MURUMIWI Paulo wahimukokomeza muzombwe Timóteo dhahi: puliha mabasawo attomeliwiwe. (2 Tim. 4:5) Iyo notene ninofwanyela ovaha ttima ejile elogile Paulo. Mbwenye ninogumanana dhorutxa. Mwa abalihu enjene, odhowa mmabasani a olaleya enofuneya oliba murima. (2 Tim. 4:2) Ninga motagiha karoma wawubuwela abalihu ankala dhilabo dhifugiwe mabasa ehu obe dhinkoddihiwa olaleya. Awene anodhowavi alaleyaga masiki aziwaga wi agattiddiwa anofugeliwa!

1-2. Makattamiho gani angumanana abali enjene?

² Nlogo na Yehova ninowanana makattamiho menjene anattukulela okala okumuwene. Motagiha, abali ena anolaba venjene wi asapele amudhawa. Awene anokana efunelo y’olaba venjene mmabasani a olaleya mbwenye agafiya omamalelo wa sumana ankala olemene. Ena anotabuwa na eredda ehiniwa murobwe obe makattamiho a wuluvala. Masaka mena kanwodha obudduwa vatakulu, nona kanwodha okosa venjene mmabasani a olaleya ninga mwafunelani. Ahikalawo ena antabuwa na dhubuwelo dhohifwanyela, anivyona ninga kana ttima vamentoni va Yehova. Mary, * onkala elabo y’ Oriente médio, ohiloga: “Owanana dhubuwelo dhohifwanyela enoddittiya wokumuwene, nona ddinofwanyela ovilibihedha. Ddinovipwattelihaga muladdu, vowi mudhidhi na guru onongemi ddiwanagana makattamiho aga, bubuwene ogalabihedhilemi mmabasani a olaleya.”

3. Txini enfuna iyo wona mwari mwa nsunzo ntti?

³ Masiki nigumanagana makattamiho menjene, Yehova ohilibela onivaha guru. Ottiya onikamihedha owanana makattamiho ehu, iyene ononikamihedha vina olabihedha guru dhehu mmabasani animukoselihu. Mwari mwa nsunzo ntti, ninele wona mukalelo onnikamihedha Yehova nigagumanagana dhorutxa. Mbwenye vamaromo, ninele wona mukalelo omukamihedhiliye  Paulo na Timótio owanana makattamiho vina okosa mabasa awa a olaleya.

4. Makattamiho gani agumanilena Paulo?

⁴ Paulo ogumanana makattamiho menji. Iyene wanfuna guru makamaka mudhidhi watabutxiwiye, wasosottiwiye vina vafugeliwiye mukambura. (2 Kor. 11:23-25) Paulo vina wahirumela wi wanwanana dhubuwelo dhohifwanyela. (Rom. 7:18, 19, 24) Ottiya ejo, iyene wanvilela makattamiho akala ninga ‘mwinga wali mmaningoni mwaye.’ Mwa mudhidhi mwina, ohimuloba Mulugu wi akutxemo mwingaya.—2 Kor. 12:7, 8.

5. Masiki na makattamiho, Paulo owodhile okosa nni?

⁵ Masiki na makattamiho otene agumaniliyena, Yehova wahinvaha guru Paulo sabwa ya ejuwene, iyene wahiwodha okosa mabasa aye a olaleya. Kona ewodhile okosa Paulo. Wahikalawo mudhidhi wahawodha iyene obudduwa vatakulu, motagiha, mudhidhi wafugeliweye—vatakuluvaye—o’Roma. (Mer. 28:17; Fil. 4:21, 22) Masiki dhawene, iyene wanwodha walaleyela miselu dhapama alamuleli, ang’aneli vina abale adhowa omona. (Mer. 28:30, 31; Fil. 1:13) Bu mudhidhene obu olebiliye makarta aye, ba makarta abuwenevi anlabihedha Akristu a ebaribari masaka abano. Ottiya ejo, Paulo wali yotagiha yapama mmulogoni w,o Roma. Nona Bibilia agalogaga wi abali a wenewale andhowavi attabwihaga “olaleya nzu na Mulugu, ahovaga elo.” (Fil. 1:14) Ebaribari wi Paulo wansegedheya na dhilobo dhafuniye okosa, mbwenye wanvilibihedha wi akose mpaka vawodheliye. Yodhelavoya? Ninga mulogeli mwinyene Paulo: “Dhetene dhiddipadduwela, dhireyelé olibiha olaleya muthaka.”—Fil. 1:12.

