Mapadduwo A Mwigumini
“Ddihisunza Venjene na Attu a Eziwelo Vina Adhile Vawale!”
NALIGI mattiyu wa eddima vaddiddi miyo na anyakoddo ena a elabo yo França namagile misasa dhehu vari va myango dho Argélia, koddo yahivingaga vaddiddi. Na futti yaga mmadani ddemelile vaguddeliwe saku dha mattaka, ddali meka ddang’anelaga mburhoya. Saddu, ddiniwa oruma vina jidho dha attu addamelaga valimi. Venevo miyo oroma ogurumela. Ddela obudduwa-wene muzombweni vina kaddana efunelo ya ompa muttu nne ya opiwa. Miyo okuwa: “Nabuya Mulugu! Kaddikamihedheni!”
Nipaduwo nttile notxutxa nihisaddula kakamwe egumi yaga, oromana labonene nttile paromilimi omutamela Mpaddutxi. Ddinfuna ddutapulelemo mukalelo ogomile omattiyu obule, mbwenye vamaromo ddinfuna ddiloge vang’onovi dhiddipadduwile oromana muhimani. Dhowireya dhina dhipadduwile nsakanene nttile dhihipatta mukalelo waga wawubuwela vina dhihiddittukulela omutamela Mulugu.
DHISUNZILEMI NA BABANI
Ddibaliwe yaka ya 1937 murudda wo Guesnain, sidadi yamineru enkala omadhulu wa elabo yo França. Babani wali mineru vina ddisunzile na iyene ttima yokala namalaba wapama. Vina ddisunzile na babani ekalelo yoweddana merelo oliga, iyene wanawamelela amirenu ena atabuwa sabwa ya mukalelo walabihiwani. Babani wahifiyedha ovolowa munikuruni ninkuweliwa sindikatu, asindikatu attu anamelela dhofuna na ofuru wa anamalaba wi akamihedhe anamalaba ampattiwa makattamiho. Ottiya ejo, babani wansilidheya na asogorheli a makapela ali agwarhagwambi awoniye mu sidade. Owinjivaya ali areli, masiki dhawene, anakumbira dhoja vina kobiri amineru ali ayeligi vina atabuwela vaddiddi ofwanya elobo yovikalihana. Babani wansilidheya vinjene na asogorheli abale ahiddisunzihile elobwene sabwa ya relijiau. Mwa ologa ebaribari, iyo kanasunzihiwa-wene sabwa ya Mulugu.
Munnuwelimi, ddahiroma vina widda ohiligana. Motagiha, miyo ddanawona anawedda akala o França atabuwaga sabwa yotanyiwa. Miyo ddanziveliwa oponya mpirha na ayima a anawedda vina ovega na awene. Ottiya ejo, mmani kali wo França, wali wa elabo yo Pólonia. Nona miyo ddantamela mburo wakala attu otene na murenddele vina wahatanyiwa malogo a attu sabwa ya ottiyana wa ttebe.
DDAHIROMA OTANALELA TTIMA YA EGUMI
Mudhidhi walimi munyakoddo
Ddahiwobeliwa okoddoni yaka ya 1957. Jijene edditukuleli okala mmyangoni dho Argélia omattiyu obule wa eddima ologilemi omaromo. Mumalilemi okuwa: “Nabuya Mulugu! Kaddikamihedheni!” Wadha osogorho waga kali munyakoddo wamwiddani, mbwenye yali buru ya mwini! Venevo ddahiloga, eyá! Masiki dhawene nipadduwo nttile—vina ovinga wa koddo dhiddittukulela—wubuwela vaddiddi ttima ya egumi, nona ddahivivuza. Nipadutxeliweni nni? Mulugu ononitanala? Ninofiya nsaka ninakalewo iyo na murenddele?
