1-2. Elobo gani enaganyedha attu ena?

 WEYO wahiromaga waganyedha akala Yehova onowakula malobelo awo? Akala eli dhawene, kuli weka. Abali na arogora enjene ahirumela wi anowaganyedha, makamaka mudhidhi ongumananina makattamiho. Ejo egapadduwa, enokala yorutxa oziwa akala Yehova onowakula malobelo ehu.

² Mwari mwa nsunzo ntti, ninele wona ennittukulela okuluvela wi Yehova onowakula malobelo a adhari aye. (1 Jo. 5:15) Ottiya ejo, ninele wakula vina mavuzo aba: Mudhidhi mwina ninfiyedhela nni wubuwela wi Yehova txino kanakula malobelo ehu? Na mukalelo gani onakula Yehova malobelo ehu masaka abano?

3. Yehova onfunela eni wi nimulobelelege iyene?

³ Bibilia ononikuluveliha wi Yehova ononikwela vina onononana ttima. (Ajeu. 2:7; 1 Jo. 4:10) Sabwa ya ejuwene iyene ononiwoba wi ninfiyedhe na malobelo. (1 Ped. 5:6, 7) Yehova onofuna venjene onikamihedha wi nikalege ofiyedheya na iyene vina niwodhege owanana makattamiho a mwigumini.

4. Ninziwa dhavi wi Yehova onowakula malobelo a adhari aye? (Koona vina foto.)

⁴ Mbibiliani ninofwanyamo dhologa dhinjene dhinoniha wi Yehova ohakula malobelo a adhari aye. Weyo onowodha wubuwela yotagiha modha? Txino onowubuwela yotagiha ya Mwene Davidi. Okalawo waye wotene, iyene ohagumanana amwiddani enjene, vina dila dhinjene omukumbirha Yehova na nlobelo wi amukamihedhe. Dila modha iyene wahilobela dhahi: “Nabuya vuruwanani nlobelo naga. Na ororomeleya  wenyu, akelaní kutho yaga; nomyala wenyu murima, dditanalení.” (Masal. 143:1) Yehova wahakula malobelo a Davidi vina wahinvuna mmakattamihoni owopiha. (1 Sam. 19:10, 18-20; 2 Sam. 5:17-25) Jijuwene emuttukuleli Davidi ologa dhahi: “Nabuya onoawaddamela etene animwithana.” Iyo vina ninorumela na esi dhilogile munasalmo.—Masal. 145:18.

5. Kavaha yotagiha enoniha wi Yehova kakulile malobelo a adhari aye dhahene ninga mwajedhelani. (Koona vina foto.)

⁵ Txino Yehova kanakula malobelo ehu ninga mwajedhelihu. Jijuwene empadduweli murumiwi Paulo. Iyene wahimuloba Yehova wi amukutxe mwinga wamulata mmaningoni. Paulo wahimuloba Yehova dila ttaru amwaddelaga makattamiho akene. Koddi Yehova wahakula malobelo aba? Ndde, mbwenyi kahiyo dhahene ninga mwajedhela Paulo. Ottiya ogomiha makattamiho aye, Yehova wahinvaha guru yafuniye wi adhowegevi amulabelaga Iyene nororomeleya.—2 Kor. 12:7-10.

6. Sabwaya jani masaka mena egoneyaga ninga Yehova kanakula malobelo ehu?

⁶ Masaka mena Yehova onowakula malobelo ehu na mukalelo wahajedhelihu. Mbwenyi nikane ebaribari wi Yehova onoziwa mowakwana-mwene ejile eli yapama mwa iyo. Enowodheya iyene onirela dhilobo dhotene okwaranya dhinimulobihu obe dhinubuwelihu. (Ef. 3:20) Nona yowakula ya Yehova modhela malobelo ehu enodhaga ofiya na mudhidhi obe na mukalelo wahajedhelihu.

