NSUNZO 14
“Mugakwelanaga, Athu Etene Anoziwa wi Muli Anamasunza Aga”
“Mugakwelanaga,—athu etene anoziwa wi muli anamasunza aga.”— JO. 13:35.
JIBO 106 Okwela Kofuneya Vaddiddi
DHINASUNZE IYO a
Txini enubuwelaga attu enjene ahili Anamoona a Yehova, agona okwelana wa nlogo na Yehova? (Kang’ana ddima 1)
1. Txini enatikiniha attu agadha wona matugumano ehu dila yoroma? (Koona vina foto.)
KAWUBUWELE mulobwana na mwadhiye anona matugumano Onumbani ya Omwene dila yoroma. Awene anotikina na mukalelo wapama onttambiriwani vina anowona okwela onlagihana muttu na mukwaye. Eyelelaga vatakulu muyanaya onologa, ‘Onoziwa, Anamoona a Yehova bottiyana na attu ena aziwilimi—vina ddihiziveliwa venjene otugumana na awene.’
2. Attu ena attiyeleni omulabela Yehova?
2 Okwela ona nlogo na Yehova onotikiniha. Enoziweya wi Anamoona a Yehova attu ohiligana. (1 Jo. 1:8) Nigaziwa deretu abali ehu kinarutxe wona dhovonya dhawa. (Rom. 3:23) Mokubanyiha-mwene sabwa ya ena ozuzumela dhovonya dha attu ena ahittiya omulabela Yehova.
3. Egawodheyile dhavi wazinddiyela Akristu ebaribari? (Joau 13:34, 35)
3 Koona wili nlebo na nsunzo ntti. (Kengesa Joau 13:34, 35.) Txini enazinddiyeliha Akristu a ebaribari? Okwela, ottiya oligana. Weyo ohona wi Yezu kalogile: Mugakwelanaka munele oziwa wi muli anamasunza aga. Mbwenyi iyene ologile: “Mugakwelanaga, athu etene anoziwa wi muli anamasunza aga.” Sabwa ya ejuwene kagali anamasunza a Yezu bahi agazinddiyeli wi ohikalawo okwela webaribari mmulogoni. Ottiya anamasunza a Yezu bahi agazinddiyeli okwela webaribari mmulogoni attu ahili mwibaribarini agahizinddiyela.
4. Txini egadhile ovivuza attu ena mwaha wa Akristu a ebaribari?
4 Attu ahili Anamoona a Yehova txino anovivuzaga: ‘Okwela onlagiha dhavi wi muttu namafwara wa Yezu? Yezu wakwelile dhavi arumiwi aye? Masaka abano enwodheya dhavi otagiha okwela wa Yezu?’ Iyo Anamoona a Yehova ninofwanyela wubuwela mavuzo aba. Nigakosa ejuwene kinarutxe wakwela attu ena makamaka nigagumanana magudulano na awene.—Ef. 5:2.
OKWELA ONOWAZINDDIYELIHA ANAMAFWARA A YEZU, DHAVI?
5. Mazu a Yezu anfwanyeya va Joau 15:12, 13 antapulela nni?
5 Yezu wahiloga wi anamafwara aye agahikwelana na mukalelo wotikiniha. (Kengesa Joau 15:12, 13.) Koona nlamulo navahiliye: “Mukwelanege ninga munukwelanimi.” Eji entapulela nni? Iyene owatapulelamo anamafwara aye wi anfwanyela wakwela attu ena opitta mwavikwelani—awene anfwanyela olevela egumi yawa wi avune abali awa egafuneya. b
6. Nzu na Mulugu ninoniha dhavi ttima ena okwela?
6 Bibilia onosunziha wi okwela kwamakamaka vaddiddi. Attu enjene anoziveliwa malebo aba: “Mulugu ddi okwela.” (1 Jo. 4:8) “Omukwele muttu mukwawo dhawene ninga envikweliwe.” (Mt. 22:39) “Okwela onothimiha dhothega dhinjene.” (1 Ped. 4:8) “Okwela kunamale-wene.” (1 Kor. 13:8) Versu esi na dhina dhinowoniha kakamwe wi okwela kofuneya-wene.
