1. Yezu wamulobeli ni Yehova wi abarele anamafwara aye?

OMATTIYU womariha bali velaboni ya vati, Yezu wobuwela makattamiho agadhile ogumanana anamafwara aye. Sabwa ya wakwela ninga amarho aye wahimuloba Babe “wi mwarabelihe obure.” (Jo. 17:14, 15) Yezu wahiziwa wi ageyelela wirimu, Ddiabo Satana agahimetxa koddo na abale agadidelile omulabela Yehova. Nona nlogo na Yehova ninofwanyela nibarelo.

2. Txini eninkuluveliha wi Yehova onele wakula malobelo ehu?

² Yehova wahakula nlobelo na Yezu sabwa ya omukwela Waye Mwanaye. Iyo nigakosa guru ya omwagalaliha Yehova, iyene onele onikwela vina onele ofwaseyela ovuruwana malobelo ehu wi anikamihedhe vina anibarele. Dhayene ninga Mwazambo wa ntakulu, Yehova onodhowavi azuzumelaga anaye na okwela. Kowiliwa kakosa ejuwene nzina naye nigahiveya!

3. Masaka abano ninfunelani nibarelo na Yehova?

³ Masaka abano ninofwanyela oveda vaddiddi nibarelo na Yehova. Vegariwe Satana wirimu, olivi “n’owali onddimuwa.” (Ovuh. 12:12) Iyene onowattukulela abale annifwarafwara wubuwelaga “wi anumuthithimiha Mulugu.” (Jo. 16:2) Ena Ahinimurumela Mulugu, ononifwarafwara sabwa ya iyo ohifwara yeddelo ya elabo ejino. Kintanala sabwaya eninfwarafwarela attu, iyo kaninfwanyela wova. Sabwaya? Sabwani Nzu na Mulugu ninloga: “Nabuya ddawiwananeyana: iyene onowulibihani, onowuvunani mmadani mwa Satana.” (2 Tes. 3:3) Yehova oninbarela dhavi? Ninfuna none mikalelo mili.

4. Mowiwanana na Éfeso 6:13-17, Yehova onnivaha eni wi enibarele?

⁴ Yehova ononivaha dhipano dha onibarelana na dhimanya dha Satana. (Kengesa Éfeso 6:13-17.) Nibarelo ntti na omuyani tta guru vina ninolaba mowakwana! Dhipano esi dhinele onibarela nigalabihedha modha-modha na mukalelo w’ofwanyelela—nigakosa dhawene ninele obareleya mowakwana-mwene. Dhipano esi dhintapulela ni? Ovano ninfuna none epano modha-modha.

5. Papaseko wa ebaribari txini, vina ninfwanyelela ni omwabala?

⁵ Papaseko wa ebaribari entapulela ebaribai emfwanyeya mu Nzuni na Mulugu, Bibilia. Iyo ninfwanyelela ni omwabala papaseko? Sabwani Satana “ddi nipara na wota.” (Jo. 8:44) Oromana nsaka na wale iyene namazivala vina onowakwekwettela “mubureni athu etene”! (Ovuh. 12:9) Mbwenye ebaribari eli mBibiliani enonibarela ananipupurutxe. Ninawodhe dhavi wabala ezinddiyelo eji ya papaseko? Ninakose ejoya modhela osunza ebaribari sabwa ya Yehova, ‘omwebedha na muya vina na ebaribari’ vina okana mweddelo wapama mwa dhilobo dhotene.—Jo. 4:24; Ef. 4:25; Aheb. 13:18.

6. Yabalo ya mujila txini, vina ninfwanyelela ni wabala?

⁶ Oligana murima oukaleleni yabalo ya mujila eji entapulela magano oligana a Yehova. Yabalo ya mujila ninawodhe dhavi wabala? Dhahene ninga yabalo ya mujila embarela murima wa munyakoddo wi onalatiwe, yabalo ya nladdaniho enobarela murima wehu vina omuttu wehu mwa dhimanya dhotakala dha elabo ejino. (Gano 4:23) Yehova onfuna wi iyo nimulabele vina nimukwelege na murima wotene. (Mt. 22:36, 37) Oku Satana onfuna agawe murima wehu nikwelege dhilobo dhamwilaboni—dhinidda Yehova. (Tia. 4:4; 1 Jo. 2:15, 16) Iyene agahiniwodhe na murega obu, ononikwekwettela okosaga dhilobo dhinidda Yehova.

7. Iyo ninabala dhavi yabalo ya mujila?

⁷ Iyo ninabala yabalo ya mujila nigarumela malamulo oligana a Yehova mwa ejile eli yabure vina yaderetu vina nigavirihagamo malamuloya mwigumini mwehu. (Masal. 97:10) Attu ena anodhaga wubuwela wi magano a Yehova kanavaha ofuru. Mbwenye iyo nigattiya ovirihamo magano a Bibilia mwigumini mwehu, ninoladdanihiwa na munyakoddo onrula yabalo ya mujila mukoddoni obuwelaga wi enolemela. Oku onkala otolo! Abale animukwela Yehova anoziwa wi malamulo aye kanlemela ottiya ejo anovuna egumi.—1 Jo. 5:3.

