Yehova onakwela ‘Abale Ambala Milima na Ovilela’
“Beu emothele mmathakani a pama, enatonya abale . . . ankoya na murima womyala na ntidi, mpaka obalamo.”—LUKA 8:15.
JIBO: 44, 10
1, 2. (a) Ninlibiheya dhavi na dhotagiha dha abali na arogora ororomeleya andidela na mabasa a olaleya masiki akoddaga ovuruwaniwa? (Koona foto eli omaroma.) (b) Yezu ologile eni sabwa ya mabasa a olaleya ‘mmuruddani mwawo’?
SERGIO NA OLINDA atelani a’pionero a elabo ya Estados Unidos. Oheli anakalaba vina vyaka dhawa dhihikwaranya 80. Ovanenevi kanwodha wedda mowakwanela myeddo dhawa dhihiroma ogurumela. Mbwenye ninga mulemelelani okosa mwari mwa vyaka dhinjene, awene anovisasanyedha membesene mudhidhi wonotanu na bili anodhowa okule onweliwa karera. Agafiya andowa waniburoni nawa nanda anroma wapakela manivuru abale ankala venevale. Attu enjene anowapwaza sabwani ahalemana, mbwenye Sergio na Olinda anotamela vego vowimela nanda anowatonyihedha emwerumweru abale anawang’ana. Mudhidhi wa omutana anowiyelela vatakulu. Mumangwananimwa mudhidhi wakene tanu na bili anowiyelelawo. Awene anodidelavi na mabasa a olaleya malabo otene a sumana dhotene dha yaka.
2 Moligana na Sergio na Olinda, ahikalawo abali enjene ororomeleya andididelavi olaleya mmuruddani mwawa mwari mwa vyaka dhinjene, masiki akoddaga ovuruwaniwa. Txino weyo vina murudda onlaleyiwe oli ninga wa abali aba. Akala pumwenemo, iyo ninoutamalela vaddiddi sabwa ya ovilela na mabasa a olaleya mirudda dhorutxa. * (Koona yowenjedhedha.) Yotagiha yawo enowalibiha abali na arogora enjene, masiki abale ana ewodhelo na dhotagiha dha vyaka dhinjene. Kavuruwana miselu dhilogile anameddelela milogo: “Ddigalabaga na mbali obe murogora wororomeleya maningo aga anowala sabwa ya dhotagiha dhawa.” “Ororomeleya wawa onoddilibiha odhowanavi na mabasa aga.” “Dhotagiha dhawa dhinottabiha murima waga.”
3. Mavuzo gani mararu anakule iyo nanda sabwaya jani?
3 Mwari mwa mutoma obu ninele wakula mavuzo mararu: Sabwaya jani muttu-muttu wa iyo onofwanyiwa wobana? Obaala milima entapulela nni? Elobo gani enanikamihedhe obaala milima n’ovilela? Ononelamo dhowakula dha mavuzo aba mararu onele onikamihedha odhowanavi mabasa ehu a olaleya abene anirumile Yezu wi nikose.
SABWAYA JANI ENFWANYELIWA IYO WOBANA?
4. (a) Paulo wewilemo dhavi na esile dhakosa nlogo na Ayuda? (b) Paulo wakubanyela nni?
4 Weyo vina onowobana sabwa ya okooda ovuruwaniwa mmuruddani mwawo ogalaleyaga? Akala pumwenemo onele ononelamo mukalelo wewamo murumiwi Paulo. Iyene wahimala vyaka 30 na mabasa olaleya, ohakamihedha attu enjene okala Akristu. (Merelo 14:21; 2 Korinto 3:2, 3) Mbwenye kawodhile wakamihedha Ayuda enjene okala Akristu. Ottiya ejuwene attuya ankodda onvuruwana afiyedhaga otamela muladdu wa ompa. (Merelo 14:19; 17:1, 4, 5, 13) Paulo wewilemo dhavi na makani abale? Iyene Ohiloga: ‘Ddinowiwopa ohingoma mmirimani mwaga.’ (Roma 9:1-3) Paulo walogelani dhahene? Walogela sabwa yawi wanziveliwa mabasa a olaleya vina wannakwela attuya. Mwebaribari Paulo wanakwela vaddiddi Ayuda nanda wankubanya venjene vawoniye akooddaga miselu dha Mulugu.
5. (a) Elobo gani ennittukulela odhowanavi mabasa a olaleya? (b) Dila dhina enkalela ni yofwanyelela ottiddiwa na mubuwelo owobana?
