1-2. Txini enakosihe webedha wehu orumeliwa na Yehova?

 TXINI enubuwela weyo ogewa nzu ntti “webedha”? Txino enudhela muyubuweloni mbali onkokora n’ovyeviha amulobelela Yehova na murima waye wotene ahinatti odhowa ogona. Obe onawubuwela anamudhi attugumanele omusunza Bibilia.

² Dhotagiha esi dhobili dhinoniha merelo awebedha. Koddi Yehova onorumela webedha wawa? Iyene onrumela webedha oniwanana na enfunelo yaye vina akala alabeliya animwebedha sabwa ya omukwela vina omuriha. Iyo ninomukwela venjene Yehova. Iyo ninoziwa wi Yehova onofwanyela webedha wehu vina ninokosa guru wi nimwebedhe na mukalelo wofwanyelela mpaka apale vanwodhelihu.

3. Txini enasekeserihu mwari mwa nsunzo ntti?

³ Mwari mwa nsunzo ntti, ninele osekeserha mukalelo wawebedha warumela Yehova masaka a wale vina ninele wona ttarho tanu na ttaru dhinkosa mpaddi wawebedha masaka abano. Venevo vasekeseregihu ttarho esi ninofwanyelela otanalela mukalelo ononuwihehu ttarho esi muwebedhani mwehu. Omamalelowa ninele wona mukalelo onawodhihe webedha webaribari wenjedha wagalala wehu.

4. Alabeli a Yehova akalilewo Kristu ahinabaliwa onihile dhavi wi animuriha vina animukwela Yehova?

⁴ Alobwana ororomeleya akalilewo Kristu ahinabaliwa ninga motagiha, Abel, Nowé, Abramu vina Job ahilagiha nriho  vina omukwela Yehova. Dhavi? Onihile ejuwene mwaha wa omwiwelela, omuroromela vina okosa guru ya omulabela. Bibilia kanloga mukalelo wamwebedhani Yehova. Awene anvilibihedha omwebedha vina Yehova wanrumela webedha wawa. Vasogorhova Yehova wahavaha ana Izrayel Nlamulo na Mizé. Mmalamuloni mpu mwahikala malago oniha mukalelo wapama wa omwebedha Yehova.

5. Matxinjo gani owebedha onehile mmalile Yeze okwa nanda bavenyihiwa?

⁵ Mukwile Yezu vina bavenyihiwa, Yehova karumela wi attu ewelelegevi Nlamulo na Mizé. (Rom. 10:4) Akristu anfwanyela ofwara nlamulo niswa, ‘nlamulo na Kristu.’ (Gal. 6:2) Awene ewelela ‘nlamulo’ ntti venevo vafwarani yotagiha ya Yezu vina ovirihamo masunziho aye, ehili wiwelelaga nlamulo na Mizé naloga okose eji, eji kukose. Masaka abano vina Akristu anfwara nlamulo na Kristu wi amwagalaliye Yehova vina “afwanye nipangarhazo.”—Mt. 11:29.

6. Nsunzo ntti ninanikamihedhe dhavi?

⁶ Mudhidhi onasekeserhigihu ttarho esi dhinkosa mpaddi wawebedha wehu muttu-muttu wa iyo onofwanyela ovivuza, ‘Ddinovilibihedha omwebedha Yehova dhahene ninga munfuneliye?’ ‘Ddinowunuwiha mikalelo dha omwebedha Yehova?’ Mavuzo aba anele wukamihedha okana wagalala na ejile enkosiwe ovanene, masiki dhawene enokala ya malago omukumbirha Yehova wi okamihedhe wona mpaddi gani onfwanyeliwe ovilibihedha.

7. Yehova onona dhavi malobelo animukoselihu na murima wotene?

⁷ Ninimwebedha Yehova nigamukoselaga  malobelo iyene. Mbibiliani malobelo ehu anoladdanihiwa na onukela wa lubani, waddumeyeliwa Yehova mmusasani vasogorhova waperekeliwiye mumparhani. (Masal. 141:2) Onukela wa lubani addumeyiwa wanimwagalaliha Mulugu. Na mukalelo wakakene, Yehova “onoziveliwa” na malobelo animukoselihu na murima wotene, maski akala ninloga na mazu ovevuwa. (Gano 15:8; Olib. 33:10) Iyo nihikana mwaha dhapama dhorumela wi Yehova onowagalala aganiwaga nimulobelelaga iyene sabwa ya omukwela vina nimutamalelaga. Iyene onfuna wi nimwaddele esile dhinnizuzumiha, esile dhinjedhelihu vina dhofuna dhehu. Ohinatti okosa nlobelo orome ogilati wubuwele nofwasa enfwanyeliwe ologa. Ogakosa dhawene, onele omperekela Babi wawo wa wirimu “lubani” wamakamaka.