8. Txini entapulela wabala sapatto dha olaleyana muttaka wa murenddele?

⁸ Paulo ohinikokomeza wi ninofwanyela wabala sapatto dh’ottamagana mukoddoni wi nilaleye muttaka wa murenddele. Na mazu mena kuloga, ninofwanyela okala omala na wale wi nalaleye muttaka wapama. Iyo nigalaleyalaga attu ena miselu dha mBibiliani, nroromelo nehu ninoliba. Enopangarhaza oziwa wi nlogo na Yehova ozugunuwa elabo yotene ninotamela marhe a olaleya miselu dhapama—numba na numba, mmabasani, oskola, mmamisika, mmuruddani munkosani marhondda, agadhowa wawaredhela amudhawa ahili anamoona, vego pa-vego anologa na attu ainaziwani vina masiki akala kanwodha obudduwa vatakulu sabwa ya makattamiho. Akala ninottiddiwa na wova nanda nittiya olaleya, ninoladdanihiwa na munyakoddo onrula sapatto mukoddoni, manyalo aye kigarutxile ovoreheya. Yodhelavoya, agahittiddiwa momaguva na amwiddani vina kagali omala na wale wi amwiwelele musogorheli waye.

9. Ninfwanyelela ni wabala ebarelo enddimuwa ya nroromelo?

 ⁹ Ebarelo enddimuwa ya nrorormelo entapulela omuroromela wehu Yehova. Iyo ninororomela wi iyene onele wakwanihedha dhogana dhaye. Nroromelo ntti ninele onikamihedha ozinddiyela ‘mathere a motho aninsugana Satana.’ Ninfwanyelela ni wabala ebarelo enddimuwa? Sabwani enonibarela na dhopela malago dha asadduweli vina enonikamihedha okala olibene nigabeddiwaga sabwa esile dhinroromelihu. Nigatowa nroromelo kaninalibe attu agaroma onimagelela olupa malamulo a Yehova. Iyo ninowabala ebarelo enddimuwa venevo vankoddihu wira dhilobo dhinimusilidha Yehova nigakala omabasani vina oskola. (1 Ped. 3:15) Mudhidhi mwina ninottiya ganyo ya muhaku mwinjene egadhile onobaniha mpaddi w’omuyani ennikamihedha okosa ejuwene tti nroromelo nehu. (Aheb. 13:5, 6) Vina nroromelo nehu ninonikamihedha odhowavi nimulabelaga Yehova masiki na ofwarafwariwa.—1 Tes. 2:2.

10. Txapewa w’ovuna txini, vina ninfunela ni omwabala?

¹⁰ Txapewa w’ovuna ontapulela njedhelo ninnivaha Yehova—njedhelo nawi onele ovivuna mukwani vina onela wavaha mareliho abale animuroromela. (1 Tes. 5:8; 1 Tim. 4:10;  Tito 1:1, 2) Dhahene ninga txapewa-ene oninbarela munyakoddo, njedhelo nehu na ovuneya ninobarela mobuwelo ehu. Namukalelo gani? Njedhelo ntti ninonikamihedha okuluvela malibelo a Yehova vina ninonikamihedha wona makattamiho namukalelo wofwanyelela. Ninawodhe dhavi omwabala Txapewa w’ovuna? Ninkosa ejuwene modhela wiwananiha mobuwelo ehu na mukalelo wakakene onona Yehova dhilobodha. Motagiha, Iyo kaninkuluvela dhorela dha elabo ejino, dhihinkuluveleya.—Masal. 26:2; 104:34; 1 Tim. 6:17.

11. Supadda na muya wokoddela txini, vina ninfunelani olabihedha?

¹¹ Supadda na muya w’okoddela tti nzu na Mulugu Bibilia. Supadda ntti guru engomiha ozivala wotene, ninafurula attu mmasunzihoni a ottambi vina merelo onyakuwa. (2 Kor. 10:4, 5; 2 Tim. 3:16, 17; Aheb. 4:12) Iyo ninowodha olabihedha na mukalelo waderetu supadda ntti modhela nsunzo n’omwinya vina maswagiho anvahiwehu na nikuru na Yehova. Mowenjedha na dhipano esi Yehova ononivaha mukalelo mwina wa nibarelo. Buvi?

12. Txini yina enfuna iyo, nanda sabwaya jani?

¹² Munyakoddo onna eziwelo ya mukoddoni onoziwa wi iyene kanapembere mukoddoni yeka, iyene onofuna nikamihedho na anyakoddo ena. Na mukalelo wakakene iyo kaninawodhe onpembera Satana yekihu; iyo ninofuna nikamihedho na abali na arogora. Yehova ononivaha nikamihedho na abali ali ‘ozugunuwa elabo’ yotene wi anikamihedhe.—1 Ped. 2:17.

