1. Yosakula gani enfwanyela okosa attu otene?

 MASAKA abano attu ahikana muttorho munddimuwa, osakula yokosa. Awene anele omukamihedha Yehova Mulugu ninga Namattonga woligana wa mwilanoni mwetemwene, obe anamukamihedhe mwiddani waye Satana Ddiabo? Muttu-muttu onofwanyela osakula mpaddi onfwanyeliye okala. Yosakula yaye enele opatta osogoro waye okala-nokala-wene. (Mt. 25:31-33, 46) Mwari mwa ‘goyi enddimuwa’ awene anele opidiwa ezinddiyelo wi yoniwe akala anele ovuniwa obe otolotxiwa.—Ovuh. 7:14; 14:9-11; Ezek. 9:4, 6.

2. (a) Enloga Ahebreu 10:35-39 ennittukulela okosa eni? (b) Nivuru na Ovuhulela ninnikamihedha dhavi?

² Kengesa Ahebreu 10:35-39. Onele okosa yosakula yapama ogagana okamihedha ottonga wa Yehova. Ovano weyo onofuna wakamihedha ena okosa yosakula eji yapama. Wi wakamihedhe, onofwanyela olabihedha masunziho anfwanyeya mu nivuruni na Ovuhulela. Nivuru ntti na ttima, ninologa enapadduwele attu ankodda olamulela wa Yehova, vina mareliho anakele abale anadhowevi aroromeliwaga na Yehova vina akamihedhaga olamulela waye. Iyo ninofwanyela osunza ebaribari eji yamakamaka. Okosa eji enele olibiha efunelo yehu yodhowavi nimulabelaga Yehova. Ottiya ejo, ninele wakamihedha attu ena osakula omulabela Yehova vina odhowavi amulabelaga.

3. Txini enasekeserihu mwari mwa nsunzo ntti?

³ Mwari mwa nsunzo ntti, ninele osekesera mavuzo aba: Txini enjedhela wakela abale ankamihedha olamulela wa Mulugu? Mwa mpaddi mwina txini enapadduwele abale ankamihedha enama yawopiha yofila ninga motto, enlogiwa muvivuruni na Ovuhulela?

4. Nikuru gani nonile murumiwi Joau banili na Yezu wirimu?

⁴ Mwari mwa woneyeliwa, murumiwi Joau ohona makuru meli akamihedhaga olamulela wa Yehova vina akelaga mareliho a egumi yamukalakala. Nikuru noroma nali na attu 144.000. (Ovuh. 7:4) Awene asakuliwe velaboni ya vati wi ete olamulela obe alamulele na Yezu wirimu. Awene vamodha na Yezu anele olamulela elabo yotene. (Ovuh. 5:9, 10; 14:3, 4) Mwari mwa nipadduwo ntti, Joau ohawona na mukalelo wa nladdaniho bemelile vamodha na Yezu wirimu Vamwangoni Sioni.—Ovuh. 14:1.

5. Txini enapadduwe na attikitteliwi alivi velaboni ya vati?

⁵ Oromana nsaka na arumiwi a Yezu, mpaka ovanene, attu enjene anosakuliwa velaboni ya vati wi akale attikitteliwi, muttengo wawa bwa 144.000. (Lk. 12:32; Rom. 8:17) Joau vina owawona abale anahalevo, obe nikuru ningʼono ninakalevi velaboni ya vati mwari mwa masaka omariha. Goyi enddimuwa ehinatti oroma, attikitteliwi ‘ahalilevo’ anele ‘wakela ezinddiyelo yomariha’ obe selagem final entonya orumeliwa wawa na Yehova. (Ovuh. 7:2, 3; 12:17) Mwari mwa goyi enddimuwa, aba ahalilevo anele ottukuleliwa wirimu wi ataganyihiwe na attikitteliwi ena akwile balivi ororomeleyene wi akwane 144.000. Awene anele ottongaga na Yezu Mumweneni mwa Mulugu.—Mt. 24:31; Ovuh. 5:9, 10.

6-7. (a) Nikuru gani nonile Joau vasogorova, nanda txini ensuza iyo sabwa ya nikuru ntto? (b) Txini enattukulela attikitteliwi alivi velaboni ya vati vina “muthithi munddimuwa” oziveliwana kapitulu 7 ya nivuru na Ovuhulela?

