1-2. Akala kuli womala-nawale wi obatiziwe, sabwaya jani kunfwanyela okumuwa? (Koona foto ya kapa.)

 AKALA onowubuwela obatiziwa, ejo yosakula yapama. Weyo oli womala na wale wi obatiziwe? Akala onona ninga ohivisasanyedha vina anddimuwa a mmulogoni arumelela, bahito onele obatiziwa mudhidhiya ogafiya. Kakana nikuluvelo wi ogakosa ejuwene onele okana egumi yapama mmabasani a Yehova.

² Ki akala anddimuwa a mmulogoni anowuwaddela wi onofwanyela okosa matxinjo ohinabatiziwa? Obe akala ddi weyo wamunya ozinddiyele ejuwene? Ejo egapadduwa, kukumuwe. Onele owodha okosa matxinjo wi obatiziwe, kintanala vyaka dhina weyo.

3. Txini elogile mukadda Etiopia na Filipi, nanda nivuzo gani niteyile sabwa ya yokumbirha yaye? (Merelo 8:36, 38)

³ Kengesa Merelo 8:36, 38. Munddimuwa wa mukadda Etiopia wahinvuza namalaleya Filipi: “Ehinddiwodhiha obatiziwa, txini?” Mulobwana oddu wa mukadda Etiopia wanfuna obatiziwa, koddi iyeneya wali omala-nawale wila abatiziwe?

4. Mukadda Etiopia wonihile dhavi wi wahikana efunelo ya osunza venjene?

⁴ Mukadda Etiopia ole “wadhowile o Jeruzalemi wi amwebedhewo Mulugu.” (Mer. 8:27) Eji enoniha wi iyene wahirumela relijiau ya Ayuda. Mwaha wa osunza Malebo a Ebraiko iyene wahisunza dhilobo dhinjene mwaha wa Yehova. Mbwenyi iyene wanfunavi osunza venjene. Munfwanyile Filipi mulobwana oddu mudila, wela wengesa rolu mwalebile Izaiya mavuhulo. (Mer. 8:28) Mavuhulo aba ali masunziho ebaribari  oviteya. Nona mulobwana oddule wa mukadda Etiopia kafuna bahi okana masunziho a mBibiliani ovevuwa, iyene wanfuna osunza venjene.

5. Txini ekoseli mukadda Etiopia na dhisunziliye?

⁵ Mulobwana oddu mukadda Etiopia, wali munddimuwa weddiha dhotene dha Mwene mwa muyana wakuweliwa Kandase wa Etiopia; ddi iyene weddiha dhotedhene dha vatakulu vaye. (Mer. 8:27) Nona wali muttu wahakanetxa mudhidhi vina wahikana mabasa menjene. Masiki dhawene, wahitamela mudhidhi wa omwebedha Yehova. Ottiya bahi osunza mwaha wa Yehova iyene wanfuna okosa elobo yina; ovirihamo esile dhasunziye. Iyene wahikosa oleddo wolapela ovenyana o Etiopia mpaka o Jeruzalemi wi amwebedhe Yehova mumparhani. Obu kuwali oleddo mung’ono, ottiya ejo wahinongela muhaku, mbwenyi mulobwana oddu wanfuna venjene omwebedha Yehova kiyatanala yorutxa egagumaniliyena.

6-7. Okwela wana mukadda Etiopia na Yehova odhowile dhavi wunuwaga?

⁶ Filipi ohimusunziha mukadda Etiopia masunziho ebaribari vina a makamaka ohimusunziha vina wi Yezu wali Mesiya. (Mer. 8:34, 35) Mulobwana oddu wahagalala vaddiddi muziweliye mwaha wa mukutto wa Yezu vina ejile yatapulelani mwa iyene. Txini ekosiliye musunziliye dhilobo esi? Iyene wali muttu worihiwa mmutugumanoni mwa Ayuda kigamurutxile okalavi mwenemo. Mbwenyi ottiya ejo, omukwela waye Yehova vina Yezu wahunuwa. Iyene wahigana okosa matxinjo manddimuwa mwigumini mwaye, obatiziwa wi akale namafwara wa Yezu Kristu. Monile Filipi wi mukadda Etiopia oddule wali womala-nawale, wahimbatiza.

⁷ Weyo vina onele owodha ovisasanyedha wi obatiziwe, ogafwara ttarho dha mukadda Etiopia. Onele okana nikuluvelo nakene nana mulobwana oddule ninawuttukulele ovuza, “Ehinddiwodhiha obatiziwa, txini?” Ninfuna none mukalelo onawodhe weyo okosa dhilobo dhakene dhikosile mukadda Etiopia: Odhowavi osunzaga, ovirihamo dhinsunziwe vina wunuwiha omukwela wawo Yehova.