7. Kavaha yotagiha enoniha wi dila dhina enofuneya otxinja mubuwelo wa malobelo ehu.

⁷ Txino enofuneya otxinja mubuwelo wa malobelo ehu, niganonelamo ejile ennifunana Yehova. Koona empadduweli mbali onkuweliwa Martin Poetzinger. Muvireli mudhidhi mung’onovi mmaleliye otela, Mbali Poetzinger wahittukuleliwa mburo wotxedhiwa na akadda Nazi. Vamaromo iyene wahimukumbirha Yehova wi amburutxewo wego okule watxedheliwiye wi eyelele vatakulu amukoye mwadhiye vina azuzumele mabasa olaleya. Mbwenyi muvirile sumana bili, yahidha woneya wi eji kiyali efunelo ya Mulugu. Mwa venevo iyene oroma olobela dhahi: “Yehova ddinowukumbirhani wi muddilagihe enddinfunana nyuwo.” Venevo iyene oroma wawubuwela abali ena atxedheliwe wenewale na iyene. Enji mwa awene ali ozuzumene sabwa ya awadhiwa vina aniwa. Vasogorhova Mbali Poetzinger wahilobela dhahi: “Ddinowutamalelani Yehova sabwa ya mabasa maswa  addittomelinyu. Muddikamihedhe wi ddiwodhe walibiha vina wapangarhaza abalaga.” Iyene wahidhowavi akosaga mabasa aba mwari mwa vyaka tanu na nayi!

8. Txini ehinfwanyelihu odduwala nigakosaga malobelo ehu?

⁸ Kanidduwale wi Yehova ohikana yogana vina onele wakwaniha yoganaya mudhidhi opimeleliye. Yogana ya Yehova enovolowelana na ogomiha kakamwe makattamiho otene antota goyi masaka abano—dhifoyo dha mwilaboni, maredda vina okwa. Yehova onele olabihedha Omwene waye wi akwanihedhe yogana yaye. (Dan. 2:44; Ovuh. 21:3, 4) Mbwenyi oku nijedhelaga ofiya wa siku ntto, Yehova onomuttiya Satana olamulela elabo. b (Jo. 12:31; Ovuh. 12:9) Kowiliwa Yehova wela ogomiha makattamiho angumanana attu masaka abano, eji egahidha woniha ninga omwene wa Satana onkosa dhilobo dhaderetu. Nona enfuneya ja iyo ojedha wi Yehova akwanihe dhogana dhaye, mbwenyi eji kintapulela wi Yehova kannikamihedha. Ovano ninfuna none nikamihedho ninnivaha Yehova masaka abano.

9. Yehova onnikamihedha dhavi nigakosaga dhogana? Kavaha yotagiha.

⁹ Yehova ononivaha eziwelo. Yehova ohipikirela wi onele onivaha eziwelo wi niwodhe okosa dhogana dha malago. Iyo nigafunaga okosa dhogana dhamakamaka dha mwigumini mwehu, ninofuna venjene eziwelo yaye. Motagiha, akala ninele okala aziye obe ninele otela obe oteliwa. (Tia. 1:5) Koona yotagiha ya murogora mmodha wa muziye onkuweliwa Maria. c Iyene walaba ninga pionera wa mudhidhi wotene, vasogorhova omuziwa mbali mmodha. Iyene ohiloga dhahi: “Iyo nahikala amarho, vasogorhova nahiroma ofunana. Miyo ddahiziwa wi ddanfwanyela okosa yogana. Sabwa ya ejuwene ddahikosa malobelo menjene. Miyo ddafuna wi Yehova eddihe ttarho dhaga, mbwenyi ddanziwa wi wafwanyela okosa yosakula yomariha ddi miyo.” Maria ohizinddiyela wi Yehova ohakula malobelo akosiye akumbirhaga eziwelo. Dhavi? Iyene ohiwodha ofwanya mitoma dhaloga makani atameliye, dhidhile omukamihedha okwaranya dhowaganyedha. Iyene vina ohivuruwana malago apama anvahile maye. Dhotene esi dhimukamihedha Maria wubuwela pama makani otene vina omamalelowa iyene ohiwodha okosa yosakula yaderetu.

