1. Sabwaya jani attu ena kanziveliwa okosa nsunzo nomwinya?

OKANA yoja masaka abano elobo yorutxa, mbwenye enofuneya olabihedha guru. Abali na arogora enjene anolaba vaddiddi wi awodhe osapela murala wawa. Malabo otene, oleddo wawa wa odhowa vina wiyela omabasani onowajela mudhidhi mwinjene. Enjiya mabasa ankosani anononga guru. Omamalelo wa siku-siku, abali na arogora ankala olemene! Masiki akalaga olemene awene anovilibihedha okana efunelo ya okosa nsunzo nomwinya.

2. Weyo onkosaga nsunzo nawo mudhidhi gani?

² Ebaribariya jawi, iyo ninofanyela okoya mudhidhi wokosa nsunzo—na Bibilia vina manivuru mena a nikuru nehu. Sabwani nigahisunze, kaninawodhe okana mandano ofiyedheya na Yehova, burevi ninodha oyelela egumi yamukalakala! (1 Tim. 4:15) Wila apurelemo deretu masunzoya, attu ena anziveliwa osunza mudhidhi wa membesi, elabo egali noo na ogogo wofwaseyene. Ena ansakula osunza omamalelo wa siku, mudhidhi onkalani wofwaseyene wi atanalele deretu.

3-4. Matxinjo gani akosile Nikuru Nolamulela mwaha wa muttengo wa manivuru, nanda sabwaya jani?

³ Txibarene weyo onorumeela wi jofuneya otamela mudhidhi wi okose nsunzo nawo. Mbwenyi txini enfunihu osunza? Txino weyo onowubuwela; wi dhikalawo dhilobo dhinji dhofuneya wengesa, mbwenyi ‘enorutxa wengesa dhilobo dhotene.’ Attu ena anowodha wengesa manivuru otene vina woona mavidiyu ansasanyedha nikuru nehu, mbwenyi mwa abalihu enjene, okana mudhidhi wa wengesa kahiyo elobo yovevuwa. Nikuru Nolamulela ninononelamo makattamiho abo. Noona, muttengo wa manivuru ehu ohivuguliwa.

 ⁴ Motagiha, kaninvaviha vina Anúarios das Testemunhas de Jeová vowi mu site jw.org^® na TV.JW Broadcasting^® munodha dhotagiha dhinjene dhinlibiha. Ottiya eji, marevista ninga Mwang’aneli, (A Sentinela edição para o público) na Despertai! ddabuno anvavihiwa dila ttaru va yakani. Matxinjo aba, kakoseliwe wi nilabihedhege mudhidhiya na dhokosa dhina. Akoseliwe wi “niwodhe osakula dhofwanyelela.” (Fil. 1:10) Ovano ndoweni none txini enfanyela weyo okosa wi owodhe wira matadelo a dhilobo dhamakamaka vina mareliho anakaane weyo sabwa ya nsunzo nawo nomwinya.

5-6. Manivuru gani anfwanyelihu ofwaseyela osunza?

⁵ Ninarome ozuzumela eni nigakosaga nsunzo nomwinya? Iyo txibarene ninofwanyela oburutxa mudhidhi wa osunza Mazu a Mulugu siku-siku. Nikuru Nolamulela nihikosa masasanyedho a ovugula makapitulu mena a Bibilia engesiwa mmulogoni, wila nikaane mudhidhi wa otanaalela dhowengesa na dhopepesa dhehu. Dhogana dhehu kadhikale wengesavi bahi, mbwenye okosa muli mwetemwene wila nittiye malebo a Bibilia addiginye murima wehu vina niwodhe okala wofiyedheya na Yehova.—Masal. 19:14.

⁶ Elobo gani enfwanyelela iyo ofwaseyela osunza? Txibarene ninofwanyela omusasanyedha Mwang’aneli W’osunzana vina Nsunzo na Bibilia na Mmulogoni na dhotene dhinasunziwe mmatugumanoni a vari va sumana. Ninofwanyela vina wang’ana manivuru maswa ninga A Sentinela na Despertai!

7. Ninofwanyela okumuwa akala kaninwodha wengesa obe wona dhotene dhili mu jw.org na JW Broadcasting?

⁷ Txino weyo onovivuza ‘miselu dhina dhinfwanyeya mu, jw.org, dhina mu JW Broadcasting ddinakose dhavi? Ebaribari Miseludha dhihinjiva-wene!’ Koona yotagiha eji: Txino weyo ohidhowa mungulihiwa dhoja nanda ohifwanya dhoja obe miziyo dhottiyana-ttiyana. Ebaribari wi kunawodhe oja dhotene, onosakulavo dhinwodhiwe. Yakakene, akala weyo kunwodha wona mavidiyu obe wengesa dhotene dhili mu websiteni mwehu, kukumuwe. Mbwenye kengesa vina koona mavidiyu ninga munwodheliwe. Ovano ninfuna ninonelemo, okosa nsunzo nomwinya entapulela eni vina ninawodhe dhavi opurelamo nigakosaga nsunzo nehu nomwinya.

