NSUNZO 20
JIBO 67 ‘Dhowani Mwalaleye’
Odhowegevi Olaleyaga Sabwa ya Okwela!
Enofuneya wi vamaromo attu a malogo otene afiyedhiwena muttaka wapama.—MK. 13:10.
DHINASUNZE IYO
Ninele wona wi okwela ononittukulela ovingela mabasa a olaleya na murima wotene.
1. Txini esunzilihu vamatugumanoni a yaka ya 2023?
VAMATUGUMANONI a yaka ya 2023, a iyo nihiwa ononihedhiwamo wa esile dhinrumelihu vina nihiwa dhovuwiha dhottabiha sabwa ya mabasa ehu a olaleya. Motagiha, nihisunza wi attu ena anodhaga okana gari ya omulabela Yehova Babilónia Munddimuwa agamala otolotxiwa. Nihisunza vina wi oromana Novemburu wa 2023, mwa anamalaleya ena kigali yofuneya olebela mabasa otene ankosani mmalaleyoni. Matxinjo aba anoniha wi mabasaya aba ahittiya okala amakamaka, obe kahiye anamaguve? Kahiye mwenemo!
2. Mabasa a olaleya akalele nni anamaguve? (Marko 13:10)
2 Kadda labo ninvira mabasa a olaleya anodhowavi akalaga anamaguve. Sabwaya jani? Sabwani mudhidhiya onottamaga vaddiddi. Katanalela nivuhulo nilogile Yezu sabwa ya mabasa a olaleya masiku omariha. (Kengesa Marko 13:10.) Mowiwanana na mazu oladdana ali va Mateu 24:14, Yezu ohiloga wi miselu esi dhapama dhigahilaleyiwa mwilaboni mwetemwene “ogoma” wa elabo ohinafiya. Nzu ntti ogoma, ninaddiwana ogoma wa dhilobo dhabure dhili mwilaboni mwa Satana. Yehova ohittoma siku vina mudhidhi onapadduwe dhilobo esi. (Mt. 24:36; 25:13; Mer. 1:7) Kadda labo ninvira labona ntto ninowaddamela. (Rom. 13:11) Oku omagomo ohinafiya, iyo ninele odhowavi nilaleyaga.
3. Txini ennittukulela olaleya?
3 Nitanalelaga sabwa ya mabasa a olaleya, enokala yapama oroma otamela yowakula ya nivuzo ntti namakamaka: Ninlaleyela nni miselu dhapama? Na mazu ogwaddela, ennittukulela olaleya okwela. Dhinkosihu mmabasani a olaleya dhinowoniha okwela wehu—okwela miselu dhapama, wakwela attu, opitta dhetedhene omukwela wehu Yehova vina nzina yaye nokoddela. Ndoweni nisekeserheni elobo modha-modha.
NINLALEYA SABWA YA OKWELA MISELU DHAPAMA
4. Ninviwamo dhavi nigakela miselu dhowagalaliha?
4 Karoma otanalela mukalelo waviwilemo weyo vewiliwe muselu wohagalaliha—txino sabwa ya wiwa wi munammudhi wawo okana mwana obe ofwanya ganyo yatamelitxiye? Kaninaganyedha wi eji ehuttukulela wawaddela anamudhi obe amarho awo. Koddi ehipadduwa yakene vewiliwe weyo dila yoroma miselu dhamakamaka dhimpitta dhotedhene—miselu dhapama dha Omwene wa Mulugu?
5. Vewiliwe dila yoroma ebaribari ya Nzu na Mulugu waviwilemo dhavi? (Koona vina mafoto.)
5 Karoma otanalela mukalelo oviwilemo weyo dila yoroma esunziliwe ebaribari ya Nzu na Mulugu. Weyo ohizinddiyela wi Babi wawo wa wirimu onowukwela, ohiziwa wi iyene onfuna wila weyo okose mpaddi wa anamudhi aye animwebedha vina ohipikirhela ogomiha wiwa opa na matabuwo, ottiya ejo ohikana njedhelo na wawona wili amudhawo akwile eyelelaga okalawo mwilaboni eswa—na dhilobo dhinjene dhisunziliwe. (Mk. 10:29, 30; Jo. 5:28, 29; Rom. 8:38, 39; Ovuh. 21:3, 4) Ebaribari eji esunzile weyo ehiddiginya murima wawo. (Lk. 24:32) Weyo wankwela esile dhasunziwe ottiya ejo kuwamalilena wahigana wawaddela attu ena!—Kaladdaniha na Jeremiya 20:9.
