Sabwaya jani mulobwana omukuwelile Boaz “mwanammudhi” aloga wi komutela Ruti agahinonga dhaye? (Ruti 4:1, 6)

Masaka a mundduni, mulobwana watelile kokwa ahikanile mwana, vanniteya mavuzo ninga aba: Txini egapadduwile na mindda dhaye? Koddi nzina naye nigahidduwaliwa kakamwe na amudhaye? Nlamulo na Mizé nanakula mavuzo aba.

Txini yapadduwa na mindda dha marafulaya, obe txini yapadduwa na minddadha iyene koguliha sabwa ya oyelega? Mbalaye obe mmudhaye wofiyedheya angula, dhawene munddaya wandowavi okalaga wa amudhaye.—Onam. 25:23-28; Oleb. 27:8-11.

Egawodheyile dhavi nzina na marafulaya ohidduwaliwa na amudhaye? Modhela mwadhi marafula oteliwa na mulamwaye, jijene epadduwile na Ruti. Mulobwanaya wannimutela wi ambalena mwana, mwanaya ottiya ohalana bahi mindda dha marafula, wanwalana vina nzina na marafula. Aba ali masasanyedho okwela akamihedha amamukwela.—Olib. 25:5-7; Mt. 22:23-28.

Koona yotagiha ya Nowemi. Iyene wateliwe na Elimelek. Mukwile Elimelek na anaye eli, Nowemi kana muttu womukamihedha. (Ruti 1:1-5) Veyeleli Nowemi o Juda, wahimwaddela muwenyaye Ruti wi amukumbirhe Bowaz wi agule obe obolele mindda dha marafula Elimelek. Bowaz wali munamudhi wofiyedheya wa Elimelek. (Ruti 2:1, 19, 20; 3:1-4) Mbwenyi, Bowaz wahubuwela wi wahikalawo “munammudhi” mwina walitxi wofiyedheya, wafwanyela ogula minddadha.—Ruti 3:9, 12, 13.

Omaromo, “munammudhi” ole wanfuna okamihedha. (Ruti 4:1-4) Masiki minddadha kogulihiwaga muttengo mwinjene agahigula, sabwani iyene wanziwa wi Nowemi kagakanile mwana agadhile ohalana mindda dha Elimelek. Dhahene, minddadha dhigahikala dha munammudhi ole vina agahiranjulana vaddiddi.

Mbwenyi, munammudhi oddule muziweliye wi yanfuneya omutela Ruti, wahitxinja mubuwelo waye. Iyene ohiloga dhahi: “Kaddingula munddayá, sabwa kunadhe okala wa anaga.” (Ruti 4:5, 6) Iyene watxinjeli nni mubuwelo waye?

Munammudhi ole obe mulobwana mwina komutela Ruti, vina babalana mwana, mwanaya agahalana mindda dha marafula Elimelek. Eji eganongile dhavi dhokana dha Munammudhi oddule? Bibilia kanloga elobo mwaha wa makani aba, mbwenyi enowodheya otanalela sabwa dhing’onovi.

• Yoroma, iyene agahiyelela kobiri dhigaguliliyena mindda dha Elimelek, na sikuna mindda esile dhigahidha okala dha mwana agambaliliye na Ruti.

• Yanawili, iyene agahikana muttorho w’omusapela Ruti na Nowemi.

• Yaneraru, mulobwana ole kokana aima ena na Ruti, agahigawa mindda dhaye na aima ena abaliliye na muyana mwina.

• Yanonayi, akala munammudhi ole kana aima, mwana agakaniliye na Ruti agahalana mindda dha Elimelek na mindda dhaye. Munammudhi ole kokwa mindda dhaye dhigakalile dha mwana agattukulile nzina na Elimelek ottiya naye. Munammudhi oddule kafuna ononga dhilobo dhaye wi amukamihedhe Nowemi. Iyene wahigana wi Bowaz munammudhi mwina wofiyedheya, attukule muttorho obu. Bowaz wahikosa ejuwene sabwani kafuna wi nzina na marafula nirimele.—Ruti 4:10.

Yafuna munammudhi oddule yali ya okoya nzina naye na dhokana dhaye. Iyene wali namakumbela vaye. Munammudhi ole wanfuna venjene okoya nzina naye, mbwenyi kipadduwile ninga mwafuneliye, mpaka ovano kavo onziwa nzina naye. Iyene vina ohiyelela gari enddimuwa vaddiddi yakelile Bowaz. Bowaz ohidha okala mmodha mwa abale anlogiwa muzizani nibaliwe Mesiya, Yezu Kristu. Yodhelavo gani yokubanyiha, sabwa ya omukumbela vaye munammudhi ole wahikodda omukamihidha muttu wafuna nikamihedho!—Mt. 1:5; Lk. 3:23, 32.