13. Mowiwanana na Ahebreu 10:24, 25, nimpurelamo eni nigadhowaga omatugumanoni?

¹³ Mukalelo mmodha wa iyo ovahiwa nikamihedho ku odhowa omatugumanoni. (Kengesa Ahebreu 10:24, 25.) Iyo nigakala onyimuwene—ninga empadduwaga mudhidhi mwina—matugumano anonipamgaraza. Iyo ninolibiheya na dhowakula dha mmurimani dha abali na arogora. Diskursu dhindela mBibiliani na dhipaddi dhinlagihiwa mmatugumanoni, dhinonilibiha vina dhinonikamihedha odhowagavi nimulabelaga Yehova. Makani olibiha ankanihu na abali matugumano ahinatti vina agamala anonilibiha. (1 Tes. 5:14) Mowenjedhedha, matugumano ehu anonivaha gari ya okana wagalala onda mwa wakamihedha attu ena. (Mer. 20:35; Rom. 1:11, 12) Matugumano anonikamihedha na mikalelo dhottiyana-ttiyana. Vina anonikamihedha wunuwiha eziwelo yehu mmabasani a olaleya. Motagiha, iyo ninosunza olabihedha dhipano dhehu dhinfwanyeya muttunbini mwehu dha osunzihana na mukalelo waderetu. Nona ogadhowaga omatugumanoni kavisasanyedhe deretu. Matugumano ageddaga kavuruwana n’ofwasa vina agamala kalabihedha esunzile weyo. Mwa okosa dhilobo ninga esi, weyo onele okala “munyakoddo wororomeleya wa Yezu Kristu.”—2 Tim. 2:3.

14. Nikamihedho gani ninagu nina iyo?

¹⁴ Iyo vina nikana nikamihedho na angelo matxikwi na matxikwi. Katanalela enwodha okosa mungelo mmodha! (Iza. 37:36) Ovano kobuwela enwodha wakwaniha makuru a angelo. Nne muttu nne adomonyo, kanladdanihiwa na enwodha vina guru ya Yehova. Enologiwaga wi Munamoona mmodha w’ororomeleya wa Yehova oli na iyo dda guru opitta amwiddani ehu. (Anam. 6:16) Eji ebaribari txibarene! Kakaanavi ejuwene muyubuweloni akala onodhugudheya na akwawo a oskola, omabasani obe esile dhinokosela amudhawo obe dhinukoselani. Kobuwela wi makattamiho awo kunwanana weka. Kavittiye osogoreliwa na Yehova.

15. Mowiwanana na Izaiya 54:15, 17, sabwaya jani nlogo na Mulugu txipo kaninattiye olaleya?

¹⁵ Elabo ya Satana ehikana mwaha dhinji dha onidda. Iyo kaninkamihedha politika vina kanindowa okoddoni. Mbwenye iyo ninolaleya nzina na Mulugu, Omwene waye obuwene onadhena murenddele velaboni ya vati vina okamihedha malamulo aye oligana. Iyo ninowawoniha attu wi mulamuleli wa elabo ejino panga vina muttambi. (Jo. 8:44) Vina ninolaleya wi elabo ya Satana enele otolotxiwa momaguva. Satana na akamihedhi aye kanawodhe otximiha mabasa ankosihu olaleya miselu dhapama. Ottiya ejo ninelege odhowavi nimwagalalihaga Yehova nilabihedhaga marhe otene aliwo wi nidhowegevi nikosaga mabasa anittomeliye! Masiki Satana vaniye ewodhelo kanawodhe obarela mabasa ankosiwa a olaleya miselu dhapama ozugunuwa elabo yotene. Eji enwodheya sabwa ya iyo okana nikamihedho na Yehova.—Kengesa Izaiya 54:15, 17.

16. Yehova onavune dhavi nlogo naye mudhidhi wa goyi enddimuwa?

¹⁶ Txini enapadduwe vasogorhova? Mwari mwa goyi enddimuwa, Yehova onele onivuna na mikalelo minli. Woroma, iyene onele wavuna adhari aye ororomeleya mudhidhi onaattukuleliye alamuleli amwilaboni omutolotxa Babilónia Munddimuwa, musogorheli wa marelijiau ottambi. (Ovuh. 17:16-18; 18:2, 4) Ottiya ejo, iyene onele ovuna nlogo naye mudhidhi onagomihiye olamulela wa Satana va koddoni ya Harmagedón.—Ovuh. 7:9, 10; 16:14, 16.

17. Ninapurelemo eni nigakala ofiyedheya na Yehova?

¹⁷ Iyo nigakala ofiyedheya na Yehova, Satana kananitotele makattamiho ahingoma. Ottiya ejo, iyene ddinakalevi mutabuwani mohimala. (Rom. 16:20) Enfwanyelihu okosa jawabala dhipano dhovivunana—vina olabihedha mumodhani! Kutamele owana weka mmavurhanonimwa. Kakamihedhe abali na arogora. Vina kafwara malago a Yehova. Ogakosa dhawene, weyo onele okana ebaribari wi Babihu wokwela wa wirimu onele wulibiha vina wubarela.—Iza. 41:10.