Dila yoroma esunzilihu ebaribari ya mBibiliani, nahagalala venjene vina nanfuna wawaddela attu otene! (Kang’ana ddima 5)
6. Txini ensunziliwe na Ernest vina Rose?
6 Koona nipadduwo ntti. Mbali onkuweliwa Ernest b babe okwile vanniyena vyaka kumi dhobaliwa. Ernest onowubuwela: “Miyo ddanivivuza: ‘Koddi babani odhowile wirimu? Obe na labona ddinele omona wili?’ Miyo ddanasilila aima ena ahakweliwe ababiwa.” Mudhidhi na mudhidhi Ernest wandhowa omasiye vekuttani watibeliwe babe, bakokora baroma olobela: “Eh Nabuya Mulugu, miyo ddinfuna ddiziwe oli babani.” Muvirile vyaka 17 babe bamalile okwa, Ernest wahirumela omusunza Bibilia na Anamoona a Yehova. Iyene ohisunza mBibiliani wi amarafula kanziwa elo ali ninga muttu ongona, ohinonelamo vina wi amarafula anele ovenyihiwa mukwani. (Koh. 9:5, 10; Mer. 24:15) Iyene wahifwanya dhowakula dha mavuzo atamelitxiye! Ernest wanziveliwana vaddiddi ebaribari yasunziye mBibiliani. Mwadhiye Rose, wahivitaganyiha na iyene baroma osunza vina anawaddela attu ena miselu dhapama dha Omwene wa Mulugu. Awene abatiziwe yaka ya 1978. Anziveliwa walaleya attu ena ninga anamudhi, amarho na muttu-muttuvi warumela wavuruwana. Eji edhilena yopurelamo gani? Ernest na mwadhiye Rose ahakamihedha attu okwaranya 70 ofiyedha obatiziwa.
7. Txini empadduwa nigaroma okwela ebaribari ofiyedha wita mitxitxi mmurimani mwehu? (Luka 6:45)
7 Se waganyedha, nigakwela ebaribari ya mBibiliani, bimela mitxitxi mmurimani mwehu, kanniwodha omalana. (Kengesa Luka 6:45.) Iyo niniviwamo ninga anamafwara a Yezu a nsaka noroma alogile dhahi: “Iyo kaninwodha omàlana dhonilehu, dhiwalehu.” (Mer. 4:20) Iyo ninokwela venjene ebaribari vina ninofuna wawaddela attu otene egawodheya.
NINOLALEYA SABWA YA WAKWELA ATTU
8. Txini ennittukulela wawaddela attu ena miselu dhapama? (Koona kasha “ Attu Okwela—Anowakosa Anamasunza.”) (Koona vina foto.)
8 Dhahene ninga Yehova na Mwanaye Yezu, iyo ninowakwela attu. (Gano 8:31; Jo. 3:16) Ninowaweddela ttagaraga abale ahinna Mulugu vina ahinna njedhelo. (Ef. 2:12) Awene anedda dila enatotele makattamiho, mbwenyi iyo nihikana elobo entamelani—miselu dhapama dha Omwene wa Mulugu. Wakwela vina waweddela ttagaraga ononittukulela okosa guru wi nafiyedhena miselu dhapama. Miselu dhapama dhinalaleya iyo dhinodhaga oddiginya mirima dhawa vina wavaha njedhelo, dhinele wakamihedha ofwanya egumi yamakamaka eliwo ovanene vina wavaha gari ya okana egumiya-egumiya—okalawo na mukalakala—mwilaboni eswa ya Mulugu.—1 Tim. 6:19.
