1, 2. (a) Txini yalogile Yezu na anamafwara aye omattiyu obule ahinakwa? (Koona foto eli omaromo.) (b) Ekalelini yamakamaka iyo wubuwela sabwaya enlaleyela iyo? (c) Ninasekeserhe eni?

OMATTIYU obule Yezu ahinakwa, wahiloga na anamafwara aye mudhidhi mwinjene. Iyene owawubutxa wi onowakwela vaddiddi. Ohiloga mwaha wa musibo wa muri wa nvidera, omalile iyo osekesera mutoma ovirile. Yezu wafuna alibihe anamafwara aye ‘obaala milima minjene,’ eji entapulela okaanela ntidi olaleya mwaha womwene.​—Joau 15:8.

² Ottiya wapangavi anamafwara aye txini yafwanyelani okosa, vina owawaddela sabwaya yafwanyelelani okosa. Ohatapulelamo sabwaya enfuneyela awene odhowagavi bagalaleya. Eji jamakamaka wa iyo sabwani enonubutxedha ttima ya odhowanavi mabasa a olaleya. Wubuwela ejene enonittukulela okalela ntidi ‘olaleya malogo otene.’ (Mateu 24:13, 14) Munsunzoni ntti ninele osekeserha mwaha minayi dhinnittukulela olaleya. Vina ninela osekeserha nvaho dhindela wa Yehova esene dhinikamihedha obaala milima.

3. (a) Modhela Joau 15:8, mwahaya wamakamaka onnittukulela olaleya buvi? (b) Musibo wa Yezu txini entapulela uva, nanda nladdaniho ntti nikaleleni nofwanyelela?

³ Mwaha wamakamaka onnitukulela olaleya jawi iyo ninimuttittimiha Yehova vina ninotxeniha nzina naye. (Kengesa Joau 15:1, 8.) Valogile Yezu musibo wa nvidera ohimuladdaniha Yehova na namalima onlima uva. Yezu ohiloga wi iyenene muri wa mvidera, anamafwara aye mirayi. (Joau 15:5) Mmusiboni obu, uva entapulela dhodhavo dha mabasa ankosa anamafwara a Yezu obe mabasa olaleya ankosani. Yezu owapanga anamafwara aye wi: ‘Mugabaala milima minjene panttittimihiwa Babaga.’ Sabwani nvidera ombala uva dhaderetu, ononvaha nttittimiho namalimaya. Mwakakene iyo nigakosa muli-mwetemwene wi nilaleye mwaha wa omwene, iyo ninomuttittimiha obe ninomuriha Yehova.​—Mateu 25:20-23.

4. (a) Ninatxenihe dhavi nzina na Mulugu? (b) Weyo oniwamo dhavi mwaha wokaana gari yotxeniha nzina na Mulugu?

⁴ Nzina na Mulugu nihimala okoddela. Kaninfwanyela okosa elobo wi nikoddelihevi. Mwadhawene, ninatxenihe dhavi nzina na Mulugu nigalaleyaga? Koona elogile murumiwi Izaiya: ‘Ddi Yehova bahi onfwanyela otxenihiwa.’ (Izaiya 8:13) Iyo nintxeniha nzina na Mulugu, Yehova, ning’onaga ninga nzina nili vadhulu va mazina etene vina nakamihedhaga attu ena ononelamo entapulela okoddela. (Mateu 6:9) Motagiha, nigasunzihaga attu ebaribari sabwa ya makalelo okoddela a Yehova na efunelo yaye wa attu ya okala na mukalakala Mparaizu, iyo ninowakamihedha attu wona wi dhilobo dhabure dhalogile Satana modhela Yehova ottambi. (Wita 3:1-5) Iyo ninotxeniha nzina na Mulugu nigaakamihedha attu oziwa wi ddi Yehova bahi onfwanyela ‘ottittimihiwa, orihiwa, vowi opaddutxa dhetedhene.’ (Ovuhulela 4:11) Rune wali pionera wa muddiddi wotene mwa yvaka 16, ohiloga: “Oziwa wi ddakaana mperhe wokala munamona wa muttanddi wa elabo yotene, enoddagalaliha. Vina enoddivaha efunelo yodhowa baddigalaleya.”

5. (a) Mwaha gani wolaleya onfwanyeha va Joau 15:9, 10? (b) Yezu wakamihile dhavi anamafwara aye wi anofwanyela okalela ntidi?

