1-2. Namaleba dhahi ologile nni, nanda txini enasekesere iyo?

MASAKA ABANO attu matxikwi na matxikwi anloga wi anomurumela Yezu, mbwenye kanfwara masunziho aye. (2 Tim. 4:3, 4) Eji enowiwanana na elogile namaleba dhahi: “Kobuwela kowiliwa masaka abano ele okalawo ‘Yezu’ mwina agalogaga vina agakosaga dhilobo dhakakene ninga Yezu webaribari . . . , Nigahimukodda dhahene ninga ekoselihu vyaka matxikwi meli mundduni? . . . Yowakulaya txino egakalile: Ndde, nigahimukodda.”

² Vyaka zana dhoroma attu enjene ahiwa masunziho a Yezu vina ahimona akosaga matikiniho, masiki dhawene ahikodda omuroromela. Sabwaya? Nsunzo nivirile, nihona mwaha minayi dhattukuleli attu okwakwattuwa sabwa ya dhilobo dhilogile vina dhikosile Yezu. Mwari mwa nsunzo ntti ninele osekesera mwaha dhina minayi. Vasogorova ninele wona sabwaya enattukulela attu enjene masaka abano wakodda anamafwara a Yezu, vina enanikamihedhe ohikwakwattuwa.

3. Dhilobo gani dhikosile Yezu dhakwakwattutxile attu enaguwa?

³ Yezu valihe velaboni ya vati, wanandana na attu otene. Yezu wanja na attu ana ettomo, areli, vina anazuzumela ayelegi na attu atabuwa. Ottiya ejo, wanaweddela ttagaraga attu oniwa ninga ‘attegi.’ Abale avihona ninga aligani ankwakwattuwa sabwa ya dhokosa dha Yezu. Awene ahavuza anamafwara aye: ‘Ngani, munjela nni, mummwela nni vamodha na  anamasokiya misoko na attegi?’ Yezu owawakula: “Animunlela ñganga baredda, kaiye agumi. Miyo kaddidhele wawithana athu apama, ddidhele wawobela athegi orugunutxa murima.”—Lk. 5:29-32.

4. Mowiwanana na namavuhulela Izaiya, Ayuda egajedheli nni sabwa ya Mesiya?

⁴ Txini enloga malebo? Yezu ahinadha, namavuhulela Izaiya wahileba wi iyene agahikoddiwa na attu a mwilaboni. Nivuhulo nilebiliye naloga: ‘Iyene opwaziwa, orabeliwa na attu . . . Woniwa ninga muttu oní ogamona bupiba omentoni. Ohitanyiwa vina koniwa ninga elo.’ (Iza. 53:3) Ninga munlogela nivuhulo na Izaiya, Mesiya agahirabeliwa ‘na attu.’ Nona Ayuda a vyaka zana dhoroma agahiziwa wi Yezu agahipwaziwa.

5. Attu enjene masaka abano anawona dhavi anamafwara a Yezu?

⁵ Ninohona makattamiho akakene masaka abano? Ndde. Asogoreli enjene a marelijiau mmakapela mwewa anazuzumeletxa areli, attu a ettomo, na abale anoniwa ninga aziwitxi. Awene anokosa ejuwene masiki akala attuya abo dhinkosani kadhiniwanana na magano a Mulugu. Asogoreli aba anowapwaza adhari a Yehova. Masiki akalaga attu ovilibihedha, anfwara malamulo a Yehova, kanvahiwa ttima na attu a mwilaboni. Paulu ohiloga, Mulugu onowasakula “athu opwaziwa.” (1 Kor. 1:26-29) Yehova onowavaha ttima alabeli aye ororomeleya otene.

6. Ninawodhe dhavi otagiha mukalelo otonyihedhi Yezu, onfwanyeya va Mateu 11:25, 26?

⁶ Txini enfwanyelela iyo okosa wi ninakwakwattuwe? (Kengesa Mateu 11:25, 26.) Kunyegenttiwe na dhologa dha attu a mwilaboni mwaha wa nlogo na Mulugu. Kudduwale wi Yehova onalabihedha attu oviyeviha wi akose efunelo yaye. (Masal. 138:6) Vina kobuwela dhilobo dhiwodhile okosa Yehova alabihedhaga attu anoniwa na elabo ninga kedhi elo obe ahisunzile.

