1. Mowiwanana na Mateu 24:9, nikoddela ni otikina attu a mwiliaboni aganiddaga?

YEHOVA ohinittanda na ewodhelo ya okwela vina okweliwa na attu ena. Mbwenye muttu agaroma onidda, iyo ninowiwa opa vina kaniziveliwa. Motagiha, murogora onkuweliwa Georgina, onkala elabo ya Europa ohiloga: “Vana miyo vyaka 14, mmani wanddidda sabwa ya omulabela Yehova. Miyo ddavyona ninga muttu wonyanyaliwa vina ddanubuwela wi kaddili muttu wapama.” * Mbali onkuweliwa Danylo ohileba: “Vaddibubuddile anyakoddo, vina odiruwana ahiddaddela wi agadditabutxa sabwa ya miyo okala Munamoona wa Yehova, miyo ddahova vina ddahinyapwarihiwa.” Iyo ninowiwa opa attu aganiddaga, mbwenye ejo kinitikiniha. Yezu wahibaza ologa wi iyo nagahiddiwa.—Kengesa Mateu 24:9.

2-3. Anamafwara a Yezu aniddeliwa nni?

² Elabo enowawidda anamafwara a Yezu. Sabwaya? Dhahene ninga anafwara a Yezu, iyo ‘kaninkosa mpaddi wa elabo.’ (Jo. 15:17-19) Yodhelavoya, masiki vanariyehu alamuleli a elabo iyo ninokodda wawebedha vina webedha maladdaniho awa anattittimiha. Iyo ninimwebedha bahi Yehova. Iyo ninkamihedha olamulela wa—Mulugu, olamulela ompanbiha Satana na “ziza naye.” (Wita 3:1-5, 15) Ninoziwa wi Omwene wa Mulugu tti njedhelo namakamaka wa nlogo na attu vina Omwene waye momaguva onele watolotxa abale ansadduwela Omweneya. (Dan. 2:44; Ovuh. 19:19-21) Miselu esi sapama mwa akurumuwi, mbwenye sawopiha mwa attu abure.—Masal. 37:10, 11.

 ³ Iyo ninowidddiwa sabwa ya ovirihagamo Malamulo oligana a Yehova. Malamuloya oligana a Yehova anottiyana na malamulo amwilaboni. Motagiha, attu awinjivaya masaka abano anorumelela mowoneya-mwene makalelo onyakuwa moligana na abale atolotxile Yehova akadda Sodoma na Gomora! (Jud. 7) Sabwa ya iyo ovirihagamo magano anfwanyeya mBibiliani, attu awinjivaya anonibedda vina anoniruwana!—1 Ped. 4:3, 4.

4. Mikalelo gani dhinanikamihedhe ovilela attu aganiddaga?

⁴ Txini enanikamihedhe ovilela akala attu anonidda vina anoniruwana? Iyo ninofwanyela omuroromela Yehova wi iyene onele onikamihedha. Dhahene ninga ebarelo, nroromelo nehu ninonibarela na ‘mathere a motto anisugana Satana.’ (Ef. 6:16) Ottiya okana nroromelovi bahi. Iyo vina ninofwanyela okana okwela. Sabwaya? Sabwani onkwela “kankoya ntxiga.” Eji enele onikamihedha ovilela makalelo otene awiddiwa. (1 Kor. 13:4-7, 13) Ovano ndoweni none omukwela wehu Yehova, wakwela abali vamodha na arogora vina wakwela amwiddani ehu mukalelo onanikamihedhani ovilela widdiwa.

5. Okwela wana yezu na babe omulibihile dhavi?

⁵ Omattiyu ahinatti opiwa na amwiddani aye, Yezu wahawaddela anamafwara aye ororomeleya wi: “Miyo ddinomukwela Babaga, [ottiya ejo] ddinowiravi eddirumileye.” (Jo. 14:31) Mukalelo wamukwela Yezu Yehova wahimukamidha ovilela makattamiho agumaniyena. Omukwela wehu Yehova onele onikamidha na mukalelo wakakene.

6. Mowiwanana na Roma 5:3-5, alabeli a Yehova aniwamo dhavi agavilelaga widdiwa?

⁶ Omukwela Yehova onowakamihedhavi alabeli ororomeleya aye ovilela ofwarafwariwa. Motagiha, mudhidhi wakoddihiwe arumiwi olaleya na anamattonga a muttego munddimuwa wa Ayuda, omukwela Mulugu wahattukulela omuroromela “Mulugu opitha athu.” (Mer. 5:29; 1 Jo. 5:3) Vina okwela onowakamihedha abali awinjiva masaka abano okalavi olibene masiki na ofwarafwariwa w’ottabwa vina ottabutxiwa na alamuleli. Ottiya okala owojeyene, iyo ninowona ninga gari ovilela widdiwa na attu a mwilaboni.—Mer. 5:41; kengesa Roma 5:3-5.

