1-2. Mowiwanana na 1 Pedro 4:7, 8, txini enanikamihedhe ovilela mudhidhi wa makattamiho?

 IYO ninowaddamela omagomelo wa “masaka omariha,” nona ninojeedhela ogumanana makattamiho menjene. (2 Tim. 3:1) Motagiha, mmaleli osakuliwa mulamuleli mpaddi womadhowelo wa nzuwa welabo ya Afrika, attu ahiroma osadduwelana vina owana-wana. Okwaranya myeri mitanu na mmodha, abalihu ali vangovini sabwa ya owana-wana wali mmuruddanimwa. Txini yakamihedhile awene ovilela makattamihoya? Ena ahithawela mmatakulu mwa abali ali mirudda dhobareleya. Mbali mmodha wahiloga: “Ddahagalala okala na akwaga, mwari mwa mudhidhi obule worutxa. Nahilibihana muthu na mukwaye.”

² ‘Goi enddimuwa’ egaroma, ninele wagalala okana akwehu apama annikwela. (Ovuh. 7:14) Nona jofuneya olibiha mandano ehu ovanene. (Kengesa 1 Pedro 4:7, 8.) Ninele osunza na yotagiha ya Jeremiya, okamihedhiwe na mukwaye owodha oviluwa masaka orutxa Jeruzalemi ahinatti otolotxiwa. * Ninawodhe dhavi omutagiha Jeremiya?

3. (a) Txini egamuttukulele Jeremiya okala vaye-vene? (b) Jeremiya wamwaddeli eni namaleba waye Baruk, nanda yodhelavoya jivi?

³ Ofiyedha vyaka 40, Jeremiya wakala na attu amwika ekothi Mulugu, mwa aboya, ena ali anamwanddamani, enaya txino ali amudhaye murudda wa Anatot. (Jer. 11:21; 12:6) Masiki dhawene, iyene kafunile okala vaye-vene. Iyene wahimwaddela  esile dhobuweliye moso waye Baruk wali muthu oweddeyana, mapadduwoya ali mBibiliani. (Jer. 8:21; 9:1; 20:14-18; 45:1) Valeba Baruk dhopadduwa dha mwigumini mwa Jeremiya, yalagiha wi oheeli ahunuwiha okwelana vina orihana muttu na mukwaye.—Jer. 20:1, 2; 26:7-11.

4. Txini yakumbirhile Yehova wi Jeremiya akose, nanda mabasa attomeliwani alibihile dhavi mandano a Jeremiya na Baruk?

⁴ Mwari mwa vyaka dhinjene, Jeremiya wahapanga ana Izrayel mwaha wa esile dhigapadduwile na Jeruzalemi. (Jer. 25:3) Yehova wahavaha mudhidhi ana Izrayel wi atxinuwe, nona wahimukumbirha Jeremiya oleba malago Aye mu nipapi. (Jer. 36:1-4) Txino mwari mwa myeri dhinjidhene, Jeremiya na Baruk ahilaba vamodha mabasa attomeliwani na Mulugu, kavali waganyedha wi awene ahilibihana muttu na mukwaye.

5. Baruk olagihile dhavi wi wali marho wapama wa Jeremiya?

⁵ Mmalelani olebela mu nipapini, Jeremiya wahimuttoma mukwaye Baruk, wi adhowe engesele nlogo museluya. (Jer. 36:5, 6) Noliba murima Baruk wahakwaniha mabasa orutxa attomeliwiye. Kobuwela wagalala wana Jeremiya mwaha wa Baruk orumela ovolowa mumparhani vina odhowa wengesa muselu obule! (Jer. 36:8-10) Amoso o Judá ahiwa wi Baruk wahidhowa mumparhani, nona awene ahimukuwela wila awengesele nipapi nttile na lizu nowiweya! (Jer. 36:14, 15) Amoso abale ahigana omwaddela Mwene Joiyakim dhalogile Jeremiya. Na nriho, amosoya ahimwaddela Baruk: “Dhowá wavitale vamodha na Jeremiya. Vanvitala nyuwo, kavaziweye na muthu-wene.” (Jer. 36:16-19) Aba ali malago apama!