7. Txini yamuttukuleli Yezu wakuwela Afarizi agwaragwambi, nanda awene ewalemo dhavi?

⁷ Yezu wahakona anddimuwa a marelijiau sabwa yohasunziha attu mukalelo waderetu womwebedha Yehova. Motagiha, iyene owakuwela Afarizi agwaragwambi vowi awane azuzumela mukalelo wa onawa mada ottiya wavaha ttima amambalawa. (Mt. 15:1-11) Txino anamafwara a Yezu ahitikina sabwa ya mazu aye. Mwa dhawene, awene ahinvuza: ‘Muhona wi Afarizi mwiwalani mazu enyu akwakwattuwa?’ Yezu ohawakula: “Muri bu muri ohitibelile Babaga oli wirimu, onothuliwa. Kamwatanale: aboyá aliba ohona anaweddiha aliba ohona akwawa. Muliba ohona onimweddiha muliba ohona mukwaye, obiliyá anogwela munlejeni.” (Mt. 15:12-14) Masiki vanyimuwile anddimuwa a marelijiau sabwa ya dhilobo dhalogile Yezu, iyene kattiyile ologa ebaribari.

8. Yezu wonihile dhavi wi Mulugu kanrumela masunziho a marelijiau otene?

⁸ Yezu ohivitula masunziyo ottambi a marelijiau. Iyene kakamihedha mubuwelo wa wi Mulugu onorumela masunziho a marelijiau otene. Nona, iyene wahiloga wi attu enjene agahedda dila enddimuwa enttukulela wutolotxiwani nanda attu ang’onovi agahedda dila yoyeva enattukulela ofwanya egumi. (Mt. 7:13, 14) Yezu vina wahoniha wila attu ena agahikala ninga animulabela Mulugu, oku mwebaribari ahimulabelaga. Iyene ohiloga: “Txenjerhani na anamavuhulela awota, anususelani na makalelo a nibila; oku mmirimani mwawa puli makalelo a mwinji. Munowaziwa monaga merelo awa.”—Mt. 7:15-20.

9. Masunziho gani a marelijiau ottambi avitulile Yezu?

 ⁹ Txini enloga Malebo? Bibilia wahittaga ologa wi ozuzumela numba ya Yehova egahimulaliha Mesiya. (Masal. 69:9; Jo. 2:14-17) Wali ozuzumela-wene oku wamuttukuleli Yezu ovitula mansunziho vina merelo onyegentta a marelijiau. Motagiha, Afarizi anrumela wi muzimu kunkwa, mbenye Yezu ohisunziha wi akwile anogona. (Jo. 11:11) Asaduseyi karumela ovenyihiwa mukwani, mbwenye Yezu wahinvenyiha mukwaye Lazaro mukwani. (Jo. 11:43, 44; Mer. 23:8) Afarizi anloga wi dhotedhene dimpadduwa ompaddutxa ddi Mulugu obe distinu, mbwenye Yezu wahisunziha wi muttu-muttu okana ofuru wosakula omwebedha Mulugu obe nne.—Mt. 11:28.

10. Attu owinjiva ankwakwattuwelani na masunziho ehu?

¹⁰ Ninowona makattamiho akakene masaka abano? Ndde. Attu enjene anokwakwattuwa nigatonyihedhaga mBibiliani wi masunziho mena a marelijiau bottambi. Motagiha, anddimuwa a makapela anosunziha wi Mulugu onowatabutxa attu omottoni. Awene anolabihedha masunziho aba ottambi wila awag’anelege attu. Mbwenye abale animulabela Yehova, Mulugu wokwela, anowasunziha attu wi oko ottambi. Anddimuwa amarelijiau anosunziha vina wi muzimu kunkwa. Iyo ninowatonyihedha wi masunziho abo bottambi kanfwanyeya mBibiliani. Akala txibarene muzimu kunkwa, kigafuneyile attu ovenyihiwa mukwani. Oku marelijiau asunzihaga wi distinu enoweddiha egumi yehu, iyo ninosunziha wi muttu-muttu okana ofuru wosakula vina ogana akala onofuna omulabela Mulugu obe nne. Anddimuwa a marelijiau anonamo dhavi masunziho ehu? Ankala osilidhi-wene!

11. Mowiwanana na mazu a Yezu anfwanyeya va Joau 8:45-47, txini enjedhela Yehova mwa alabeli aye?

¹¹ Ninfwanyelela okosa nni wi ninakwakwattuwe? Akala iyo txibarene ninokwela ebaribari, ninofwanyelela orumela dhinloga Mulugu. (Kengesa Joau 8:45-47.) Kanili ninga Satana Diabo, ohili mwibaribarini. Iyo txipo kaninkosa elobo ehiniwanana na dhinrumelihu.  (Jo. 8:44) Mulugu onfuna wi alabeli aye ‘attawe obure’ vina “eddegenavi opama na ntidi” dhahene ninga mukoseli Yezu.—Rom. 12:9; Aheb. 1:9.