7. Txini enfwanyela iyo okosa akala amudhehu anoroma onidda?

⁷ Txino yoweha enddimuwa endhaga okala ofwarafwariwa na amudhihu. Nigaroma ottonyihedha efunelo na ebaribari, amudhehu anodhaga wubuwela wi iyo nihinyegentteya vaddiddi. Ena anofiyedha wubuwela wi nihittawiwa zelu. (Kaladdaniha na Mk. 3:21.) Txino awane anodhaga oroma onifwarafwara. Ofwarafwariwa ninga oku kanifwanyela otikina. Yezu wahiloga dhahi: “Amwiddani a muthu andha okala amudhaye-ene.” (Mt. 10:36) Masiki na mukalelo wottiya-ttiyana onnona vina onneddiya amudhehu, iyo kanifwanyela waweddiha ninga amwiddani ehu. Mottiyana mwene, vanunuwa omukwela wehu Yehova, wakwela wehu attu ena onowunuwa. (Mt. 22:37-39) Mbwenye iyo kanittiya ofwara nne ovirihamo malamulo anfwanyeya mBibiliani sabwa ya otamela waziveliha attu.

8-9. Txini emukamihedhile murogora mudhidhi wafwanyiwiye ofwarafwariwa w’ottabwa?

⁸ Georgina, ologiwe omaromo, walivi pwi masiki afwarafwariwaga na maye. Georgina ohitapulelamo dhahi: “Mmani na miyo nahiroma omusunza Bibilia na Anamoona a Yehova. Mbwenye muvirile myeri mitano na mmodha vafuna miyo oroma wona matugumano, mohijedheleya mmani wahitxinja  mikalelo dhaye. Miyo ddahizinddiyela wi mmani wahiroma okana mandano na asadduweli. Iyene alogaga na miyo wanddinyimula na mikalelo dhottiyana-ttiyana. Vina wanddiruwana, wanddiweta nttitti, oddifunya mukotti ofiyedha oponya manivuru aga. Musogorhomwa vakwaniyelimi vyaka 15, ddahibatiziwa. Mmani wantamela mikalelo dha oddittiha omulabela Yehova, ofiyedha oddidhowana mburo wattiyiwa aima akobola fola vina akosa dhilobo dhopanga wi akamihedhiwe. Ofwarafwariwa onopa vaddiddi makamaka akala ondha mwa muttu wafwanyela wukwela vina wukamihedha.”

⁹ Txini emukamedhile Georgina? Iyene ohiloga: “Labo naddittamagihile mmani vatakulu, yaliganilena miyo baddimalile onpuliha omwengensa Bibilia wotene. Venevo ddahidha oziwa wi ddihimala ofwanya ebaribari vina ddahikana mandano ofiyedheya na Yehova. Miyo ddahimuloba Yehova vina iyene wahiddivuruwana. Ddikalagavi numbe-ne ejile, murogora dhahi wahiddiwobela vatakulu vaye, venevo nahiroma omusunza Bibilia vamodha. Mudhidhene obule wotene, miyo ddahilibihiwa na abali vina arogora a mmulogoni. Awene addeddiha ninga mmudhawa. Miyo ddahona mowakwana-mwene wi kintanala bani ali amwiddani ehu, Yehova ohikana guru opitta awene.

10. Iyo ninfwanyelela nni omukuluvela Nabuya Mulugu wehu Yehova?

¹⁰ Murumiwi Paulo, ohileba wi kavali elo enwodha “onimwalaniha n’okwela wa Mulugu, woneyile mwa Yezu Kristu Nabuyehu.” (Rom. 8:38, 39) Masiki nitabuwaga mwari mwa mudhidhene, Yehova olivi vakuvi wi anikamihedhe vina anilibihe. Dhahene ninga empadduwele Georgina, Yehova onowalabihedha amudhehu omuyani wi anikamihedhe.

