1. Makattamiho gani angumanana alabeli a Yehova?

WEYO onotabuwa sabwa ya ogumanana makattamiho ofarelana? Txino okala muttu wunyimulile mmulogoni. (Tia. 3:2) Obe onobeddiwa omabasani obe oskola sabwa ya omulabela Yehova. (1 Ped. 4:3, 4) Obe amudhawo anowukoddiha odhowa omatugumanoni vina mmabasani a olaleya. (Mt. 10:35, 36) Akala makattamiho awo anottabwavi, onodha wubuwela wila elobo yamakamaka enfwanyeliwe okosa ottiya omulabela Yehova. Mbwenye weyo ogamukuluvela Yehova kintanala makattamiho makattamihovi angumaninwena, iyene onela wuvaha ononelamo vina guru wi owodhe ovilela.

2. Ninga munlogela Roma 15:4, wengesa Nzu na Mulugu ninanikamihedhe dhavi?

² Munzuni naye Yehova ohittiya wi elebiwe mapadduwo a attu ohiligana awodhile okwaranya makattamiho awa. Sabwaya? Sabwani dhilebeliwe wi iyo nisunze. Jijene emuttukuleli Yehova omukamihedha murumiwi Paulo oleba. (Kengesa Roma 15:4.) Wengesa mapadduwo aba enowodha onipangarhaza vina onivaha njedhelo. Ottiya ejo, wi nipurelemo kaninfwanyela bahi omwengesavi Bibilia. Iyo ninofwanyeela ovittiya wi malebo aneddihe vina addiginye mirima dhehu. Nigatamelaga malago a owanana makattamiho ehu, txini enfwanyelehu okosa? Ninofwanyela olabihedha Ttarho esi nai: (1) Olobela, (2) Wubuwela, (3) Otanalela, vina (4) Ovirihamo. Ninfuna nisunzeni mattibelo a ttarho modha-modha. * Iyo ninela  olabihedha tarho esi niromaga osunza na yopadduwa ya Mwene David vina murumiwi Paulo.

3. Ohinatti omwengesa Bibilia txini enfwanyeliwe okosa, nanda sabwaya jani?

³ (1) Olobela. Ohinatti oroma omwengesa Bibilia, kamukumbirhe Yehova wi awukamihedhe opuramo dhinengesiwe. Motagiha, akala weyo onfuna malago a owananana makattamiho awo, kamukumbirhe Yehova wi awukamihedhe ofwanya malago mu Nzuni naye vina ofware.—Fil. 4:6, 7; Tia. 1:5.

4. Onawodhe dhavi opurelamo mapadduwo a mBibiliani anengesiwe?

⁴ (2) Wubuwela. Yehova ohinivaha ewodhelo enddimuwa ya wubuwela. Wila nipadduwo na Mbibiliani nengesiliwe nukamihedhe mwigumini mwawo, kobuwela vina kavike vamburoni va muttuya opadduweliwe. Katamela wona mukalelo wewamo iyene dhilobodha vina katanalela txini egakosile weyo kokala vamburoni vaye.

5. Otanalela txini, nanda ninawodhe dhavi otanalelawa?

⁵ (3) Otanalela. Otanalela entapulela wubuwela na ofwasa esile dhinengesiwe vina woona mukalelo onupatta nipadduwona. Eji enele wukamihedha venjene otanalela nipadduwo ninengesiwe. Omwengesa Bibilia sohitanalela enkala ninga okalela wang’anavi jogo ya quebra-cabeça emwadheyile vameza. Otanalela eli ninga ofwaseyela ogumaniha dhipaddi dha joguya ngamala buwona bili yosasanyedheyene. Wi owodhe otanalela deretu kavikose mavuzo aba: ‘Txini ekosile muttu onlogiwa vanipadduwoni ntti edhile omukamihedha? Yehova omukamihedhile dhavi? Ddinawodhe dhavi osunza na mapadduwo anengesimi wi addikamihedhe okwaranya makattamiho aga?’