7. Sabwaya jani Satana kagawodhile wasunziha attu okwelana muttu na mukwaye vina okana wiwanana?
7 Enwodheya dhavi ozinddiyela relijiau yebaribari, oku marelijiau etene alogaga wi anosunziha ebaribari? Marelijiau otene anosunziha dhilobo dhottiyana. Satana onowodha wita marelijiau menjene ottambi eji enowazuzumiha attu enjene. Satana txipo kagawodhile wataganyiha attu a dhilabo dhottiyana-ttiyana wi akale Akristu ankwelana muttu na mukwaye orugunuwa elabo yotene. Yehova bahi ddinwodha okosa ejene. Eji ebaribari, okwela webaribari onda wa Yehova. (1 Jo. 4:7) Ankana okwela webaribari babale ana muya vina anrurihiwa na Yehova. Yezu ohiloga wi okwela bunazinddiyeliha Akristu ebaribari.
8-9. Attu ena aniviwamo dhavi agona okwelana wa Anamoona a Yehova?
8 Yezu wahiloga wi, attu enjene agahazinddiyela Akristu ebaribari sabwa ya okwela onlagihana awene muttu na mukwaye. Motagiha, mbali onkuweliwa Yan onowubuwela emuddiginyile murima vadhowiliye dila yoroma okongeresoni. Kongereso eji yakosiwe vakuvi na vankaliye estadiyu yakene yoniligiye mavurhano a mpirha myeri dha mundduni. Iyene ohiloga: “Attuya ali ottiyana vaddiddi. Anamoona a Yehova ali attu oleleya, ahabala deretu vina anawa ali oleleya. Opitta dhotedhene ddihona wi awene ahikana murenddele munddimuwa. Miyo ddanfuna murenddele ninga obu. Miyo kaddinubuwela diskursu dhikosiwevo, mbwenyi mweddelo wapama wa Anamoona a Yehova kaddidduwalile.” c Yonile Ian vakongerosoni yodhelavo enoniha okwela wehu. Iyo nigakwela abalihu vina arogora ninowaweddiha na oderetu vina nriho.
9 Mbali onkuweliwa John wahizinddiyela elobo yakene varomiliye wona matugumano Onumbani ya Omwene. Iyene ohiloga: “Ddahitikina na mukalelo wa weddihana wawa wapama . . . ali ninga attu oligana. Okwelana wawa watxibarene ohiddikamihedha wona wi ddihifwanya relijiau yebaribari.” d Dhotagiha esi na dhina dhinowoniha kakamwe wi alabeli a Yehova Akristu ebaribari.
10. Midhidhi gani dhina iyo gari dhowatonyihedha abali ehu okwela? (Koona nota.)
10 Ninga monelihu omaromo wa nsunzo ntti, otene ali mmulogoni attu ohiligana. Dila dhina abali ehu anele ologa obe okosa dhilobo dhinaninyimule. e (Tia. 3:2) Eji egapadduwa enowodheya watonyihedha abali ehu okwela wehu na mukalelo onaweddihehu. Elobo enanikamihedhe okosa ejene osunza yotagiha ya Yezu.—Jo. 13:15.
YEZU WONIHILE DHAVI WI WANAKWELA ARUMIWI AYE?
Yezu ohaweddiha arumiwi aye na okwela masiki vavonyani (Kang’ana ddima 11-13)
11. Tiago na Joau onihile mweddelo gani wohifwanyelela? (Koona vina foto.)
11 Yezu kajedhela wi arumiwi aye akale oligana. Ottiya ejo Yezu owakamihedha awene owanana dhohiligana dhawa wi arumeliwe vamentoni va Yehova. Labo nimodha arumiwi eli, Tiago na Joau, ahiloga na mamayawa wi amukumbirhe Yezu arumele wavaha mpaddo dhottukuwa Mumweneni mwaye. (Mt. 20:20, 21) Ekubirile Tiago na Joau ehoniha ekalelo ya ovittukulela vina omukumbela vaye.—Gano 16:18.
12. Koddi ddi Tiago na Joau atonyihedhile mukalelo wohifwanyelela? Katapulela.
12 Kahiye Tiago na Joau bahi onihile mweddelo wohifwanyelela mudhidhene obule. Koona ekosile arumiwi ena muziwelani: “Ena kumi mwiwalani makani aba, ahitikina venjene na anamafwara abale eli.” (Mt. 20:24) Enowodheya otanalela mbigiddi wetehile na arumiwi abale. Txino ahifiyedha ologa mazu ninga aba: ‘Nyuwo munoni ninga mulitxi ani ofiyedha okumbirha ettomo enddimuwa Mumweneni mwa Mulugu? Kahiyo nyuwo bahi olabile na Yezu ororomeleyene. Iyo vina ninofwanyela ejuwene enkumbirinyu!’ Kintanala mukalelo opadduwilani mudhidhene obule arumiwi ahidduwala otonyihedhana okwela vina orihana mudhidhi wotene muttu na mukwaye.