8. Txini enloga Joau 17:3 enfwanyeliwe okosa?

⁸ Kengesa Joau 17:3. Mazu aba a Yezu ahukamihedha odhowavi omusunzaga Bibilia? Jijuwene epadduwile wa enjene wa iyo. Koddi mazu aba anonilibiha odhowagavi nisunzaga? Ndde. Iyo txipo kaninattiye osunza vina “omuziwa . . . Mulugu webaribari.”  (Koh. 3:11) Iyo ninele odhowavi nisunzaga mwaha wa Yehova, okala nokala-wene. Venevo vandowihu nisunzaga venjene mwaha wa Iyene, ofiyedheya wehu na Yehova onelege wunuwavi.—Masal. 73:28.

9. Txini enfwanyelihu okosa nigamala osunza masunziho oroma a mazu a Mulugu?

⁹ Ebaribari wi nigaromaga osunza mwaha wa Yehova ninroma na masunzo ovevuwa a mBibiliani. Mukartani yalebeliye akadda Hebreu, murumiwi Paulo ohilogamo wi masunziho ovevuwa ali ninga “masunziho oroma a mazu a Mulugu.” Iyene kafuna aloge wi “masunziho oroma”; kali a makamaka, ottiya ejo iyene oladdanihile na mukaka onimunuwiha mwana. (Aheb. 5:12; 6:1) Nona murumiwi Paulo owakokomeza Akristu wila attiye masunzo oroma, asogorena masunziho owarala a mazu a Mulugu. Kaninaganyedha wi weyo onotamela ononelamo pama masunziho a mazu a Mulugu. Koddi weyo ohikana efunelo ya odhowavi wunuwaga mpaddi womuyani vina osunzaga mwaha wa Yehova na dhofuna dhaye?

10. Attu ena anrutxeliwa nni osunza?

¹⁰ Enji wa iyo, osunza kahiyo elobo yovevuwa. Ki weyo? Oskola wanziveliwa osunza vina wannonelamo pama dhasunziwe obe wahikana makattamiho mang’onovi? Napanovi onona ninga osunza kahiyo elobo yovevuwa? Enjene anona dhawene, mbwenyi Yehova onowodha wukamihedha. Iyene ddoligana vina ddi Namasunziha wamakamaka oliwo.

11. Yehova ononiha dhavi wi iyene Namasunziha Munddimuwa?

¹¹ Mwinyene Yehova onloga dhahi miyo ddili Namasunziha wawo Munddimuwa. (Iza. 30:20, 21) Iyene Namasunziha wovilela, waderetu vina onnitanala. Onotamela mikalelo dhapama dhina anamasunza aye. (Masal. 130:3) Kannikumbirha dhilobo dhihinwodhihu okosa. Kudduwale, ddi Iyene osasanyile ogogo wawo, oli mvaho wapama. (Masal. 139:14) Iyo notene nihibaliwa na efunelo ya osunza dhilobo dhiswa. Muttanddi wehu onfuna wi nidhowegevi nisunzaga okala nokala-wene—vina niziveliwege dhinsunzihu. Nona, enokala ya malago wunuwiha efunelo ya odhowavi nisunzaga ebaribari enfwanyeya mu nzuni na Mulugu oromana ovanene. (1 Ped. 2:2) Otamele dhogana dhing’onovi dhinawodhiwe wakwanihedha, vina wengesege nzu na Mulugu malabo otene. (Jos. 1:8) Na nikamihedho na Yehova onelege odhowavi omwengesaga Bibilia, manivuru vina osunzaga mwaha wa iyene.

12. Ekalele nni yamakamaka osunza egumi na mabasa olaleya a Yezu?

¹² Otamele mudhidhi wa otanaalela egumi vina mabasa olaleya a Yezu. Akala ninofuna omulabela Yehova na mukalelo wofwanyelela, jamakamaka omutagiha Yezu, makamaka mmidhidhini dhorutxa. (1 Ped. 2:21) Yezu kaviteli anamafwara aye mwalogeliye wi agahifwanyiwa makattamiho. (Lk. 14:27, 28) Masiki dhawene iyene wahikuluvela wi anamafwara aye agahikala oweddeyana na Yehova dhahene ninga mukosiliye. (Jo. 16:33) Opepese venjene wi osunze mukalelo wali egumi ya Yezu vina wimetxe yogana ya omutagiha siku na siku.

