1. Egumi yawo ohinatti omusunza Bibilia yali dhavi?

 EGUMI yawo ohinatti omusunza Bibilia na Anamoona a Yehova yali dhavi? Ena mwa iyo kanfuna wubuwela. Merelo ehu eddihiwa na magano a mwilaboni. Sabwa ya ejiwene mwilaboni mpu ‘kananamo yororomela vina kananamo Mulugu.’ (Ef. 2:12) Mbwenye Bibilia ohitxinja egumi yehu!

2. Txini ezinddiyeliwe modhela nsunzo nawo na Bibilia?

² Modhela nsunzo na Bibilia, ohidha ononelamo wi ohikana Babi wirimu onukwela vaddiddi. Weyo ohinonelamo wila omwagalalihe Yehova vina okosa mpaddi wa murala waye onimwebedha wanfwanyela okosa matxinjo manddimuwa mwigumini mwawo vina mukalelo wawo wa wubuwela. Ohisunza vina ovirihamo magano a Yehova.—Ef. 5:3-5.

3. Mowiwana na Kolosi 3:9, 10, txini ennifunana Yehova wi nikose, nanda txini enasekeserhihu mwari mwa nsunzo ntti?

³ Yehova ddi muttanddi wehu vina Babi wehu wa wirimu iyene ddinsakula mukalelo onfwanyela omwebedha emeleli aye. Iyene vina onfuna wi iyo nihinatti obatiziwa nikose guru ya ‘orula omuttu wehu wawale na mereloya.’ * (Kengesa Kolosi 3:9, 10.) Nsunzo ntti ninele wakamihedha abale anfuna obatiziwa wakula mavuzo mararu: (1) Txini entapulela ‘omuttu wawale’? (2) Sabwaya jani Yehova aganikokomezaga orula? (3) Ninawodhe dhavi okosa ejuwene? Mwa abale ali omala-nawale wila abatiziwe, nsunzo ntti ninele wakamihedha orabela merelo a omuttu wawale.

4. Muttu ageddihiwaga na ‘omuttu wawale’ onkala dhavi?

⁴ Muttu onang’aneliwa na ‘omuttu wawale’ dhubuwelo dhaye na merelo aye ankala omaningonivi. Iyene onodhaga okala mukumbela vaye, mutota kani, muttu ohintamalela vina wovittukulela. Iyene onodhaga oziveliwa wawona attu bali yovi wang’ana mavidiyu onyakuwa obe anlagiha kani. Kavali waganyedha wi muttu ninga oddo kana mikalelo dhapama. Txino iyene onokana muyubuweloni wi dhinkosiye vina dhinlogiye dhilobo dhabure vowi efunelo yaye yokosa elobo yabure ehunuwa kanwodha okana guru ya otxinja mubuwelo na merelo aye.—Gal. 5:19-21; 2 Tim. 3:2-5.

5. Enowodheya orula mowakwana-mwene omuttu wawale? Katapulelamo. (Merelo 3:19)

⁵ Vowi iyo nili attu ohiligana, kavo wa iyo onawodhe okuputta mowakwana-mwene dhubuwelo dhotene dhabure dha mmurimani mwehu. Dila dhina, ninele ologa obe okosa dhilobo dhinanittukulele otxinuwa. (Jer. 17:9; Tia. 3:2) Mbwenye nigarula omuttu wawale kaninang’aneliwege vina na dhifunelo dha maningo na mereloya. Iyo kaninakale vina ninga yalihu ninokala attu ottiyana.—Iza. 55:7; kengesa Merelo 3:19.

6. Sabwaya jani ennifunana Yehova wi nirule dhubuwelo vina merelo abure a omuttu wawale?

⁶ Yehova ononikokomeza wi nifuruleye na dhubuwelo vina dhilemelelo dhabure sabwani iyene ononikwela venjene vina onfuna wi nikane wagalala mwigumini. (Iza. 48:17, 18) Iyene onoziwa wi abale ankosa dhilobo dhabure, anoviputula vina anowaputtula attu ena. Yehova onowiwa opa aganonaga niviputtulaga vina naputtulaga attu ena.