13. Yezu waweddihile dhavi arumiwi aye sabwa ya ohiligana wawa? (Mateu 20:25-28)
13 Yezu waweddihile dhavi arumiwi aye sabwa ya ohiligana wawa? Iyene ohavilela. Vina kawaddeli wi agahasakula arumiwi ena, attu amakamaka, oviyeviha vina anlagiha okwela. Na okurumuwa Yezu wahiloga na awene sabwani wanziwa wi arumiwi abale ahikana efunelo ya okosa dhilobo dhapama. (Kengesa Mateu 20:25-28.) Eji kiyali dila yoroma nne yomariha yawana arumiwi a Yezu wi yoneye bani walitxi wamakamakaya wa awene, masiki dhawene Yezu wanaweddiha na opama.—Mk. 9:34; Lk. 22:24.
14. Dhilemelelo gani dhafwanyeya mirudda dhiwunuwile arumiwi a Yezu?
14 Kavali waganyedha wi Yezu wantanala dhilemelelo dha murudda wunuwile arumiwi aye. (Jo. 2:24, 25) Awene onuwile mmuruddani mwasunziha asogorheli a marelijiau wi muttu wakana ttima agakana ettomo yamakamaka mmuruddani. (Mt. 23:6; koona vidiyu Primeiros Assentos na Sinagoga na nota de Estudo de Mateus 23:6.) Asogorheli vina a Ayuda anivihonana vina ttima enddimuwa opitta attu ena. f (Lk. 18:9-12) Yezu wanziwa wi dhotene esi dhampatta mukalelo waviwona arumiwi aye vina mukalelo wawonani attu ena. (Gano 19:11) Yezu wanziwa wi arumiwi aye elege okosa dhilobo dhovonya nona wanakurumuwela. Wanziwa vina wi awene ahikana mirima dhapama sabwa ya ejuwene wahitamela mudhidhi wowasunziha wi akale attu oviyeviha vina akwelegena muttu na mukwaye ottiya otamelaga okala attu amakamaka.
NINAFWARE DHAVI YOTAGIHA YA YEZU?
15. Epadduwile na Tiago vina Joau ennisunziha eni?
15 Enowodheya iyo osunza venjene na epadduwile na Tiago vina Joau. Okumbirha ettomo enddimuwa Mumweneni mwa Mulugu kiyakalile. Arumiwi ena vina ahivonya sabwani ahittiya makani abale atote ogawana. Masiki dhawene Yezu ohaweddiha na okwela vina oderetu arumiwi otene 12. Nipadduwo ntti ninnisunziha eni? Elitxi yofuneya otanalela kahiyo dhovonya dhinnikosela attu ena mbwenye mukalelo onfwanyelihu waweddiha. Txini enanikamihedhe ogwadda makaniya pama? Akala nile osilidhiwa na mbali nirome ovivuza: ‘Ekosiliye eddinyonyeli nni dhahene? Koddi eji enoniha wi ekalawo mpaddi onfwanyelimi oviwogolela? Ahikalawo makattamiho angumanana mbaliya? Masiki ddonaga wi vahikala mwaha onddittukulela osilidhiwa, koddi enowodheya omutonyihedha okwela vina omulevelela?’ Nigaweddihaga attu ena na okwela ninowoniha txibarene wi nili anamafwara a Kristu.
16. Elobo gani yina ensunzihu na yotagiha ya Yezu?
16 Yotagiha ya Yezu ehinisunziha ttima yowaziwa pama abalihu. (Gano 20:5) Ebaribari wi Yezu wanwodha wona dhili mmirimani. Mbwenyi iyo kanina ewodhelo yokosa ejuwene. Masiki dhawene enowodheya wakurumuwela abali ehu sabwani awene attu ohiligana ninga iyo. (Ef. 4:1, 2; 1 Ped. 3:8) Enanikamihedhe okosa ejuwene kuwaziwa pama abalihu. Koona yotagiha modha.