⁶ Vasogorova Joau ohona wirimu nikuru nina, “muthithi munddimuwa.” Nikuru ntti nihittiyana na nttile na 144.000, ntti kaninelegeya. (Ovuh. 7:9, 10) Txini ensunzehu mwaha wa nikuru ntti? Joau ohiloga dhahi: “Aba, babale avirile mmasosoni manddimuwa, afulile dhabalo dhawa akoddelihaga na nikame na Mwana-Nibila.” (Ovuh. 7:14) Attu ankosa mpaddi wa “muthithi munddimuwa” agamala oviluwa mugoyini enddimuwa, anele okala velaboni ya vati vina anele ojavo mareliho owumiha milomo.—Masal. 37:9-11, 27-29; Gano 2:21, 22; Ovuh. 7:16, 17.

⁷ Kintanala akala nisakuliwe wi nikale wirimu, obe nikalegevi velaboni ya vati, ninele wona wakwanihedheya wa mazu alebiwe va kapitulu 7 ya nivuru na Ovuhulela? Egahikala iyo kowona. Obo onakale mudhidhi wowagalaliha vaddiddi wa makuru aba meli a emeleli a Mulugu! Iyo ninele wagalala sabwa ya osakula okamihedha olamulela wa Yehova. Elobo gani yina ennaddela nivuru na Ovuhulela sabwa ya goyi enddimuwa?—Mt. 24:21.

8. Goyi enddimuwa enarome dhavi, nanda eji enapatte dhavi attu?

⁸ Ninga mulogeliwani nsunzo nivirile, makuru a politika a elabo ejino anele omutolotxa Babilónia Munddimuwa oli otaganyiheya wa marelijiau otene onyengetta. (Ovuh. 17:16, 17) Nipadduwo ntti ninele wita goyi enddimuwa. Eji enele wattukulela attu enjene oroma omwebedha Yehova? Nne. Mottiyana-mwene Ovuhulela kapitulu 6 onowoniha wi mudhidhi obu worutxa attu abale ahinimwebedha Yehova anelege otamela nibarelo mmakuruni a politika vina a anamarondda a elabo ejino abuwene anladdanihiwa na myango. Vowi awene kanakamihedhe Omwene wa Mulugu, Yehova onele wawona ninga amwiddani aye.—Lk. 11:23; Ovuh. 6:15-17.

9. Nlogo na Yehova ninakale dhavi nottiyana mwari mwa goyi enddimuwa, nanda txini enapadduwe vasogorova?

⁹ Emeleli ororomeleya a Yehova anele okana  yimelelo yottiyana mwari mwa mudhidhi obu worutxa wa goyi enddimuwa. Ba awene bahi anamulabelegevi Yehova velaboni ya vati vina anakodde okamihedha ‘enema enddimuwa yawopiha.’ (Ovuh. 13:14-17) Yimelelo yawa enele wattukulela amwiddani a Yehova osilidhiwa. Enapadduwe? Makuru a mwilaboni anele olupela nikuru notene na Mulugu nili velaboni ya vati. Olupeliwa oku wawopiha ovuhuleliwe ninga olupela wa Gog wa Magog.—Ezek. 38:14-16.

10. Ninga munlogela Ovuhulela 19:19-21, Yehova onakulele dhavi olupeliwa wa nlogo naye?

¹⁰ Yehova onakulele dhavi olupeliwa oku? Iyene onaddela dhahi: “Owali waga onere wavuwa.” (Ezek. 38:18, 21-23) Ovuhulela kapitulu 19 enologa enapadduwe vasogorova. Yehova onele omuruma Mwanaye Yezu wi abarele nlogo Naye vina atolotxe amwiddani aye. Yezu vamodha na “makuru a anyakoddo a odhulu” ali agelo ororomeleya—otaganyiha na attikitteliwi owakwana 144.000 anele walupela amwiddani aba a Mulugu. (Ovuh. 17:14; 19:11-15) Koddo eji enagome dhavi? Makuru otene a attu a mwilaboni animwidda Yehova anele otolotxiwa kakamwe!—Kengesa Ovuhulela 19:19-21.