Mudhidhi dhahi wavumelimi mabasa, baddidhowa wawona amambali aga, ddahimuziwa muttu dhahi wali Monamoona wa Yehova. Iyene wahiddivaha La Sainte Bible, wali Bibilia wa Kapela ya Katolika watapuleliwe na elogelo ya efranses. Veyelelimi o Argélia ddahiroma omwengesa. Nlebo niddiddiginyile murima nali Ovuhulela 21:3, 4. Ninloga dhahi: “Mone numba ya Mulugu eli vari va athu . . . [Iyene] Oner’okuputha muntori bu muntori wa mmentoni mwawa. Kunakale vina okwa, kutho, obulela, segedho.” * Mazu aba ahiddirurumutxa. Miyo ddakala wubuwelavi: ‘Koddi mazu aba bebaribar?’ Nsakanene nttile, miyo kaddaziwa elobwene sabwa ya Mulugu vina Bibilia.
Yaka ya 1959, baddifuruliwe mukoddoni, ddahimuziwa Monamoona wa Yehova mwina wakuweliwa François iyene ohiddisunziha dhibaribari dhinji dha mBibiliani. Motagiha, iyene ohiddilagiha mBibiliani wi nzina na Mulugu ddi Yehova. (Masal. 83:18) Vina ohidditapulelamo wi Mulugu onele odhana oligana velaboni ya vati, onele osaddula elabo bikala Paraizu vina onele wakwanihedha mazu ali va Ovuhulela 21:3, 4.
Masunziho abale ali ebaribari nona ahiddiginya murima waga. Vina ddahiroma osilidheya na asogorheli a marelijiau. Ddafuna ddasumele vowi kasunziha dhilobo dhili mBibiliani! Miyo ddewamo dhawene ninga babani, kaddawodha ovyang’anela nona ddanfuna okosa elobo-txilobo!
François na akwaga ena ali Anamoona a Yehova ahiddikamihedha okala okurumuwa. Awene ahidditapulelamo wi iyo ninga Akritu, mabasa ehu kahiye wakona attu, ottiya ejo ninsunziha miselu dhapama dhinvaha njedhelo ninadhena Omwene wa Mulugu. Aba ba mabasa akosa Yezu vina anittiyedhiye wi nikosege. (Mt. 24:14; Lk. 4:43) Miyo vina ddahona wi ddanfwanyela osunza ologa na attu na mukalelo waderetu vina na ttotto ddihang’anga kapela yawa. Ddifwara eji enloga Bibilia wi: “Mwimeleli wa Nabuya kanfwanyela okala mutota kani; akale woleleya, onedda na athu etene.”—2 Tim. 2:24.
Ddahikosa matxinjo mwigumina mwaga vina ddibatiziwa ninga Monamoona wa Yehova va mutugumanoni wa murudda yaka ya 1959. Wenewo ddihimuziwa murogora wa muzombwe onkuweliwa Angèle, iyene wahiddikoddela vaddiddi. Mudhidhi mwina ddandhowa otugumana mulogo waye nanda nitelilena yaka ya 1960. Iyene txibarene muyana waderetu, wofwaseya vina nvaho wamakamaka oddivahile Yehova.—Gano 19:14.
Labo na matelo ehu
DDIHISUNZA VENJENE NA ATTU A EZIWELO VINA ADHILE VAWALE
Mwa ovira wa mudhidhi, ddihisunza magano amakamaka na abali a eziwelo vina adhile vawale amulabelagavi Mulugu. Nigano namakamaka nisunzilemi ttintti: Nigafuwa wi masaba-mabasavi orutxa ottomeliwehu edde deretu ninofwanyela okala ovyeviha vina nifware nlago nili va Gano 15:22: “Osogorha wa mabasa oli na ovuza zelu.”
Banili mmabasani a weddelela milogo o França, 1965
Yaka ya 1964, ddahiroma wona wakwanihedheya wa malago aba. Yakene ejile ddattomiwe ninga nameddelela milogo. Miyo ddeddelela milogo wi ddalibihe vina ddapamgarhaze abali. Mudhidhene obo miyo ddana vyaka 27 vina dhilobo dhinji kaddaziwa okosawa. Nona ddihivonya vaddiddi. Mbwenye ddihisunza na dhovonya dhaga. Ottiya ejo, ddihisunza malago attima na ‘attu azelu’ vina adhile vawale.