11. Okwela ologile Yezu va nlebo na Joau 15:12, 13 wakamihedhile dhavi anamafwara aye? Kavaha yotagiha.

¹¹ Omattiyu obule ahinatti okwa, Yezu wahawaddela anamafwara aye wi anofwanyela okwelana muttu na mukwaye. (Kengesa Jo. 15:12, 13.) Iyene wanziwa wi ovilibihedha okosa guru ya olagiha okwelana muttu na mukwaye ogahawodhiha okala mumodhani vina ogahakamihedha ovilela widdiwa na attu a mwilaboni. Katanalela yotagiha epadduwile na mulogo wo Taselonika. Mudhidhi witiwe  mulogo obule, Akristuya ahiroma ofwarafwariwa. Masiki dhawene abali na arogora, ali yotagiha yaderetu ya ororomeleya vina okwela. (1 Tes. 1:3, 6, 7) Paulo wahapamgaraza wi adhowegevi atonyidhaga okwela vina ‘attabihe wirawa.’ (1 Tes. 4:9, 10) Okwela ogahakamihedha wapangaraza abale akumuwile, adhuguddheyile vina walibihiha abale akumuwile. (1 Tes. 5:14) Awene ahivirihamo malago avahile Paulo, mvireli vyaka dhingonovi, Paulo alebela karta yanawili, iyene wahilebamo dhahi: “Ororomela wenyu onodhowa wunuwagavi okwela wenyu owaralagavi.” (2 Tes. 1:3-5) Okwela wawa ohakamihedha ovilela masoso vina ofwarafwariwa.

12. Nsaka na koddo, abali na arogora a elabo yina alagihile dhavi okwelana muttu na mukwaye?

¹² Katanalela yotagiha ya Danylo na mwadhiye alogiwe omaromo. Nsaka navingile koddo mpaddi wakalani awene andhowavi omatugumanoni, anivilibihedha olaleya mpaka vawodhelani vina angawelana dhoja dhagumelani na abali. Ottiya ejo, labo dhahi Danylo wahittidiwa na anyakoddo. Danylo ohiloga: “Awene ahiddimagelela wi ddirune nroromelo naga, mukoddelimi, ahiddibubudha vina yahivikosiha ninga yafuna oddobela vamosorho. Ahinatti odhowa ahidditxutxa wi agahidhowa amuttidde mwadhaga amurarutxe. Mbwenye momaguva abali ahiniweliha mukumboyuni banimwalela sidadi yina. Miyo txipo kaddinadduwale okwela wanilagihile abali abale. Nfiyedhihu, abali a sidadi ejile ahinivaha dhoja, ahinikamihedha ofwanya ganyo vina mburo wokala! Yodhelavoya. Iyo nali omala nawale wi nawakelege Abali ena attawa koddo dhilabo dhina.” Dhotagiha esi dhinowoniha kakamwe wi okwela wa abali ononikamihedha ovilela widdiwa.

13. Muya wokoddela onnikamihedha dhavi omulabela Yehova na ovilela masiki nifwara-fwariwaga?

¹³ Yezu wahawaddela anamafwara aye wi akwelege amwiddani awa. (Mt. 5:44, 45) Eji elobo yevevuwa? Kahiye yovevuwa! Mbwenye enowodheya na nikamihedho na muya wokoddela wa Mulugu. Okwela yobala ya muya wokoddela, dhahene ninga ovilela, murima wapama, okurumuwa vina ovipimelela. (Gal. 5:22, 23) Mikalelo esi dhinonikamihedha ovilela widdiwa. Anamafwara-fwara enjene anosaddulaga dhubuwelo dhawa sabwa ya mikalelo dhapama dhinlagiha amudhawa ali Akristu  ninga muteliwi, mamuni, mwawa obe anamanddamani. Asadduweli enjene anofiyedhaga okala abali vina arogora okweleya. Akala weyo onorutxiwa wakwela abale onuwidda sabwa ya omulabela Yehova, kalobela okumbiraga muya wokoddela. (Lk. 11:13) Vina kakuluvela wi elebo yamakamaka ku ofwara malago a Mulugu.—Gano 3:5-7.

14-15. Nlebo na Roma 12:17-21 nimukamedhi dhavi Yasmeen omutonyihedha okwela mamunaye masiki vanfwara-fwariye?

¹⁴ Katanalela yotagiha ya Yasmeen onkala o Médio Oriente. Mukaleliye Munamoona wa Yehova, mamune wobuwela wi iyene ohipupuruwa, nanda wahikosa muli mwetene wi amutximihe omulabela Mulugu. Wahiroma omuruwana vina wahakuweliha amudhaye, asogoreli a kapela vina anamugu wi amukasanye vina wahimagedha wi onfuna amwadhe murala. Mamune wahifiyedha waruwana abali vari va matugumano! Yasmeen wanunla sabwa ya otabutxiwa na mamune.