10. Ninga munlogela Filipi 4:13, txini enkosa Yehova wi akamihedhe adhari aye? Kavaha yotagiha. (Koona vina foto.)

¹⁰ Yehova ononivaha guru wi niwodhe ovilela. Dhahene ninga ekosiliye na murumiwi Paulo, Yehova ononivaha guru enfunihu wi  nivilele makattamiho. (Kengesa Filipi 4:13.) Koona mukalelo omukamihedhile Yehova mbali onkuweliwa Benjamin owanana makattamiho orutxa. Muzombweni mwaye, Benjamin ohivira mudhidhi mwinjene akalaga na amudhaye mburo wattawela anamattawa koddo o Afrika. Benjamin ohiloga dhahi: “Miyo dila dhinjene ddannimuloba Yehova wi addikamihedhe okosa dhilobo dhaderetu vamentoni vaye. Yehova ohakula malobelo aga, iyene oddikamihedha okana murenddele, oliba murima wi ddilaleye vina ovahiwa mapublikasau addikamihedha wi ddikalegevi olibene mpaddi womuyani. Wengesa dhotagiha dha abali ena, vina osunza mukalelo wakamihedhile Yehova ehiddikamihedha okalavi olibene.”

11-12. Yehova onalabihedha dhavi abalihu wi akule malobelo ehu? (Koona vina foto.)

¹¹ Yehova ononikamihedha alabihedhaga abalihu. Omattiyu womariha Yezu ahinatti okwa, wahilobela venjene. Yezu kafuna attu wubuwelaga wi iyene wahipigidha nzina na babe. Sabwa ya ejuwene iyene wahimunlela Yehova wi ahittiye ejo opadduwa, mbwenyi ottiya ovirihamo yokumbirha ya Yezu Yehova wahimuruma anju wi amulibihe. (Lk. 22:42, 43) Na mukalelo wakene, Yehova vina onowodha onikamihedha amulabihedhaga mbali wi aniligarele obe adhe anoone wi anipangarhaze. Ebaribariya jiji, enowodheya iyo notene otamela gari wi niloge “mazu apama” na abalihu obe okosa elobo wi napangarhaze.—Gano 12:25.

¹² Koona epadduwile na murogora onkuweliwa Miriam. Sumana dhing’onovi mamune ahinatti okwa, Miriam wali yeka vatakulu, iyene wankubanya vaddiddi vina wahikukumuwa. Iyene wakala olilavi mudhidhi wotene vina wannimutamela muttu wologana makani. Iyene ohiloga dhahi: “Miyo kaddawodha omuligarela muttu, venevo miyo omulobelela Yehova. Ddunlaga oku ddilobelaga, mudhidhi wakene telefoni oruma. Wali munddimuwa wa mmulogoni wofiyedheya vaddiddi na miyo.” Miriam ohipangarhazeya vaddiddi na nikamihedho nivahile munddimuwa oddule wa mulogo na mwadhiye. Iyene ohikana nikuluvelo wi ddi Yehova wamukosihile mbali oddule omuligarela.

13. Kaloga nipadduwo ninoniha wi Yehova onowodha walabihedha attu ahinimulabela wi akule malobelo ehu.

 ¹³ Yehova onowodha walabihedha attu ahinimulabela wi anikamihedhe. (Gano 21:1) Dila dhina Yehova onowodha wakula malobelo ehu akosihaga attu ahinimulabela wi anikamihedhe. Motagiha, Yehova ohimukosiha Mwene Artaxerxes omurumeliha Nehemiya wiyelela o Jeruzalemi wi akamihedhe ovenyihedhiwa wa sidadi. (Nem. 2:3-6) Masaka abano vina, Yehova onowalabihedha attu ahinimulabela wi akose yakene.

14. Nipadduwo na Soo Hing nukamihedhile dhavi? (Koona vina foto.)

¹⁴ Murogora onkuweliwa Soo Hing ohona nikamihedho ninvahile Yehova amulabihedhaga mediku waye. Mwanaye wa mwana mulobwana ohitabuwa venjene na oredda (problemas mentais). Mumaleli opattiwa mwanawa na ngovi, iyene na mamunaye ahigana ottiya mabasa awa wi arome omuzuzumela mwaniwa. Sabwa ya ejuwene, awene ahiroma ogumanana makattamiho a ohikana kobiri. Soo Hing ohiloga wi iyene wahigoma, kaziwa akala agahiwodha owanana makattamihoya. Vasogorhova iyene omulobelela Yehova na murima waye wotene amukumbirhaga nikamihedho. Mediku wamukamihedha mwanaye, wahakamihedha anamudhi abale. Sabwa ya ejuwene Soo Hing na mamune ahiwodha wakela nikamihedho na guverno vina ahivahiwa ntakulu n’okala. Omamalelowa iyene ohiloga dhahi: “Iyo nihona nlada na Yehova ninikamihedhaga. Txibarene iyene Namewa malobelo.”—Masal. 65:3, [Masal. 65:2 TNM].