7. Mowiwanana na Roma 12:1, 2, yosakula gani ena iyo?

⁷ Txino vamaromo amarho ehu vina anamudhi anelege onibedda atamelaga onitximiha wi nihittiye omuttu wawale. (1 Ped. 4:3, 4) Awene anele ologa wi iyo nihikana ofuru wosakula ejile enfunihu vina kili yofuneya waddeliwa na attu ena enfwanyelihu okosa. Masiki dhawene abale ankodda ofwara magano a Yehova kankana ofuru wokosa enfunani. Mwa ebaribari, awene anovittiya weddihiwa na elabo ejene ensogorheliwa na Satana.  (Kengesa Roma 12:1, 2.) Iyo nihikana ofuru wa osakula: Odhowanavi omuttu wawale nisogorheliwaga na yottega vina elabo ya Satana, obe ovittiya osadduliwa na Yehova wi nikale attu apama.—Iza. 64:8.

8. Txini enanikamihedhe orabela mubuwelo na merelo abure?

⁸ Yehova onoziwa wi enottukula mudhidhi vina guru wi niwodhe orabela merelo na dhubuwelo dhabure. (Masal. 103:13, 14) Sabwa ya ejuwene, modhela Nzu naye, muya waye wotxena vina nikuru naye Yehova ononivaha eziwelo, guru vina ononivaha nikamihedho ninfunihu wi niwodhe otxinja egumi yehu. Kavali waganyedha wi iyene oli womala-nawale wi okamihedhe. Ovano ndowe nisekeserhe ttarho dhing’onovi dhinanikamihedhe orula omuttu wawale wi nivilibihedhe ofiyedha ttarho ya obatiziwa.

9. Nzu na Mulugu ninokamihedhe dhavi?

⁹ Omulabihedhe Bibilia wi ovipepesena. Nzu na Mulugu ninlaba ninga supeyo; ninowodha wukamihedha ononelamo pama dhubuwelo dhawo, dhologa dhawo vina dhowira dhawo. (Tia. 1:22-25) Namasunziha wawo wa Bibilia na Akristu ena oliba mpaddi womuyani anele wuvaha malago anokamihedhe. Motagiha, awene anele olabihedha malebo wi okamihedhena ozinddiyela mpaddi olibiliwe vina dhowobana dhawo. Anele wusunziha vina ofwanya mBibiliani malago anokamihedhe opemberha dhilemelelo dhabure. Yehova vina oli womala-nawale wi okamihedhe. Iyene onoziwa mukalelo wapama wowukamihedha; vina onoziwa ejile eli mmirimani mwawo. (Gano 14:10; 15:11) Nona kakana elemelelo ya olobela vina osunza Nzu naye masiku otene.

10. Txini esunziliwe na nipadduwo na Elie?

¹⁰ Okane nikuluvelo wi magano a Yehova bamakamaka. Iyo ninowodha opurelamo dhotedhene dhinnikumbira Yehova wi nikose. Abale ankalawo mowiwanana na magano oligana a Yehova anopurelamo, anokana egumi yottugareya vina anokana egumi yatxibarene. (Masal. 19:7-11) Mottiyana na abale ampwaza magano oligana a Yehova anotabuwa na dhodhelavo dha dhintopa maningo. Koona elogile mulobwana onkuweliwa Elie sabwa ya onyanyala magano a Mulugu. Iyene oleliwe na amambali animukwela Yehova. Mbwenye muzombweni mwaye wahisakula mandano abure. Iyene wahifwara meddelo a oja fola, okosa mararuwo vina ombava. Iyene wahifiyedha okala muttu waharutxiwa osilidhiwa. Iyene ohiloga: “Miyo ddankosa dhotedhene dhasunzihiwimi wi ddihikose ninga Mukristu.” Masiki dhawene, Elie kadduwalile esile dhisunzihiwiye bali muzombwe. Wahikosa guru eli yotene wi anyanyale dhilemelelo dhabure. Odhile obatiziwa yaka ya 2000. Magano a Yehova amukamihedhile dhavi? Elie ohiloga: “Ovano miyo ddikana murenddele wa muyubuweloni vina mubuwelo wotxena.” * Nipadduwo ntti ninoniha wi abale annyanyala magano a Yehova anoviputtula. Masiki dhawene Yehova oli womala-nawale wi akamihedhe okosa matxinjo.

