1. Yotagiha gani yattiyedhi Yezu anamafwara aye, nanda awene afwarile dhavi? (Kang’ana foto ya kapa.)

YEZU bali velaboni ya vati, wahikana monelo wofwanyelela sabwa ya mabasa a olaleya vina wafuna wi anamafwara aye akanevi monelo wakakene. (Jo. 4:35, 36) Mudhidhi wotene walani na Yezu, anamafwara aye anvingela mabasa olaleya. (Lk. 10:1, 5-11, 17) Mbwenye mmaleli Yezu otxedhiwa ofiyedha opiwa, mudhidhi mung’onovi anamafwara aye ahitowiwa wagalala wa olaleya miselu dhapama. (Jo. 16:32) Mumaleli Yezu ovenyihiwa mukwani, wahakokomeza wi awene anfwanyela ozuzumela mabasa a olaleya. Nona mwiyeleli Yezu wirimu, anamafwara aye ahiroma olaleya na ntidi ofiyedha amwiddani awa ologa dhahi: “Nyuwo muhidhaliha mu Jeruzalemi mwetemwene masunziho enyu abo.”—Mer. 5:28.

2. Yehova orurihile dhavi mabasa a olaleya?

² Yezu wahisogorela mabasa a olaleya akosa Akristu oroma, nanda Yehova wahiruriha mabasaya vowi attu enjene ahirumela muttaka wapama. Ninga motagiha, va Pentekosteni wa 33 N.K., vahibatiziwa attu matxikwi mararu. (Mer. 2:41) Vina muttengo wa anamafwara waninjivavi venjene. (Mer. 6:7) Yezu wahibaza ologa wi mabasa aba a olaleya agahinjiva venjene makamaka masaka abano omariha.—Jo. 14:12; Mer. 1:8.

3-4. Dhipaddi dhina dha elabo enrutxelani olaleya, nanda txini enasunzehu mwari mwa nsunzo ntti?

³ Iyo notene ninotamela ovilibihedha wi nikane monelo wofwanyelela mmabasani a olaleya. Dhipaddi dhina dha elabo okosa ejo kinrutxa. Sabwaya? Sabwani attu enjene ahikana efunelo y’omusunza Bibilia ena anomujedhelaga Munamoona  wa Yehova womala na-wale wi asunzihe Bibilia! Oku dhipaddi dhina dha elabo, anamalaleya anorutxiwaga olaleya; vowi attuya kankaletxa mmatakulu agakalamo kanfuna wiwa miselu dha Bibilia.

⁴ Akala weyo onkala mmuruddani munrutxa olaleya, malago anfwayeya mwari mwa nsunzo ntti anele wukamihedha. Ninele wona enkosa abali ena wi awodhe walaleya attu enjene. Vina ninele wono mukalelo onawodhihu okanavi monelo wofwanyelela, akala attuya anovuruwana miselu dhinlaleyihu obe kanvuruwana.

5. Anamoona a Yehova enjene angumanana makattamiho gani?

⁵ Anamoona a Yehova enjene anodhowa arutxiwagavi wafwanya attu mmatakulu mwawa. Anamalaleya ena ankala mmuruddani muli nyumba dhobareleya dhinalugarihiwa obe maperediyu muhinfiyiwa burebure. Txino mwag’aneliya wa vamusuwo onomukoddiha muttu-muttuvi ovolowamo ahiwobiwe na abaleya ankalamo. Anamalaleya ena anowodha olaleya se makani nyumba na nyumba mbwenye kanafwanyamo anamuralaya. Oku ena anlaleya muttemba obe mirudda munkala attu ang’onovi. Awene anokosa oleddo wolapela vaddiddi wila amulaleye ngafuna muttu mmodha—masaka mena kaninfwanya! Akala weyo onogumanana makattamiho akakene kalela ntidi. Txini enaukamidhe ovilela vina owodha walaleya attu enjene?

6. Anamalaleya ali dhavi ninga anamattadda?

⁶ Yezu ohiladdaniha mabasa a olaleya na mabasa a namattadda. (Mk. 1:17) Anamattadda ena anomala malabwene ahigumelaga oba. Mbwenye awene anodidelavi vina anotamela marhe mena. Awene anotxinja mudhidhi wodhowa, mburoya, vina mukaleloya wa ottadda. Iyo ninofwanyela ofwara marhe akakene mmabasani mwehu a olaleya. Ovano ninfuna none tharho esi dhinfwanyelihu otagiha.