6. Mowiwanana na 2 Korinto 12:9, 10, txini emukamihedhile paulo wakwaniha mabasa aye a olaleya?

⁶ Paulo wanziwa wi kohikala guru ya Yehova txipo kagawodhile okosa dhotene dhikosiliye. Iyene wahinonelamo wi owodha wa Mulugu “ononeyetxa vanobana muthu.” (Kengesa 2 Korinto 12:9, 10.) Yehova ohilabihedha muya Waye wokoddela wi anvahe guru Paulo. Dhawene murumiwi oddu wororomeleya pawodhiliye wakwanihedha mabasa aye—masiki afwarafwariwaga, afugeliwaga mukambura vina na makattamiho mena.

7. Makattamiho gani afwanyela owanana Timóteo wi awodhe okosa mabasa aye?

⁷ Masiki Timóteo valiye muzombwe opittta Paulo, iyene wanfwanyela okuluvela owodha  wa Mulugu wi akwanihedhe mabasa aye. Timóteo wahinvelela Paulo mmabasani a olaleya akosaga oleddo wolapela. Ottiya ejo, Paulo wahimukumbira Timóteo wi akose oleddo woweddelela vina olibiha milogo. (1 Kor. 4:17) Txino Timóteo wannubuwela wi kali ofwanyelela okosa mabasa abo. Eji enoneya ninga ji sabwaya emuttukuleli Paulo onvaha nlago ntti: “Ahikálewo onupwazela okala muzombwe.” (2 Tim. 4:12) Ottiya ejo, mudhidhene obule Timóteo wanwanana makattamiho ali ninga mwinga wali mmaningoni mwaye, iyene ‘wanbulela—dila dhinjene.’ (1 Tim. 5:23) Mbwenye Timóteo wanziwa wi wanfwanyela okuluvela owodha wa muya wokodela wa Yehova. Na nikamihedho na muya obu, iyene agahikanavi guru wi adhowenavi mabasa a olaleyeya vina walabela abali.—2 Tim. 1:7.

8. Yehova onnivaha dhavi guru masaka abano?

⁸ Masaka abono Yehova onowavaha alabeli aye ‘Owodha ohinpimeya.’ owodha oku ononikamihedha omulabela Yehova ororomeleyene. (2 Kor. 4:7) Ninele wona mikalelo minayi dhinnikamihedhana Yehova wi nikane guru: nlobelo, Bibilia, abali omuyani vina mabasa a olaleya.

9. Olobela onnikamihedha dhavi?

⁹ Ninolibiheya modhela malobelo. Va Éfeso 6:18, Paulo ononikokomeza wi nimulobelele Mulugu ‘mwetemwene munkalihu.’ Mulugu onele onakula anivahaga guru dhinfunihu. Jonnie, onkala o Bolivia, ohona nikamihedho na Yehova vagumaniyena makattamiho orutxa. Mwadhiye, ottaganyiha na amambali aye ahikala aredda mwari mwa mudhidhi mmodhene. Jonnie wanrutxiwa vaddiddi wakamihedha anamudhi aba. Mokubanyiha-mwene maye ohikwa vina vahivira mudhidhi mwinjene mwadhiye na babe ahinavulumuwa. Jonnie obuwelaga dhotene dhinpadduweli ohiloga: “Mudhidhi wadhugudheyimi venjene yaddikamidhetxa yali okala wotapuwa malobeloni mwaga.” Yehova ohinvaha Jonnie guru wi awodhe ovilela. Ronald, oli munddimuwa wa mulogo onkala o Bolivia, wahidha ozinddiyela wi maye wahipattiwa eradda ya kanseri. Mokubanyiha-mwene maye okwile mvireli mweri mmodha. Txini emukamihedhile Ronald? Iyene ohiloga: “Ddigalobelaga ddinnofugulela murimaga Yehova vina ddinomwaddela mukalelo oniwamo miyo. Ddinoziwa wi Yehova onononelamo mukalelo oniwamo miyo, opitta muttu-muttuvi vina onoddiziwa pama opitta miyo ddamwinya.” Mudhidhi mwina ninokalaga odhugudheyene sabwa ya makattamiho, ofiyedha ohiziwa enfwanyela iyo ologa mu nlobeloni. Mbwenye Yehova ononiwoba wi ninfiyedhe na nlobelo masiki akala enonirutxa omwaddela na mazu, mukalelo oniwamo iyo.—Rom. 8:26, 27.

