1-2. Txini enonaga iyo labo n’obatizo, nanda txini enasunzehu mwari mwa nsunzo ntti?

 WAHIROMAGA wona nikuru na attu anfuna obatiziwa va kongeresuni obe va sembeleyani? Enowodheya wiwa wakula wawa na nikuluvelo mavuzo meli a obatiziwa. Weyo onowodha wawona amudhawa bali owagalalene. Agabudduwa mmanjeni onowodha wona emwerumweru omentoni wawa, vina anowobeliwa mada. Sumana dhotedhene attu matxikwi na matxikwi anobatiziwa ninga Anamoona a Yehova.

² Ki weyo? Akala onowubuwela obatiziwa, oli muttu wokoddela vamentoni va Yehova mwilaboni ejino yabure vina eji enowoniha wi weyo onomutamela Yehova. (Masal. 14:1, 2) Peno akala wa muzombwe obe wa munddimuwa, nsunzo ntti nisasanyedhiwe weyo. Akala ohibatiziwa, nsunzo ntti ninele olibiha efunelo yawo ya odhowavi omulabelaga Yehova namukalakala. Ovano ninfuna nisunze mwaha miraru dhinnittukulela omulabela Yehova.

3. Sabwaya jani alabeli a Yehova agakwelaga dhilobo dhebaribari vina dholigana? (Masalmo 119:128, 163)

³ Yehova wahiloga na nlogo naye wi eddegena ebaribari. (Zak. 8:19) Vina Yezu wahawaddela anamafwara aye wi atamelege oligana. (Mt. 5:6) Eji entapulela wi ninofwanyela okana efunelo enddimuwa ya okosa ejile enloga Mulugu wi japama vina joligana. Weyo onokwela dhili dhebaribari vina dholigana? Kaninaganyedha, weyo onokwela. Onowidda ottambi na dhilobo dhotene dhabure. (Kengesa Masalmo 119:128, 163.) Onloga dhottambi onimusanza Satana, mulamuleli wa elabo ejino. (Jo. 8:44; 12:31) Yofuna yaye modha ja opigidha nzina notxena na Yehova. Oromana osadduwela waye mmunddani mwa Edeni, Satana onowazavi ottambi sabwa ya Mulugu. Satana onowakwekwettela attu wubuwela wi Yehova mulamuleli wa mukumbela vaye wohikuluveleya, onavitela  attu dhilobo dhapama. (Wita 3:1, 4, 5) Dhottambi dhinloga Satana mwaha wa Yehova dhinopigidha mobuwelo na mirima dha attu. Attu agasakula ohikwela ebaribari Satana onowakwekwettela okosa dhilobo dhotene dhohiligana vina dhabure.—Rom. 1:25-31.

4. Txini enkosa Yehova enoniha wi iyene “Mulugu wororomeleya”? (Koona vina foto.)

⁴ Yehova “Mulugu wororomeleya,” nona na mukalelo wapama iyene ohasunziha ebaribari otene animukwela. (Masal. 31:5) Dhahene, Yehova onowakamihedha ohinyengettiwa vina na dhottambi dha Satana. Yehova vina onowasunziha alabeli aye okala attu oligana vina okuluveleya. Eji enowakamihedha abale animukwela Yehova ovikwela anyene vina okana murenddele. (Gano 13:5, 6) Mwari mwa nsunzo nawo na Bibilia, onowodha omona Yehova okoselaga esene? Weyo onodhowavi osunzaga wi mukalelo wa Yehova okosa dhilobo bwa pama makamaka mwa weyo. (Masal. 77:13) Nona onofwanyela okosa ejile enloga Yehova wi japama. (Mt. 6:33) Weyo onofuna wamelela ebaribari vina olagiha wi ejile elogile Satana mwaha wa Mulugu wehu ottambi. Ononihe dhavi ejuwene?

5. Ononihe dhavi wi onokamihedha dhili dhebaribari vina dholigana?

⁵ Enowodheya weyo okalawo weddaga na merelo anawoniha attu otene wi: “Onorabela dhottambi dha Satana vina onokamihedha ebaribari. Enowodheya woniha wi onofuna olamuleliwa na Yehova vina onofuna okosa ejile enlogiye wi japama.” Onakose dhavi ejuwene? Modhela onfiyedha Yehova na nlobelo vina oviperheka wa iyene, vasogorhova wonihe ejuwene mwa obatiziwa. Okwela dholigana vina dhili dhebaribari bu mwahaya munddimuwa onuttukulela osakula obatiziwa.