Ddinowubuwela elobo epadduwile varomilemi olaba ninga nameddelela milogo. Mumalelimi weddelela mulogo mmodha wo Paris, mbali mmodha woliba mpadi womuyani wahiddivuza akala enowodheya ologa vehuvene. Ddahimwakula wi: “Kavali makani.”
Mbaliya wahiddivuza: “Louis, ng’anga wosipitale agadhowa vatakulu vamuttu onimudhowelavo anni?”
Ddihakula, “Aredda.”
Iyene ohiloga: “Ebaribari ohakula pama. Mbwenye ddihona wi nyuwo munkala mudhidhi mwinjene na abale ali agumi mpaddi womuyani, ninga motagiha, musogorheli wa mabasa a olaleya wa mulogo. Mmulogoni wehu muhikala abali na arogora enjene ojeyile, ena aswa oku ena attu amanhazo. Awene agahiziveliwa vaddiddi kotamelaga mudhidhi wokala na awena, ngafuna wene mudhidhi mung’onovi obe odhowa oja elobo txilobo na awene.”
Nlago nivahile mbali oddule ttamakamaka txibarene. Okwela waniyena na mabila a Yehova wahiddinginha murima waga. Nona ddahivyeviha vina momaguva-mwene ddahilabihedha yalogeliye. Ddinomutamalela vaddiddi Yehova sabwa yawaziwa abali ninga iyene.
Oromana yaka ya 1969 ofiyedha 1973, ddahittomiwa ninga Musogoreli Wowang’anela Dhoja vamutugumanoni woriganela wakosewe o Colombes, elabo yo Paris. Mutugumano wakosiwe yaka ya 1973, yanfuneya wagawela dhoja attu matxikwi makumatanu na nimodha mwari mwa malabo matanu! Mwebaribari, ddahova. Mbwenye nigano na opembera nafwanyeya va Gano 15:22—wavuza attu a zelu. Venevo ddahitamela malago na abali enjene oliba mpaddi womuyani ana eziwelo yowakwana mpaddi wa dhoja. Ninga: amatadori, anamalima, anamapiya vina anamagula dhoja. Mwebaribari mabasa abale akala ninga orutxa, mbwenye sabwa yoriganela nahakwaniha.
Yaka ya 1973, miyo na mwadhaga nahiwobeliwa olaba mabasa o Beteli yo França. Vina mabasa oroma attomeliwemi wenewale ali orutxa. Ali mabasa owavayedha manivuru abali o Camarões, elabo yo África. Mbwenye elabo ejile, mabasa ehu ankoddihiwa oromana 1970 ofiyedha 1993. Wili, ddahona wi kaddigawodhile wakwaniha mabasa abale. Txino mbali wang’anela mabasaya o França muzinddiyeliye ejuwene, wahiddilibiha alogaga: “Abalihu ankala o Camarões anofuna vaddiddi oja womuyani. Ndowe nasapele!” Jijuwene yakoselihu.
Vamatugumanoni avawoka o Nigéria na Anamoona a Yehova a elabo yo Camarões, 1973
Miyo ddankosa oleddo wa odhowa dhilabo dhaddamanile na maddile o Camarões dila dhinjene, dhawene pawodhimi okosa matugumano na anddimuwa a milogo a elabo ejile. Awene aali abali osaga vina oliba murima, ahiddikamihedha okosa masasanyedho afuneya wi ddivahedhelege o Camarões oja womuyani mudhidhi wotene. Yehova wahiruriha mabasa akosehu. Mwari mwa vyaka 20, abalihu akala elabo ejile, txipo kajombihedhiwe nne Mwang’aneli nne nivuru napakiwa myeri dhotene nakuweliwa Nosso Serviço do Reino.