10. Mowiwanana na Ahebreu 4:12, ekalelini yamakamaka omwengesaga Bibilia vina otanalela dhinengesihu?

¹⁰ Ninolibiheya modhela Bibilia. Malebo annimukamihedha Paulo okana guru vina nipangarhazo. Yokakene enopadduwa na iyo masaka abano. (Rom. 15:4) Jamakamaka wengesaga Nzu na Mulugu vina otanalelaga dhinengesihu. Nigakosa dhawene, Yehova onele olabihedha muya waye wokoddela wi anilagihe mukalelo onnikamihedha Bibilia owanana makattamiho. (Kengesa Ahebreu 4:12.) Ronald ologiwe omaromo, bela dhahi: “Yali yamalago okana elemelelo yowengesaga na mattiyu versu dhing’onovi dha Bibilia. Ddinotanalela venjene mikalelo dha Yehova vina mikalelo dhinaweddihiye adhari aye na okwela. Esuwene dhinoddikamidha okanavi guru.”

11. Bibilia onvahile dhavi guru murogora wali wokubanyene?

¹¹ Otanalela Nzu na Mulugu enonikamihedha  owanana makattamiho ehu na mukalelo waderetu. Koona epadduwile na murogora dhahi wa mamukwela Iyene wali okubanyene sabwa ya okwa wa mamune, nona munddimuwa wa mulogo wahinvaha nlago ntti, wengese nivuru na Job. Murogora oddule wahigana ovirihamo nlagona. Muromeliye wengesa, emudheli muyubuweloni yali ya opambiha mubuwelo wa Job. Iyene wanlogavi dhahi: “Job! Kukane mubuwelo wabure dhawene!” Pavenevo vadhiliye ononelamo mutomaya: wi iyene vina wahikana dhubuwelo dhakakene dhana Job. Wengesa nivuru nttile na Bibilia, nihimukamihedha murogorihu oddule otxinja mobuwelo waye vina okana guru wi awodhe owanana makattamiho a okwa wa mamune.

12. Yehova onalabihedha dhavi abalihu ali Akristu wi anilibihe?

¹² Ninolibiheya modhela abali ehu ali Akristu. Mukalelo mwina onnivaha Yehova guru ku walabihedha abali ehu. Paulo wahalebela dhahi abali a mulogo wo Roma: “Ddinowunlela ogumana na nyuwo, wi vari venyu miyo vina ddilibihiwe.” (Rom. 1:11, 12) Maria ologiwe omaromo, ohona wi okala na abali elobo yamakamaka. Iyene ohiloga: “Yehova ohalabihedha abali na arogora ahaziwa makattamiho aga. Awene ahiloga mazu addipangarhazile vina andddilebela makarta, tti nipangarhazo navedimi mudhidhene obule. Elobo yina eddikamihedhile yali okala wotapuwa na arogora agumanilena makattamiho oligana na aga vowi ddinowodha osunza na mukalelo owodhilani owanana. Anddimuwa a mulogo anoddubutxedhaga ddila dhinjene wi miyo ddili attima mmulogoni.”

13. Ninawodhe dhavi olibihana muttu na mukwaye mmatugumanoni?

¹³ Midhidhi dhamakamaka dha opangarhazana muttu na mukwaye ku okala mmatugumanoni. Ogakala omatugumanoni, ononamo dhavi weyo okala woroma wapangarhaza ena? Motagiha, matugumano ahinaroma, munddimuwa dhahi wa mulogo onkuweliwa Peter wahiloga dhahi na murogora wa muziye: “Ddihagalala venjene na odha wawo. Mudhidhi wotene ondiwe omatugumanoni onodha na anawo vina awene ankala omala na wale wi avahe dhowakula dhawa.” Ahimaya ahagalala venjene vewalani mazu aba vina murogora oddule ohitamalela alogaga mazu awi: “Kaddina yologa, txibarene mazu enyu addilibiha vaddiddi.”