Wakwela attu vina waweddela ttagaraga ononittukulela walaleya miselu dhapama (Kang’ana ddima 8)
9. Miselu gani dhinlaleya iyo sabwa ya musogorho, vina sabwaya jani? (Ezekiyel 33:7, 8)
9 Wakwela attu ononittukulela wawaddela sabwa ya ogoma wa elabo eji yabure onaddamela. (Kengesa Ezekiyel 33:7, 8.) Iyo ninowaweddela ttagaraga anamandamani ehu vina amudhihu ahili Anamoona a Yehova. Attu enjene kanziwa wi—“onele okala goyi enddimuwa ehinoneyaga oromana vapaddutxiwe elabo ofiyedha masaka abano, nne kinoneye vina.” (Mt. 24:21) Iyo ninfuna naziwihe dhinfuna opadduwa nsaka ntto na ottongiwa—marelijiau onyengetta anele otolotxiwa, vasogorhova dhilobo dhotene dhabure dhili mwilaboni ya Satana dhinele otolotxiwa kakamwe mu Armagedón. (Ovuh. 16:14, 16; 17:16, 17; 19:11, 19, 20) Ninolobela wi attu enjene avuruwane muselu obu onawaddela iyo vina agane omwebedha Yehova vamodha na iyo. Ki niloge dhavi sabwa ya amudhihu na attu ena ankodda wiwelela miselu esi ovanene?
10. Enfuneyela nni odhowavi nawaddelaga attu dhinfuna opadduwa mohigonela?
10 Ninga monile iyo nsunzo nivirile, txino Yehova onodhaga wavuna abale anatxinje mirima dhawa baroma omuroromela, agoona otolotxiwa wa Babilónia Munddimuwa. Akala pumwenemo, ja namaguve wawaddela dhinapadduwe. Karoma otanalela eji: Nsakana ntto nigafiya awene anodhaga wubuwela esi dhinawaddelihu ovanene. (Kaladdaniha na Ezekiyel 33:33.) Txino awene anele otanalela esile dhawaddela iyo nanda eji biyattukulela omulabela Yehova vamodha na iyo vahinatti oya. Ninga namang’anela wa mukambura w’o Filipi watxinjile murima waye mmaleliye woona ottekenyeya wapadduwile, ena ahinrumela miselu dhinalaleya iyo ovanene anodhaga otxinja mirima dhawa agaroma wona otolotxiwa wa Babilónia Munddimuwa.—Mer. 16:25-34.
NINOLALEYA SABWA YA OMUKWELA YEHOVA VINA NZINA NAYE
11. Ninanvahe dhavi Yehova nttittimiho, nriho vina guru? (Ovuhulela 4:11) (Koona vina mafoto.)
11 Mwaha wamakamaka onnittukulela olaleya miselu dhapama ku omukwela Yehova vina nzina naye nokoddela. Iyo ninowona mabasa a olaleya ninga marhe a omuttittimiha Mulugu onimukwelihu. (Kengesa Ovuhulela 4:11.) Na murima wehu wotene ninorumela mazu aba: Yehova Mulugu onofwanyelela wakela nttittimiho, nriho, guru vina weddeyana wa alabeli aye. Iyo ninomuttittimiha vina ninomuriha Yehova nigawaddelaga attu ena ebaribari enoniha wi iyene ddi muttanddi wa dhilobo dhetene vina ddi iyene onipaddutxile. Iyo nininvaha guru dhehu, dhokana dhehu vina mudhidhi wehu—nigadhowaga mmabasani a olaleya wi nawaddele attu enjene egawodheya. (Mt. 6:33; Lk. 13:24; Kol. 3:23) Na mazu ogwaddela iyo ninowalaleya attu sabwa ya omukwela Mulugu. Ottiya ejo iyo ninolaleya sabwa ya nzina naye vina ejile entapulelani. Dhavi?
Ninomuttittimiha Yehova nigalabihedha guru dhehu, mudhidhi wehu na dhokana dhehu, wi nikamihedhe mabasa a olaleya mpaka munwodhelihu (Kang’ana ddima 11)
12. Mmabasani a olaleya, ninkoddeliha dhavi nzina na Yehova?
12 Omukwela Yehova ononittukulela ottittimiha nzina naye. (Mt. 6:9) Eji entapulela wi enofuneya waziwiha attu wi dhotene dhilogile Satana mwaha wa Yehova, sottambi. (Wita 3:1-5; Job 2:4; Jo. 8:44) Mmabasani a olaleya iyo ninombarela Yehova, nawaddelaga ebaribari abale otene anninvuruwana. Iyo ninfuna wi otene aziwe wi mukalelo munddimuwaya wa Yehova okwela, olamulela waye buli wamakamaka vina woligana, Omwene waye bunagomihe matabuwo otene vina bunadhena murenddele na wagalala wa attu otene. (Masal. 37:10, 11, 29; 1 Jo. 4:8) Nigamelela ekalelo ya Yehova mmabasani a olaleya, ninokoddeliha nzina naye vina ninowoniha wi ninkalawo mowiwanana na nzina ninttukulehu. Dhavi?