¹⁵ Yasmeen agakala o Nyunbani y’Omwene, abali na arogora annimulibiha vina anipamgaraza. Anddimuwa a mmulogoni ahimukokomeza wi avirihemo mazu anfwanyeya va Roma 12:17-21. (Kengesa.) Yasmeen ohiloga dhahi. “Eji yali elobo yorutxa, mbwenye ddahimukumbira Yehova nikamihedho, vina ddahikosa guru wi ddivirihemo ejile enloga Bibilia. Vasilidhiwa mamunaga nanda apigidha omattuwani, Miyo ddakuputhawo. Mudhidhi waddiruwaniye, ddanimwakula na nriho. Vina mudhidhi waliye muredda ddanimweddiha na okwela.”

16-17. Osunzilevo eni na yotagiha ya Yasmeen?

¹⁶ Yasmeen wahipurelamo venjene sabwa ya omulagiha okwela mamunaye. Iyene ohiloga: “Mamunaga wahiroma oddikuluvela venjene sabwa ya miyo ologaga ebaribari mudhidhi wotene. Iyene onoddivuruwana na nriho nigalogaga sabwa ya relijiau, vina ohirumela oteihana. Ovano iyene ddinddaddela wi ddihijonbege omatugumanoni. Miyo na mamunaga ninowiwanana vina nikana murala wofwasa. Ddinjedhela wi na labona mamunaga avitaganyihe na miyo wi nimulabege Yehova vamodha.”[8]

¹⁷ Yotagiha ya Yasmeen enowoniha wi onkwela “onovilela dhetene, onokuluvelavi dhosogorho.” (1 Kor. 13:4, 7) Widdiwa ohikana ewodhelo vina onopa vaddiddi, mbwenye okwela onopitta dhetene. Nigakwelaga attu ena, awene anodhaga ottiya onitxiga. Eji enele  omwagalaliha Yehova. Masiki akala amwiddani anelege onifwarafwaravi, ninele okalavi owagalalene. Dhavi?

18. Iyo ninawodhe dhavi wagalala masiki na widdiwa?

¹⁸ Yezu ohiloga dhahi: ‘Nyuwo munele wagalala athu agawiddani.’ (Lk. 6:22) Iyo kanisakulile widdiwa. Vina kanniziveliwa attu aganiddaga sabwa ya nroromelo nehu. Ninawodhe dhavi okalavi owagalalene masiki nigeddiwaga? Ninfuna nitanalele mwaha miraru. Woroma, nigavilela ninokala orumeliwa vamentoni va Mulugu. (1 Ped. 4:13, 14) Yanawili, nroromelo nehu ninotxittiwa vina ninoliba. (1 Ped. 1:7) Yanehuraru, ninele wakela mareliho—a egumi yamukalakala.—Rom. 2:6, 7.

19. Anamafwara a Yezu attabela ni masiki na obubuddiwa?

¹⁹ Mmaleli Yezu ovenyihiwa mukwani, esile dhalogeliye dhahiroma wapadduwela anamafwara aye. Mmalelani owasuliwa vina addeliwa wi attiye olaleya, awene ahihagalala. Sabwaya? “Sabwa Mulugu oavaha thima y’ososeliwa nzina na Yezu.” (Mer. 5:40-42) Omukwela wawa Yezu wahunuwa opitta wova widdiwa na amwiddani awa. Awene ahitonyihedha okwela wawa modhela odidelavi olaleya miselu dhapama ‘s’ohilema.’ Masaka abano, abali enji anodhowavi omulabelaga n’ororomeleya masiki na makattamiho. Awene anoziwa wi txipo kanadduwale mabasa animukoselani vina okwela onlagihani nzina naye.—Aheb. 6:10.

20. Txini enasekererihu nsunzo ninfwarela?

²⁰ Mwilaboni mpuno munlamuleliwa na Satana ninelege widdiwa mpaka vanatolotxiwani. (Jo. 15:19) Mbwenye iyo kannifwanyela wova. Ninga munonelihu nsunzo ninfwarela, Yehova ‘onele walibiha vina wabarela’ alabeli aye ororomeleya. (2 Tes. 3:3) Nona ninofwanyela odhowagavi nimukwelaga Yehova, abalihu vamodha na arogora vina wakwela amwiddani ehu. Iyo nigavirihamo malago aye ninele okalavi mumodhani vina wolibene mpaddi w’omuyani nanda ninele omuttittimiha Yehova, nonihaga wi okwela wehu ohikana ewodhelo opitta widdiwa.