1. Txini elogile Yezu mwaha wa dhorela dha wirimu?

KAHIYO mafumo otene anwodheya woneya. Txibarene, mafumo attimaya-ttimaya kanwodheya woniwa. Yezu akosaga Diskursu yaye ya Vamwangoni, ohiloga wi ttima ya mafumo a wirimu ehittabwa opitta ttima ya dhokana dha mwilaboni. Vasogorhova, iyene ohiloga ebaribari eji: “Vali muhaku wawo, pali murima wawo.” (Mt. 6:19-21) Murima wehu onnikwekwetteletxa otamela esile dhinttittimihetxihu obe dhinfunetxihu venjene. Iyo ninwugela “dhorela odhulu” mwa otamela okana nzina nottittimiheya obe okoddeliha merelo ehu vamentoni va Mulugu. Yezu ohitapulelamo wi dhorela esi, txipo kadhiniyiwa nne kadhinnongeya.

2. (a) Ninga munlogela 2 Korinto 4:17, 18, txini enitutele Paulo okosa? (b) Txini dhinasunzihu mwari mwa mutoma obu?

² Murumiwi Paulo ohinitutela na malago awi “nikuluvele dhihinoneya.” (Kengesa 2 Korinto 4:17, 18.) Dhohoneya esi dhintaganyiheya na mafumo a wakela maruriho a ojavo elabo eswa ya Mulugu enfuniye odhana musogorho. Mwari mwa mutoma obu, iyo ninfuna nisunzemo mafumo manayi ahinoneya, abuwene anjavo iyo ovanene—omarho onihu na Mulugu, mvaho wa nlobelo, nikamihedho na muya wokoddela wa Mulugu na nikamihedho ninda wirimu, ninneddiha mmabasani a olaleya. Ninela wona malago a otamalelana mafumo aba ohoneya.

3. Nifumo gani ninddimuwa nihinoneya nivahiwehu, vina nivahiwe dhavi?

³ Omarho onihu na Yehova Mulugu, mvaho munddimuwa vaddiddi. (Masal. 25:14) Enwodheya dhavi attu ottega ofiyedha  okala amarho okoddela a Mulugu? Ewodheyile sabwa ya mukutto wa Yezu ottimihile “yothega ya elabo”; nona, otene anowodha okoddelihiwa. (Jo. 1:29) Yehova wanziwa wi efunelo yaye ya Wavuna attu a malogo kigavonyile. Jijene emukosihile iyene wawikamo ninga amarho attu akalilewo Yezu ahinatti okwa.—Rom. 3:25.

4. Kaloga dhotagiha dha alobwana oroma akalile amarho a Mulugu Kristu ahinabaliwa.

⁴ Karoma wona yotagiha ya alobwana oroma aligi amarho a Mulugu, Kristu ahinabaliwa. Abrahamu wali mulobwana wonihile nroromelo nddimuwa vaddiddi. Okwaranya vyaka 1.000 Abrahamu bakwile, Yehova ohiloga wi iyene wali ‘mukwaye.’ (Iza. 41:8) Okwa kumwalanihile omarho wana Yehova na Abrahamu. Muyubuweloni mwa Yehova, Abrahamu oli wokalawene. (Lk. 20:37, 38) Yotagiha yina ja Job. Siku dhahi natugumanile anju wirimu, Yehova ohiloga na nikuluvelo notene mwaha wa Job. Iyene ohiloga wi Job, “onovirihamo magano, onoweddeyana na athu, onorabela obure.” (Job 1:6-8) Yehova omonile dhavi Daniyel, mulobwana omulabele na nroromelo nddimuwa, masiki vakaliye na attu otakala merelo ottamagela vyaka 80? Anju wa Mulugu ohimwaddela dila ttaru wi iyene ‘muthu wakweliwa na Mulugu.’ (Dan. 9:23; 10:11, 19) Mwebaribari iyo ninoziwa wi Yehova ohikana efunelo enddimuwa vaddiddi ya wavenyiha mukwani akwaye okweleya.—Job 14:15.

5. Txini enfuneya wi nikale amarho a Yehova?

⁵ Attu angasi anjavo omarho na Yehova masaka abano? Amiliyawu enjene. Ninlogela dhahene sabwani orugunuwa elabo yotene, alobwana, ayana na aimaya anowoniha na merelo awa wi ahikana efunelo ya okala amarho a Mulugu. “Nabuya [Yehova] onowandana na abale anvirihamo” magano aye. (Gano 3:32) Awene anowodha okala amarho a Mulugu sabwani anororomela mukutto wa Yezu. Sabwa ya mukutto obu, Yehova na ttagaraga yaye onowakela ovivelela wehu ofiyedha wubatiziwani. Nigeddana ttaro eji yattima, ninovitaganyiha na attu enjene anivivelela, bakala Akristu obatiziwa, abuwene anjavo omarho wofiyedheya na Munddimuwa wa elabo yotene.