13. Ninziveleliwani okuweliwa Anamoona a Yehova? (Izaiya 43:10-12)
13 Yehova ohinittana wi nikale “anamona” aye. (Kengesa Izaiya 43:10-12.) Vyaka dhing’onovi mundduni, karta na abali a Nikuru Nolamulela nihiloga dhahi: “Nttittimiho ninjavo muttu-muttu wa iyo ku okuweliwa ninga Munamoona wa Yehova.” c Ninlogela nni dhahene? Katanalela yoladdaniha eji. Komutamelaga muttu wi avahe onamoona wa makani awo otribunali, ogamusakulile muttu wokuluveleya vina onziwiwe wi agahivaha onamoona wokuluveleya. Mwa onisakula wi nikale Anamoona aye, eji enoniha wi Yehova ononiziwa deretu vina ononikuluvela wi ninele ovaha onamoona ononiha wi iyene bahi ddili Mulugu webaribari. Nttittimiho ninddimuwa vaddiddi okala Anamoona aye, nona ninovilibihedha ovuwiha nzina naye. Mwa okosa ejuwene ninolagiha wi txibarene nili Anamoona a Yehova!—Masal. 83:18; Rom. 10:13-15.
NINELEGE OLALEYAVI MPAKA OMAGOMO
14. Dhilobo gani dhotikiniha dhinapadduwe musogorho?
14 Ninojedhela wona dhilobo dhotikiniha musogorho! Na mareliho a Yehova ninojedhela wi attu enjene anele orumela ebaribari goyi enddimuwa ehinaroma. Ottiya ejo, iyo ninowagalala venjene sabwa ya oziwa wi masiki nsaka na goyi enddimuwa onakalani mudhidhi worutxa vaddiddi wa nlogo na attu—txino ninele wawona attu enjene abudduwaga mwilaboni ya Satana wi avitaganyihe na iyo wila nimuttittimihe Yehova!—Mer. 13:48.
15-16. Txini enadhowegehu nikosaga, vina mpaka mudhidhi gani?
15 Masiki dhawene, nikana mabasa menjene a okosa. Iyo nihikana gari ya okamihedha mabasa ahinakosiwe dila yanawili—olaleya mwilaboni mwetene miselu dhapama dha Omwene wa Mulugu. Mudhidhi wakene, ninele odhowavi nawaddelaga attu sabwa ya esile dhinapadduwe mohigonela. Attu anofwanyela oziwa wi omagomo wa elabo eji yabure onowaddamela. Nona mudhidhi wa ottonga ogafiya awene anele oziwa wi muselu walaleya iyo wadha wa Yehova.—Ezek. 38:23.
16 Mwa dhahene txini enfwanyelihu okosa? Sabwa ya okwela miselu dhapama—wakwela attu, ttabwa-ttabwa omukwela wehu Yehova vina nzina naye—ninele odhowavi nilaleyaga nowagalala vina nanamaguve mpaka Yehova ologa, “Mabasa a olaleya apula!”
JIBO 54 ‘Dila ya Egumi’
a Matugumano a vayakani akosiwe labo 7, na Otuburu wa 2023, o Nyumbani ya Asembeleya ya Anamoona a Yehova o Newburgh, Nova York, Estados Unidos. Vasogorhova porogaramaya yahilagihiwa mu JW Broadcasting®—Epaddi yoroma elagihiwe Novemburu wa 2023 Epaddi yanawili Janero wa 2024.
b Koona mutoma “A Bíblia Muda a Vida das Pessoas—Fiquei impressionado com as respostas da Bíblia,” mu A Sentinela de 1º de fevereiro de 2015.