11. Dhilobo gani dhinidda Yehova?

¹¹ Widdege esile dhinidda Yehova. (Masal. 97:10) Bibilia onloga wi Yehova onosilidhiwa na ‘mwang’anelo wa muliba opanela, nlumi na muliba ozivala vina mada animpa muttu ohina muladdu.’ (Gano 6:16, 17) Iyene vina ‘onowawidda abale anawidda akwawa.’  (Masal. 5:6) Yehova onowidda mweddelo obu na mereloya, jijuwene yamuttukuleli watolotxa attu abure akalilewo nsaka na Nowé abuwene adhalihile obure mwilaboni. (Wita 6:13) Koona nipadduwo nina. Yehova wahimulabihedha namavuhulela waye Malakiya oleba wi, Iyene onowawidda abale anamwala awadhiwa se miladdu. Mulugu karumela webedha wawa vina agahakuwela wila attonge.—Mal. 2:13-16; Aheb. 13:4.

12. Txini entapulela ‘ottawa obure’?

¹² Yehova onfuna wi iyo ‘nittawe obure.’ (Rom. 12:9) Nzu ntti ‘ottawa’ va versuni eji ninaddiwana orabela elobo yonyakuwa ennittukulela ogwiha mara. Kobuwela yowakula yovadda eganvahile weyo muttu kowukumbira wi oje yoja yovudda. Wubuwelavi bahi sabwa ya oja elobo yovudda egahunyakuwela. Na mukalelo wakakene, wubuwela okosa elobo enona Yehova wi jabure enofwanyela oninyakuwela.

13. Ninawodhe dhavi okoya mubuwelo wehu?

¹³ Okoye mubuwelo wawo. Dhubuwelo dhehu sinnittukulela okosa dhilobo dhabure. Ji sabwaya elogile Yezu wi ninofwanyela orabela momaguva mwene dhubuwelo dhiganittukulile okosa yottega enddimuwa. (Mt. 5:21, 22, 28, 29) Iyo ninfuna nimwagalalihe Babi wehu wa wirimu, kahiye mwenemo? Nona jamakamaka orabela dhubuwelo dhabure dhigadhile mmusorhoni mwehu!

14. Dhologa dhawo dhintonyihedha eni nanda mavuzo gani anfwanyelihu wakula?

¹⁴ Wang’anele dhologa dhawo. Yezu ohiloga dhahi: “Vano dhotedhene dhimbudduwa mwano dhinda mmurimani.” (Mt. 15:18) Pumwenemo, iyo ninloga esile dhidhalile mmurimani mwehu. Nona kavikose mavuzo aba: ‘Miyo ddinorabela ologa ottambi masiki akala ologa ebaribari onodditatamulela makattamiho? Ninga muteli obe muteliwi ddinorabela omugayela muttu ohili mwadhaga obe mamunaga? Ddinorabela kakamwe ologa mazu onyakuwa? Ddinowakula na ofasa muttu agaddilogela elobo yabure?’ Otanalela na ofwasa mavuzo aba enele wukamihedha. Akala weyo onovilibihedha orabela mazu onyimula, ozivala vina mazu onyakuwa mmakanini mwawo onele wona wi kinrutxa orula omuttu wawale.

15. Txini entapulela ‘okomela vapingirhizini’ omuttu wehu wawale?

¹⁵ Okose ejile eli yofuneya. Murumiwi Paulo  ohiloga nladdaniho ninoniha wi jofuneya otxinja mukalelo wehu wa ologa. Iyene ohiloga wi ninofwanyela ‘orula omuthu wehu wawale’ nikomele ‘vapingirhizini.’ (Rom. 6:6) Na mazu mena kuloga, iyo ninofwanyela ofwara yotagiha ya Kristu. Iyo ninofwanyela opa dhilemelelo na meddelo dhinidda Yehova. Nigattukula ttarho esi ninele owodha ottukula mubuwelo wotxena vina njedhelo na ojavo egumi yamukalakala. (Jo. 17:3; 1 Ped. 3:21) Kudduwale, Yehova kanatxinje malamulo aye wi anagalalihena, ddi iyo onfwanyela otxinja egumi yehu wi nifware malamulo aye.—Iza. 1:16-18; 55:9.

