1. Attu ena anrutxiwa okosa eni?

 WAHIROMAGA okana yogana yomuyani yurutxile wakwaniha? b Akala pumweneno, weyo kuli weka. Motagiha, Philip wahona wi wanfwanyela olobelaga dila dhinjene vina wunuwiha ekalelo yaye yolobela, mbwenyi iyene kakana mudhidhi wi akose ejene. Erika wahikana yogana yofiya na mudhidhene mmatugumanoni a obudduwa mmabasani a olaleya; mbwenyi wanfiya oyeluwene matugumano otene. Tomáš wahigana omwengesa Bibilia wantero. Iyene ohiloga: “Miyo kaddaziveliwa omwengesa Bibilia. Ddahitagiha dila ttaru, mbwenyi dila dhotene ddigaroma ddagomela va Onamakutha miyo otxima.”

2. Ninkoddela nni onyimuwa akala iyo kaninawodha wakwaniha yogana yehu?

² Akala weyo onovilibihedha wakwaniha yogana yawo mbwenyi kunatti wakwaniha, kuwubuwele wi weyo ohobana. Wakwaniha yogana kahiye elobo yovevuwa, enofuneya mudhidhi na guru masiki akala yoganaya eng’ono. Ovilibihedha wawo onowoniha wi onovaha ttima mandano awo na Yehova vina onofuna omulabela na guru dhawo dhotene. Kudduwale wi Yehova onottittimiha ovilibihedha wawo. Ebaribari wi iyene kanjedhela wi nikose ehinwodhihu. (Masal. 103:14; Mik. 6:8) Nona ogasakulaga yogana okale muttu wovipimelela, kusakule yogana ehinawodhe weyo wakwaniha. Ogamala  osakula yogana, txini enfwanyela weyo okosa wila wakwanihe? Ndoweni none malago mang’onovi.

3. Ekaleli nni yapama okana efunelo yapama?

³ Wi niwodhe wakwaniha yogana ninofwanyela okana efunelo yapama. Okana efunelo yapama enonittukulela ovilibihedha wi nakwanihe yogana yehu. Niladdanihe makani aba na pevo entukuma barku ya vela mpaka ondowani. Akala pevoya enodhowavi yobaga, barkuya enofiya ondowani. Pevoya egobaga na guru barkuya kanrutxa ofiya. Nona efunelo yehu ya ottidda mabasa egonuwa, kinarutxe wakwaniha yogana yehu. Davidi mbali wa El Salvador ohiloga: “Weyo ogakana efunelo yapama onovilibihedha. Onovilibihedha wi ohittiye elobo-txilobo wutximiha wakwaniha yogana yawo.” Txini enfwanyela weyo okosa wi okane efunelo yapama?

4. Txini enfwanyela iyo okumbirha mmalobeloni mwehu? (Filipi 2:13) (Koona vina foto.)

⁴ Kalobela okumbiraga efunelo yapama. Yehova onolabihedha muya waye wokoddela wi ovahe efunelo yapama wila wakwanihedhe yogana yawo. (Kengesa Filipi 2:13.) Dila dhina ninodhaga okana yogana, sabwani jijuwene enfwanyela iyo okosa. Eji kahiye yabure, mbwenyi enodhaga opadduwa iyo ohikanaga efunelo ya wakwaniha yoganaya. Jijuwene empadduweli murogora wa Uganda onkuweliwa Norina. Iyene wahikana yogana ya weddiha nsunzo na Bibilia, mbwenyi kana efunelo yapama sabwani kaviwona ninga namasunziha waderetu. Txini emukamihedhile? Iyene ohiloga: “Miyo ddahiroma omulobelela Yehova dila dhinjidhene, ddimukumbirhaga wi addivahe efunelo ya weddiha nsunzo na Bibilia. Miyo ddahikosa epaddi yaga ddahivilibihedha wunuwiha ewodhelo yaga yosunziha, mvireli vyaka dhing’onovi ddahona wi efunelo yaga yahunuwa. Yaka yakakene ddahiroma weddiha masunzo meli a Bibilia.”

5. Wi nenjedhedhe efunelo yehu ninfwanyela otanalela eni?

⁵ Katanalela dhilobo dhinikoseli Yehova. (Masal. 143:5) Murumiwi Paulo wantanalela mahala a Yehova, eji yanimuttukulela okana efunelo enddimuwa yomulabela Yehova. (1 Kor. 15:9, 10; 1 Tim. 1:12-14) Na mukalelo wakakene, weyo ogaroma otanalela dhilobo dhotedhene dhukoseli Yehova onele okana efunelo yapama yowakwaniha yogana yawo. (Masal. 116:12) Koona emukamihedhile murogora a Honduras wakwaniha yogana yaye yokala pionera wa mudhidhi wotene. Iyene ohiloga: “Miyo ddantanalela mukalelo onddikamihedha Yehova. Iyene ohiddikamidha ofwanya nlogo naye, onoddibarela vina onoddeddiha. Otanalela ejene ehunuwiha omukwela waga vina ehenjedhedha efunelo yaga.”