11. Elobo gani yamakamaka enlogiwa munivuruni na Ovuhulela?

¹¹ Karoma otanalela eneweno attu ororomeleya anaviluwe mudhidhi onatolotxiwe amwiddani a Mulugu! Otene anele wagalala! Ottiya ejo onowiweya okuwa onddimuwa wirimu mudhidhi onatolotxiwe Babilónia munddimuwa, ehikalawo elobo yina enadhena ottaba oku onddimuwa. (Ovuh. 19:1-3) Ejo, ji elobo yamakamaka enlogiwa munivuruni na Ovuhulela—“matelo a Mwana-Nibila.”—Ovuh. 19:6-9.

12. Ninga munlogela Ovuhulela 21:1, 2, mudhidhi gani onakosiwe matelo a Mwana-Nibila?

¹² Matelo aba anapadduwe mudhidhi gani? Attikitteliwi otene owakwana 144.000 anele okala wirimu koddo ya Armageddón ehinatti owaniwa. Mbwenye obu kahiye mudhidhi onakosiwe matelo a Mwana Nibila. (Kengesa Ovuhulela 21:1, 2.) Matelo a Mwana-Nibila anakosiwe koddo ya Armageddón bimalile owaniwa vina amwiddani otene a Mulugu bamalile otolotxiwa.—Masal. 45:3, 4, 13-17.

13. Matelo a Mwana-Nibila antapulela nni mwa attikitteliwi vina Yezu?

¹³ Txini entapulela matelo a Mwana Nibila mwa Yezu vina attikitteliwi? Ninga munziwela iyo, matelo wiwanana wa mulobwana na mwiyana wi akalege vamodha, na mukalelo wakene, matelo a Mwana-Nibila wiwanana wa muteli na ‘muteliwi,’ Yezu Kristu na attikitteliwi 144.000. Nipadduwo ntti ninele wita olamulela oswa onalamulele elabo yotene mwari wa vyaka 1.000.—Ovuh. 20:6.

14-15. Munivuruni na Ovuhulela kapitulu 21 attikitteliwi 144.000 anladdanihiwa na eni? (Kang’ana foto ya kapa.)

¹⁴ Va Ovuhulela kapitulu  21 attikitteliwi 144.000 anladdanihiwa na sidadi yokoddela enkuweliwa “Jeruzalemi Muswa.” (Ovuh. 21:2, 9) Sidadi ejo yana mattuwa 12 vahilebiwa mazina ‘kumi na meli a arumiwi kumi na eli a Mwana-Nibila.’ Txini emuttukuleli Joau ozuzumela nipadduwo ntti? Swabwani iyene wahona nttuwa nimodha valebiwe nzina naye. Ntti nali nttittimiho ninddimuwa!—Ovuh. 21:10-14; Ef. 2:20.

¹⁵ Kiyaliwo sidadi yina yoladdana na sidadi eji ya nladdaniho. Sidadi eji yahikana rampa yasasanyiwe na nddarama yoka-yoka, misuwo kumi na minli dha myarha dha ttima vina  mattuwa a ngome ya muttetteya akoddelihiwe na malugu a ttima ottiyana-ttiyana. (Ovuh. 21:15-21) Masiki dhawene, yahikalawo elobo yajombamo! Koona ennaddela Joau vasogorova: “Mmuthethenimwá kaddonimo mparha, vowi mparhayámo ddi Nabuya Mulugu wowodha-wodha, vina Mwana-Nibila. Mmuthethenimwá kamunfuneya warya wa nzuwa, nne wa mamweri, vowi nthithimiho na Mulugu thimmoneyamo, waryawá ddi Mwana-Nibila.” (Ovuh. 21:22, 23) Abale anakalege mu Jeruzalemi Muswa anelege osogoreliwa na Yehova. (Aheb. 7:27; Ovuh. 22:3, 4) Mwa awene, Yehova vamodha na Yezu banakale mparha wa mmuttettenimwa.