17. Omuziwa apama mbali omukamihedhile dhavi nameddelela milogo?
17 Mbali oli nameddelela milogo onlaba o Afrika Oriental onomubuwela mbali mmodha wamoniye ninga muttu worutxa. Txini ekosile nameddelela mulogo? Iyene ohiloga dhahi: “Ottiya omutxatxamaga mbali oddule, miyo ddahigana omuziwa pama.” Mukosiliye ejuwene iyene ohizinddiyela wi mukalelo waleliwe mbali oddule wali worutxa vaddiddi vina eji ehidha opatta mukalelo waweddihiye attu ena. Nameddelela milogo ohidhowavi alogaga: “Vazinddiyelimi wi mbali oddule wahikosa guru enddimuwa vaddiddi wi akose matxinjo manddimuwa mwigumini mwaye wi awodhege waweddiha pama attu ena vina muzinddiyelimi matxinjo akosiliye miyo ddahitikina venjene. Mwavenevo nahidha okala amarho.” Ejo ebaribari, nigakosa guru wi niwodhe wona mukalelo oniviwamo abali ehu kinrutxa waweddiha na okwela.
18. Akala mbali ononinyimula mavuzo gani anfwanyela iyo ovikosa? (Gano 26:20)
18 Dila dhina ninele wona wi jofuneya omutamela mbaliya oninyimulile wi niloge na iyene nigomihe makaniya. Mbwenyi vamaromo egahikala ya malago oroma ovivuza: ‘Koddi ddihinonelamo dhotedhene dhipadduwile?’ (Gano 18:13) ‘Koddi iyene okosile ejiya na ofuna waye?’ (Koh. 7:20) ‘Koddi miyo ddahiromaga okosa yovonya yoladdanana?’ (Koh. 7:21, 22) ‘Ddigatamela ologa na iyene, makani antamela miyo ogomiha na iyene anele ottabwa?’ (Kengesa Gano 26:20.) Nigatamela mudhidhi wa otanalela mavuzo aba, ninodhaga wubuwela wi enfwanyela iyo okosa olagiha okwela vina odduwala makaniya.
19. Txini eganiliwe okosa?
19 Anamoona a Yehova anowoniha wi ali anamafwara atxibarene a Yezu Kristu sabwa ya olagihana okwelana muttu na mukwaye. Muttu-muttu wa iyo onowoniha wi namafwara watxibarene wa Yezu Kristu agakwelaga abali aye masiki na ohiligana. Nigakosaga ejuwene, attu ena anele ozinddiyela wi iyo nili mu relijiau yatxibarene vina anele ofuna omwebedha Mulugu wehu wokwela Yehova. Nona nihigana odhowavi nilagihaga okwela onazinddiyeliha Akristu ebaribari.
JIBO 17 ‘Miyo Vina Ddinofuna’
a Attu enjene anofuna osunza ebaribari sabwa ya okwela webaribari anonani na iyo. Iyo kanili attu oligana nona masaka mena enorutxa otonyihedhana okwela muttu na mukwaye. Nona ninele osunza ekalelani yamakamaka otonyihedhana okwela webaribari vina mukalelo onamutagihe iyo Yezu nigawanagana na ohiligana wehu muttu na mukwaye.
b Koona nivuru “Kadhawuno Okale Namafwara Waga,” kapitulu 17, ddima 10-11.
c Koona artigu “Finalmente minha vida tem objetivo” va A Sentinela de 1 Novembro wa yaka ya 2012, nikuku 13-14.
d Koona artigu “Minha vida parecia muito boa” mu A Sentinela 1 de Maio wa yaka ya 2012, nikuku. 18-19.
e Makani anlogiwa apa kaniwanana na dhottega dhinddimuwa esuwene dhineddihiwa na anddimuwa a mmulogoni ninga dhinfwanyeya va 1 Korinto 6:9, 10.
f Dhihikalawo dholebiwa dhinoniha wi movira wa vyaka murabinu mmodha ohiloga wi: “Attu oligana ninga Abramu ali mwilaboni kankwaranya makumi mararu. Akala ahikalawo makumi mararu, eli mwa awene ddi miyo na mwanaga; akala ali kumi, eli mwa awene ddi miyo na mwanaga; akala a ali atanu, eli mwa awene ddi miyo na mwanaga; akala ali eli, ddi miyo na mwanaga; akala oli mmodha, bahito ddi miyo.”
