1-2. Txini ennittukulela oziveliwa na nivuru na Ovuhulela?

 WEYO wahikanaga gari ya wang’ana mafoto a muttu mwina? Txino weyo onoroma wawang’ana attu ena ahinaziwiwe. Mbwenye saddu, wona foto, ewuddiginyile murima. Sabwaya jani? Sabawni weyo oli vafotoniva. Mwa venevo, onoroma wubuwela mburoya vina mudhidhi opidiwani. Vina onotamela wawubuwela attu ena ali vafotoniva. Foto ejo jamakamaka mwa weyo.

² Nivuru na Ovuhulela nili ninga foto eji. Sabwaya? Sabwa ya dhilobo bili. Yoroma, nivuru ntti na Ovuhulela olebeliwe ddi iyo. Versu Dhoroma, ninengesa dhahi: “Munivuruni-mpu muli mazu ovuhulela, akelile Yezu Kristu wa Mulugu, wi àziwihe emeleli aye dhinfuna opadduwa ovanene.” (Ovuh. 1:1) Dhilebiwe munivuruni ntti, kadhilebeliwe attu otene, dhilebeliwe makamaka, emeleli a Mulugu. Mwa iyo ninga nlogo na Mulugu, kanintikina mwaha wa okosa mpaddi wowakwanihedheya wa mavuhulo anfwanyeya munivuruni ntti na wumiha milomo. Na mazu mena, enkala ninga iyo “niniviwona vafotoni.”

3-4. Mudhidhi gani ogaromile wakwanihedheya mavuhulo anfwanyeya munivuruni na Ovuhulela vina aboya aganipattile dhavi?

³ Sabwa yanawili ennittukulela oziveliwa na nivuru na Ovuhulela eniwanana na mudhidhi ogaromile wakwanihedheya wa mavuhulo a nivuru ntti. Murumiwi Joau ohiwodha ozinddiyela mudhidhi ogaromile wakwanihedheya mavuhulo aba mulogiliye dhahi: ‘Na nikamihedho na muya wokodela labo dhahi, nali Siku na Nabuya.’ (Ovuh. 1:10) Joau olebile mazu aba yaka ya 96 N.K, mwa mudhidhene obule ‘labo na  Nabuya’ nali wolapela. (Mt. 25:14, 19; Lk. 19:12) Mowiwanana na mavuhulo a mBibiliani, labo na Nabuya niromile yaka ya 1914 mudhidhi ottomiwe Yezu Kristu ninga Mwene wirimu. Oromana yaka ejile, mavuhulo anfwanyeya munivuruni na Ovuhulela, aniwanana na nlogo na Mulugu, paromilani wakwanihedheya. Ndde, ovano iyo ninkalawo ‘labo na Nabuya’!

⁴ Sabwa ya wi ninkalawo mudhidhi wowagalaliha vaddiddi, enofuneya ofwaseyela venjene malago okwela alebiwe va Ovuhulela 1:3: ‘Owagalala ddule onengesela nivuru ntti, onvuruwana mazu ovuhulela alimo avirihagamo dhilebiwemo, nsaka na opadduwa esodha nili vakuvi.’ Nona, enofuneya txibarene ‘wengesa na lizu nowiweya,’ ‘wiwa mazu a nivuru ntti,’ vina ovirihamo dhilebiwemo. Mwa mazuya abo anfwanyelihu wiwelela bavi?

5. Nivuru na Ovuhulela ninoniha dhavi ttima ya omwebedha Yehova ninga munrumeleliye?

⁵ Oromana kapitulu Dhoroma dha Ovuhulela, iyo ninononelamo wi Yezu Kristu Onoziwa pama dhetedhene dhimpadduwa mmulogoni. (Ovuh. 1:12-16, 20; 2:1) Iyo ninziwa ejuwene sabwa ya miselu dhivahedhiliye milogo mitanu na minli dhakala o Asia Menor. Mwa miselu esi iyene wahavaha malago ohipipiriheya Akristu oroma wi akamihedhe omwebedha Yehova na mukalelo wofwanyelela. Dhilogile Yezu, dhinolabavi masaka abano. Txini ensunzihu na malago avahiliye? Nabuya wehu, Yezu Kristu, onoziwa pama mukalelo oli iyo mpaddi womuyani. Yezu ononisogorela, ononibarela vina onowona dhetene dhimpaduwa. Iyene vina onoziwa enfwanyelihu okosa wi nirumeliwe na Yehova. Malago gani avahile Yezu anfwanyelihu ofwara masaka abano?