14. Mabasa a olaleya annikamihedha dhavi?

¹⁴ Ninolibiheya na mabasa a olaleya. Nigalogaga na attu ena muselu wa mBibiliani, iyo ninolibiheya masiki akala anonivuruwana obe nne. (Gano 11:25) Murogora onittaniwa Stacy ohona mukalelo onnilibiha mabasa a olaleya. Mmudhaye mmodha, ohibulutxiwa mmulogoni nanda ejo ehimukubanyiha venjene. Stacy wakala ovivuzavi: “Koddi miyo ddigahikosa elobo egadhile omukamihedha?” Iyene kawodha wubuwela elobo yina. Txini emukamihedhile Stacy owanana makattamiho aba? Olaleya! Venevo vavilibihedhiye mmabasani a olaleya, pawodhiye wazuzumela attu anmuruddani atamela nikamihedho. Iyene ohiloga: “Mudhidhine obule Yehova wahiddiruriha na oddivaha namasunza wa Bibilia wamaguveli wunuwa mpaddi womuyani. Eji ehiddagalaliha venjene. Elobo enddinkamihedha okalavi owimelene ba mabasa a olaleya.”

15. Txini esunziliwe na mazu a Mary?

¹⁵ Abali ena anona ninga kanwodha omulabela Yehova venjene sabwa ya makattamiho awa. Weyo vina oniwamo dhavene? Akala pumwenemo kudduwale wi Yehova onowagalala agowonaga ovilibihedhaga. Koona wili yotagiha ya Mary. Mudhoweliye mulogo wa elogelo yina wavyona ninga muttu wosegedheya. Mary ohiloga: “Ohivira mudhidhi mwinjene,  mbwenye yawodhimi okosa yali ovaha yowakula eng’onovi, wengesa nlebo na bibilia obe ovaha foliyetu modha bahi mmabasani a olaleya.” Mary wanviladdaniha na abale aloga deretu elogeloya nanda sabwa yejuwene wandhugudheya. Mbwenye wahidha otxinja mubuwelo waye. Iyene wahinonelamo wi Yehova agahimulabihedha masiki na makattamiho aniyena a elogeloya. Mary ohenjedhedha: “Ebaribari ya mBibiliani japama vaddiddi, jovevuwa vina enowodha otxinja dhigumi dha attu.”

16. Akala weyo kunwodha obudduwa vatakulu, txini enokamidhe okana guru?

¹⁶ Txino weyo ogahiziveliwa odhowa mmabasani a olaleya, mbwenye kunwodha obudduwa vatakulu. Kakana ebaribari wi Yehova onowona vina onononelamo makattamiho awo. Iyene onowodha wukamihedha wi owodhege walaleya abale onukoya, amediku vina anamalaba ena osipitale. Ottiya ejuwene kuladdanihege enkosiwe ovanene na esile dhawodhiwe okosa wale, vowi ogobuwelaga esuwene dhinodha wuwobaniha. Katamela oziwa enkosa Yehova ovanene wi okamihedhe. Ogakosa ejuwene onele okana guru enokamihedhe ovilela makattamiho-makattamihovi ohiyeleliwaga wagalala.

17. Mowiwanana na Kohelét 11:6, ninfwanyelelani okalela ntidi olaleya?

¹⁷ Iyo ninovilibihedha wala behu eli ebaribari ya Nzu na Mulugu, mbwenye kaninziwa behu gani enamele ofiyedha wunuwa. (Kengesa Kohelét 11:6.) Kona yotagiha ya Barbara, iyene ona vyaka 80 dha obaliwa masiki dhawene onovahavi onamoona na telefoni vina makarta. Mwa makarta aba, nimodha wahekamo revista na Sentinela woroma wa 2014, wana mutona ““Txini enukosela Mulugu.” Barbara kamuziwa bani agakelile karta nttile, mbwenye adhile wakela ali atelani dhahi attiyile omulabela Yehova. Awene ahengesa revista nttile ddila dhinjene. Mamune ewamo ninga ddi Yehova waloga kakamwe na iyene. Atelani abale ahiyelela otugumana wili vina ahiyelela wili—okala anamoona a Yehova mvireli vyaka 27. Kobuwela mukalelo walibiheyile Barbara vina oziveliwa waniyena moniliye yodhelavo ya karta nttile!

18. Txini enfwanyelihu okosa wi nakele owodha wa Mulugu?

¹⁸. Yehova ononivaha gari yowakela owodha waye onddimuwa. Ninga monelihu, iyene onivaha gari ya olobela, Bibilia, abalihu Okristu vina mabasa a olaleya. Kapurelamo pama nikamihedho nimodha-nimodha. Nigakosa dhawene kaninonihe bahi wi Yehova onowodha onikamihedha, ottiya ejo iyene onofuna-wene onikamihedha. Kamukuluvelegevi Babi wawo wawirimu, vina kakuluvela wi “iyene onowatanala abale animuroromela.”—2 Map. 16:9.