6. Elobo gani yina enanikamihedhe wenjedhedha efunelo ehu?

⁶ Kobuwela dhopurelamo dhinda sabwa ya  weyo wakwaniha dhogana dhawo. Kobuwela elogile Erika ologiwe mundduni, wana yogana ya ofiya na mudhidhene mmatugumanoni a obudduwa mmabasani a olaleya. Iyene ohiloga: “Ofiya mmatugumanoni a obudduwa mmabasani a olaleya oyeluwene, yanddiyeleliha dhilobo dhinjidhene. Miyo ddigafiya na mudhidhene, ddanalejela abali vina nanloga makani. Ottiya ejo miyo vina ddanniwa malago avahiwehu a oromana makani mmabasani a olaleya.” Erika wahizuzumela dhodhelavo sabwa ya ofiya na mutanene omatugumanoni a obudduwa mmabasani a olaleya, nona iyene wahiwodha wakwaniha yogana yaye. Wahiromaga wubuwela dhodhelavo dhinda sabwa ya wakwaniha dhogana dhawo? Motagiha, akala yogana yawo enowiwanana na olobela vina omwengesa Bibilia, kobuwela mukalelo onalibihe yogana eji mandano awo na Yehova. (Masal. 145:18, 19) Akala yogana yawo enowiwanana na wunuwiha mikalelo dha Okristu, kobuwela mukalelo onawukamihedhe mukalelo obu wiwanana na attu ena. (Kol. 3:14) Onkoddela nni okosa lista na dhilobo dhapama dhinuttukulela wakwaniha yogana yawo? Mudhidhi na mudhidhi wang’anege lista nawo. Tomáš, ologiwe mundduni ohiloga: “Ddigakana dhilobo dhinjidhene dhinddikamihedha wakwaniha dhogana dhaga, enele okala yorutxa miyo ohivilibihedha wi ddakwanihedhe.”

7. Txini emukamihedhile Julio na mwadhiye wakwaniha yogana yawa?

⁷ Otamele mudhidhi wa okala na attu anawukamihedhe. (Gano 13:20) Koona emukamihedhile Julio na mwadhiye wakwaniha yogana yawa ya ovilibihedha mmabasani a olaleya. Iyene ohiloga: “Iyo nihitamela okana amarho agalogile na iyo sabwa ya yogana yehu vina aganikamihedhile. Enjene mwa awene ahikana dhogana dhakene na dhehu vina ahinivaha malago apama. Amarho ehu antamela oziwa mukalelo onedda dhogana dhehu, nigafwanyiwa dhokubanyiha awene annikamihedha.”

8. Txini egapadduwile iyo kojedhela okana efunelo wi nakwanihe yogana yehu? (Koona vina foto.)

⁸ Mwebaribari mwa iyo notene, ahikalawo malabo ahinkana iyo efunelo yokosa dhilobo. Kito, eji enele onittukulela ohakwanihedha dhogana dhehu? Nne. Kobuwela wili yotagiha ya barku ya vela. Pevo jinimutukuma barkuya wi afiye ondowiye mbwenyi guru ya pevo enodhaga otxinja, malabo mena pevoya kinoba. Kito barkuya onowimela sabwa ya ejuwene? Nne. Enowodheya barkuya odhowa osogorho. Motagiha, barku dhina dha vela dhihikana mutori obe ng’ombo, dhinlabihedhiwa mpaka barkuya ofiya. Efunelo yehu enoladdanihiwa na pevo, malabo mena pevo enowoba oku malabo mena kunkala pevo. Yakene jimpadduwa na iyo, dila dhina  kaninkana wene efunelo yokosa dhilobo. Iyo nigajedhela okana efunelo wi nakwanihe yogana yehu ninodhaga ohakwaniha. Dhahene ninga munwodheyela barku ofiya ondowiye masiki s’ohikalawo pevo, enowodheya wakwaniha dhogana dhehu masiki nihikanaga efunelo. Kahiye yovevuwa, mbwenyi japama okosa ejuwene. Ndoweni none malago anfwanyelihu ofwara.