6. (a) Mowiwanana na Ovuhulela 2:3, 4, makattamiho gani ana mulogo wa Efeso? (b) Txini ensunzihu?

⁶ Kengesa Ovuhulela 2:3, 4. Iyo kaniyelele okwela wanihuna na Yehova vamaromo. Muselu warumele Yezu abali a mulogo wo Efeso wahoniha wi awene andhowavi amulabelaga Yehova na ovilela masiki na makattamiho agumananina. Mbwenye, mokubanyiha-mwene ahiyelela okwela wananina na Yehova vamaromo. Nona yanfuneya wi eyelele omukwela Yehova—ninga mwakoselani, dhahene pagawodhile Yehova orumela webedha wawa. Na mukalelo wakakene masaka abano iyo ninofwanyela okosa elobo yina ottiya ovilelavi, enofuneya ovilela na sabwa yofwanyelela. Mulugu kanagalala bahi na ejile enkosihu mbwenye makamaka na sabwaya ennitukulela okosa ejuwene. Ennittukulela omukosela Yehova elobo jili yamaka-maka wa iyene sabwani iyene onfuna wi omwebedha wehu ottukuleleyege sabwa ya omukwela vina omutamalela venjene.—Gano 16:2; Mk. 12:29, 30.

7. (a) Mowiwana na Ovuhulela 3:1-3, makattamiho gani alogile Yezu ana milogo dho Sardis? (b) Nanda iyo ninfwanyela okosa eni?

⁷ Kengesa Ovuhulela 3:1-3. Enofuneya iyo odhowavi nikalaga mento vina txenjewa. Milogo dhinji dho Sardis dhahikana makattamiho ottiyana. Awene andha amulabelaga Yehova mundduni, mbwenye ahidha wobanela mabasaya. Yezu wahawaddela wi anfwanyela ‘okala mento.’ Ninsunzavo eni? Txibarene, Yehova txipo kandduwala mabasa ehu. (Aheb. 6:10) Masiki dhawene, kaninfwanyela wubuwela wi akala nandha nimulabelaga Yehova mundduni, ovano nobanele mabasaya. Akala iyo kanina ewodhelo ninga mwa wale,  ninofwanyela odhowavi nizuzumelaga “mabasa a Nabuya,” nikalaga mento vina txenjewa mpaka omagomo.—1 Kor. 15:58; Mt. 24:13; Mk. 13:33.

8. Mowiwanana na Ovuhulela 3:15-17, txini ensunza iyo na ejile elogile Yezu na abali o Lawodiseya?

⁸ Kengesa Ovuhulela 3:15-17. Nittangaramele mabasa a Yehova vina nimwebedhege na murima wotene. Yezu wahiloga wi mulogo wo Lawodiseya wahikana makattamiho ottiyana, awene ‘karidhile vina kaviyiletxe’ mu webedhani mwawa. Sabwa ya ejuwene Yezu wahiloga wi awene ali ‘asegedheyi vina ahawi.’ Anfwanyela wiyelela omulabela Yehova nottangarama. (Ovuh. 3:19) Ninsunzavo eni? Niganonelamo wi niroma wobanela dhilobo dhomuyani ninofwanyela otamalelaga dhotedhene dhinnikosela Yehova vina dhinnivaha nlogo naye. (Ovuh. 3:18) Kanittiye wi dhilobo dhomaningoni onittukulela wika dhilobo dhomuyani vamburoni vanawili.

9. Mowiwanana na miselu dharumile Yezu o Pérgamo vina o Tiatira, elobo gani yawopiha enfwanyelihu orabela?

⁹ Ninofwanyela orabela masunziho a asadduweli. Yezu wahasisigula abali a mulogo wo Pérgamo atota ogawana vina eta makuru. (Ovuh. 2:14-16) Mbwenye Yezu wahatamalela abali a mulogo wo Tiatira sabwa ya orabela “dhoviteya dha satana” vina iyene wahakokomeza wi ‘adidelevi’ weddana ebaribari. (Ovuh. 2:24-26) Abali abale obanile mpaddi womuyani sabwa ya ofwara masunziho onyengetta anfwanyela otxinuwa. Eji ennisunziha eni masaka abano? Ninofwanyela orabela masunziho anguddulana na mubuwelo wa Yehova. Asadduweli ‘anowoneyana ekalelo ya omuriha Mulugu’ mbwenye anozinddiyeleya wi ‘attambi’ sabwa ya merelo awa. (2 Tim. 3:5) Nona enofuneya wi nikale anamasunza apama a Mazu a Mulugu wi niwodhe ozinddiyela vina orabela masunziho onyengetta.—2 Tim. 3:14-17; Jud. 3, 4.

