Akristu ena masaka abano anolabihedha teknolojia wi akale ofiyedheya na amudhawa vina Akristu akwawa. Masiki bili dhawene, Mukristu woliba omuyani onofwanyela okana muyubuweloni malago aba: “Muthu wotxenjerha onozinddyela mutanene dhawopiha, onowere-wera; oku wotowa malago adhowelaga enimutolotxa.”—Gano 27:12.

Iyo ninotamalela venjene sabwa ya nibarelo ninnivaha Yehova. Eji enowoniha wi iyo kanifwanyela ovitaganyiha na attu andhana masunziho opela malago, attu abudutxiwe mmulogoni vina abale antota ogawana. (Rom. 16:17; 1 Kor. 5:11; 2 Jo. 10, 11) Attu ena antugumana na iyo mmulogoni kana mweddelo wofwanyelela. (2 Tim. 2:20, 21) Nigafunaga okosa mandano, ninofwanyela okana mazu aba muyubuweloni. Wasakula amarho apama enkala ninga elobo yohirutxa makamaka na apilikativo ovavihana miselu.

Ninofwanyelela okala txenjewa nigasakulaga amarho aderetu makamaka akala nikuruna na ovavihedhana miselu ninddimuwa. Akristu ena avivolotxile mmakuruni manddimuwa ahidha ogumanana makattamiho orutxa. Mbali obe murogora, anawodhe dhavi okala txenjewa munikuruni muli attu awinjiva vaddiddi? Munikuruni enodha okala yorutxa omuziwa mowakwana-mwene muttuya vina oziwa yimelelo yawa mpaddi w’omuyani. Masalmo 26:4 enloga dhahi: “Kaddinedda na athu anawebedha amulugu ebewene, kaddinandana na abale anna mirima mili.” Eji entapulela wi iyo kaninfwanyelela olabihedha apilikativu ovavihana miselu wi nilogege na attu abale anaziwihu?

Mukristu onofwanyela okala txenjewa sabwa ya miselu dhinvavihiwa munikurunimwa vina mudhidhi onongiye avavihaga miseludha. Eji kintapulela wi iyo ninofwanyela ovolowela makani anlogani vina mudhidhi onkala awene avavihedhagana miselu. Paulo wahimukokomeza Timóteo wi akale txenjewa na attu ali “addangurhanya, akanlupiwa elo, alogaga dhihinapatha.” (1 Tim. 5:13) Dhilobo ninga esi dhinopadduwa mmapilikativuni a ovavihedhana miselu.

Mukristu woliba mpaddi w’omuyani kanvolowela makani opambihana vina kanfwanyela ovuwiha muselu woviteya sabwa ya abali ena. (Masal. 15:3; Gano 20:19) Kanfwanyela ovuwiha miselu dhihina matibelo obe dhihili dhebaribari. (Ef. 4:25) Modhela site yehu jw.org myeri dhotene ninowakela programa ya JW Broadcasting^®, oja wowinjiva mpaddi w’omuyani vina miselu dhiswa dhokuluveleya.

Akristu ena, anolabihedha dhipano esi wi onuwihe marhondda awa ninga ogula, oguliha vina ovaha ganyo. Mbwenyi guru eji enkosiwa ya wunuwiha marhondda kinkosa mpaddi wa vilobo dho Okristu. Akristu ahinfuna ojiwa murima na muhaku anorabela yoweha ya walabihedha abali ehu mmarhonddani wi agumelegena korowa.—Aheb. 13:5.

Enorumelihiwa mbali walabihedha apilikativu aba wi akumbirena korowa ya wakamihedhana abali ali musegedheyani obe apattiwe dhifoyo dha mwilaboni? Iyo ninowakwela abali ehu vina ninowazuzumela ottiya ejo ninowava nikamiyedho abale asegedheyile vina ninowapaganraza. (Tia. 2:15, 16) Mbwenyi otagiha okosa ejo munikuruni ninddimuwa egahidhana ogudulana na masasanyedho a kabinrinya yo katti obe a mulogo. (1 Tim. 5:3, 4, 9, 10, 16) Txibarene kavo wa iyo agatamele wakosiha attu wubuwela wi nihittomeliwa mabasa a vawoka aniwanana na mabila a Mulugu.

Iyo ninotamela okosa dhilobo dhinimuttittimiha Mulugu. (1 Kor. 10:31) Nigafunaga olabihedha ovaviha miselu dha oleba, obe dhipano dhina nitanalelege wopiha olivo vina nikalege txenjewa.