⁵ Kengesa Joau 15:9, 10. Mwaha wanawili onnittukulela olaleya miselu dha Omwene omukwela wehu Yehova na Yezu. (Marko 12:30; Joau 14:15) Yezu owapanga anamafwara aye wi anofwanyela ‘okalavi mukwelani mwaye.’ Yezu ologelini ejene? Sabwani iyene wanziwa wi  anamafwara aye anfwanyela okaanela ntidi okalawo wawa ninga Akristu ebaribari. Va Joau 15:4-10, iyo nihoona wi Yezu ohilabihedha nzu ntti “kalanivi” masaka menji iyene owakamihedha anamafwara aye ononelamo wi anfwanyela okalela ntidi.

6. Ninalagihe dhavi wi nili mukwelani mwa Kristu?

⁶ Ninalagihe dhavi wila nili mukwelani mwa Mulugu vina nihirumeliwa na iyene? Ninlagiha nigamwiwelela iyene. Yezu onikumbira bahi okosa ekosile iyene. Ohiloga: “Ddivirihamo magano a Babaga ddinkalavi mukwelani mwaye.” Yezu yotagiha yaderetu wa iyo.​—Joau 13:15.

7. Wiwelela ontaganyiheya dhavi nokwela?

⁷ Yezu ohiloga wi wiwelela otaganyiheya na okwela mulogiliye wi: “Onakela magano aga, avirihamo, oddo onoddikwela txibarene.” (Joau 14:21) Dhirumile Yezu dhidhile wa Babe, noona nigewelela enirumile Yezu yodhowa olaleya, iyo ninotonyihedha wi ninomukwela Yehova. (Mateu 17:5; Joau 8:28) Iyo nigamutonyihedha Yehova na Yezu wi ninowakwela, ninokalavi mukwelani mwawa.

8, 9. (a) Mwaha mwina onnittukulela olaleya buvi? (b) Mazu gani anfwanyeya va Ezekiyel 3:18, 19 na 18:23 annittukulela olaleya?

⁸ Mwaha wanoraru onittukulela olaleya jawi iyo ninfuna nashagihe attu wi labo na Yehova nili vakuvi. Mbibiliani Nowé onkuweliwa ‘namasunziha.’ (Kengesa 2 Pedro 2:5.) Ohinafiya mpulo, miselu dhalaleya Nowé dhataganyiheya na waddamela wa otolotxiwa. Ninlogelani ejene? Sabwani Yezu wahiloga: “Masiku abo, muneri ohinapadduwa attu anja, ammwa, antelana, antelanihana, ahubuwelaga yafuna wagwela, ofiyedha siku nivolowile Nowé mpangayani. Kàliwo warohedha mpaka mpulo ovinga ofiyedha wamedha etene. Yokokene jinereye nsaka ninadhe mwana-muthu.” (Mateu 24:38, 39) Masiki attu ejene vampwazani Nowé iyene anlaleya na nroromelo wi ashagihe attu na miselu dhimpangile Yehova.

⁹ Masaka abano, ninolaleya miselu mwaha wa Omwene obuwene onavahe attu gari yosunza txini enakosele Mulugu attu musogoro. Ninga Yehova iyo ninfuna wi attu etteke maru avuruwana “akalewo.”  (Ezekiyel 18:23) Nigalaleyaga nyumba na nyumba obe murampani ninowapanga attu owinjiva wi omwene wa Mulugu onele odha otolotxe elabo eji yabure.​—Ezekiyel 3:18, 19; Daniyel 2:44; Ovuhulela 14:6, 7.

10. (a) Mwaha gani oli va Mateu 22:39 onnittukulela olaleya? (b)  Paulo na Sila amukamihedhile dhavi mwang’aneli o Filipi?

¹⁰ Mwaha wanonai enkalela iyo ntidi olaleya jawi ninowakwela attu. (Mateu 22:39) Okwela oku ononikamihedha odhowa olaleyela sabwani nihiziwa wi enowodheya muttu ozugunutxa murimaye agakaana monelo muswa. Motagiha Asadduweli ahimwika Paulo na Sila mukambura o Filipi. Mbwenye vari va mattiyu, morurumutxa-mwene elabo ettekenyeya vaddiddi ofiyedha kambura ojere-jereya misuwodha ofuguwa. Mwang’aneli obuwelaga wi afugeliwi ahittawa wafuna ovipa. Mbwenye Paulo ohimukoddiya vina ohikuwa: “Mulobwana kuvipe!” Mwang’aneli ohivuza: “Ddikose nni wi ddivulumutxiwe?” Paulo na Sila ahiloga: “Omurumele Nabuya Yezu, onovulumutxiwa.”​—Merelo 16:25-34.