10. Txini ensunza iyo na elogile Yezu na mulogo wo Pérgamo vina wo Tiatira?

¹⁰ Nittawe mukalelo wotene wa mararuwo. Abali o Pérgamo na o Tiatira ahikana makattamiho mena. Yezu ohiloga wi ena a mmulogoni ankosa mararuwo. (Ovuh. 2:14, 20) Txini ensunza iyo? Sabwa ya odha nimulabelaga Yehova mwa vyaka dhinjene vina okana ettomo mmulogoni, kanubuwele wi Iyene onele orumela iyo okosa mararuwo. (1 Sam. 15:22; 1 Ped. 2:16) Yehova onjedhela wi iyo neddegena malamulo aye masiki attu a mwilaboni akosaga mararuwo.—Ef. 6:11-13.

11. Txini esunzile iyo mpaka veneva? (Koona kasha “ Dhinsunza Iyo Masaka Abano.”)

 ¹¹ Txini esunzile iyo mpaka veneva? Ninofwanyela oziwa txibarene akala webedha wehu onorumeliwa na Yehova. Akala ninokosa elobo enttukulela webedha wehu ohirumeliwa na Yehova, ninofwanyela okosa matxinjo momaguva. (Ovuh. 2:5, 16; 3:3, 16) Mbwenye Yezu wahiloga elobo yina mwa milogo esile. Txini elogiliye?

12. Txini elogile Yezu na mulogo wo Esmirna vina Filadelfia nanda museluya okalele eni wa makamaka wa iyo? (Ovuhulela 2:10)

¹² Ndowe none elogile Yezu na mulogo wa Esmirna vina Filadelfia, iyene ohiloga wi awene kafwanyela wova ofwarafwariwa vowi agahittuviwa sabwa ya ovilelela wawa. (Kengesa Ovuhulela 2:10; 3:10) Txini ensunza iyo masaka abano? Iyo ninele ofwarafwariwa vina ninofwanyela ovilela. (Mt. 24:9, 13; 2 Kor. 12:10) Muselu obu okalele nni wa makamaka?

13-14. Mapadduwo anlogiwa va Ovuhulela kapitulu 12 ampatta dhavi nlogo na Mulugu?

¹³ Nivuru na Ovuhulela ninologa wi nlogo na Mulugu ninele ofwarafwariwa,—“siku na Nabuya.” Sikuna na Nabuya ba masaka abano ankalawo iyo. Ovuhulela kapitulu 12 enonaddela wi mukalele Yezu Mwene wa Omwene wa Mulugu, wirimu otatamuwa koddo. Migueli—wottittimihiwa Yezu Kristu—na angelo aye ahiwana na Satana vina adomonyo aye. (Ovuh. 12:7, 8) Amwiddani aba a Mulugu ahigonjihiwa vina ahiponyedhiwa velaboni ya vati, nona mwilaboni bamukala makattamiho menjene. (Ovuh. 12:9, 12) Mapadduwo aba ampatta dhavi nlogo na Mulugu?

¹⁴ Vasogorova nivuru na Ovuhulela ninonaddela ejile egakosile Satana. Iyene kana vina ewodhelo ya okosa mpaddi wa wirimu nona ohisilidhiwa venjene na attikitteliwi ali velaboni ya vati, attikitteliwi ankamihedha Omwene wa Mulugu vina ‘ana mabasa a olaleya esile dheddilena Yezu.’ (Ovuh. 12:17; 2 Kor. 5:20; Ef. 6:19, 20) Mavuhulo aba anakwanihedheya dhavi?

15. Bani atonya ‘anamona’ eli anlogiwa va kapitulu 11, nanda txini epadduwile na awene?

¹⁵ Satana ohalabihedha amwiddani a Mulugu wi afwarafware attikitteliwi asogorela mabasa velaboni ya vati. Alobwana aba anatonya ‘anamona’ anlogiwa va nivuruni na Ovuhulela. * (Ovuh. 11:3, 7-11) Yaka ya 1918 abali atanu na araru asogorhela mabasa a olaleya velaboni ya vati, ahimagedhiwa muladdu wahakosilani vina ahifugeliwa mukambura wi akalemo vyaka dhinjene.  Mupadduweli ejuwene attu ena obuwela wi mabasa asogorela abali abale ahimala ogoma obe “ahikwa.”