8. Ttarho gani dhinfanyeelela weyo olabihedha ogasasanyedhaga Mwang’aneli w’osunzana nanda onakaane yopurelamo gani?

⁸ Osunza entapulela wengesa n’ofwaseya wila ononelemo esile dhili dhattima. Osunza onokwaranya wengesa na okwereta dhowakuladha. Motagiha, ogasasanyedhaga Mwang’aneli W’osunzana, vamaromo, ofwaseyele ononelamo apale valebiwe dhinasunze iyo. Osogorhowa, wengese anamisorho a nsunzona vina ononelemo mavuzo owiyelela. Wengesege ddimadha vang’ono-vang’ono vina na ttontto. Ofwaseyele ddima yoroma, enele wutonyihedha makani analogiwe mwari mwa ddima dhina dhinfwarela. Ogengesaga mutoma wotene, kobuwela mukalelo oniwanana ddimadha na mitoma dhina dhing’ono, ononelagamo makaniya amakamaka. Ogafanya mazu orutxa vina makani ahinwodha weyo ononelamo kalebela vego ogamala opepese.

9. (a) Ninawodhe dhavi ofwaseyela malebo a mBibiliani mwari mwa nsunzo na Mwang’aneli, nanda sabwaya jani? (b) Mowiwanana na nivuru na Josuwé 1:8, ottiya wengesavi malebo txini enfwanyelihu okosa?

⁹ Mwang’aneli W’osunzana, nsunzo na  Bibilia. Nona, kafwaseyela malebo a mBibiliani, osakule makamaka abale anengesiwe mwari mwa matugumano. Olebele mazu a malebo a Bibilia ankamihedha esile dhinloga ddimaya. Ottiya ejuwene, okaane mudhidhi wila otanaalele malebo a mBibiliani anengesa weyo vina wubuwele mukalelo onawodhiwe olabihedha mwigumini mwawo.—Kengesa Josuwé 1:8.

10. Mowiwanana na nivuru na Ahebreu 5:14, sabwaya jani amambali anofwanyela opura mudhidhi wa webedha wa ntakulu, wila akamihedhe aniwa owodha osunza vina opepesa?

¹⁰ Txibarene, amambali anofuna wi Webedha wa Ntakulu onkosiwa vasumanani, okale mudhidhi w’ozivela vamodha na aniwa. Ebaribari wila amambali anofwanyela osasanyedha na mutanene, dhinfunani osunza vina okosa va webedhani wa ntakulu, mbwenye kanfwanyela wubuwela okosa mabasa a vawoka obe ogilatela wona mavidiyu. Enowodheya amambali olabihedha Webedha wa Ntakulu ang’anaga matadelo a mweri anlagihiwa mu JW Broadcasting obe olaba mabasa ninga osasanyedha pangaya wa Nowé, mbwenye wili-wili aima anofwanyela omusunza Bibilia na omunonelamo. Motagiha, awene anofwanyela oziwa osasanyedha matugumano obe opepesa dhilobo dhorutxa, agagumanana makani owaganyedha oskola. (Kengesa Ahebreu 5:14.) Akala awene anokaana elemelelo ya omusunza Bibilia vatakulu, anele okala ofwaseyela ovuruwana agakala mmatugumanoni a mmulogoni, a murudda na a ttattamwa, sabwani dila dhina kavankala mavidiyu menjene. Joziweya, wi mudhidhi onfuna ogonela nsunzona oniwanana na yaka obe ononelamo wa mwanaya.

11. Ekalele nni yamakamaka wasunziha anamasunza ehu owodha okosa nsunzo na Bibilia nomwinya?

¹¹ Anamasunza ehu a Bibilia anofwanyela vina oziwa okosa nsunzo nomwinya. Vamaromo, iyo ninowagalala wawona awene asasanyedhaga nivuru nawa n’osunzana Bibilia obe dhinasunziwe mmulogoni. Mbwenye nazuzumele wasunziha awene owodha opepesa vina okosa matibelo anakamihedhe ononelamo dhinsunzani agakala woka. Dhawene agafwanyiwa makani orutxa, kandowa onvuza mbali mwina mmulogoni wila amukamihedhe, awene anele oziwa opepesa mmanivuruni mwehu wi afwanye malago anfunani olabihedha.