13. Txini enfwanyeliwe omukumbirha Yehova nanda sabwaya jani?

¹³ Enoziweya wi okana eziwelo jamakamaka mbwenyi kinakwana. Eziwelo jofuneya wi osunze venjene mwaha wa Yehova vina wunuwihe omukwela vina omuroromela. (1 Kor. 8:1-3) Oku osunzaga mwaha wa Yehova, omukumbirhe iyene wi okamihedhe okana  nroromelo noliba. (Lk. 17:5) Iyene onowakula malobelo aba. Ogakaana nroromelo na txibarene niniwanana na esile dhisunziliwe mwaha wa Yehova onele owodha ovirihamo dhinsunziwe.—Tia. 2:26.

14. Murumiwi Pedru wonihile dhavi ttima ya ovirihamo esile dhinsunzihu? (Koona vina foto.)

¹⁴ Murumiwi Pedru mulogiliye nipadduwo na Nowé, ohoniha wi jamakamaka ovirihagamo esile dhinsunzihu. Yehova wahimwaddela Nowé wi agahidhana mpulo ogatolotxile attu abure a nsaka nttile. Oziwa bahi wi ogahidha mpulo, kiyatapulela wi Nowé na amudhaye agahivuneya. Koona wi Pedru alogaga makani aba oromile na mazu aba “oku Nowé amukungaga pangaya.” (1 Ped. 3:20) Mazu aba antonya mpulo ohinatti ofiya, eji enlagiha wi Nowé na amudhaye ahivirihamo esile dhawaddelile Yehova, bamusasanya pangaya. (Aheb. 11:7) Pedru wela oladdaniha ejile ekosile Nowé na obatiziwa. Iyene ologile dhahi: “Manje abo àli ezinddyelo y’obatizo, onuvulumutxani ddabuno.” (1 Ped. 3:21) Guru enkosiwe wi obatiziwe enoladdanihiwa na guru ekosile Nowé na amudhaye mwari mwa vyaka dhinjene wi amusasanye pangaya. Txini enfwanyeliwe okosa wi okale omala na wale wi obatiziwe?

15. Ononihe dhavi wi ohimala otxinuwa dhottega dhawo?

¹⁵ Elobo modha enfwanyeliwe okosa, otxinuwa na murima wotene mwa dhottega dhawo. (Mer. 2:37, 38) Ninawodhe okosa matxinjo ali ofuneya mwigumini mwehu nigatxinuwa kakamwe dhottega dhehu. Weyo ohiwodha ottiya dhilobo dhinimusilidha Yehova, mweddelo wonyakuwa, okobola fola obe ologa mazu abure? (1 Kor. 6:9, 10; 2 Kor. 7:1; Ef. 4:29) Akala weyo kunawodha ovifurula mwa dhilobo esi, kuwiyelele mundduni odhowegevi ovilibihedhaga. Kaloga na namasunziha wawo wa Bibilia obe anddimuwa a mmulogoni wakumbirhaga nikamihedho vina malago. Akala wamuzombwe onkala na amambali awo, kakumbirhe nikamihedho wi owodhe ovifurula mwa elobo-elobovi yabure enutximiha obatiziwa.

16. Txini eniwanana na ozuzumela dhilobo dhomuyani?

 ¹⁶ Elobo yina yamakamaka enfwanyeliwe okosa okana elemelelo ya ozuzumela dhilobo dhomuyani. Eji vina enowiwanana na woona matugumano vina ovaha dhowakula. (Aheb. 10:24, 25) Ogarumelihiwa okosa mabasa olaleya, odhowegevi olaleyaga mudhidhi wotene. Venevo vandowiwe okosaga mabasa aba anvuna dhigumi, onelege odhowavi oziveliwagana. (2 Tim. 4:5) Akala weyo wa muzombwe onkala na amambali awo, kavivuze: ‘Wi ddidhowe omatugumanoni vina mmabasani olaleya, enofuneya mudhidhi wotene amambali aga oddubutxedha? Obe ddinokosa ejuwene se wubutxedhiwa?’ Ozuzumela dhilobo esi, enowooniha wi weyo ohikana nroromelo onomukwela Yehova vina onotamalela dhilobo dhotene dhinukosela Yehova. Ninga munlogela Bibilia, okosa dhilobo esi entapulela wi weyo onoweddana merelo a muttu ovilevele Mulugu, na mazu mena enkala ninga oninvaha Yehova elobo yattima. (2 Ped. 3:11; Aheb. 13:15) Mivaho dhotene dhininvaha iyo Yehova na murima wotene nihimageleliwaga, dhinomwagalaliha venjene. (Kaladdaniha na 2 Korinto 9:7.) Mwa iyo gari enddimuwa vaddiddi onvaha Yehova dhilobo dhapama dhinehu.