7. Nigalaleyega midhidhi dhottiyana, yodhelavoya enakale evi?

⁷ Katamela wafwanya attuya modhela odhowa mudhidhi wottiyana. Iyo ninele owodha walaleya attu enjene txino nigadhowa mudhidhi onkalani vatakulu. Vowi masiki attu edde dhavi, ohikala mudhidhi oniyelelani vatakulu! Anamalaleya enjene anwodha wafwanya attu mmatakulo mwawa ogadhowa olaleya mudhidhi wa mutana obe txiguwo. Ottiya ejo, mudhidhene obo anamuralaya ankala ofwaseyene vina anologeyana makani. Txino onele oziveliwa monelo ovahile munddimuwa wa mulogo onkuweliwa David. Iyene ologile wi agamala olaleya mmuruddani na mukwaye, anowiyelela nyumba esile muhafwanyilani attu. Ohenjedhedha: “Eji enonagalaliha venjene vowi nigeyelela wili ninowafwanyamo-wene anamuralaya.” *

8. Nigakala mmabasani a olaleya ninalabihedhe dhavi enloga nlebo na Kohelét 11:6?

⁸ Ninofwanyela okalela ntidi. Jijuwene ennikokomeza nlebo na mutoma wehu wa nsunzo. (Kengesa Kohelét 11:6.) David ologiwe mundduni, kafunyile myono. Mweddiliye nyumba dhinjene ahafwanyagamo anyaya, omamalelowa wahidha onfwanya mwanamurala mmodha. Mwanamuralaya wahikana efunelo ya omusunza Bibilia vina wahiloga dhahi, “Miyo ddinkala veneva na eji vyaka tanu na ttaru txipo kaddinakopeleliwaga na Anamoona a Yehova.” David bela dhahi, “Omamalelowa ddihizinddiyela wi  ningafwanya mwanamurala vatakulu iyene onokana efunelo ya ovuruwana muselu onlalelihu.”

9. Anamalaleya ena ankosa eni agoona wila jorutxa wafwanya attu mmatakulu?

⁹ Katagiha olalelya mburo wottiyana. Anamalaleya ena agoona wi enurutxa wafwanya anamurala mmatakulu, anotagiha olaleya mimburo dhina dhottiyana. Ninga motagiha, olaleya vattaddo obe na karinya onowaweddela pama. Na mukalelo-wene obo panwodhani walaleya abale ankala mmaperediyuni vina abale agarutxile wafwanyawa. Anamalaleya enjene ahizinddiyela wi attu anafwanyani mmaparageni, mmaferani na mimburo dhina munkosiwa marondda ali omala nawale wila anivuruwane vina akele manivuru ehu. Floiran, nameddelela milogo onkala elabo y’o Bolivia ohiloga: “Iyo nindowa oferani vina mpule munkosiwa marondda mudhidhi wa mutana obe wa txiguyo. Mudhidhi obu anamagulihaya kankanetxa dhokosa. Venevo ninowodha okana makani apama mpaka wita nsunzo na Bibilia.”

10. Marhe gani enawodhiwe olabihedha wi wafwanye attu?

¹⁰ Katagiha olaleya na mukalelo mwina. Kobuwela wi weyo ohatamela attu na mukalelo wottiyana-ttiyana. Vina ohaweddela mmatakulu mwawa midhidhi dhottiyana-ttiyana mbwenye kuwafwanyile. Ohikala mukalelo mwina onawodhiwe wafwanya attuya abo? Murogora onkuweliwa Katarina ohiloga dhahi: “Miyo ddikana elemelelo ya walebela makarta abale ahinafwanyimi mmatakulu mwawa, mukartanimwa ddinologaga wi ddigahiziveliwa  ogumana na awene wi ddilogena.” Ninsunzavo nni na yotagiha eji? Mudhidhi onkaliwe mmalaleyoni katamela ologa na otene anafwanyiwe mmuruddanimwa egarutxa katamela marhe mena.

11. Sabwaya jani attu ena kanfuna ovuruwana miselu dhinlaleyihu?

¹¹ Attu ena kanfuna ovuruwana miselu dhehu. Awene anubuwela wila kili yofuneya osunza sabwa ya Bibilia obe ya Mulugu. Sabwa ya wona makattamiho owinjiva mwilaboni, eji enowattukulela ohimurumela Mulugu. Awene kana efunelo ya omusunza Bibilia, sabwani anowawona asogoreli a marelijiau anloga wi anonfwara Bibilia oku akosaga dhilobo dhabure. Attu ena anzuzumela mabasa awa, amudhawa, obe makattamiho awa vina kanubuwela wi Bibilia onowodha wakamihedha. Ninakose eni wila nihirimeliwe wagalala masiki akala attu ena kanfuna ovuruwana obe kanvaha ttima miselu dhinlaleya iyo?