12. Mukalelo okwile Yezu wakwakwattutxelini Ayuda enjene?

¹² Mwaha mwina wakwakwattutxile Ayuda nsaka na Yezu buvi? Paulo ohiloga: ‘Oku iyo nimulaleyaga Kristu okomeliwe vapingirhizini, masuziho aba anowakwakwattutxa Ayuda.’ (1 Kor. 1:23) Ayuda enjene asilidheliwani na mukalelo okwile Yezu? Mwa awene sabwa ya Yezu okwa vapingirhizini yakala ninga iyene wali timbwini vina muttegi, ottiya Mesiya.—Olib. 21:22, 23.

13. Abale akwakwattuhile sabwa ya Yezu elobo gani ehitanalelani?

¹³ Ayuda akwakwattuwile, katanaleli dhibaribari dhotene ninga: ohikana muladdu wa Yezu, omagedhiwa dhilobo dhihikosiliye vina oheddihiwa na oligana. Abale amuttongile Yezu katamelile oziwa ebaribariya. Awene ahitugumana momaguva wila amuttonge Yezu vina kafwarile malamulo attongiwana miladdu masaka abale. (Lk. 22:54; Jo. 18:24) Anamattongaya kohikana nsakulano agahipima dhamagedheliwa Yezu, ottiya ejo awene antamela ‘y’ommagedhana wi awodhe onfwanyana muladdu wompihana.’ Vonilani wi kahodhile omukosana yanfunanina, namakutta munddimuwa ohitamela omulogiha Yezu elobo egadhile omukona. Dhikosilani kadhewanana na malamulo a masaka abale. (Mt. 26:59; Mk. 14:55-64) Masiki Yezu mumaliliye ovenyihiwa mukwani, anamattonga abale andhowavi amweddiyaga n’ohiligana awene ahipitxa “muthengo munddimuwa wa kobiri” wi afugena mulomo anyakoddo akadda Roma ang’anela ekutta mwekiwe Yezu wila alaleye ottambi wawi maningo a Yezu alo wiyiwa.—Mt. 28:11-15.

14. Malebo attagile ologa eni sabwa ya okwa wa Mesiya?

¹⁴ Txini enloga Malebo? Ayuda enjene a nsaka na Yezu obuwela wi Mesiya kafwanyela okwa, ovano katanalela dhattagile  ologa Malebo: “Ovilevela mwinyene opiwa, orumela otaganyihiwa na atimbwini, avipwathelihaga miladdu dha athu enjene, oalogela aliba oddawa.” (Iza. 53:12) Nona Ayuda kana mwaha wa okwakwattuwa, mukweli Yezu ninga muttegi.

15. Dhilobo gani dhimagedheliwe Anamoona a Yohova dhidhile wakwakwattutxa attu ena?

¹⁵ Ninowona makattamiho akakene masaka abano? Ndde. Yezu wahimagedhiwa vina wahittongeliwa muladdu wahakosiliye, yakakene enopadduwa na Anamoona a Yehova masaka abano. Kona dhotagiha dhing’onovi. Elabo ya Estados Unidos yaka ya 1930 mpaka 1940, nlogo na Mulugu nahidhowa dila dhinjene omuttegoni wi amelele ofuru wawa wa omwebedha Mulugu. Anamattonga ena annoniha-wene wi kaziveliwa na iyo. Elabo ya Canadá, kwatti ya Quebec, Anakapela na Alamuleli a elobo ejile ahilaba vamodha wi agomihe mabasa ehu. Anamalaleya enjene ahifugeliwa sabwa ya wasunziha anamwanddamani awa Omwene wa Mulugu. O Alemanha, azombwe ejene ororomeleya ahipiwa na akadda nazista. Masaka abano, abali enjene ahifugeliwa mwaha wologa makani a mBibiliani abuwene anoniwa ninga “estremista.” Bibilia Tradução do Novo Mundo wa elogelo ya Russo ohikoddihiwa oniwaga ninga “epano ya estremista,” sabwa yofwanyeyamo nzina na Yehova.