6. Txini yakosile Jeremiya na Baruk vafwara-fwariwani?

 ⁶ Mwene Joiyakim wahisilidhiwa na mazu a Jeremiya ewaliye nona wahiddumeya nipapina vina wahilamula wi Jeremiya na Baruk afugeliwe. Mbwenye, Jeremiya katxutxehile. Iyene wahittukula nipapi nina, wahinvaha Baruk, vina Jeremiya wanimwaddela miselu dha Yehova, Baruk wanleba “dhetene dhamwaddela Jeremiya, mpaganyo wotene wali munipapini naddumeyile Joyakim, mwene w’o Judá.”—Jer. 36:26-28, 32.

7. Txini yapadduwile na Jeremiya vina Baruk sabwa yolaba vamodha?

⁷ Attu anfwanyiwa makattamiho orutxa vamodha anokaanaga mandano ofiyedhana. Jeremiya na Baruk ahilaba vamodha wila alebe wili nipapi naddumehile Mwene wotabala Joiyakim, nona awene ahunuwiha mikalelo dhapama muttu na mukwaye. Ninawodhe dhavi opurelamo na yotagiha ya alobwana aba eeli ororomeleya?

8. Enrutxela nni okala otapuwa na attu ena, nanda ninfuna nivilibihedhe okosa eni?

⁸ Txino ninorutxiwaga okala wotapuwa na attu ena, makamaka akala muttuya wahininyimula. (Gano 18:19, 24) Obe txino ninowubuwela wi kanina mudhidhi vina guru dha wunuwihana mandano ofiyedheyana. Mbwenye, ninofwanyela ovilibihedha. Akala ninfuna wi abalihu akale na iyo mudhidhi worutxa, ninofwanyela wakuluvela ovanene nawaddelaga dhinubuwelihu. Eji ttarho yamakamaka enanikamihedhe okana amarho ebaribari.—1 Ped. 1:22.

9. (a) Yezu otonyihedhi dhavi wi wanakuluvela akwaye? (b) Okala wotapuwa onawukamihedhe dhavi okana mandano oliba na akwawo? Kavaha yotagiha.

⁹ Yezu wahitonyihedha wi wannakuluvela akwaye sabwa ya okala otapuwa nawene. (Jo. 15:15) Enowodheya omutagiha modhela wawaddela akwehu dhilobo dhinnagalaliha, dhinnikubanyiha, vina dhinnizuzumiha. Ofwaseyela onvuruwana muttu mwina agalogaga, enele wukamihedha wona wila moheli mukana mubuwelo, etanalelo vina dhogana dholigana. Koona yotagiha ya murogora oniliwa Cindy wa vyaka 29. Iyene wahikaana mandano na murogora Marie-Louise wali pionera wa vyaka 67. Cindy na Marie-Louise andowa vamodha mmabasani olaleya Matxinai otene na membesi, vina anloga makani ottiyana-ttiyana. Cindy ohiloga, “ddinoziveliwa ologa na akwaga makani a makamaka sabwani ejo enodhikamihedha waziwa vina wavuruwana nofwaseya.” Wila mandano onuwe anofanyeelela  olibihiwa modhela ologa na murima wotapuwa. Dhahene ninga Cindy, akala weyo oli wotapuwa wi ologe makani na attu ena, onele wona wi mandano awo anodhowavi alibaga.—Gano 27:9.

10. Mowiwanana na Gano 27:17, txini empadduwa nigalabaga vamodha na abalihu?

¹⁰ Ninga empadduwele Jeremiya na Baruk, nigalabaga vamodha na abalihu nonaga mikalelo dhawa dhapama, ninele osunza dhilobo dhinji nawene vina ninele okana mandano ofiyedheyana. (Kengesa Gano 27:17.) Motagiha, ogewilemo dhavi kokala mmalaleyoni nanda mukwawo noliba murima atapulelagamo esile dhinrumeliye obe alogaga na nikuluvelo mwaha wa mapikirelo a Yehova? Mohaganyedha wandana wenyu ogahiliba.