12. Nigakala mmabasani a olaleya ninalabihedhe dhavi nlago nili va Filipi 2:4?

¹² Kalagiha wi onowazuzumela. Attu enji omaromo kaana efunelo ya wiwa miselu dhapama, monilani wi txibarene iyo ninowatanala atxinja mubuwelo wawa. (Kengesa Filipi 2:4.) Motagiha, David oromoliwe omaromo ologile dhahi: “Muttu agaloga wi kanfuna onivuruwana, ninomukoya Bibilia wehu na manivuru ehu, novenya iyo onvuza dhahi: ‘Ddigahiziveliwa oziwa enuttukulela ologa dhawene.’” Attu anowodha ozinddiyela akala muttu onowatanala. Awene txino anodha ohubuwela dhilogilihu, mbwenye anodhaga wubuwela mukalelo waweddihilihu na oriheya. Masiki akala munamuralaya kanittiya ologa elobwene, ninele olagiha wila ninomutanala sabwa ya mukalelo onkala kove yehu.

13. Ninawodhe dhavi osaddulela muselu onlaleyehu mowiwanana na dhojombeliwa vina dhofuna dha anamuralaya?

¹³ Iyo ninolagiha wi ninowazuzumela attu mwa osaddulela muselu onlaleyehu niwananihaga na dhojombeliwa vina dhofuna dhawa. Motagiha, vatakuluva vanowoneya ezinddiyelo enlagiha wi vahikala aima? Abale ali amambali txino anoziveliwa magano a Bibilia anloga mukalelo wawalela aima vina okana wagalala vamuralani. Vatakuluva ninowonavo kaddiyaddo dhowinjiva dhinfugiwana misuwo? Akala ninowona, iyo txino ninosakula ologa sabwa ya winjiva wa opanga vina mukalelo anattiyani attu owovene. Txino mwanamuralaya onele wagalala agaziwa wi nalabona makattamiho abo  anele ogoma. Mudhidhi wotene oninfwanyiwe muttu ontonyihedha efunelu, katamela omunonihedhamo mukalelo onamukamihedhe malago a Bibilia. Katarína, oromoliwe omaromo ohiloga: “Miyo ddinowubuwela mukalelo otxinjile ebaribari egumi yaga.” Dahene, Katarína onowodha ologa na ovikoma, vina abale aninvuruwana anoziwa ejuwene.

14. Mowiwanana na Gano 27:17, abali andowa vamodha omalaleyoni anawodhe dhavi okamihedhana?

¹⁴ Kapura nikamihedho na attu ena. Murumiwe Paulo wahimuswagiha Timóteo mukalelo wa olaleya na osunziha. Vina wahimukokomeza olabihedha marhe asunziliye wila akamihedhe attu ena. (1 Kor. 4:17) Dhahene ninga Timóteo, enowodheya osunza venjene na abalihu ana ewodhelo mmulogoni. (Kengesa Gano 27:17.) Koona yotagiha ya mbali onkuweliwa Shawn. Iyene wahilaba ninga pionero mudhidhi mug’onovi muttemba, attuya wenewo anziveliwana kapela yawa. Iyene owodhile dhavi okanavi wagalala mmabasani a olaleya? Shawn ohiloga: “Egawodheya ddandhowa omalaleyoni na mbali mwina.” Iyene ohejedhedha “Nadhowaga numba yina nampura mudhidhiya wi nikamihedhena muttu na mukwaye wunuwiha ewodhelo ya osunziha. Motagiha, iyo nanloga mukalelo weddile makani numba yalihu. Ejo yannikamihedha wona vafwanyelihu ottiyaniha makani afunihu ologa numba yafwarela.”

15. Olobela okalelini elobo yamakamaka mmabasani ehu a olaleya?

¹⁵ Kalobela okumbirhaga nikamihedho na Yehova. Mudhidhi ondowa weyo omalaleyoni omukumbire Yehova wi oweddihe. Kawo muttu onwodha okosa elobo txilobo omalaleyoni se nikamihedho na muya wokoddela wa Mulugu. (Masal. 127:1; Lk. 11:13) Ogalobelaga okumbirhaga nikamihedho, ologe enfuniwe. Motagiha, kamukumbire Yehova wi awukamihedhe onfwanya muttu onfuna wiwa miselu dhehu vina osunza mwaha waye. Kakosa mpaddi wawo vina ovilibihedhe ologa na attu otene anafwanyiwe.

