Anengesa nipadduwo ntti mowaguva-mwene kannonelamo. Mbwenye versu esi dhinaloga alobwana eli ottiyana akuweliwa na nzina nakene, Mefiboset vina ninele osunza elobo nigasekeserha nipaduwo ntti.

Sawul Mwene wa Izrayel wana aima atanu na eli vina anayana eli. Mwana woroma wa Sawul wali Jónata. Vasogorhova mwene wahikana mwana mwina wakuweliwa Mefiboset, wambaliliye na mwadhiye wa mamima wakuweliwa Rispa. Yotikinihaya jawi, Jónata wahikana mwana wanvahiliye nzina na Mefiboset. Dhahene Mwene Sawul wahikana mwanaye wakuweliwa Mefiboset vina mudhulaye wakuweliwa na nzina nakene, Mefiboset.

Nsaka dhahi, Mwene Sawul wahiroma wawidda akadda Gabaón vina wahitamela watolotxa otene. Enoneya ninga muttengo mwinjene wa akadda Gabaón ahipiwa. Eji yali elobo yawopiha. Sabwaya? Sabwani nsaka na Josuwé, anddimuwa a Mwizrayel ahikosa nipagano na murenddele na akadda Gabaón.—Jos. 9:3-27.

Nipagano ntti nakalawovi mpaka nsaka nidhile Sawul okala Mwene. Mwene wahitagiha watolotxa akadda Gabaón otene. Sabwa ya ejuwene ‘Sawul vamodha na amudhawe ahigweliwa muladdu wa nikami.’ (2 Sam. 21:1) Nsaka nikalile, Davidi Mwene. Akadda Gabaón aviluwile ahidha ologa na Davidi sabwa ya muladdu wawopiha wakosile Sawul. Davidi wahavuza dduwireleni eni sabwa ya muladdu wawopiha okosile Sawul wi nyuwo muwodhe oruriha nlogo na Mulugu. Ottiya okumbirha kobiri, akadda Gabaón akumbirhile aima atanu na eli a mulobwana ‘wafuna wapa’ wi adhowe ape. (Oleb. 35:30, 31) Davidi wahirumela yokumbirha yawa.—2 Sam. 21:2-6.

Mudhidhene obo, Sawul na Jónata ahimala okwa okoddoni, mbwenye Mefiboset mwana Jόnata wakalawovi. Iyene wahiragala myeddo dhomili sabwa ya ngovi yampadduweli bali mwana vina mudhidhi wapile bibe akadda Gabaón iyene kamukamihedhile. Davidi wahikosa nipagano na wandana na Jόnata, nipagano ntti nanapurihamo ana a Jónata adhegewo ottaganyiha na mwanaye Mefiboset. (1 Sam. 18:1; 20:42) Nipadduwona ninloga dhahi: “Mwene [Davidi] omvuna Mefiboset, mwana Jόnata, mudhulu wa Sawul, wi arihe wanddana omagileye n’oddubela.”—2 Sam. 21:7.

Davidi wahiriha yogana ya akadda Gabaón, iyene wahaperhekela aima eli a Sawul mmodhaya wakuweliwa Mefiboset, ena atanu ali adhulu a Sawul. (2 Sam. 21:8, 9) Eji ekosile Davidi ekuputta muladdu wa nikami yagweliwe nlogo.

Yowireya eji enopitta nipadduwo. Nlamulo na Mulugu naloga dhahi: “Ana kapeliwe muladdu oligile amambali awa.” (Olib. 24:16) Yehova kagattiyile wi ana eli a Sawul ottaganyiha na adhulaye atanu apiwe kohikana muladdu. Nlamulo nandowavi nilogaga wi: “Muthu-muthu onothongeliwa opeliwa muladdu oligileye.” Eji enoniha wi adhulu atanu a Sawul na anaye eli apiwe, ahimukamihedha Sawul mudhidhi watolotxiye akadda Gabaón. Edhile opadduwa, attu atanu na eli apiwe akweli muladdu ototilani.

Nipadduwo ntti ninoniha wi muttu kanfwanyela okosa elobo yabure ngamala atamela ovibarela obuwelaga wi wafwara malago. Muziwitxi mmodha olebile Gano ohiloga dhahi: ‘Wang’anege vannyigaliwe, dhawene onovira vovadda.’—Gano 4:24-27; Ef. 5:15.