6. Enfuneyelani wi iyo nivirihemo esile dhinsunzihu?

⁶ (4) Ovirihamo. Yezu ohiloga wi oniwa mazu aye aahivirihamo onladdana na muttu omagile numba yaye vamutxesani. Iyene onolaba na nttokoso mbwenye guru yaye kampurana elo. Sabwaya? Sabwani muzogwe agapula manje agatepuwa, pevo yoba na owali, numbaya enogwa. (Mt. 7:24-27) Na mukalelo wakakene, iyo nigalobela, nigobuwela vina nigatanalela, nanda nihivirihamo esile dhinsunzehu, guru yehu vina enkala ya vayovi. Nnroromelo nehu nigehiwaga na makattamiho a ofawara-fwariwa iyo kaninalibe mowakwana wi niwodhe okwaranya. Mottiyana mwene, iyo nigasunza vina nigavirihamo ninela okosa dhogana dhamalago vina ninela okana nroromelo noliba. (Iza. 48:17, 18) Nilabihedhaga ttarho esi nai dhitanalelihu, ndoweni none txini enasunzehu na nipadduwo na Mwene David.

7. Nipadduwo gani na Mbibiliani ninfuna wona iyo ovanene?

⁷ Weyo ohisadduweliwa na mwanamudhi obe marho wawo? Onele opurelamo na nipadduwo na Absalau mwana mwene David, wamusadduweli Babe atamelaga omwakiha omwene.—2 Sam. 15:5-14, 31; 18:6-14.

8. Txini enfwanyeliwe okosa wi okane nikamihedho na Yehova?

⁸ (1) Olobela. Na nipadduwo ntti muyubuweloni, kalobela wa Yehova omwaddelagamo mukalelo onuweddiha attu ena na obure. (Masal. 6:6-9) Kakala wotapuwa. Ottiya ejo, kakumbirha nikamihedho na Yehova, wi ofwanye magano anawukamihedhe owanana makattamiho angumaniwena.

9. Txini epadduwile na David vina Absalau?

⁹ (2) Otanalela. Kobuwela sabwa ya mapadduwoya vina katanalela mukalelo wapattiwe mwene David. Mwanaye Absalau wahilaba vyaka dhinjene atamelaga wakwekwetta attu wi amukwelege. (2 Sam. 15:7) Absalau moneliye wi obule wali mudhidhi  wofwanyelela, waharuma anamukatti aye mwilaboni mwetene mwa Izrayel wi akweketele attu omurumela ninga mwene. Iyene vina wahifiyedha wakweketta amarho ofiyedheya a mwene David vina namalaga, Ahitofel, wahidhowa ovitaganyiha na musadduweli oddu. Absalau wahivikosiha mwene vina wantamela marhe omuttiddana David wi ampe, mudhidhi wapattiwiye makattamiho a oredda. (Masal. 41:1-9) David muziwiliye wi onofwara-fwariwa, wahittawela elabo yo Jerusalemi. Vasogorhova, Absalau na alobwana aye ahidhowa owana na alobwana ororomeleya a David. Mbwenye nikuru nttile nasadduweli, nahipemberhiwa vina Absalau wahifiyedha opiwa.

10. Mwene David agadhile wubuwela okosa elobo gani?

¹⁰ Katanalela mukalelo wewamo David na dhetene esi dhapadduwile. Iyene wanimukwela Absalau vina wannimukuluvela Aitofel. Masiki dhawene, attu aba ahimusadduwela, animwidda vaddiddi, ofiyedha otamela mikalelo dha ompa. David kokala mwina, agahittiya wakuluvela amarho ena obuwelaga wi awene agahivitaganyiha na Absalau. Iyene agahidha wubuwela wi mukalelo waderetu bokala yeka vina odhowa elabo yina. Obe agahidha wojeya venjene s‘ohikana yokosa. Mbwenye dhotene esi David kakosilevo nne elobo modha. Ottiya ejo, wandowavi awanagana makattamiho angumaniyena. Iyene owodhile dhavi okosa ejuwene?

11. Txini ekosile Davidi vafwanyiwiye makattamiho orutxa?

¹¹ (3) Otanalela. Magano gani asunziliwe munipadduwoni ntti na David? Kafwanya yowakula ya nivuzo ntti: “Elobo gani emukamihedhile David?” David kattiddiwe na wova nne vina kamaguvele okosa dhosakula dhottowa malago. Ottiya ejo wahilobela wa Yehova akumbirhaga nikamihedho. Iyene wahakumbirha nikamihedho amarho aye. Vina momaguva-mwene wahikosa dhogana nanda wahifwara malagoya. Masiki David vawaniyenavi na makattamiho aba, iyene katamelile okala vayevene vina katameli wawidda akwaye. Iyene wandowavi amukuluvelaga Yehova vina amarho aye.