16. Elobo gani yotikiniha epadduwile yaka ya 1919, mbwenye txini enkosavi Satana oromana mudhidhene obule?

¹⁶ Nivuhulo nili va Ovuhulela kapitulu 11 ninologa vina wi ‘anamona abale eli’ agahiyelela okalawo kovira mudhidhi mung’onovi. Nivuhulo ntti nihakwanihedheya na mukalelo wotikiniha muvirile yaka modha na myeri dhing’onovi abali abale balivi mukambura. Marsu wa yaka ya 1919 abali abale ottikitteliwa ahifuruliwa mukambura vina yahoniwa wi kana muladdu. Venevo abali ahiyelela wili ottidda mabasa a Omwene. Mbwenye eji kiyamutximihile Satana ofwarafwara nlogo na Mulugu. Oromana nsakanene nttile Satana ‘napanovi’ onofwarafwara nlogo na Mulugu. (Ovuh. 12:15) Nona veneva panoneya ‘ovilela vina ororomela’ wa muttu-muttu wa iyo.—Ovuh. 13:10.

17. Nikamihedho gani nohijedheleya ninakelaga nlogo na Yehova?

¹⁷ Kapitulu 12 ya nivuru na Ovuhulela enologa wi nlogo na Mulugu nigahakela nikamihedho mburo wahajedhelani. Eji egali ninga “mathaka” alomedha “mwinje” wa ofwarafwara. (Ovuh. 12:16) Nona jijuwene enpadduwaga na makuru ankosa mpaddi wa elabo ya Satana ninga motagiha, cistema juridico anofewelaga murima nlogo na Mulugu. Dila dhinjene emeleli a Yehova anopemberaga mmatribunali okana ofuru wa webedha. Awene anlabihedha dhavi ofuru obo? Anopura mudhidhi wotene wi attidde mabasa a Yehova. (1 Kor. 16:9) Aboya mabasa gani?

18. Mabasa gani a makamaka anfwanyelihu okosa masaka abano omariha?

¹⁸ Yezu wahivuhulela wi nlogo naye nigahilaleya ‘miselu dhapama dha Omwene wa Mulugu’ orugunuwa elabo yotene ngamala pagafiyile omagomo. (Mt. 24:14) Wi awodhe wakwanihedha mabasa aba awene anowakela nikamihedho na anju obe makuru a angelo, awene akana ‘muttaka wapama wi alaleyele attu a vati, a vilabo dhotene, a mahimo, a vilogelo a malogo otene.’—Ovuh 14:6.

19. Muselu gani mwina onfwanyela olaleyiwa na abale animukwela Yehova?

¹⁹ Nlogo na Mulugu kaninlaleya bahi miseluvi dhapama dha Omwene wa Mulugu. Awene vina anokamihedha mabasa ankosa angelo anlogiwa va Ovuhulela kapitulu  8-10 angelo aba anovuwiha ntowa ninagwele abale ankodda Omwene wa Mulugu. Nona Anamoona a Yehova anolaleya muselu onladdanihiwa na muzogwe wa “maralala vina motho,” ontonya mukalelo onattonge Mulugu elabo eji ya Satana. (Ovuh. 8:7, 13) Attu anofwanyela oziwa wi omagomo wa elabo oli vakuvi vina anofwanyela okosa matxinjo mwigumini mwawa akala anofuna oviluwa siku na owali wa Mulugu. (Sof. 2:2, 3) Mbwenye obu kahiye muselu onziveliwa attu wiwa. Nona enele ofuneya oliba murima. Mwari mwa goyi enddimuwa muselu onfunihu olaleya onakale wohipipiriheya vina wa guru.—Ovuh. 16:21.

20. Txini enasekeserhihu mwari mwa masunzo meli anfwarela?

²⁰ Iyo txibarene ninofwanyela wiwelela “mazu ovuhulela” sabwani ninokosa mpaddi wa mavuhulo anfwanyeya munivuruni na Ovuhulela. (Ovuh. 1:3) Mbwenye ninawodhe dhavi odhowavi nikalaga ororomeleya vina nilaleyaga miselu dhapama na oliba murima masiki nifwarafwariwaga? Dhilobo bili dhinele onilibiha: Yoroma ejile enloga nivuru na Ovuhulela sabwa ya amwiddani a Mulugu, yanawili mareliho anakelihu musogoro nigakalavi ororomeleya. Ninele osekesera mitoma esi mwari mwa masunzo meli anfwarela.