16. Okana nsunzo nomwinya ninikamihedha dhavi mmabasani a olaleya?

¹⁶ Katamela mudhidhi wokosa nsunzo nomwinya. Nzu na Mulugu ninloga wi Mukristu onofwanyela ‘ononelamo eninfunana Mulugu, eli yapama, enimuzivela, eli yawakwana.’ (Rom. 12:2) Nigamusunzaga Bibilia ninomuziwa Yehova venjene. Nigalaleyaga mwaha wa Yehova attu anowodha wona wi ninororomela esile dhinsunziyihu. Katarina oromoliwe mundduni ohiloga: “Mudhidhi mug’onovi mundduni miyo ddahona wi ddanfwanyelela wenjedhedha nroromelo naga na masunziho oroma. Nona ddahigilatela osunza dhilobo dhinoniha wila okalawo Mpaddutxi, wi Bibilia txibarene Nzu na Mulugu vina wila Mulugu okana nlogo naye masaka abano ninimwimelela.” Katarina bela, okaana nsunzo nomwinya nihivaddiha nroromelo naye vina ohenjedhedha wagalala waye mmalaleyoni.

17. Sabwaya jani Yezu wahikanavi monelo wofwanyelela mmabasani a omwene?

¹⁷ Enaya kafunile ovuruwana miselu dhalaleya Yezu. Masiki dhawene iyene wahikanavi monelo wofwanyelela na mabasa a olaleya. Sabwaya? Sabwani iyene wanziwa wi attu enjene agahikana efunelo yosunza ebaribari nona wahigana wafiyedhana attu owinjiva muselu wa Omwene. Iyene wanziwa wi enagu omaromo kagatonyihedhile efunelo, mbwenye musugurhomwa agahidha orumela. Koona epadduwile na anamudhi a Yezu. Iyene olaleya mwari mwa vyaka tharu na jiddiga  mbwenye nne mmodha wa abalaye wahirumela okala namafwara waye. (Jo. 7:5) Mbwenye vavenyihiwe Yezu awene ahidha omurumela okala anamafwara waye.—Mer. 1:14.

18. Ninfwanyelelani odhowavi banigalaleya?

¹⁸ Iyo kaninziwa bani anakale mulabeli wa Yehova. Attu ena anottukula mudhidhi mwinjene wi asunze ebaribari. Masiki abale ahinfuna vamaromo onivuruwana, agoona mweddelo wehu wapama vina dhowira dhehu anoroma ‘omuttittimiha Mulugu.’—1 Ped. 2:12.

19. Mowiwanana na 1 Korinto 3:6, 7 txini enfwanyelihu oziwa?

¹⁹ Iyo ninowala vina ninohelela manje, mbwenye ninoziwa wi Yehova ddina mpaddi wattima mmabasani a olaleya. (Kengesa 1 Korinto 3:6, 7.) Mbali Getahun onlabela elabo y’o Etiópia, ohiloga dhahi: “Murudda okalile miyo okwaranya vyaka 20 walabiwe vang’onovi vina Munamoonaya wa Yehova walimo ddi miyo bahi. Ovano nilimo anamalaleya 14. Kumi na araru ahibatiziwa, otaganyiha na mwadhaga vina anihu araru. Attu owakwana 32 anowona matugumano ehu.” Getahun onowagalala sabwa ya omujedhela Yehova n’ovilela wi aakamihedhe attu ena okosa mpaddi wa nikuru naye!—Jo. 6:44.

20. Ninlogela nni wi iyo nili ninga nikuru novuna dhigumi?

²⁰ Vamentoni va Yehova, attu otena battima. Iyene ohinivaha mabasa a olaba na Mwanaye owagumaniha attu a malogo otene omagomo wa elabo ejino ohinafiya. (Ajeu 2:7) Mabasa ehu a olaleya anoladdanihiwa na nikuru novuna dhigumi. Nanda iyo nili ninga nikuru nirumiwe wi natamele attu akuttuwile na mwanddiya. Txino attu ena ankosa mpaddi wa nikuru anowodha onvuna muttu mmodha, mbwenye mabasa ankosa attu otene bamakamaka. Mmabasani mwehu a olaleya enopadduwa yakakene. Iyo kaninziwa bani onawodhe onvuna muttu mwilaboni mpu ya Satana. Enziwehu jowi Yehova onowodha omulabihedha muttu-muttu wa iyo. Andreas onkala elabo y’o Bolívia, ohiloga: “Muttu-muttuvi onsunza ebaribari ya Bibilia ofiyedha obatiziwa, ddinoziwa wi eji epadduweli sabwa y’okala mabasa origanela.” Ninofwanyela wonaga mabasa ehu a olaleleya na mukalelo wakakene. Nigakosa dhawene, Yehova onele oniruriha vina mabasa ehu a olaleya anele okala ohagalaliha.