11, 12. (a) Enpadduweli mwang’aneli oddule enisunziha eni mwaha wa olaleya? (b) Ninfunelani odhowavi banigalaleya?

¹¹ Epadduwile na mwang’aneli ennisunziha eni mwaha wa mabasa olaleya? Koona, mwang’aneli oddule otxinjile monelo waye vamaleliye wona ojere-jereya wa kambura. Na mukalelo wakakene attu ahinfuna wiwa miselu dha Bibilia anodha otxinja monelo wawa bafiyedha okumbirha nikamihedho egahapaduwela elobo mwigumini mwawa. Ninga motagiha, agayelela ganyo obe agamwaliwa. Ena anonyimuwa agaziwa wi akana eredda yowopiha obe muttu amukwelani agakwa. Dhilobo ninga esi dhigapadduwa, attuya anoroma okosa mavuzo mwaha a egumi, mavuzo ehinavikosani. Awene anofiyedha ovivuza, ‘ddikose nni wi ddivuneye?’ Awene anele ofuna wiwa miselu dhehu dha njedhelo masiki akala kanewaga.

¹² Mwadhawene nigadhowavi banigalaleya na nroromelo, ninele okala omala nawale wi niwodhe wakamihedha attu anrumela nipangarhazo ninattukulela iyo. (Izaiya 61:1) Charlotte, olabile ninga pioneru vyaka 38 ohiloga: “Attu masaka abano ahipupuruwa. Awene anofuna okana gari yowiwa miselu dhapama.” Ejvor, onlaba ninga pionero mwa vyaka 34 ohiloga: “Ovanene attu kana wagalala. Miyo mwebaribari ddinofuna wakamihedha. Efunelo eji enoddittukulela odhowa olaleya.” Mohaganyedha, wakwela attu mwaha onnittululela odhowanavi mabasa a olaleya!

13, 14. (a) Nvaho gani onlogiwa va Joau 15:11? (b)  Ninakane dhavi ottaba ninga wana Yezu? (c) Ottaba onnikamihedha dhavi mmabasani olaleya?

¹³ Omattiyu obule Yezu ahinakwa, wahiloga mwaha wa nvaho ogadhile wakamihedha anamafwara aye obaala milima na ntidi. Nvahoya buvi nanda onanikamihedhe dhavi masaka abano?

 ¹⁴ Nvaho wa ottaba. Ninowona olaleya ninga muttoro wolemela? Nne. Mmalele Yezu ologa musibo wa nvidera, iyene wahiloga wi nigalaleyaga ninokana ottaba waye. (Kengesa Joau 15:11.) Ejiya enakwanihedheya dhavi? Kobuwela, musibo wa Yezu iyene wahiviladaniha na nvidera nanda anamafwara aye na mirayi. Mirayi esi wi dhidhowivi badhigakela manje na dhokaliha dhina enofuneya dhikalevi dhottiddana na muriya. Mwakakene, enowodheya iyo ottaba ninga mwattabela Yezu nigakala mowiwanana na iyene vina nifwaraga muviriliye. Ninokaana ottaba ninga waniye, ottaba onda mwari mwa okosa efunelo ya Yehova. (Joau 4:34; 17:13; 1 Pedro 2:21) Hanne, olabile ninga pionera mwa vyika 40, ohiloga, “Ottaba oniwa miyo ddigakala omalaleyoni onoddikamihedha odhonawavi mabasa a Yehova.” Ottaba ononivaha guru yolaleya masiki akala attuya kanfuna oniwa.​—Mateu 5:10-12.

15. (a) Nvaho gani onlogiwa va Joau 14:27? (b) Murenddele onanikamihedhe dhavi obala milima na ntidi?