12. Dhogana gani dhinfunihu okana nigakosaga nsunzo nomwinya?

¹² Akala weyo kunkosa nsunzo nomwinya, txino kunanonelemo wi nsunzo nomwinya  tta pama. Mbwenye enowodheya weyo oziveliwana na nsunzo nawo. Karoma osunza mudhidhi mung’onovi vina odhowege vang’ono-vang’ono otamelaga wenjedhedha mudhidhiya wosunza. Ogane enfuniwe opurelamo. Mwebaribari, yogana yehu ya ttima-ttimaya ja okana mandano ofiyedheya na Yehova. Mbwenye enowodheya vina ogana oziwa wakula mavuzo ankosiwa iyo na muttu ddi muttu obe opepesa makani ananikamihedhe owanana na makattamiho anfwanyiwa iyo.

13. (a) Dhilobo gani dhinfanyeelela munyaskola okosa wila atonyihedhe akwaye ebaribari ya mBibiliani? (b) Onawodhe dhavi olabihedha malago anfwanyeya munivuruni na Kolosi 4:6?

¹³ Motagiha, akala weyo oli munyaskola, akwawo oskola txino anorumeela wi dhilobo dhipadduwile woka kadhina Muttanddi. Weyo txino ogahiziveliwa ontonyihedha ebaribari ensunziha Bibilia, mbwenye onivoona ninga kunawodhe okosa. Nona kazuzumela okosa nsunzo nomwinya! Enowodheya ogana dhilobo bili: (1) Wenjedhedha nikuluvelo nawo wi Mulugu ddi muttanddi wa dhotene vina (2) ononihedhamo esile dhinrumeeliwe. (Rom. 1:20; 1 Ped. 3:15) Kavivuze: akwaga oskola anlibana dhologa gani wi arumeele dhilobo dhipadduwile woka? Nomala opepese n’ofwaseya matibelo a makaniya mmanivuruni mwehu. Wamelela ebaribari kahiyo elobo yorutxa. Attu enjene anrumeela wi dhilobo dhipadduwile woka sabwani muttu onimurihani onowavaha nikuluvelo ninooniha ninga ebaribari. Mwari mwa opepesa wawo akala ohifanya dhowakula mmodha obe dhilobo bili dhinoniha ebaribari ya mBibiliani, kinrutxa omutonyihedha muttu ontamela oziwa ebaribari ya dhilobo eso.—Kengesa Kolosi 4:6.

14-16. (a) Onawodhe dhavi oziwa deretu mwaha wa nivuru na mBibiliani? (b) Olabihedhaga malebo aromoliwe veneva, katapulela mukalelo onnonelamo weyo nivuru na Amós. (Koona vina kasha “ Katamela Oziviha Nsunzo Nawo na Bibilia!”)

¹⁴ Kobuwela wi, mmatugumanoni mwehu ninele osunza nivuru nilebiwe na namavuhulela ologile dhilobo dhing’onovi, txino weyo kunziwa vaddiddi dhinloga nivuruna. Nona, enfwanyeliwe okosa vamaromo otamele wunuwiha efunelo yawo yosunza enloga nivuruna. Onawodhe okosa dhavi?

¹⁵ Voroma, kavivuze: Miyo ddinziwa eni mwaha wa namalebaya? Iyeneya wali ani, wakala wuvi vina wakosa mabasa gani? Ononelamo miselu ninga esi dhinele wukamihedha oziwa sabwaya emuttukulele namalebaya olabihedha mazu mena obe misibo. Ogengesaga katamela makani anloga sabwa ya namalebaya.

¹⁶ Elobo yina enawukamihedhe ja opepesa nsaka nilebiwe nivuruna. Onofwanya miselu esi o “Tabela dos Livros da Bíblia” enfwanyeya omamalelo wa Bibilia Tradução do Novo Mundo. Ottiya ejuwene, katamela vina Apêndice A6. Akala nivuruna na Bibilia nihikaana mavuhulo, katamela oziwa nsaka nilebiwe nivuruna, mukalelo wakala attuya, bani wakala nsaka nimodhene na namavuhulela oddu? Mubuwelo vina merelo gani abure akosiwa nsaka nakala namavuhulela oddu, yafuniye wogolela? Wi owodhe okana miselu dhotene txino enofuneya weyo otamela ononelamo na manivuru mena a mBibiliani. Motagiha, wi ninonelemo epadduwile nsaka na namavuhulela Amós enofuneya wengesa maversikulu a manivuru a 2 Amwene na 2 Mapadduwo vareferencia ninda munivuruni na Amós 1:1. Opepese vina nivuru na  namavuhulela Ozeya okalile txino nsaka nimodhene na Amós. Miselu esi dhotene dhinele wukamihedha ononelamo nsaka nikalilewo Amós.—2 Amwe. 14:25-28; 2 Map. 26:1-15; Oz. 1:1-11; Am. 1:1.