16. Mowiwanana na 1 Joau 4:1, sabwaya jani ehifwanyelihu onyengetteya na dhozivala dhinlogiwa mwaha wa nlogo na Yehova?

¹⁶ Ninfwanyelela okosa nni wi ninakwakwattuwe? Osunza ebaribari ya makaniya. Diskursu ya Vamwangoni ekosile Yezu, ohiloga wi anamafwara aye ‘agahimagedhiwa dhotakala dhinjene’ mwaha waye. (Mt. 5:11) Dhotambi dhotene dhinda wa Satana. Iyene onowakwekwetta asadduweli wi amwadhe dhottambi mwaha wa abale ankwela ebaribari. (Ovuh. 12:9, 10) Iyo kaninfwanyela ovuruwana dhottambi dhinloga asadduweli. Txipo kanittiye wi dhottambi esi dhinitxutxe obe dhobanihe nroromelo nehu.—Kengesa 1 Joau 4:1.

17. Dhilobo dhipadduwile Yezu ahinakwa dhattukuleli dhavi attu ena okwakwattuwa?

¹⁷ Ahalagawo malabo mang’onovi wi Yezu akwe, mwa arumiwi aye 12 mmodha wahimuguliya. Murumiwi mwina omukodda dila ttaru vina omattiyu womariha ahinakwa otena ahimuttawa. (Mt. 26:14-16, 47, 56, 75) Yezu katikinile. Vowi iyene wahittaga ologa wi ejile egahimpadduwela. (Jo. 6:64; 13:21, 26, 38; 16:32) Mwa wona mapadduwo aba, txino ogahattukulela attu ena okwakwattuwa obuwelaga: ‘Akala arumiwi a Yezu ahikosa ejuwene, miyo kaddinfuna okosa mpaddi wa nikuru nawa!’

18. Mavuhulo gani amalile wakwanihedheya Yezu ahinatti okwa?

¹⁸ Txini enloga Malebo? Vyaka dhinji mundduni, Yehova wahivuhulela mu Nzuni naye wi Mesiya agahigulihiwa na kobiri makumararu dha parata. (Zak. 11:12, 13) Agamugulihile Yezu agakalile marho waye wofihedheya. (Masal. 41:9) Namavuhulela Zakariya wahileba: ‘Onvoreye mukumbuzi wi mabila abalaleye.’ (Zak. 13:7) Ole wana murima womyala, kagakwakwattuwile na dhopadduwa esi ottiya ejo, nroromelo naye nigahivadda mwaha wa wona mavuhulo aba akwanihedheyaga mwa Yezu.

19. Txini enziwa attu abale ovyeviha?

¹⁹ Ninowona makattamiho akakene masaka abano? Ndde. Masaka abano Anamoona ena a Yehova oziweya deretu, ahittiya ebaribari bakala asadduweli nanda anotamela wapupurutxa ena. Awene anowalogela bure Anamoona a Yehova vina anowazivalela ankosa esuwene alabihedhaga TV, maradio vina majornal. Mbwenye attu abale ovyeviha kankwakwattuwa na esuwene. Ottiya ejo, awene anoziwa wi Bibilia wahibaza ologa wila ena agahikala asadduweli.—Mt. 24:24; 2 Ped. 2:18-22.

20. Txini enanikamihedhe orabela okwakwattuwa sabwa y’abale anttiya ebaribari? (2 Timóteo 4:4, 5)

 ²⁰ Ninfwanyelela okosa nni wi ninakwakwattuwe? Ninofwanyela ovaddihavi nroromelo nehu, wi ejo epadduwe japama osunzaga malabo etene, olobela mudhidhi wotene, vina odhowaganavi mabasa anivahile Yehova. (Kengesa 2 Timóteo 4:4, 5.) Nigakana nroromelo noliba, kaninattiddiwe wova nigewa miselu dhabure. (Iza. 28:16) Omukwela wehu Yehova, Nzu naye vina abali na arogora, onele onikamihedha ohikwakwattuwa sabwa ya abale anttiya ebaribari.

21. Masiki attu enjene akoddaga wiwa miselu dhinlaleyihu, ninfwanyela okana ebaribari gani?

²¹ Nsaka na Yezu, enjene ahikwakwattuwa vina ahimukodda. Masiki dhawene, attu ena ahimurumela. Mwa abuwene amurumelile wahikalavo musogorheli mmodha w’abale alaba mMuttegoni wo’Judeya vina ‘anamakutta enjene.’ (Mer. 6:7; Mt. 27:57-60; Mk. 15:43) Masaka abano enopadduwa yakakene, attu matxikwi na matxikwi kanttiya okwakwattuwa na elobo-txilobo. Sabwaya? Sabwani awene anoziwa vina anokwela dhibaribari dhili Mmaleboni. Nzu na Mulugu ninloga: ‘Ankwela malamulo enyu anokana murenddele munddimuwa, kuli elo enwodha wakwakwattutxa.’—Masal. 119:165.