilobo dhinji dhindana ottaba ehili wakamihedha attu omukwela Yehova. Katanalela wagalala wanna Murumiwi Filipi mmukamihedhiye mukadda Etiopia osunza ebaribari eli mmaleboni ofiyedha obatiziwa! Onele olagiha wi onofuna okala Munamoona wa Yehova ogamutagiha Filipi vina ogewelela nikokomezo na Yezu na odhowa olaleya. (Kengesa Roma 10:10, 13, 14.) Mpaka veneva txino weyo onokosa nivuzo nakakene nakosile mukadda Etiopia wi: “Ehinddiwodhiha obatiziwa, txini?”​—Mer. 8:36.

18. Txini enasunzehu mwari mwa mutoma onfwarela?

¹⁸ Ogabatiziwa onokosa yogana yamakamaka mwigumini mwawo. Vowi eji ttarho yamakamaka, onofwanyela otanaalela na malago entapulelani. Txini enfwanyeliwe oziwa mwaha wa obatizo? Txini enfwanyeliwe okosa ohinatti vina ogamala obatiziwa? Mavuzo aba anele wakuliwa mwari mwa mutoma onfwarela.