12. Txini yakosile Yehova wi amukamihedhe David?

¹² Yehova omukamihedhile dhavi David? Ogapepesa, onele wona wila ddi Yehova wanvaha David guru ya owodha owanana makattamiho aye. (Masal. 3:1-8.) Yehova wahikamihedha yogana yakosile David. Vina Yehova wahakamihedha amarho oweddeyana a David wi abarele omwene waye.

13. Weyo onawodhe dhavi omutagiha David akala muttu onowunyimula na mukalelo dhottiyana-ttiyana? (Mateu 18:15-17)

¹³ (4) Ovirihamo. Kavivuze, ‘ddinawodhe dhavi omusanza David?’ Weyo onofwanyela okosavo elobo txilobo wila osasanyedhe makaniya momaguva. Mowiwanana na mukalelo ompadduwa makaniya onofwanyela ofwara malago anfwanyeya nivuru na Mateu kapitulu 18 vina ovirihamo maganoya. (Kengesa Mateu 18:15-17.) Masiki dhawene, weyo kunfwanyela okosa dhogana s’ohitanalela. Onofwanyela olobela wa Yehova wi ovahe murima wofwasa vina wononelamo wi owodhe okwaranya makattamiho angumaniwena. Kuttiye waroromela amarho awo. Ottiya ejo, kakala womala nawale wi orumeele nikamihedho ninuvahani. (Gano 17:17) Yamakamakaya, kafwara malago otene anuvaha Yehova anda Munzuni naye.—Gano 3:5, 6.

14. Makattamiho gani agadhile weyo okalela mento nlebo na 2 Timóteo 1:12-16; 4:6-11, 17-22?

¹⁴ Weyo onowanana makattamiho a ofwara-fwariwa na amudhawo? Obe onkala mwilaboni munkoddihiwa mabasa  a Anamoona a Yehova, obe mufugiwani? Akala pumwenemo, onele opamgarhazeya modhela wengesa nlebo na 2 Timóteo 1:12-16 vina 4:6-11, 17-22. * Paulo olebile mazu aba mudhidhi waliye mukamburha.

15. Txini enamulobe weyo Yehova?

¹⁵ (1) Olobela. Ohinatti wengesa nlebo mBibiliani kamwaddele Yehova sabwa ya makattamiho awo vina kamutapulelemo mukalelo oniwamo weyo opa. Kakala wotapuwa. Ottiya ejo, kamukumbirhe Yehova awukamihedhe ofwanya malago munipadduwoni na murumiwi Paulo mudhidhi wafwanyiweyi makattamiho, vina mukalelo onawodhani wukamihedha owanana makattamiho awo.

16. Txini epadduwile na murumiwi Paulo?

¹⁶ (2) Wubuwela. Kavyobuwele buli vanburoni va murumiwi Paulo. Iyene bali mukambura o Roma womagiwene na pingwi. Vamaromo-vene iyene wahifugeliwa mmbwenye mudhidhi obo yali yawoneya wi iyene agahipiwa. Amarho aye enjene yahimala omuttawa vina mpaddi w’omaningoni wahilema—2 Tim. 1:15.

17. Paulo weddihile dhavi makattamiho aye?

¹⁷ Paulo txino agahidha otanalela dhamundduni, wi kowiliwa kakosile yosakula ninga ejilene, kagakalile mukambura mudhidhene obule. Iyene agahisilidhiwa vaddiddi na attu a elabo y’o Asia sabwa ya awene omunyanyala, vina agahikaana ekalelo y’oharoromelaga amarho ena. Mbwenye Paulo kakosile nne elobo modha mwa esene. Sabwani iyene wahikaana nroromelo vina njedhelo.

18. Paulo wakuleli dhavi makattamiho agumaniyena?

¹⁸ (3) Otanalela. Katamela yowakula ya nivuzo ntti, “Txini emukamihedhile Paulo?” Masiki veddihiwiye na mukalelo wohifwanyelela—okwa wamukaleli vakuvi, Paulo txipo karimeliwe nroromelo vina wanziwa wi makattamiho manddimuwa angumaniyena annimuttittimiha Yehova. Wannubuwelavi mukalelo ogawodhiliye wakamihedha vina walibiha attu ena. Iyene animukuluvela Yehova modhela okosa malobelo mudhidhi wotene. (2 Tim. 1:3) Ottiya wawubuwelaga abale amunyanyalile, iyene wanatamalela amarho aweddeyana amukamihedhile na mikalelo dhottiyana-ttiyana. Paulo vina andhowavi asunzaga Nzu na Mulugu. (2 Tim. 3:16, 17; 4:13) Yamakamakaya Paulo wahikaana ebaribari wi Yehova vamodha na Yezu, annimukwela venjene. Awene kamunyanyalile vina animukamihedha anvahaga guru ya odhowanavi mabasa aye vasogorho.