5 Moligana na Murumiwi Paulo, iyo ninowalaleya attu sabwani ninowazuzumela nanda ninfuna wi nakamihedhe. (Mateu 22:39; 1 Korinto 11:1) Iyo ninoziwelamo sabwani nihimala weha wi omulabela Yehova elobo yamakamaka mwigumini mwehu. Ninotamela wakamihedha attu eena wi akaane vina egumi yosanzaya! Noona ninodhowavi banigakokomeza attu wi asunze ebaribari ya Yehova na efunelo yaye na nlogo na vati. Enkala ninga nindhana nvaho wong’animela nilogaga wi: ‘Ninowukumbirhani, kaakelani.’ Awene agakooddaga nvaho obu, ‘ejo enonisuva mmirimani,’ moligana na murumiwi Paulo. Ninowiwa opa, kahiye sabwa yawi kanina nroromelo, mbwenye sabwa yawi txibarene ninowakwela attuya. Noona dila dhina nigafwanyiwa wobana, kaninttiya, ninodhowanavi mabasa ehu a olaleya. Txibarene ninorumeela elogile Helena, pionera wa vyaka 25: “Mabasa olaleya anorutxa vaddiddi. Mbwenye babene anakosege miyo kaddina meena.”
OBAALA MILIMA N’OVILELA ENTAPULELA NNI?
6. Nivuzo gani ninfunihu wakula ovanene?
6 Ninkanela nni ebaribari yawi ninofwanya yopurelamo wego-kuwego onlaleya iyo? Yowakula ya nivuzo ntti jamakamaka vaddiddi, ndoweni nirome otanaalela dhili mwari mwa musibo ologile Yezu sabwa ya ofuneya wa ‘obaala milima.’ (Mateu 13:23) Musibo woroma onlogana muri wa mvidera.
7. (a) Mwari mwa musibo wa Yezu, “namalima,” “muri wa mvidera,” na “mirayi,” entapulela ani? (b) Nivuzo gani ninfwanyeela iyo otiba yowakulaya?
7 Kengesa Joau 15:1-5, 8. Mwari mwa musibo obu, Yezu ohooniha wi Yehova ddi “namalima,” Yezu mwinyene ddi “muri wa mvidera,” anamafwara aye “mirayi.” * Yezu wahiloga na anamafwara aye eraga: “Nyuwo mugabala milima dhinjene, mugakala anamasunza aga, panathithimihiwe babaga.” Mazu aba obaala milima entapulela nni? Musibo obu, Yezu kalogile nzina na mulimaya, mbwenye ohivaha moonelo onnikamihedha ofwanya yowakula ya nivuzo ntti.
8. (a) Mwari mwa musibo wa Yezu, “obaala milima” onttiyana dhavi na okaana anamasunza aswa? (b) Ebaribari ya dhilobo dhotene dhinnikumbira Yehova wi nikose txini?
8 Yezu ohiloga sabwa ya Babe wi: ‘Iyene onogwadda dhirasi dhotene dhihimbala milima.’ Na mazu meena, iyo ninakale emeleli a Mulugu akala ninobala milima. (Mateu 13:23; 21:43) Obaala milima kintapulela okaana anamafwara aswa. (Mateu 28:19) Kowiliwa dhawene, ahikalawo anamoona a Yehova ororomeleya mbwenye ahiwodhile omukamihedha muttu ofiyedha okala namafwara wa Yezu, agali ninga mirayi dhihimbala misapo. Mbwenye kili dhawene! Sabwaya? Sabwani iyo kaninamagelela attu okala anamafwara a Yezu. Yehova Mulugu ddokwela. Iyene txipo kanniruma okosa elobo ehinwodhihu okosa. Mbwenye onnikumbirha okosa ejile enwodha iyo wira.—Olibiha 30:11-14.
9. (a) Obaala milima entapulele nni? (b) Epaddi gani enfwarela ya musibo wa makani aba?
9 Mazu aba obaala milima antapulela nni? Enaddiwana elobo enwodha okosa iyo notene. Mabasa gani arumile Yehova wi attu otene akose? Olaleya miselu dha Omwene wa Mulugu. * (Mateu 24:14) Musibo wa Yezu onloga sabwa ya namalima, onottiya makaniya aba mowooneya-mwene. Ndoweni nitibe makaniya aba na musibo wanawili.
10. (a) Mwari mwa musibo obu beu vina mattaka entapulela eni? (b) Nigala na trigu nimbaala eni?