9. Enofuneya ovilibihedha wakwaniha yogana masiki nihikanaga efunelo yokosa ejuwene? Kavaha yotagiha.

⁹ Yehova kanfuna wi nikose dhilobo sabwa ya odideliwa, iyene onfuna wi nikose na wagalala. (Masal. 100:2; 2 Kor. 9:7) Akala weyo kuna efunelo yowakwaniha yogana, onofwanyela ovilibihedha? Koona yotagiha ya murumiwi Paulo. Iyene ohiloga: “Ddinowanana mwili waga, ddinokurumutxa okala mudhari waga.” (1 Kor. 9:25-27) Paulo wannivilibihedha okosa dhapama masiki ahikanaga efunelo. Yehova wonamo dhavi mabasa a Paulo? Yehova wahagalala na ovilibihedha wa Paulo vina ohimuttuva.—2 Tim. 4:7, 8.

10. Ekaleli nni yapama ovilibihedha wakwaniha yogana masiki akala kanina efunelo?

¹⁰ Na mukalelo wakakene, Yehova onowagalala aganonaga nivilibihedhaga wakwaniha yogana yehu masiki akala kanina efunelo yokosa ejuwene. Enimuttukulela Yehova wagalala jawi iyo ninivilibihedha okosa yoganaya kahiyo sabwa ya oziveliwa na enkosihu, mbwenyi sabwa yomukwela. Dhahene ninga mmuttuveliye Paulo sabwa ya ovilibihedha waye, Yehova onele onittuva sabwa ya ovilibihedha wehu. (Masal. 126:5) Nigona wi Yehova ononiruriha, iyo ninowenjedhedha efunelo yehu. Murogora wo Polónia onkuweliwa Lucyna ohiloga: “Malabo mena kaddinkana efunelo yodhowa mmabasani a olaleya, ttabwattabwa ddigalema. Mbwenyi wagalala onkana miyo ddigeyelela vatakulu, nvaho wapama onda wa Yehova.” Ndoweni none enfwanyela iyo okosa nigona wi kanina efunelo.

11. Txini enfwanyela iyo okosa wi nikale attu ovipimelela?

¹¹ Kalobela okumbiraga ovipimelela. Ovipimelela ewodhelo ya wang’anela dhokosa dhehu vina dhiniwamo iyo. Dila dhina enotapulela oviyang’anela wila ninakose dhilobo dhabure. Iyo vina ninofuna ovipimelela wi nikane efunelo yokosa elobo yapama, ttabwattabwa akala eloboya jorutxa vina kanina efunelo yokosa. Kudduwale wi ovipimelela onokosa mpaddi wa dhimbaala muya nona omulobe Yehova wi awukamihedhe wunuwiha mukalelo obu wamakamaka. (Lk. 11:13; Gal. 5:22, 23) Davidi ologiwe mundduni wanrutxiwa okosa nsunzo naye nomunya; iyene ohiloga wi emukamihedhile, okosa malobelo. Iyene ohenjedhedha: “Miyo ddanimukumbirha Yehova malabo etene wi addikamihedhe okala muttu wovipimelela. Na nikamihedho naye miyo ddahikosa matadelo apama a okosa nsunzo nomunya se olupiha.”

12. Nlebo na Kohelét 11:4 eniwanana dhavi na dhogana dhomuyani?

¹² Kujedhele dhilobo wuweddelaga deretu. Mwilaboni mpu munkalihu, kaninfwanyela ojedhela dhilobo dhotedhene oneddelaga deretu. Nigajedhelaga ejuwene kaninawodhe wakwaniha yogana yehu. (Kengesa Kohelét 11:4.) Mbali onkuweliwa Dayniel ohiloga: “Kuli mudhidhi wofwanyelela. Mbwenyi enowodheya ofwanya mudhidhi wofwanyelela nigaroma wakwaniha yogana yehu.” Mbali onkala o Uganda onkuweliwa Paul onologa mwaha mwina ohinfwanyelela iyo olupihedha dhilobo: “Nigaroma okosa elobo masiki na makattamiho, ninonvaha Yehova elobo enwodhiye oruriha.”—Mal. 3:10.