Yaka ya 1977, miyo na Angèle nahikana gari yoweddelela o Nigéria niveleliwaga na anameddelela miligo o Camarões vamodha na awadhiwa
DDIHISUNZA VENJENE NA MWADHAGA
Oromana weddelelana wehu, ddihona wi Angèle ohikana mikalelo dhapama mpaddi womuyani. Vina wandhowavi alagihaga mikalelelo esi mwigumini mwehu ninga atelani. Txibarene, labo nitelilena iyo, eyene wahiddiloba wi ddikose nlobelo ddikumbiraga efunelo yehu yomulabela Yehova mpaka vanwodhelihu. Yehova wahakula nlobelona.
Angèle vina onoddikamihedhavi venjene omukuluvela Yehova. Motagiha: vawobiliwehu olaba o Beteli yaka ya 1973, miyo ddahitxima vang’onovi vowi ddaziveliwetxa olaba ninga nameddelela milogo. Venevo Angèle wahiddubutxedha wi iyo nihimperekela egumi yehu Yehova. Kigali yamalago ofwaraga mudhidhi wotene ejile enkumbira nikuru naye? (Aheb. 13:17) Na mazu apama ninga aba, ddigalogile elobo gani yina! Venevo nahidhowa Obeteli. Mwari mwa vyaka dhinjene dhilihu vamodha, ddinowagalala vona wi mwadhaga muttu wamalago, wokurumuwa vina woliba omuyani. Eji enolibiha matelo ehu vina enonikamihedha okosa dhogana dhapama.
Na Angèle o Betel yo França
Apa vandhowa iyo banigoluvala, Angèle onodhowanavi ekalelo yaye yokala muteliwi wapama vina onoddikamihedhavi. Motagiha, Dhiskola dhinji dha Omwene dhinkosiwa na elogelo ya Englezi. Sabwa yejuwene, miyo na Angèle ninovilibidhegadha ologa pama Englezi wi nidhowe nakose dhiskola eso. Iyo nihifiyedha omwalela mulogo wa elogelo ya Englezi, masiki nsaka nttile vanihuna vyaka dhokwaranya 70. Sabwa ya mabasa atomeliwemi ninga musogereli wa Filiali yo França, osunza elogelo yina kahiye elobo yovevuwa. Mbwenye miyo na mwadhaga ninila okamihedhana. Ovano apa vanihuna vyaka 80, ninodhowavi nisasanyedhaga matugumano na dhilogelo dhobili, Englezi na Efranses. Vina ninovilibihedha ovaha dhowakula mmatugumanoni vina obudduwa na mulogo mmabasani a olaleya. Yehova onorurihavi guru enkosihu ya osunza Englezi.
Yaka ya 2017 nihakela mareliho menjene. Miyo na Angèle nahakela gari ya okasa Sikola ya Asogoreli a Filiyali na Awadhiwa, enkosiwa o Patterson, Nova York mburo onkuweliwa Centro Educacional da Torre de Vigia.
Yehova txibarene ddi Namasunziha Mundimuwa. (Iza. 30:20) Nona kinttikiniha wawona adhari aye,—azombwe na akalaba—akelaga masunziho attima ahinfwanyeya na attu a mwilaboni! (Olib. 4:5-8) Mwebaribari, ddihona wi azombwe aninvuruwana Yehova vina abali na arogora adhile vawale amulabelaga Mulugu, anowunuwa pama mpaddi w’omuyani vina dhokosa dhawa dhinosogora. Dhahene ninga munlogela Gano 9:9: “Musunzihe muthu wonona, iyene onowenjedhedha onona waye.”
Mudhidhi na mudhidhi, ddinowubelaga omattiyu obule weddima waligimi vari va myango dho Argélia, vyaka 60 mundduni. Miyo nne kaddobuwela dhilobo dhapama dhali osogorho waga. Ddihisunza venjene na attu ena! Yehova ohiddivaha miyo na mwadhaga Angèle egumi yotugareya vina yowagalala. Nona nihigana odhowavi nisunzihiwaga na Babihu wawirimu vina na abali a eziwelo adhile vawale amulabelaga vina amukwelagavi Mulugu.
^ par. 11 Bibilia Malebo Okoddela.