6. Ninawodhe dhavi woniha otamalela omarho onihu na Mulugu?

⁶ Ninawodhe dhavi woniha wi ninottittimiha omarho wehu na Yehova? Moligana na Abrahamu vina na Job, ali ororomeleya na Mulugu mwari mwa vyaka dhinjidhene, iyo vina ninofwanyela okala ororomelaya—kintanala vyaka dhikalile iyo nimulabaga Yehova mwilaboni mpuno. Enofuneya vina ottittimiha omarho wehu na Mulugu opitta egumi yehu, dhahene ninga mukosele Daniyel. (Dan. 6:7, 10, 16, 22) Na nikamihedho na Yehova, ninele owodha oliba mmasosoni ofiyedha omujedhela iyene bahi.—Fil. 4:13.

7. (a) Ninga munlogela Gano 15:8, Yehova onona dhavi malobelo ehu? (b) Yehova onakula dhavi malobelo ehu?

⁷ Mvaho mwina ohinoneya bwa nlobelo. Amarho ankwelana anowaddelana dha mmurimani mwawa. Eji enopadduwa na marho wehu Yehova? Ndde! Yehova onologa na iyo mmazuni mwaye, mwenemo munnaddeliye dha mmurimani mwaye vina dhinubuweliye okosa. Iyo ninologa na iyene munlobeloni, mwenemo ninowodha ologa dhotedhene dhili mmurimani mwehu. Yehova onoziveliwa venjene ovuruwana malobelo ehu. (Kengesa Gano 15:8.) Iyene kankalela ovuruwanavi malobelo ehu, nne, onovuruwana vina onowakula, vowi iyene ddi marho wehu wokwela. Masaka mena iyene onowakula  nomaguva. Mbwenye mudhidhi mwina enofuneya olobelela venjene elobo modhene. Mwa dhotedhene eso, iyo ninofwanyela oziwa wi yowakulaya enodha vamudhidhiniva vina n’ekalelo enfunihu. Txibarene, dhowakula dha Mulugu dhinottiyana na dhubuwelo dhehu. Ninga motagiha, ottiya onittawiha masoso annifwanya, iyene onnivaha eziwelo vina ononelamo wa owodha ‘opemberha.’—1 Kor. 10:13.

8. Niwodhe dhavi woniha otamalela wehu mvaho wa nlobelo?

⁸ Niwodhe dhavi woniha wi ninotamalela mvaho wa nlobelo? Voroma-vene, ninofwanyela ovirihamo malago a wirimu awi: “lobelagani muhilemágana.” (1 Tes. 5:17) Yehova kannikokela olobela. Iyene onoriha efunelo enihu ya osakula enfunihu, enkosiye ja onilaga na mazu anloga, “didelaní mulobelani.” (Rom. 12:12) Dhahene, iyo nigalobelaga wili-wili, labo nimodha-nimodha, ninowoniha otamalela wehu. Mulobelanimwa vina ninofwanyela wekamu mazu omutamalelana Yehova.—Masal. 145:2, 3.

9. Txini elogile mbali dhahi mwaha wa nlobelo, vina txini enonamo weyo mwaha wa mvaho obu?

⁹ Veneva vanimulabelihu Yehova mwa vyaka dhinjidhene, ninowona mwakulelo onakuliye malobelo ehu, ejo egapadduwa otamalela wehu mwaha wa nlobelo onowenjedheya. Karoma wona yotagiha ya mbali onkuweliha Chris, iyene ohilaba vyaka 47 mmabasani a mudhidhi wotene. Chris ohiloga: “Enoddizivela vaddiddi ovenya na membesi baddigamulobelela Yehova. Enoziva vaddiddi ologa na Yehova, nzuwa banigaroma-wene opattuwa vina elabo bili yokoddelene! Eji enoddittukulela omutamalela mwaha wa mivaho dhotedhene, otaganyiha na gari y’olobela. Enoddizivelaga vaddiddi olobela na mattiyu, ddigamala baddidhowa ogona na mobuwelo wokoddelene.”

10. Ekalele nni yofuneya iyo ovaha ttima muya wokoddela wa Mulugu?

¹⁰ Muya Wokoddela wa Mulugu nifumo nina ninnivahiye ninfwanyelihu otamalela. Yezu ohinaddela wi jofuneya iyo olobela nikumbirhaga  muya wokoddela. (Luka 11:9, 13) Yehova ononivaha guru na muya waye wokoddela—oli ‘owodha onddimuwa onkwaranya dhotene.’ (2 Kor. 4:7; Mer. 1:8) Na nikamihedho na muya wokoddela wa Mulugu, ninowodha opemberha makattamiho angumanihuna.