11-12. Kavaha yotagiha enoniha wi olaleya na abalihu ononikamihedha olibiha mandano.

¹¹ Koona dhotagiha bili dhinlagiha mukalelo onnikamihedha mabasa olaleya okala ofiyedhana. Murogora oniliwa Adeline, wa vyaka 23, wahimukumbirha mukwaye oniliwa Candice, wi adhowe alaleye murudda wakoodda olaleyiwa. Iyene ohiloga: “Iyo nanfuna olaleya na murima wotene wi niziveliwe na mabasaya. Mbwenye noheeli nanfuna olibihana omuyani.” Awene apurilemo eni sabwa yolaba vamodha? Adeline ohiloga: “Omagomelo wa labo-labo, iyo nanloga makani mwaha wa dhubuwelo dhehu, sabwa ya mukalelo walibiheyihu vina wanikamihedhile Yehova mmabasani mwehu a olaleya. Noheeli nanziveliwa na makani ehu vina nanziwana pama muttu na mukwaye.”

¹² Arogora eli a elabo ya França ali aziye aniliwa Laïla na Marianne, ahilaleya vamodha sumana tanu o Bangui, sidadi enna attu enjene mpaddi wa República Centro-Africana. Laïla onowubuwela: “Miyo na Marianne nahifwanyiwa makattamiho, mbwenye okala wotapuwa na okwela webaribari, olibiha mandano ehu. Ddifiyedha wona wi Marianne wali  muttu ohinrutxa olemelela, iyene wannakwela attu a mmuruddani vina wanlaleya na murima wotene, nona ddannimuriha vaddiddi.” Kili yofuneya omwalela elabo yina wi okaane dhopurelamo esi. Kapura mudhidhi wi odhowe walaleye na abali vina arogora murudda wa mulogo wenyu, onele okana gari ya waziwa pama vina olibiha mandano na awene.

13. Elobo gani enonihu nigalabaga vamodha na abali ehu?

¹³ Nigalabaga vamodha na abali ehu, ottiya woona bahi mikalelo dhawa dhapama ninowona vina dhovonya dhawa. Txini enanikamihedhe okala ofiyedheya na akwehu masiki na dhovonya dhawa? Ndoweni none wili yotagiha ya Jeremiya. Txini emukamihedhile woona mpaddi wa pama wa akwaye othiya ofwaseyela woona dhovonya dhawa?

14. Txini esunzile Jeremiya mwaha wa Yehova, nanda ejo emukamihedhile dhavi?

¹⁴ Jeremiya wahileba nivuru ninttukula nzina naye vina manivuru a Bibilia a Amwene 1 na 2. Kavali waganyedha wi mabasa attomeliwe Jeremiya ahimukamihedha wona wi Yehova onowaweddiha attu ohakwana na nttebwa. Motagiha, iyene wanziwa wi vatxinuwile Mwene Akab, Yehova kamugwihedhe ntowa okalawo waye mbwenye odhile wagwihedha amudhaye. (1 Amwe. 21:27-29) Jeremiya, wanziwa vina dhopadduwa dha Manassé odduwene wamunyimulile Yehova ompitta Akab. Masiki dhawene, Yehova wahimulevelela sabwani iyene wahitxinuwa. (2 Amwe. 21:16, 17; 2 Map. 33:10-13) Mapadduwo aba ahimukamihedha Jeremiya otagiha ovilela wa Yehova vina waweddela ttagaraga akwaye.—Masal. 103:8, 9.

15. Jeremiya otagihile dhavi ovilela wa Yehova varomile Baruk ozuzuma?

¹⁵ Katanalela mukalelo ovilelile Jeremiya varomile Baruk ozuzuma vang’onovi mmabasani attomeliwiye. Iyene kamaguvile onyimuwa, ottiya ejo Jeremiya wahimukamihedha mukwaye Baruk modhela omutonyihedha muselu wapama wa Mulugu. (Jer. 45:1-5) Ninsunzavo eni na dhopadduwa esi?