6. Mwaha gani dhinfwanyeya va Masalmo 45:4 dhinuttukulela omukwela Yezu Kristu?

⁶ Txini enuttukulela omukwela Yezu Kristu? Va Masalmo 45:4 vahikala mwaha dhapama dhinnittukulela omukwela. (Kengesa.) Yezu onokwela ebaribari, ddoligana vina ddoviyeviha. Akala weyo onokwela ebaribari vina dhilobo dholigana, eji enowoniha wi onomukwela Yezu Kristu. Pumwenemo, sabwani Yezu Kristu na oliba murima ohibarela ebaribari vina oligana. (Jo. 18:37) Yezu wonihile dhavi wi ninofwanyela ovyeviha?

7. Txini enutikiniha na ovyeviha wa Yezu?

 ⁷ Na yotagiha yaye, Yezu ohoniha wi ninofwanyela okala ovyeviha. Iyene kanivittittimiha, mudhidhi wotene oninvaha nttittimiho Yehova. (Mk. 10:17, 18; Jo. 5:19) Ononamo dhavi na ovyeviha oku wa Yezu? Txibarene eji enowuttukulela omukwela vina onfwara Yezu. Txini enimuttukulela Yezu okala woviyeviha? Sabwani Yehova ddoviyeviha. (Masal. 18:35; Aheb. 1:3) Nanda Yezu onokwela vina onotagiha ekalelo ya Babe, eji kinuttukulela omuziwa pama Yezu vina otagiha mowakwana-mwene mikalelo dha Yehova?

8. Txini ennittukulela omukwela Yezu?

⁸ Iyo ninomukwela Yezu, vowi iyene ddi mwene wofwanyelela. Mwinyene Yehova ddimuswagihile Mwanaye bamuttoma ninga mulamuleli. (Iza. 50:4, 5) Ottiya ejo, Yezu ohittiya dhilobo dhinji sabwa y’onikwela. (Jo. 13:1) Vowi Yezu ddi Mwene wehu, iyo ninofwanyela omukwela. Yezu ohitapulelamo wi onawona—ninga akwaye abale animukwela txibarene—vina akwaye anowoniha wi anomukwela mwa ovirihamo malamulo aye. (Jo. 14:15; 15:14, 15) Gari enddimuwa okala marho wa Mwana wa Mulugu!

9. Obatiziwa wehu, onligana dhavi na obatiziwa wa Yezu?

⁹ Nlamulo nimodha ninloga wi anamafwara aye anofwanyela obatiziwa. (Mt. 28:19, 20) Vina iyene ohittiya yotagiha eji modhela obatiziwa. Ebaribari wi obatiziwa wa Yezu ohittiyana na obatiziwa wehu mwa mikalelo dhina. (Koona kasha “ Obatiziwa wa Yezu Onttiyana Dhavi na—Obatiziwa wa Anamafwara Aye.”) Mbwenyi masiki dhawene muhikala dhilobo dhiniwanana. Vabatiziwe Yezu, iyenene wahivivelela okosa efunelo ya Babe. (Aheb. 10:7) Na mukalelo wakene iyo nigabatiziwa ninowatonyihedha attu otene wi nihimperhekela Yehova egumi yehu yotene. Oromana venevo mpaka musogorho, elobo eli yamakamaka mwigumini mwehu ja okosa efunelo ya Yehova ottiya efunelo yehu, dhahene ninofwara yotagiha ya Yezu.

10. Txini egawuttukulele obatiziwa?

¹⁰ Kobuwela vang’onovi esile dhinziwiwe sabwa ya Yezu. Weyo onoziwa wi Yezu ddi Mwana woroma opaddutxiwe na Yehova vina ddi iyene osakuliwe ninga Mwene wi alamulele elabo. Weyo onowona wi iyene onosanza mowakwana-mwene ovyeviha wa Babe, vina ohisunza wi Yezu ohajiha attu ana dala, ohapangarhaza attu akukumuwile vina ohifiyedha wavulumutxa aredda. (Mt. 14:14-21) Weyo onowodha ozinddiyela mukalelo onsogorhela Yezu milogo masaka abano. (Mt. 23:10) Nanda onoziwa wi ninga Mwene wa Omwene wa Mulugu, Yezu onele okosa dhilobo dhinjene musogorho. Ogamala otanaalela eso dhotedhene, ononihe dhavi wi onomukwela Yezu? Modhela ofwara yotagiha yaye. (Jo. 14:21) Elobo yoroma enfwanyeliwe okosa ja oviperheka wa Yehova modhela nlobelo vina obatiziwa.