11. Muya wokoddela onnikamihedha okosa nni?

¹¹ Muya wokoddela ononiwodhiha wakwaniha mabasa annittomela Mulugu. Muya wokoddela wa Mulugu onowodha wenjedha ewodhelo na ttotto yehu. Ononiwodhiha wakwaniha mabasa ehu Okristu. Nigakosa dhapama, kanivisibe nne vina kanivittittimihe nanya, nittittimihe muya wokoddela wa Mulugu.

12. Ninga munlogela Masalmo 139:23, 24, iyo ninlobelela muya wokoddela wi onikamihedhe okosa nni?

¹² Ttaro yina yawoniha wi ninottittimiha muya wokoddela wa Mulugu ja olobela wi onikamihedhe wona dhotakala dhimvitala mmurimani mwehu. (Kengesa Masalmo 139:23, 24.) Iyo nigamulobelela Yehova wi anirabelihe dhotakala dhindda mmurimani mwehu obe anirabelihe dhabure, iyene onikamihedha na muya waye wokoddela. Vina nigarabela dhotakala obe dhabure dha mmurimani mwehu, ninofwanyela omulobelelaga Yehova wi anirabelihegevi dhabure dhetedhene dhigadhile ononga omuttu wehu. Dhahene, iyo ninorebetta dhonyakuwa dhigadhile onitakaliha, esuwene dhiganitotele goyi ya ohikamihedhiwa na muya wokoddela wa Yehova.—Ef. 4:30.

13. Niwodhe dhavi winjivihavi otamalela wehu muya wokoddela?

¹³ Enowodheya vina iyo otamalela muya obu, mwa wubuwela mabasa ankosani masaka abano ankalihu. Yezu ahinatti owela wirimu, ohawaddela anamafwara aye dhahi: “Nyuwo munere wakela guru dha Muya Wokoddela, onautiteleni; munere oziwiha elimi . . . mwilaboni mwetemwene.” (Mer. 1:8) Dhologa esi dhinowakwanihedheya n’ekalelo yawumiha milomo. Na nikamihedho na muya wokoddela, alabeli awakwana amiliyawu atanu na araru na jiddiga anomulabela Yehova, adhaga mwari mwa malogo ottiyana-ttiyana orugunuwa elabo yotene. Iyo ninompurelamo paraizu womuyani, na nikamihedho na muya wokoddela wa Mulugu,  obuwene onniwodhiha weddana merelo osibeya, ninga okwela, ottaba, murenddele, ovilela, murima wapama, murima waweddeyana, nroromelo, okurumuwa, na ovyang’anela. Dhotedhene esi, sisile “Dhimbala Muya.” (Gal. 5:22, 23) Mohaganyedha, muya wokoddela mvaho wa ttima enddimuwa vaddiddi!

14. Nikamihedho gani nohoneya, ninnivelela mmabasa a olaleya?

¹⁴ Iyo nihikana nifumo ninddimuwa vaddiddi nohoneya; olaba “vamodha” na Yehova vina na nikuru naye na wirimu. (2 Kor. 6:1) Mabasa aba iyo ninivitaganyiha mudhidhi-mudhidhivi onasunzihehu attu okala anamafwara a Yezu. Paulo ohiloga mazu awi “Iyo ninlaba vamodha mabasa a Mulugu” avyaddagana iyene vamodha na abale alabiyena. (1 Kor. 3:9) Nigavitaganyiha mmabasani a Okristu, kuloga nili anamalaba anlaba vamodha na Yezu. Makani aba anlogihu, Yezu ohenjedhedha na mazu awi, “Dhowani, mwasunzihe athu a malogo otene, . . . Onani, miyo ddili na nyuwo.” (Mt. 28:19, 20) Ki mwa ologa dha anju? Gari enddimuwa vaddiddi, oziwa wi iyo ninoveleliwa na anju mmabasani aba a ovuwiha “Muthaka Wapama, onlabela masaka otene”!—Ovuh. 14:6.