16. Txini enapadduwe na nlogo na attu mwari mwa Vyaka Txikwi dha Olamulela wa Omwene wa Mulugu?

¹⁶ Attikitteliwi anokana wagalala agatanalelaga sidadi eji. Eji vina enowawagalaliha abale ana njedhelo na okala velaboni ya vati. Mwari mwa Vyaka Txikwi dha Olamulela wa Omwene wa Mulugu, Jeruzalemi Muswa onele odhana mareliho ohelegeya. Joau ohona mareliho abo afukuwaga ninga “mwinje wa manje ankaliha egumi.” Txerere na txerere ya mwinjeya yahimela ‘miri dhinkaliha egumi’ matabaya ‘anowavulumutxa attu a malogo otene.’ (Ovuh. 22:1, 2) Attu otene anakalewo nsaka nene ntto, anele ojavo mareliho aba. Vang’ono-vang’ono nlogo notene na attu awiwelela anela okala oligana. Mwilaboni mpo kamunakale vina oredda, wiwa opa, nne vina kutto sabwa ya segedho.—Ovuh. 21:3-5.

17. Ninga munlogela Ovuhulela 20:11-13, bani onapurelemo mareliho mwari mwa Olamulela wa Vyaka Txikwi?

¹⁷ Bani onapurelemo mareliho aba? Voroma, muttitti munddimuwa onaviluwe mukoddoni ya Armageddón vina aima anabaliwe mwilaboni eswa. Kapitulu 20 ya Ovuhulela vahikala nipikirelo na wi amarafula anele ovenyihiwa mukwani. (Kengesa Ovuhulela 20:11-13.) ‘Aligani’ obe attu ororomeleya akwile nsaka na wale vina ‘attu abure obe ahiligani’—abale ahana gari ya osunza sabwa ya Yehova—otene anele wiyihedhiwa egumi velaboni ya vati. (Mer. 24:15; Jo. 5:28, 29) Eji entapulela wi amarafula otene anele ovenyihiwa wi akale velaboni ya vati mwari mwa Olamulela wa Vyaka Txikwi? Nne. Abale akoddile gari ya omulabela Yehova ahinatti okwa kanavenyihiwe. Awene ahikana gari, mbwenye ahoniha na merelo awa wi kanfwanyelela wakela egumi ya  mukalakala Mparaizu velaboni ya vati.—Mt. 25:46; 2 Tes. 1:9; Ovuh. 17:8; 20:15.

18. Txini enapadduwe na attu anakale velaboni ya vati omagomo wa vyaka 1.000?

¹⁸ Omagomo wa vyaka 1.000, attu otene anakale velaboni ya vati anele wiyihedhiwa egumi yoligana. Kunakale vina muttu onatabuwege na yottega etotiwe omaromo na Adamu. (Rom. 5:12) Yottega eraviwe na Adamu enele ogomihiwa kakamwe. Omagomo wa vyaka 1.000 attu otene anakale velaboni ya vati anele ‘okana egumi’ yoligana.—Ovuh. 20:5.

19. Enfuneyela nni wehiwa womariha?

¹⁹ Iyo ninoziwa wi Yezu wahikalavi wororomeleyene. Iyene karumelile onyengettiwa na dhoweha dha Satana. Attu otene anele okala ororomeleya mudhidhi onavahiwe Satana ofuru ya waweha? Muttu-muttu wa iyo onofwanyela ovivuza akala onele orabela dhoweha dha Satana obe nne, agamala ofuruliwa mu abismuni omagomo wa vyaka 1.000. (Ovuh. 20:7) Abale anakale ororomeleya mpaka omagomo wa wehiwa oku womariha anele wakela egumi ya mukalakala vina anele ojavo ofuru watxibarene. (Rom. 8:21) Asadduweli anele otolotxiwa kakamwene na Ddiabo vina adomonyo aye.—Ovuh. 20:8-10.

20. Oniwamo dhavi sabwa ya osunza mavuhulo anfwanyeya munivuruni na Ovuhulela?

²⁰ Weyo oniwamo dhavi sabwa ya osunza nivuru ntti na Ovuhulela? Onottaba ogavyubuwela mwari mwa nivuhulo ntti nohagalaliha? Eji txibarene enowuttukulela wawoba attu ena wi avitaganyihe na iyo muwebedhani mwebaribari mwa Mulugu? (Ovuh. 22:17) Vowi nihimala osunza dhinfuna opadduwa musogorho nili ohagalalene vina ninojedhela ologa ninga mulogile murumiwi Joau: “Amem! Dhawunoní Nabuya Yezu!”—Ovuh. 22:20.