11. Mwaha munddimuwaya onnittukulela obatiziwa buvi?

¹¹ Mwaha munddimuwaya onimuttukulela muttu obatiziwa buvi? Yezu ohiloga mwahaya mulogeliye nlamulo nddimuwa nivahile Yehova, iyene ologile dhahi: “Omukwele Nabuya Mulugu wawo na murima wawo wotene, na thontho yawo yotene, na guru dhawo dhotene.” (Mk. 12:30) Weyo onona ninga onomukwela Yehova dhahene?

12. Txini enuttukulela omukwela Yehova? (Koona vina foto.)

¹² Dhikalawo mwaha dhinjene dhinnittukulela omukwela Yehova. Motagiha, weyo ohisunza wi iyene “fukuwa enkaliha egumi” vina  “dhapama dhetene na mivaho dhetene dhawakwana” dhinda wa iyene. (Masal. 36:9; Tia. 1:17) Mulugu wehu wokwela vina wotapuwa mada ohuvaha dhilobo dhotene dhapama dhina weyo.

13. Yobolo ekaleli eni nvaho wamakamaka?

¹³ Mukutto wa yobolo nvaho wa makamaka onivahile Yehova, nikana sabwa dhapama dhinnittukulela ologa ejuwene. Katanalela ofiyedheya ona Yehova na Yezu. Yezu ohiloga dhahi: “Baba onoddikwela” vina “Miyo ddinomukwela Babaga.” (Jo. 10:17; 14:31) Yehova na Yezu ahikala vamodha mabiliau menjene a vyaka. (Gano 8:22, 23, 30) Nona mandano awa bakala ovadda vaddiddi. Ovano karoma otanaalela mukalelo wiwale opa Yehova venevo varumelihiliye wi Mwanaye atabutxiwe vina apiwe. Yehova ohirumeliha wi Mwanaye okweleya—apiwe—wi niwodhe okalawo namukalakala. (Jo. 3:16; Gal. 2:20) Esi dhotene dhinowoniha wi Yehova onokwela venjene nlogo na attu na weyo vina, yobolo mwaha munddimuwa onihu onnittukulela omukwela Yehova.

14. Yogana gani yamakamaka enfwanyeliwe okosa mwigumini?

¹⁴ Omukwela wawo Yehova wandhowa wunuwaga venevo vandhowa weyo osunzagavi venjene mwaha wa iyene. Vina weyo onofuna odhowa okalaga ofiyedheya na iyene okala  nokala-wene. Eji jowodheya. Yehova onfuna wi weyo ottabihe murima waye. (Gano 23:15, 16) Enowodheya okosa ejuwene na mazu vina na merelo. Dhahene, dhosakula dhinkosiwe mwigumini dhinele woniha wi txibarene onomukwela Yehova. (1 Jo. 5:3) Eji yogana yamakamaka enfwanyeliwe okosa mwigumi.

15. Weyo ononihe dhavi wi onomukwela Yehova?

¹⁵ Ononihe dhavi wi onomukwela Yehova? Omukosele nlobelo navawoka ompikirhelaga wi onele omulabela egumi yawo yotene vina wonihe yoganaya ejo modhela obatiziwa. (Masal. 40:8) Ninga monelihu mwari mwa nsunzo ntti, labo n’obatizo siku namakamaka mwigumini mwehu. Oromana venevo okalawo wawo wotene ku okosa efunelo ya Yehova ottiya efunelo yawo. (Rom. 14:8; 1 Ped. 4:1, 2) Eji enodhaga okala ninga yosakula enddimuwa. Mwebaribari enddimuwa mbwenyi enofugula dila ya ofwanya egumi yamakamaka eliwo.