17-18. Elobo gani yamakamaka enaukamihedhe ofiyedha obatiziwa, nanda sabwaya jani? (Gano 3:3-6)

¹⁷ Oku ovisasanyedhaga wi obatiziwe, onele ogumanana makattamiho. Attu ena anelege wubedda sabwa ya esile dhinsunziwe; ena anele wusadduwela ottiya ejo txino weyo onelege wiyelela okosa elobo yabure yawaniwena wi ottiye. (2 Tim. 3:12) Obe txino onodhaga osilidheya, wubuwelaga wi mudhidhi onovira kunawodhe wakwaniha dhogana dhawo. Egapadduwa dhawene, txini enokamihedhe wi ohiyelele mundduni? Elobo yamakamaka enawukamihedhe—omukwela Yehova.

¹⁸ Omukwela wawo Yehova, ekalelo yapama ena weyo. (Kengesa Gano 3:3-6.) Okwela oku, onele wukamihedha owodha opemberha makattamiho angumaniwena mwigumini. Dila dhinjene Bibilia onologa okwela woweddeyana ona Yehova na alabeli aye. Eji entapulela wi Yehova txipo kananyanyale emeleli aye vina kanattiye wakwela. (Masal.  100:5) Kudduwale wi weyo ottanddiwe moladdana na Mulugu. (Wita 1:26) Ovano onawodhe dhavi olagiha okwela woweddeyana?

19. Ononihe dhavi otamalela wawo dhilobo dhotene dhinukosela Yehova? (Galásia 2:20)

¹⁹ Elobo modha enanikamihedhe okana okwela woweddeyana otamaalela. (1 Tes. 5:18) Malabo otene kavivuze, ‘Yehova ononiha dhavi wi onoddikwela?’ Vasogorhova ogalobelaga omutamaalele Yehova ologaga elobo yukoseliye. Kazinddiyela wi Yehova onowukosela dhilobo dhinjene dhapama sabwani iyene onowukwela, jijene ezinddiyele murumiwi Paulo. (Kengesa Galásia 2:20.) Kavivuze, ‘Miyo ddinofuna omutonyihedha Yehova wi ddinomukwela?’ Omukwela wawo Yehova, onele wuttukulela ovilela dhoweha vina opemberha makattamiho. Okwela oku onele wukamihedha ozuzumela dhilobo dhomuyani vina omutonyihedha Yehova malabo otene omukwela wawo.

20. Txini eniwanana na oviperhekela Yehova, nanda yosakula eji ekaleleni yamakamaka?

²⁰ Movira wa mudhidhi, omukwela wawo Yehova onele wuttukulela okosa nlobelo n’oviperheka wa iyene. Ninga Mukristu wobatiziwa weyo ohikana njedhelo napama, omulabela Yehova okala nokala-wene. Ogaviperheka wa Yehova onompikirhela omulabela egumi yawo yotene. Oviperheka nipikirelo ninkosa weyo dila modha mwigumini. Ebaribari wi eji yosakula yamakamaka enakose weyo. Kudduwale: Mwa dhosakula dhotedhene dhinakose weyo mwigumini mwawo, ovivelela wa Yehova yosakula yamakamakaya. (Masal. 50:14) Satana onele otagiha wobaniha omukwela wawo Yehova, iyene onfuna wi weyo ottiye okala woweddeyana na Yehova. Kumuttiye Satana opemberha! (Job 27:5) Omukwela wawo Yehova ogakala woliba, weyo onele owodha wakwaniha nipikirhelo nikosiliwe vaviperhekeliwe vina onele okalavi wofiyedheya na Babi wawo Yehova.

21. Ninlogela nni wi obatizo kahiyo omagomo, mbwenyi kumaromo?

²¹ Ogamala oviperheka wa Yehova, kaloga na anddimuwa a mmulogoni wila ofware ttarho yina. Kudduwale wi obatizo kahiyo omagomo mbwenyi kumaromowa. Ovenyana mudhidhene obo, weyo onele oroma omulabela Yehova okala nokala-wene. Nona oromana ovanene kalibiha omukwela wawo Yehova. Okane dhogana dhinaukamihedhe wunuwiha okwela. Ttarho esi dhinele wukamihedha ofiyedha obatiziwa. Labo navawoka mwigumini mwawo. Mbwenyi kudduwale, oku kumaromowa. Ninjeedhela wi omukwela wawo Yehova vina Yezu odhowegevi bugonuwa okala nokala-wene!