8. Gari gani enihu ya omuttittimiha Mulugu?

⁸ Ninimwebedha Yehova nigamuttittimihaga. (Masal. 34:1) Ninomuttittimiha Yehova nigalaleyaga attu ena wi ninomukwela vina ninotikina mikalelo dhaye dhapama na mabasa aye. Nihikana sabwa dhapama dhinnittukulela omutamalela Yehova. Nigatamela mudhidhi wi nitanalele dhilobo dhotene dhinnikosela Yehova—txipo kanintuwiwa mwaha wa omuttittimiha Yehova. Mabasa a olaleya anonivaha gari ya ‘omperhekelagavi Mulugu mukutto womuttittimihana oli mulima wa mazu a mwano mwehu.’ (Aheb. 13:15) Na mukalelo wakakene ogaromilihu ofwasedha mazu agalogelihu nihinatti ologa na Yehova, enokala ya malago oroma otanalela nofwasa egafunilehu ologa na attu ena mmabasani a olaleya. Iyo ninfuna wi ‘mukutto’ wehu okale wamakamaka. Iyo ninfuna nawaddele attu ena ebaribari ya Mbibiliani na murima wehu wotene.

9. Ninga ana Izrayel, iyo ninkana dhopurelamo gani dhotugumana mumodhani? Kavaha yotagiha enoniha wi matugumano anowukamihedha.

 ⁹ Ninimwebedha Yehova nigadhowaga mmatugumanoni. Masaka awale ana Izrayel ahaddeliwa dhahi: “Dila tharu va yaka alobwana afiye vali Nabuya Mulugu wenyu mburo onavisakuleliye.” (Olib. 16:16) Awene anfwanyela ottiya numba dhawa mbwenye kavo wahalamo wi ang’anelege. Sabwani Yehova wahapikirela dhahi: “Kavo analige dhenyu mugawelaga omwebedha Nabuya Mulugu wenyu.” (Obud. 34:24) Sabwa ya omukuluvela vina omuroromela Yehova ana Izrayel katxelela odhowa mmittuponi dha omwebedha Yehova vyaka dhotene. Sabwani ampurelamo venjene otugumana mumodhani na attu ena amukwela Yehova. (Olib. 16:15) Na mukalelo wakakene iyo masaka abano ninopurelamo venjene guru enkosihu ya wona mattugumano. Sabwani ninomutamalela Yehova nigavahaga dhowakula dhehu mmatugumanoni.

10. Wiba okalele nni mpaddi yamakamaka muwebadhani mwehu?

¹⁰ Ninimwebedha Yehova nigebaga na abali vina arogora. (Masal. 28:7) Ana Izrayel ona wiba ninga mpaddi wamakamaka wawebedha wawa. Mwene Davidi wahattoma Alevita muttengo wowakwana 288 wi ebege mumparhani. (1 Map. 25:1, 6-8) Masaka abano, ninele olagiha omukwela wehu Mulugu nigamwibelaga jibo dha nttittimiho. Kintanala akala kanina oyesa wa wiba. Kona yotagiha eji: Iyo notene nigalogaga ‘ninovirigana dila dhinjene,’ masiki dhawene iyo kaninttiya ologa mmatugumanoni vina mmabasani a olaleya. (Tia. 3:2) Na mukalelo wakakene enowodheya omwibela Yehova jibo dhomuttittimihana masiki akala iyo kaniniba deretu.