15. Txini emukamihedhile murogora mmodha oziwa wi Yehova wannakula malobelo aye?

¹⁵ Kahiyo dila dhotene onakuliwa malobelo ehu na mukalelo wotikiniha. Mbwenyi mukalelo onakula Yehova malobelo ehu, bubuwene onfunihu wi nidhowegevi nikalaga oweddeyana na iyene. Sabwa ya ejuwene kakala txenjewa wi owodhege wona mukalelo onakula Yehova malobelo awo. Murogora mmodha onkuweliwa Yako wobuwela wi Yehova kakula malobelo aye, sabwa ya ejuwene iyene wahiroma olebela vapapelini dhilobo dhotene dhamukumbiriye Yehova. Muvirile mudhidhi mung’onovi, iyene wang’ana dhilobo dhotene dhalebiliye ozinddiyela wi Yehova wahakula dhinjidha dhakumbirhiliye na dhina dhadduwaliliye. Nona japama mudhidhi na mudhidhi  oromaga otanalela mukalelo onakula Yehova malobelo ehu.—Masal. 66:19, 20.

16. Na mukalelo gani mwina onfwanyelihu woniha wi nikana nroromelo? (Ahebreu 11:6)

¹⁶ Iyo ninowoniha wi nikana nroromelo nigamulobelelaga Yehova vina nigarumela dhowakula dha malobelo ehu nihitanalaga mukalelo onakuliye. (Kengesa Ahebreu 11:6.) Koona yotagiha ya Mike na mwadhiye, Chrissy. Yogana yawa yali ya okamihedha o Beteli. Mike ohiloga dhahi: “Mwa vyaka dhinjene iyo nahittikitta petisau yokamihedha o Beteli, makani aba nannimulobelela Yehova dila dhinjene, mbwenyi txipo kanikuweliwe wi nakamihedhe o Beteli.” Awene ahikana nikuluvelo nawi Yehova wanziwa pama mburo wafwanyelani olabihedhiwa deretu. Awene ahidhowavi avilibihedhaga, alabaga ninga apionero a mudhidhi wotene wego wajombeliwa anamalaleya vina ankamihedha mabasa omaga. Ddabuno awene anlaba ninga anameddelela milogo. Mike ohenjedhedha: “Kahiyo dila dhotene dhinakula Yehova malobelo ehu na mukalelo wajedhelihu, mbwenyi mudhidhi wotene iyene onowakula malobelo vina na mukalelo wapama obuwene wahajedhelihu.”

17-18. Mowiwanana na mazu a Masalmo 86:6, 7, nikuluvelo gani ninfwanyelihu okana?

¹⁷ Kengesa Masalmo 86:6, 7. Munasalmo Davidi wahikana nikuluvelo wi Yehova onovuruwana vina onowakula malobelo aye. Enowodheya weyo vina okana nikuluvelo nakene. Dhotagiha dhonilehu munsunzoni ntti, dhinonikuluveliha wi Yehova onowodha onivaha eziwelo vina guru enfunihu wi niwodhe ovilela. Iyene onowodha walabihedha abalihu vina na attu ahinimulabela wi anivahe nikamihedho-nikamihedhovi.

¹⁸ Ebaribariya, jawi kahiyo mudhidhi wotene onakula Yehova malobelo ehu na mukalelo wajedhelihu. Mbwenyi nikane nikuluvelo ntti, iyene onele wakula malobelo ehu vina onele onivaha dholoba dhehu mudhidhi wofwanyelela. Nona, kadhowavi olobelaga na nroromelo vina na nikuluvelo nawi Yehova onele wukoya ovanene. Mwilaboni eswa endawo iyene onele wavaha attu otene dhotene dhinunlelani.—Masal. 145:16.