16. Mowiwanana na Masalmo 41:12, Yehova onarurihe dhavi abale animperhekela egumi yawa?

¹⁶ Yehova muttu wotapuwa mada oliwo. Kintanala guru enimukoseliwe, iyene onele wuwenjedhedhela vopitta. (Mk. 10:29, 30) Iyene onele wuvaha egumi yapama vina empuriha, masiki mwilaboni mpu endowa omagomo. Nanda oku kumaromowa. Onelege odhowavi omulabelaga Yehova egawodheya okala-nokala-wene. Enowodheya weyo omulabela Babi wehu wokweleya wa wirimu namukalakala. Okwelana wenyu ogandowa wunuwaga vina weyo onele okalawo na mukalakala.—Kengesa Masalmo 41:12.

17. Elobo gani enanvahe iyo Yehova ejuwene ehiniye?

¹⁷ Weyo ogaviperhekela wa Yehova nanda obatiziwa, onele okana gari ya onvaha Yehova elobo ya ttima vaddiddi. Dhilobo dhotene dhaderetu na dhapama dhipaduwile mwigumini mwawo mivaho dha Yehova. Wila otamalele mivaho esi, onofwanyela onvaha Muttanddi wa erimu na elabo ya vati elobo ehiniye,—okala wororomeleya vina omulabela na murima  wotene. (Job 1:8; 41:11; Gano 27:11) Txibarene obu mukalelo wapama wa olabihedha deretu egumi yehu, mohaganyedha omukwela wawo Yehova bunawuttukulela obatiziwa.

18. Mavuzo gani anfwanyela weyo ovikosa?

¹⁸ Onofuna obatiziwa? Onwodha wakula nivuzo ntti ddi weyo. Mbwenyi egahikala yapama ovivuza, ‘Ehinddiwodhiha obatiziwa txini?’ (Mer. 8:36) Katanalela mwaha miraru dhonilehu mwari mwa nsunzo ntti. Yoroma, weyo onokwela ebaribari vina dholigana. Kavivuze, ‘Miyo ddinojedhela labo ninaloge attu otene ebaribari vina dhilobo dholigana?’ Yanawili, weyo onomukwela Yezu Kristu. Kavivuze, ‘Miyo ddinofuna wi Mwana wa Mulugu akale Mwene waga vina ddinofuna ofwara yotagiha yaye?’ Yanoraru, opitta esi dhotene, weyo onomukwela Yehova. Kavivuze, ‘Miyo ddinofuna wagalaliha murima wa Yehova modhela omulabela?’ Akala weyo ohakula mavuzo aba otene ndde, onkoddelani obatiziwa? Onjedha eni?—Mer. 16:33.

19. Sabwaya jani kunfwanyela wova obatiziwa? Kavaha yotagiha. (Joau 4:34)

¹⁹ Akala weyo onowova obatiziwa, katanalela musibo okosile Yezu. (Kengesa Joau 4:34.) Yezu ohiladdaniha okosa efunelo ya Yehova na yoja. Sabwaya jani? Sabwani oja, elobo yapama mwa iyo. Vina Yezu wanziwa wi dhotene dhinnikumbirha Yehova wi nikose sapama mwa iyo. Yehova kanfuna wi iyo nikose elobo egadhile oniputtula. Koddi obatizo onokosa mpaddi wa efunelo ya Yehova? Ndde. (Mer. 2:38) Nona kakuluvela wi ogabatiziwa enele okala yapama mwa weyo. Weyo txipo kugovile oja yoja woziva vaddiddi, kito enuwoviha obatiziwa txini?

20. Txini enone iyo nsunzo ninfwarela?

²⁰ Onjedhela eni? Enjene anowakula nivuzo ntti dhahi, “Miyo kaddili womala nawale.” Mwebaribari, yogana enkosiwe ya oviperheka wa Yehova vina obatiziwa yogana yamakamaka vaddiddi mwigumini mwawo. Nona, jofuneya wubuwelela dereto mwaha wa yogana eji, txino enele ofuneya mudhidhi vina ovilibihedha wi okale womala-nawale. Mbwenyi akala weyo onofuna-wene obatiziwa, txini enfanyeliwe okosa wi ovisasanyedhe? Yowakula ya nivuzo ntti ninele wona nsunzo ninfwarela.