15. Kaloga yotagiha ya mBibiliani enoniha wi Yehova onokala vamodha na iyo mmabasani a olaleya.

¹⁵ Txini enakwanihedhaga iyo mwaha wa nikamihedho ntti? Mudhidhi onalihu muselu wa Omwene, dhihikalawo beu dhingwela mmirimani mwapama. (Mt. 13:18, 23) Bani onmeliha vina onunuwiha beu esi dha nroromelo? Yezu ohiloga wi kawo onwodha onkala namafwara waye “ahikukusiwe” na Babe. (Joau 6:44) Bibilia onologa yotagiha ya makani aba. Karoma wubuwela mudhidhi obule walaleyile Paulo nikuru na ayana ali otakulu wa muttette w’o Filipe. Vari va nikuru nttile na ayana, wahikalavo mmodha wakuweliwa Lídia, Bibilia onloga wi: “Nabuya omutomolela murima wiwelelamo mazu a Paulo.” (Mer. 16:13-15) Dhahene ninga Lídia, Yehova onowawenjedhavi amiliyau enjene a attu ovanene.

16. Nigalaba pama mmabasani a olaleya, bani onfwanyelihu omuttittimiha?

¹⁶ Bani onfwanyela ottittimihiwa sabwa ya opureliwamo wa mabasa ehu olaleya? Yoleba ya Paulo, yalebeliye abali a mulogo w’o Korinto enowakula nivuzo ntti; iyene ohileba dhahi: “Miyo dditxeya, Apolo ohelela manje, wonuwiha ddi Mulugu. Dhahene ole ontxeya, ole on’helela manje, kayiye elo: munddimuwa ddi Mulugu onunuwiha.” (1 Kor. 3:6, 7) Moligana na Paulo, iyo nigalaba mabasa apama mulaleyani, yofuna yehu ekale ya omuttittimiha Yehova.

17. Niwodhe dhavi woniha ontamalela wehu mwaha wa “olaba vamodha” na Mulugu, Kristu, vina na anju?

¹⁷ Niwodhe dhavi otamalela gari enihu ya “olaba vamodha” na Mulugu, Kristu, vina na anju? Ninoniha otamalela wehu, nigavilibihedhaga wasunziha attu akwihu muttaka wapama. Ahikalawo marhe menjene a olaleyana, ninga olaleya ‘vathaddo peno mmatakulu.’ (Mer. 20:20) Akalawo attu enjene anziveliwa olaleya mudila. Awene agafwanya anawedda, anowalejela na ekalelo y’omarho, vina anoroma makani. Muttuya agakula n’oleleya awene anomulaleya muselu wa Omwene na ttotto.

18-19. (a) Iyo nin’helela dhavi manje beu yebaribari? (b) Kaloga yotagiha enoniha wi Yehova ohimukamihedha namasunza dhahi wa Bibilia.

¹⁸ Vowi “ninlaba vamodha mabasa a Mulugu,” ninofwanyela wala vina ohelela manje beu yebaribari. Niganfwanya muttu onfuna osunza muselu wa Mulugu, iyo ninomusuziha  obe ninomukumbirha mbali mwina wi arome na iyene nsunzo na Bibilia. Nsunzona nigadhowaga vasogorho, ninohagalala sabwa ya omona Yehova asasanyedhaga murima wa namasunza wehu, odduwene onakale namafwara musogorho.

¹⁹ Karoma wona yotagiha ya ng’anga dhahi w’elabo y’o Joni onkuweliwa Raphalalani. Iyene wahiziveliwa venjene dhasunziliye mBibiliani. Mbwenye ohifwanyiwa dhorutxa vaddiddi musunzeliye muselu wa Mulugu onloga mwaha wa wakuttela mukutto vina ologa na attu akwile. (Olib. 18:10-12) Vang’ono-vang’ono iyene wahimuttiya Mulugu wogolela dhubuwelo dhaye. Vasogorhova ohittiya mabasa abale ong’anga masiki aziwaga wi babuwene amujiha. Ddabuno Raphalalani ona vyaka 60, iyene ohiloga: “Miyo ddinowatamalela vaddiddi Anamoona a Yehova addikamihedhile okwaranya masoso aga vina addikamihedhile ofwanya ganyo. Wottabwaya onimuttamalelimi ddi Yehova, oddikamihedhile okoddeliha egumi yaga; ddabuno miyo ddinolaba mmabasani a olaleya ninga Munamoona wobatiziwa.”

20. Txini eganiliwe okosa?

²⁰ Mwari mwa mutoma obu iyo nihisunza mafumo manayi ohoneya. Nifumo nddimuwana-nddimuwana ji gari ya okala Marho wa Yehova. Omarho oku ononiwodhiha opurelamo mafumo mena ahinonihu—ologa na iyene munlobeloni, wona nikamihedho na muya waye wokoddela vina wakela nikamihedo na wirimu mmabasani mwehu a olaleya. Niganeni okana efunelo ya woniha otamalela wehu mafumo aba ohoneya. Txipo kanitxeleleni omutamalela Yehova sabwa ya orumela okala Marho wehu.