11. Ninga munlogeliwani va Masalmo 48:13, ninfwanyelelani otamela mudhidhi wa omusunza Bibilia ninga murala?

¹¹ Ninimwebedha Yehova nigasunzaga Nzu naye vina nigasunzihaga anihu mwaha waye. Ana Izrayel na Masabuddu awene kalaba, labo notene azuzumela ovaddiya mandano awa na Yehova. (Obud. 31:16, 17) Mwa abale aliba mpaddi womuyani anasunziha aniwa mwaha wa Yehova vina opama waye. Masaka abano vina iyo ninofwanyela otamela mudhidhi wa wengesa vina osunza Nzu na Mulugu. Esi dhilobo dhinkosa mpaddi wa omwebedha wehu Yehova vina dhinonikamihedha okala ofiyedheya na iyene. (Masal. 73:28) Iyo nigasunzaga mumodhani ninga murala, ninele—wakamihedha anihu—okana mandano ofiyedheya na Babihu wokwela wa wirimu.—Kengesa Masalmo 48:13.

12. Yehova wona dhavi mabasa attiddiwa mmusagalani mogumana na Nabuya nanda ejo ennisunziha eni?

¹² Ninimwebedha Yehova nigamagaga vina nigakuputtaga mimburo dhowebedha. Bibilia onologa wi mabasa attiddiwa mmusagalani mogumana na Nabuya vina dhobo dhotene dhalimo ali ‘mabasa okoddela.’ (Obud. 36:1, 4) Masaka abano, Yehova onona na mukalelo wakene mabasa a omaga Numba dha Omwene na mimparha dhina dha nikuru nehu. Abali na arogora ena anolabihedha mudhidhi mwinjene akamihedhanga mabasa aba. Iyo ninowatamalela venjene sabwa ya mabasa ankosani! Vowi awene vina anokosa mabasa a olaleya. Ena mwa awene ahikana enfunelo ya okala apiyonero. Anddimuwa a mmulogoni anele woniha wi anokamihedha mabasa aba a omaga modhela wattoma abali ana efunelo ya okala apiyonero. Masiki akala kanina ttotto ya okosa mabasa a omaga, iyo notene ninofwanyela okosa mpaddi wehu wa okuputta vina ovenyihedha.

13. Mivaho dhinkosihu wi nikamihedhena mabasa a Omwene dhikaleli nni dhamakamaka?

 ¹³ Ninimwebedha Yehova nigakamihedha mabasa a Omwene na mivaho dhehu. Ana Izrayel kafwanyela ofiya vamentoni va Yehova madavi. (Olib. 16:16) Awene andana mivaho dhawa mowinana na ejile yagumela muttu-mttu. Dhawene palagihani wi anotamalela masasanyedho akosa Yehova wi akamihedhena mpaddi womuyani. Iyo ninawodhe dhavi olagiha wi ninomukwela Yehova vina ninotamalela oja womuyani onakelihu? Mukalelo mmodha wa okosa ejuwene ku okamihedha mabasa a Omwene ankosiwa orugunuwa elabo yotene vina okosa mivaho mmulogoni mwehu. Murumiwi Paulo ohiloga ejuwene na mazu aba: ‘Akala muttu ohikana efunelo ya ovaha na murima woziveliwa, yovahaya enwodhiye enomuzivela Mulugu, Mulugu kanimuloba muttu ehiniye.’ (2 Kor. 8:4, 12) Yehova onovaha ttima nvaho-nvahovi omperhekiwa na murima wotene masiki akala mung’ono obe munddimuwa.—Mk 12:42-44; 2 Kor. 9:7.

14. Mowiwanana na Gano 19:17, Yehova onona dhavi nikamihedho ninavayihu abali na arogora asegedheyile?

¹⁴ Ninimwebedha Yehova nigakamihedhaga abalihu ana dhojombeliwa. Yehova wahipikirhela wi agahattuva ana Izrayel akamihedha ayelegi. (Olib. 15:7, 10) Dila dhotene dhinakamihedhehu abalihu asegedheyile enkala ninga ninivaha Yehova nvaho. (Kengesa Gano 19:17.) Motagiha, Akristu o Filipi vamperekelani nvaho Paulo bali mukambura, iyene bela “mivaho dhawa dhali ninga mukutho onakela Mulugu noziveliwa.” (Fil. 4:18) Karoma wang’ana mmulogoni mwano ogamala ovivuze, ‘ohikalawo muttu agawodhile miyo omukamihedha?’ Yehova onowagalala aganonaga nilabihedhaga mudhidhi wehu, guru yehu, ewodhelo yehu vina dhilobo dhinihu wi nakamihedhena abale asegedheyile. Iyene onona guru eji enkosihu ninga mpaddi wa webedha wehu.—Tia. 1:27.