17-18. Nilabihedhaga dhotagiha dhonilehu, kalagiha mukalelo onagalaliha nsunzo nehu nigasunza n’ofwaseya wi ninonelemo dhilobo dhing’ono.

¹⁷ Otamela oziwa dhilobo dhina, enele ogalamutxa nsunzo nawo na Bibilia. Motagiha, akala weyo onowengesa nivuru na namavuhulela Zakariya kapitulu 12, enloga mwaha wa okwa wa Mesiya. (Zak. 12:10) Va versikulu 12, ninowengesavo wi “Ziza na Natan” nigahifiyedha wunla vaddiddi na okwa wa Mesiya. Ottiya opwaza miselu esi, wubuwele dhahi: Sabwaya jani yafunela wunla ‘Ziza na Natan’mwaha wa okwa wa Mesiya? Ohikalawo mukalelo woziwa sabwaya?’ Venevo weyo onosadduwa, bukala ‘namapepesa.’ Nlebo nimodha ninawukamihedhe ttintti, 2 Samuwel 5:13, 14, va nlebo ntti weyo onele ononelamo wi Natan wali mwana modha wa Mwene David. Nlebo nina ttintti, Luka 3:23, 31, nlebo ntti ninolagiha wi Maria, maye wa Yezu, wankosa mpaddi wa ziza na Natan. Yotikiniha gani! Weyo wahiziwa, wila mavuhulo aba ela omutonya Yezu ninga wa ziza ya David. (Mt. 22:42) David wahikaana aima 20. Kuntikina oziwa wi Zakariya wahivuhulela wila murala wa Natan ogadha wunla okwa wa Yezu?

¹⁸ Koona yotagiha eji yina. Nivuru na Luka kapitulu 1, ninowengesavo wi anju Gabriyel wamwaredhela Maria nanda Bamwaddela dhali mwaha wa mwana agakaanile iyene: “Iyene onere okala munddimuwa, onere wittaniwa Mwana Mulugu wothithima-thithima Nabuya Mulugu onere omuhabiha mpaddo  wa nikolo naye David. Iyene onere olamulela nlogo na Jakobi masaka otene, o mwene waye kunagome-wene.” (Lk. 1:32, 33) Txino ninodha ozuzumeletxa mazu oroma a anju Gabriyel aloga wi, “Yezu onere wittaniwa Mwana Mulugu wothithima-thithima.” Mbwenye Gabriyel wahivuhulela wi Yezu ‘agahikala Mwene.’ Eji enonubutxedha mukalelo wewilemo Maria, vawaddeliwiye mazu aba. Koddi mazu a anju Gabriyel afuna atapulela wi Yezu agahikala Mwene wa mu Izrayel ahabaga mpaddo wa Mwene Herodi—obe wa abale agalamuleli musogorho? Nne, sabwani Yezu kokala Mwene, Maria agahikala Nyanyi munddimuwa, nanda amudhaye otene agahikala numba ya kala mwene. Mbwenye Bibilia kanloga wi Maria wahikaana mubuwelo ninga obu, vina kakumbirhile ettomo mu Omweneni, ninga mukoseli anamafara eli a Yezu. (Mt. 20:20-23) Miselu esi dhinolagiha kakamwe wi Maria wali muyana woviyeviha!

19-20. Mowiwanana na Tiago 1:22-25 vina 4:8, nigasunzaga ninfuna nikaane dhogana gani?

¹⁹ Nubuwelegeni wi dhogana dhehu nigamusunzaga Bibilia vina manivuru ehu ku okana mandano ofiyedheya na Yehova. Ottiya ejene, ‘ninfuna nifwaseyele deretu wona elihu’ vina nikose matxinjo wila nimuhagalalihe Mulugu. (Kengesa Tiago 1:22-25; 4:8.) Nona, nigafunaga okosa nsunzo nimukumbirhe Yehova wi anivahe muya wokoddela. Nikumbirhe na murima wotene wila iyene anikamihedhe ononelamo vina olabihedha dhotene dhinfunihu osunza.

²⁰ Nigakaana elemelelo ya osunza ninele okala ninga mulobwana ologiwe na munasalmo: “Wagari ddule onjiwa murima na magano a Nabuya, onfwaseyela mathiyu na mutana . . . Dhetene dhinireye dhinosogorha.”—Masal. 1:2, 3.