16. Enfuneyela ni wi odhowegevi owanagana dhowobana dhawo dhomaningoni?

¹⁶ Kuttiye owanana dhawobana dhawo dhomaningoni. Ogamala obatiziwa enele ofuneya odhowavi owanagana dhowobana dhawo dhomaningoni. Koona nipadduwo na mulobwana onkuweliwa Maurício. Iyene bali muzombwe wamutelile mulobwana mukwaye. Mwa ovira wa mudhidhi, iyene wahaziwa Anamoona a Yehova venevo oroma omusunza Bibilia. Vasogorhova wahitxinja egumi yaye babatiziwa yaka ya 2002. Masiki amulabelaga Yehova mwa vyaka dhinjene, Maurício ohiloga dhahi: “Dila dhina dhinowanagana dhubuwelo dhohifwanyelela.” Ottiya ejo iyene kattiyile dhilobo esi omobaniha. Vasogorova iyene ohiloga dhahi: “Eddilibihile ja oziwa wi ddihikosa yosakula enimwagalaliha Yehova.” *

17. Nipadduwo na Nabiha ninupangarhaza dhavi?

¹⁷ Olobele omukumbiraga Yehova nikamihedho. (Gal. 5:22; Fil. 4:6) Okuluvele muya waye wokoddela ottiya okuluvela guru dhawo. Iyo ninofwanyela okosa guru eli yotene wi nirule omuttu wawale. Kona nipadduwo na muyana dhahi onkuweliwa Nabiha. Babe omuttawile bana vyaka tano na modha. Iye ohiloga dhahi: “Ejo yahidditotela wiwa opa venjene.” Nabiha munuwiliye karutxa osilidhiwa vina wali muttu wowali. Iyene wahivolowela oguliha mirobwe dhinnonga ogogo bafiyedha ofugeliwa mukambura bakalamo vyaka dhing’onovi. Anamoona a Yehova munfwanyilani mukambura ahiroma omusinziha Bibilia. Venevo Nabiha baroma okosa matxinjo mwigumini mwaye. Iyene ohiloga dhahi: “Dhikaro dhina kaddarutxile ottiya,  mbwenye ottiya okobola fola yali makani mena.” Nabiha wahidhowavi awanagana ekaro eji okwaranya yaka modha omamalelowa wahiwodha ottiya. Txini emukamihedhile? Iyene ohiloga: “Yamakamakaya eddikamihedhile yali ya omuloba Yehova mudhidhi wotene wi addikamihedhe.” Ovano iyene onowalibiha attu ena na mazu aba: “Akala miyo ddihiwodha otxinja egumi yaga wi ddimwagalalihe Yehova, muttu-muttuvi onowodha vina!” *

18. Mowiwanana na 1 Korinto 6:9-11, txini ewodhile okosa adhari enjene a Yehova?

¹⁸ Nsaka zana noroma, alobwana na ayana ena asakuliwe na Yehova wi alamulele na Kristu ahipattiwa na dhimanya dhabure. Motagiha, ena ankosa mararuwo, antelana alobwanavi obe ayanavi vina enaya ali ambava. Mbwenye na nikamihedho na muya wokoddela wa Mulugu ahiwodha otxinja dhimanya esi dhabure. (Kengesa 1 Korinto 6:9-11.) Yakakene jimpadduwa masaka abano, Bibilia onowakamihedha attu matxikwi na matxikwi okosa matxinjo mwigumini mwawa. * Awene anowodha opembera dhimanya dhabure. Yotagiha yawa enowoniha wi weyo onowodha okosa matxinjo mwigumini mwawo vina o pembera dhimanya dhabure wi ofiyedhe ttarho ya obatizo.

19. Txini enasekeserihu nsunzo ninfwarela?

¹⁹ Kakosa guru eli yotene wi orule omuttu wawale, mwa abale anfuna obatiziwa anofwanyela okosa guru ya wabala omuttu oswa. Nsunzo nindawo ninele osekesera mukalelo onawodhe iyo okosa ejiwene vina mukalelo onanikamihedhe attu ena.