10 Kengesa Luka 8:5-8, 11-15. Musibo obu wa mulima, Yezu ohitapulela wi “beu thi nzu na Mulugu,” obe miselu dha omwene. Mattaka mirima dha attu. Beu emottele vamattakani apama ehimela mitxitxi, ehikala nipweto nanda ehunuwa bikala muri. Muriya ‘ohibala milima okwaranya dila 100.’ Muriya obu kokala nigala na trigu, ogabalile musapo gani? Magala mang’ono? Nne, ogabalile beu ya trigo wi egapopiwa biyinjivana. Musibu obu, beu modha enobala okwaranya dila 100. Ejo ennisunziha nni na mabasa a olaleya?
Iyo ninawodhe dhavi ‘obaala milima n’ovilela’? (Koona ddima 11)
11. (a) Musibo wa beu onisunziha nni na mabasa ehu a olaleya? (b) Iyo nimbaala dhavi milima dhiswa?
11 Akala anamudhi ehu obe Anamoona eena anonisunziha mwaha wa miselu dha omwene wa Mulugu, enkala ninga apopile beu vamattakani apama. Awene anohagalala venjene agonaga wi nihirumeela miseludha. Beu eji enowunuwa ofiyedha obaala milima. Ninga mulogeliwani vamaromo wi nigala na trigo kanimbaala nigala niina, iyo kaninabale anamafwara aswa, mbwenye beu eswa. * (Koona yowenjedhedha.) Ninakose dhavi ejiwene? Dila dhotene nilogege miselu dha Omwene wa Mulugu, ejo enkala ninga wenjedhedha vina owaza beu yaliwe mmirimani mwehu. (Luka 6:45; 8:1) Nigadhowagavi banigalaleya miselu dha Omwene wa Mulugu, ‘ninobala milima na ovilela.’
12. (a) Nisunzilevo eeni na musibo wa Yezu onloga sabwa ya muri wa mvidera na beu? (b) Nsunzo ntti nukamihedhile dhavi?
12 Ninsuzavo eni na musibo wa Yezu enloga dha muri wa mvidera vina namalima? Iyo nisunza wi “obala milima” kahiyo wi attuya anonivuruwana obe nne. Enfuneya kudhowavi banigalaleya. Murumiwi Paulo ohiloga elobo yoligana: “Muthu-muthu onere wakela muthengo omfwanyelela mabasa athiddileye.” (1 Korinto 3:8) Yehova onele oniliva na mabasa ehu, mbwenye kahiyo sabwa ya dhopurelamo dha mabasa ehu. Matilda, olabile ninga pionera mwari mwa vyaka 20 ohiloga: “Enoddagalaliha oziwa wi Yehova ononivaha mareliho sabwa ya guru ekosile iyo.”
NINAWODHE DHAVI OBAALA MILIMA NA NTIDDI?
13, 14. Mowiwanana na Roma 10:1, 2, sabwaya yali evi yamuttukulela Paulo odhowavi bagalaleya?
13 Elobo gani enanikamihedhe ‘obaala milima n’ovilela’? Ndoweni nitanalele yotagiha ya murumiwi Paulo. Iyo ninoziwa wi iyene wahobana sabwa yawi Ayuda kafuna ovuruwana miselu Dhomwene dhalaleya iyene. Mbwenye iyeneya kattiyile mabasa a olaleya. Ohitapulelalamo mukalelo wawoniye Ayuda eraga: “Enunlela miyo na murima waga wotene enimulobetxa miyo Mulugu jawi Ayuda avuneye. Ddihona wi awene anomuzuzumela Mulugu na murima wawa wotene; vano kanziwa ebaribari yomuthithimihana Mulugu mofwanyelela.” (Roma 10:1, 2) Kito Paulo wadidelelani mabasa olaleya?
14 Yoroma, Paulo ohiloga wi yamuttukulela walaleya Ayuda yali sabwa ya ‘efunelo yaye na murima wotene.’ Iyene txibarene wanfuna wi avuneye. (Roma 11:13, 14) Yanawili, iyene ohitapulelamo wi: “Ddihona wi awene anomuzuzumela Mulugu.” Paulo wahimukumbirha Yehova wi amukamihedhe muttu-muttu arumele miselu dha Omwene. Yanoraru, Paulo ohiloga wi: “Kanziwa ebaribari yomuthithimihana Mulugu.” Iyene wahinonelamo wi ahikaana guru dha omwebedhana Yehova. Iyene wanziwa guru yanani yowodha omuttittimihana Mulugu ninga yakosa iyene.