19. Yehova omukamidhile dhavi Paulo?

¹⁹ Yehova wahimwaddela Paulo wi agahigumanana makattamiho a ofwara-fwariwa sabwa ya okala Mukristu. (Mer. 21:11-13) Yehova omukamidhile dhavi Paulo? Iyene wannakula malobelo a Paulo na mudhidhiya wahinvaha guru. (2 Tim. 4:17) Paulo wahikaana ebaribari wi agahakela nlivo naye sabwa ya mabasa akosiye na nttokoso. Yehova vina wahalabihedha amarho ororomeleya a Paulo wi amukamedhe na merelo ottiyana-ttiyana.

20. Ninga munlogela Roma 8:38, 39, iyo ninawodhe dhavi omutagiha Paulo?

²⁰ (4) Ovirihamo. Kavivuze ‘ddinawodhe dhavi omutagiha Paulo?’ Dhahene ninga Paulo, iyo ninojeedhela ofwara-fwariwa sabwa ya nroromelo nehu. (Mk. 10:29, 30) Wila nikalevi ororomeleya masiki na makattamiho, ninofwanyela olobela, okosa nsunzo n’omwinya vina omukuluvela Yehova. Vina ninofwanyela wubuwela wi elobo yamakamaka, ku okosa vilobo dhinimuttittimiha Yehova. Nikaane ebaribari wi Yehova txipo kananinyanyale vina kuli elebo enabarele onitonyihedha  okwela.—Kengesa Roma 8:38, 39; Aheb. 13:5, 6.

21. Txini emukamihedhile Aya na Hector okwaranya makattamiho awa?

²¹ Nigafwanyiwa makattamiho, dhotagiha dhili mBibiliani dhikana ewodhelo ya onilibiha. Motagiha, Aya, pionera onkala o Japão ohiloga wi nipadduwo na Jona nihimukamihedha ohova ovaha onamona vattaddo. Hector, muzombwe onkala o Indonesia amanbalaye ahinimulabela Yehova, nipadduwo na Ruti nihimukamihedha osunza sabwa ya Yehova vina omulabela iyene.

22. Onawodhe dhavi opuramo venjene drama dha mBibiliani dhovuruwana vina maseriye “Imite a sua fé”?

²² Onafwanye wuvi dhotagiha dha mBibiliani dhinawulibihe? Mavidiyu ehu, drama dhogaravariwa vina maseriye “Imite a sua fé” dhinele wukamihedha osunza sabwa ya mapadduwo a mBibiliani. * Ohinatti wona, ovuruwana vina wengesa, kamukumbirhe Yehova wi okamihedhe ofwanya malago analabihedhiwe. Kavubuwele buli vamburoni va nipadduwo ninegensiwe. Katanalela ejile ekosile alabeli ororomeleya a Yehova vina mukalelo wakamihedhile Yehova okwaranya makattamiho awa. Ottiya ejo kalabihedha esunziliwe mmakattamihoni mwawo. Kamutamalele Yehova sabwa ya nikamihedho nuvahiliye. Vina koniha otamalela wawo modhela opura mudhidhi wa walibiha vina wakamihedhana attu ena na ejile esunzilewi.

23. Mowiwanana na Izaiya 41:10, 13, Yehova opikireli dhavi onikamihedha?

²³ Okalawo mwilaboni ejino ya Satana masakabano elobo y’orutxa vaddiddi ninodhaga wubuwela wi kanina y’okosa. (2 Tim. 3:1) Mbwenye kannifanyelela wova nne okala awojeyene. Yehova onoziwa wi ninogumanana makattamiho. Iyo nigafunaga nikamihedho, iyene ohipikirela onikamihedha vina onittiddela na nlada naye noja. (Kengesa Izaiya 41:10, 13.) Nigakuluvela nikamihedho naye, ninowodha olibiheya na malebo vina ninele owodha opemberha makattamiho angumanihuna.