13. Ekaleli nni yamakamaka otamela wakwaniha yogana ofwaraga ttarho modha-modha?

 ¹³ Orome vang’ono-vang’ono. Enodhaga opadduwa ohikana efunelo sabwa yogana yawo okala ninga yorutxa wakwanihedha. Ekalaga dhahene karoma ovirihagamo ttarho modha-modha. Akala yogana yawo ja omwengesa Bibilia wantero, ononamo dhavi oroma wengesa mitala dhing’onovi valaboni? Tomáš, ologiwe omaromo wa nsunzo ntti kawodha omwengesa Bibilia wantero yaka modha. Iyene ohiloga: “miyo ddihinonelamo wi ddantamela wengesa dhilobo dhinjidhene mudhidhi wakakene. Nona ddahigana oroma wili, dila eji ddahigana wengesa vang’ono-vang’ono valaboni vina otxima wi dditanalele dhengesa miyo. Yodhelavoya ddahiroma oziveliwa omwengesa Bibilia.” Oziveliwa wengesa Bibilia omukamihedha Tomáš’ omwengesaga Bibilia mudhidhi mwinjene. Omamalelowa wahiwodha omwengesa Bibilia wantero. c

14. Makattamiho gani agadhile onipatta nanda arutxiha wakwaniha dhogana dhehu?

¹⁴ Masaka mena enorutxa wakwaniha yogana masiki akala muttuya ohikana efunelo vina ddovisasanyedha. Motagiha, dhilobo dhohijedheleya dhinodhaga onitximiha wakwaniha yogana yehu. (Koh. 9:11) Iyo ninodhaga opattiwa makattamiho aganittukuleli okumuwa vina ohikana guru. (Gano 24:10) Sabwa yokala attu ohiligana ninodhaga okosa yovonya eganirutxihile wakwaniha yogana yehu. (Rom. 7:23) Obe ninodhaga okala olemene. (Mt. 26:43) Txini enanikamihedhe okwaranya makattamiho obe siku nihilihu deretu?

15. Ninkoddela nni ottiya makattamiho onitximiha? Katapulela. (Masalmo 145:14)

¹⁵ Kuttiye makattamiho wutximiha wakwaniha yogana yawo. Bibilia onologa wi masiki nifwanyiwe makattamiho enowodheya odhowa vasogorho ttabwa-ttabwa na nikamihedho na Yehova. (Kengesa Masalmo 145:14.) Philip  ologiwe mundduni ohiloga: “Wi ddiziwe wila dhilobo dhinoddeddela deretu miyo kaddinzuzumela dila dhimmotta miyo. Ottiya ejo ddinzuzumela dila dhinvenya miyo baddigadhowa osogorho.” Davidi, ologiwe mundduni ohiloga: “Miyo kaddinang’ana makattamiho obe labo nihinvenya miyo deretu ninga dhoweha, mbwenyi ddinona ninga gari ya olagiha omukwela waga Yehova.” Nigadhowaga vasogorho masiki na makattamiho, ninomulagiha Yehova wi ninfuna nimuzivelihe iyene. Yehova onowagalala vaddiddi agawuwonaga ovilibihedhaga wakwaniha yogana yawo!

16. Dhorutxa dhingumanana iyo dhinnisunziha eni?

¹⁶ Kasunza na dhorutxa dhigumaniliwena. Kavivuze, ‘Txini etotile yorutxa eji? Enofuneya miyo okosavo elobo wi eji enapadduwe wili?’ (Gano 27:12) Masaka mena dhorutxa dhimpattiwa iyo, dhinodhaga woniha wi yogana esakulilihu kaninawodhe wakwaniha. Akala eji jinupadduwela kobuwela akala onele owodha wakwaniha yogana yawo. d Akala weyo kunwodha wakwaniha yogana yawo, txipo kuwubuwele wi Yehova onuwona ninga muttu wowobana.—2 Kor. 8:12.

17. Ekaleli nni yapama wubuwela dhogana dhimalile weyo wakwaniha?

¹⁷ Kobuwela dhilobo dhimalile weyo wakwanihedha. Bibilia onologa “Mulugu ddoligana kandduwala mabasinyu.” (Aheb. 6:10) Kakosa yakakene, kudduwale dhogana dhotene dhimalile weyo wakwanihedha. Motagiha, okana mandano na Yehova—wawaddela attu ena mwaha wa iyene vina obatiziwa. Dhawene ninga muwodhiliwe wakwaniha dhogana dhawo mundduni, onele owodha wakwaniha dhogana dhina weyo ovanene.—Fil. 3:16.

18. Elobo gani enfwanyelihu okosa oku nivilibihedha wakwaniha yogana yehu? (Koona vina foto.)

¹⁸ Na nikamihedho na Yehova, enowodheya wakwaniha dhogana dhawo, dhahene ninga muttu onkosa oleddo na barku ya vela onagalala agafiya ondowiye. Mbwenyi kudduwale opurelamo oleddoya. Venevo vandowa weyo ovilibihedhaga wakwaniha yogana yawo, kàgalala sabwa ya woona Yehova arurihaga ovilibihedha wawo. (2 Kor. 4:7) Weyo ogahiyelele mundduni onele wakela maruriho menjene.—Gal. 6:9.