15. Ninawodhe dhavi omusaza Paulo? Kavaha yotagiha.
15 Ninawodhe dhavi omutagiha Paulo? Voroma, ninfuna nafwanye abale ‘ana njedhelo na okalawo namukalakala.’ Yanawili, ninomukumbirha Yehova wi akamihedhe orugunutxa murima avuruwane miselu dhinalaleya iyo. (Merelo 13:48; 16:14) Jijuwene ekosile Silvana, olabile ninga pionera mwari mwa vyaka 30. Iyene ohiloga, “Ddihinatti ovenya wi ddalaleye mmuruddani mwaga, Ddanlobela ddimukumbirhaga Yehova wi addikamihedhe okosa dholigana.” Ddankubirha wi angelo addikamihedhe wafwanya attu anaddivuruwane. (Mateu 10:11-13; Ovuhulela 14:6) Robert, olabile opionero mwari mwa vyaka 30, ohiloga, “Olaba vamodha na angelo anziwa ejile enapadduwela amazambo elobo yohagalaliha vaddiddi.” Yaneraru, ninowodha woona oderetu mwatuya vina akaana guru na mikalelo dhomulabelana Yehova. Carlo, munddimuwa wa mulogo obatiziwe vyaka 50 mundduni, ohiloga, “Ddinotamela oziwa mikalelo dhing’onovi dha muttuya, dditonyihedhaga emwerumweru, vina okosa mavuzo.” Nigakosa dhilobo ninga esene, ninele owodha ‘obaala milima dhinjene na ovilela’ ninga mukoseli Murumiwi Paulo.
“KUFUNYE MYONO DHAWO”
16, 17. (a) Ninsunzavo eni na nlebo na Kohelét 11:6? (b) Mabasa ehu a olaleya anapatta dhavi abale annoona?
16 Kanidduwale wi mabasa a olaleya ankosa iyo anolata mirima dha attu analaleya iyo masiki vankalani ninga kaniwa. (Kengesa Kohelét 11:6.) Attu anonang’ana. Awene anoziwa wi ninowabala deretu, nili attu oleleya vina owandaneyana. Ejo enowaddiginya murima masiki akooddaga oziveliwa na iyo, movira mudhidhi anodha osadduwa. Sergio na Olinda ahoona wila ejo yali ebaribari.
17 Sergio ohiloga: “Sabwa ya oredda kaniwodhile okala attu oligana. Mwiyelelihu anamakosa oleddo ahinivuza, ‘Ewupadduwelini txine? Malabo aba mwanninukwela owoonani.’” Olinda ohawakula na emwerumweru: “Anameddiha mikukutta ahinivaha nladda baloga wi ‘Mulabe deretu!’ Aweneya ahikumbirha vina manivuru.” Sergio na Olinda ahitikina vaddiddi mwafiyeli mulobwana dhahi vali karinya ya manivuru, wahavaha marhuwa angulihiwa muloja, nanda wahatamaalela na mabasa ankosani.
18. Weyo osakulele nni odhowavi ‘bugabaala milima na ovilela’?
18 Akala weyo ‘kunfunya myono dhawo’ ttangwi ya wawaddela attu miselu dha Omwene wa Mulugu weyo ohikana mabasa a makamaka a ‘walaleya attu a malogo otene.’ (Mateu 24:14) Noona weyo onele okaana ohagalala onddimuwa oziwa wi onomwagalaliha Yehova. Iyene onowakwela abale otene ‘ambaala milima n’ovilela’!
^ par. 2 Yezu ohiloga wi olaleya ‘mmuruddani mwawo’ elobo yorutxa. Dhologa esi dhinfwanyeya mwari mwa manivuru manai a muttaka anloga mabasa a Yezu.—Mateu 13:57; Marko 6:4; Luka 4:24; Joau 4:44.
^ par. 7 Mirayi dhinlogiwa mwari mwa musibo obu onaddiwana ba akristu ana njedhelo nodhowa odhulu, mbwenye musiboya okaana yopurelamo wa alabeli otene a Mulugu.
^ par. 9 Mazu aba ‘obaala milima’ anowaddana vina “dhimbala muya.” Noona mwari mwa mutoma obu na obo ondawo onalogetxe mwaha wa “mulima wa mazu a mwano mwehu,” obe olaleya miselu dha omwene.—Galásia 5:22, 23; Ahebreu 13:15.
^ par. 11 Dila yina, Yezu ohiloga musibo wa namala beu na namasinanga aladdanihaga na mabasa a wakosa anamasunziha.—Mateu 9:37; Joau 4:35-38.