15. Webedha wa ebaribari onofuna guru vina mudhidhi mbwenye sabwa jani kaye muttorho?

¹⁵ Webedha wa ebaribari onofuna guru vina mudhidhi. Mbwenye kaye muttorho. (1 Jo. 5:3) Sabwaya jani? Sabwani ninimwebedha Yehova vowi ninomukwela. Karoma otanalela, mwana oganile onvaha babe elobo-txilobo. Txino iyene onolabihedha mudhidhi apintarigi desenyu. Mbwenye kanrogela mudhidhi olabihedhiliye akosa ejuwene. Sabwani onomukwela babe vina onfuna anvahe elobo enamwagalalihe. Na mukalelo wakakene, vowi iyo ninomukwela Yehova ninowagalala olabihedha mudhidhi vina guru nikosaga mabasa ankosa mpaddi wawebedha wa ebaribari.

16. Mowiwanana na Ahebreu 6:10, Yehova onona dhavi guru enkosihu wi nimwagalalihe?

¹⁶ Amambali okwela kanjedha wakela mivaho dha mutengo mmodhene mwa aniwa otene. Awene anoziwa wi mwana-mwana anottiyana vina mikalelo dhawa dhinottiyana. Na mukalelo wakakene, Babi wehu wa wirimu onononelamo wi muttu-muttu ohikana mikalelo dhottiyana. Txino weyo onowodha omulabela Yehova venje opitta abali ena anaziwiwe vina anakweliwe. Obe weyo kunwodha okosa venjene ninga munkosela ena, sabwa ya vyaka dhowuwelavo, makattamiho a egumi obe muttorho wosapela murala. Akala pumwenemo kukumuwe. (Gal. 6:4) Yehova kandduwala mabasa awo. Kintanala mpaka apale vanwodheliwe, ejo enele omwagalaliha akala oninvaha Yehova mpaka  apale vanwodheliwe na enfunelo yapama. (Kengesa Ahebreu 6:10.) Yehova onowona ejile eli mmurimani mwawo. Iyene onfuna wi weyo ohagalale vina oziveliwe na mabasa animukoseliwe.

17. (a) Nigona wi ninorutxiwa ovirihamo ttarho dhina dhinkosa mpaddi wa webedha wehu, txini enfwanyelihu okosa? (b) Kalogamo mukalelo okamihedheyile weyo na malagao anfwanyeya va kasha “ Wenjedhe Wagalala Wawo”?

¹⁷ Txini enfwanyeliwe okosa ogona wi onorutxiwa ovirihamo ttarho dhina dhimalelihu osekeserha ninga motagiha, omusunza Bibilia obe mabasa a olaleya? Akala pumwenemo onele wona wi mudhidhi ondowiwe ovilibehedhaga onele okana enfunelo ya okosa venjene vina onele okana dhopurelamo. Ejo enoladdahihiwa na osunza epano yowibana. Akala ninrumiha dila modha va sumanani, enele onirutxa osunzawa. Mbwenye nigagana orumihaga malabo otene kinanirutxe. Yakakene jimpadduwa, iyo nigona dhopurelamo dhapama dha guru enkosihu ninele odhowavi nivilibihedhaga vina ninele okana wagalala watxibarene. Ninowodha wona mukalelo wolabihedha yotagiha eji muwebedha mwehu?

18. Iyo nipaddutxeliwe nni, nanda ninkana dhopurelamo gani?

¹⁸ Iyo nittanddiwe na efunelo ya omwebedha Yehovana murima wehu wotene. Ninkana dhopurelamo gani? Ninokana wagalala, egumi yottugareya vina njedhelo na omwebedha Yehova okala nokala-wene. (Gano 10:22) Oziwa wi Yehova ononikamihedha nigagumanana makattamiho enonikamihedha okana murenddele wa muyubuweloni. (Iza. 41:9, 10) Txibarene nihikana mwaha dhinjene dhapama dhinnagalaliha oku nimwebedhaga Babi wehu wa wirimu odduwene onfwanyela ‘orihiwa vina ottittimihiwa!’—Ovuh. 4:11.