16. Mowiwanana na Gano 17:9, txini enfanyeelelihu okosa wi mandano ehu akalevi ofiyedheyana?

¹⁶ Mwebaribari, iyo kaninjeedhela oligana wa abali na arogora ehu. Nona, nigamala omaga mandano ofiyedhana, ninofwanyela ovilibihedha odhowavi nilibihaga mandanoya. Akala akwehu anowira yoddawa, txino ninofwanyela wavaha malago andela Munzuni na Mulugu mbwenye noderetu. (Masal. 141:5) Akala awene anoninyimula, ninofwanyela walevelela. Nigamala walevelela, ninofwanyela orabela wawubutxedha yoddawa ekosilani. (Kengesa Gano 17:9.) Masaka abano orutxa jamakamaka ofwaseyela mikalelo dhapama dha abali na arogora ottiya wang’ana dhovonya dhawa! Nigakosa dhawene ninele olibiha onamudhi wehu, vina ninele okala ofiyedheya na akwehu mpaka mmasosoni manddimuwa.

17. Jeremiya olagihile dhavi wi wali marho webaribari mudhidhi wa makattamiho?

¹⁷ Namavuhulela Jeremiya ohilagiha okala marho webaribari mudhidhi wa makattamiho. Motagiha, Ebede-Melek musogorheli wa mwene wahova opiwa na amoso, sabwa ya onvuna Jeremiya mudhidhi wavokeliwiye mutxelani. Mwiwale Jeremiya dhilobo esi, iyene kamaalile, obuwelaga wi mukwaye agahiwodha ovilela mwinyene. Masiki  valiye ofugeliwene, iyene wahimutonyihedha mukwaye Ebede-Melek nipikirelo n’opangarhaza namukoseli Yehova.—Jer. 38:7-13; 39:15-18.

18. Mowiwanana na Gano 17:17, txini enfanyeelelihu wakosela akwehu agafwanyiwa makattamiho?

¹⁸ Masaka abano, abali na arogora anogumanana dhoweha dhottiyana-ttiyana. Motagiha, attu enjene anotabuwa na dhifoyo, ninga ottekenyeya wa mattaka obe koddo na dhilobo dhina. Dhilobo esi dhigapadduwa, ena wa iyo txino ninowawakela abali na arogora aba mmawani mwehu. Enaya anokamihedha avahedhaga kobiri dhawa. Mbwenye notene ninowodha omukumbirha Yehova wi akamihedhe abali na arogora ehu. Nigewa wi mbali obe murogora ohikumuwa, txino kanniziwa enfunihu okosa obe mukalelo onfunihu ologana. Mbwenye notene ninowodha wakamihedha. Motagiha, enowodheya otamela mudhidhi wi nikale vamodha na akwehu. Enowodheya onvuruwana nofwaseya agalogaga. Vina enowodheya omulagiha nlebo nopangarhaza ninziveliwehu. (Iza. 50:4) Yamakamakaya ja wakamihedha akwawo mudhidhi onfunani okala vamodha na weyo.—Kengesa Gano 17:17.

19. Olibiha mandano ovanene onanikamihedhe dhavi musogorho?

¹⁹ Ninofwanyela okaana mandano oliba na abali vina arogora ehu ovanene. Sabwaya? Sabwani amwiddani anele olabihedha miselu dhottambi wi agawe wiwanana wehu. Awene anele otamela onikosiha wi nittiye wakuluvela vina wakamihedha abalihu. Mbwenye ovilibihedha wawa wonimwalaniha onakale webewene. Amwiddani ehu kanawodhe ogomiha okwela onihuna. Kawo elobo enatolotxe omarho wenamudhi wehu. Txibarene, omarho wehu wokwelana onelege odhowavi na mukalakala!