¹⁵ Nvaho wa murenddele. (Kengesa Joau 14:27.) Yezu ahinakwa ohiloga na anamafwara aye: ‘Ddinowuvahani murenddele waga.’ Enwodheya dhavi murenddele wa Yezu onikamihedha nigalaleyaga? Nigalaleyaga, ninokaana murenddele sabwani iyo nihiziwa wi ninomuhagalaliha Yehova na Yezu. (Masalmo 149:4; Roma 5:3, 4; Kolosi 3:15) Ulf olabile ninga pionero mwa vyaka 45 ohiloga, “Mabasa olaleya masaka meena anoddittiya olemene masiki dhawene onoddivaha wagalala webaribari vina elobo yamakamaka mwigumini mwaga.” Iyo ninotamalela sabwa yokaana murendele ohingoma!

16. (a) Nvaho gani onlogiwa va Joau 15:15? (b) Anamafwara a Yezu agawodhile dhavi okalavi amarho aye?

¹⁶ Nvaho wa omarho. Mmaleli Yezu ologa wila onfuna wi anamafwara aye attabe, iyene wahatapulela wi jamakamaka otonyihedha okwelana. (Joau 15:11-13) Noona iyene wahiloga: “Ddinowirani akwaga.” Okala marho wa Yezu nvaho wavawoka! Nanda anamafwara aye agawodhile dhavi okalavi amarho aye? Yezu ohitapulela: ‘Mudhowe vina mbaale milima na ntidi.’ (Kengesa Joau 15:14-16.) Na mazu  meena, eji entapulela odhowanavi mabasa a olaleya. Nvirile vyaka bili, Yezu ologa na anamafwara aye: “Mweddaga mudila laleyani wi: ‘Omwene wa wirimu oli vakuvi-kuvi.’” (Mateu 10:7) Mwadhawene omattiyu obule ahinakwa Yezu wawalibiha anamafwara aye wi akalele ntidi mabasa olaleya. (Mateu 24:13; Marko 3:14) Txibarene, Yezu wahiziwa wi wakwaniha yoruma yaye kiyali yovevuwa. Masiki dhawene awene ahidhowavi agali amarho aye. Awodhile dhavi? Na nikamihedho na nvaho.

17, 18. (a) Nvaho gani onlogiwa va Joau 15:7? (b) Nvaho obu wakamihedhile dhavi anamafwara a Yezu? (c) Nvaho gani onikamihedha masaka abano?

¹⁷ Nvaho worumeliwa malobelo ehu. Yezu ohiloga: “Lobani enfunenyu, munovahiwa.” (Joau 15:7, 16) Elibelile Yezu txibarene ehalibiha anamafwara aye! * (Koona yowenjedhedha.) Anamafwara a Yezu kanonelamo mowakwana wi mohigonela Yezu agakwa. Mbwenye okwa waye kuwatapulela wi agahala ahivahiwaga nikamihedho. Yehova wali womala nawale wi akule malobelo awa vina akamihedhe mmabasani awa olaleya. Nanda ohikosa-wene. Yezu mukweliye, anamafwara aye ahimpigirihela Yehova wi alibihe murima, Yehova wahakula malobelo awa.​—Merelo 4:29, 31.

¹⁸ Yakakene enopadduwa ovanene. Iyo nigakanela ntidi mabasa olaleya ninokala amarho a Yezu. Vina nikaane ebaribari wi Yehova oli omala nawale wi akule malobelo ankosihu nigafunaga nikamihedho mmabasani olaleya. (Filipi 4:13) Iyo ninomutamalela Yehova sabwa yowakula malobelo ehu vina gari yokaana Yezu ninga marho wehu. Nvaho esi dhindela wa Yehova vina enonivaha ewodhelo yobala milima na ntidi.​—Tiago 1:17.

19. (a) Iyo ninkalelani ntidi olaleya? (b) Txini enanikamihedhe opuliha mabasa attomeliwe iyo na Mulugu?

¹⁹ Mwari mwa mutoma obu, iyo nihisunzamo dhilobo nayi dhinnittukulela odhowanavi mabasa a olaleya: omuttittimiha Yehova, otxeniha nzina naye, olagiha okwela wehu wa Yehova vina Yezu, wawaddela attu vina otonyihedha wi ninowakwela. Nihisunza vina mivaho minayi: ottaba, murenddele, omarho na wakuliwa wa malobelo ehu. Mivaho esi dhinonilibiha wi nipulihe mabasa anittomeli Mulugu wi nikose. Yehova onowagalala vaddiddi aganonaga nilabaga na guru ‘wi nibaale milima na ntidi’!