1-2. (a) Mowiwanana na Éfeso 6:16, ninfunela nni wi ‘nroromelo ninikalele ebarelo’? (b) Mavuzo gani anfunihu wakula?

 ‘NROROMELO ninowukalela ebarelo’ yawo? (Kengesa Éfeso 6:16.) Dhahene ninga ebarelo yabarela maningo a munyakoddo, nroromelo ninowubarela wi onapattiwe na mweddelo wonyakuwa, opanga, vina vimanya dhotene dha elabo eji yabure.

² Vowi ninkalawo “masaka omariha,” nroromelo nehu ninelege wehiwavi. (2 Tim. 3:1) Onawodhe dhavi opima akala nroromelo nawo nili ebarelo ttolibanene? Nanda onawodhe dhavi olibihavi ebarelo yawo? Ndoweni nisekeserhe dhowakula dha mavuzo aba.

3. Txini yakosana anyakoddo na ebarelo yawa, nanda sabwaya jani?

³ Mmasakani a Bibilia, ebarelo yalabihedha anyakoddo yabalihiwa ttebe ya enama. Anyakoddoya ansigiha makura wi ttebeya enanongeye vina mijiladha dhinakaane mukwiti. Akala ebarelo ya munyakoddo yela onongeya, iyene wankosa guru ya osasanyedha, dhahene wakala womala nawale wi arabe koddo yina. Weyo onawodhe dhavi ovirihamo yotagiha eji?

4. Onfunela nni opima ebarelo ya nroromelo nawo, nanda onawodhe okosa dhavi?

⁴ Ninga munyakoddo wa masaka awale, weyo onofwanyela opima vina obarela nroromelo nawo, wila okale womala nawale wi orabe koddo. Ninga Akristu, iyo ninoraba koddo yomuyani vina ninowana na amwiddani ehu ali muya dhabure.  (Ef. 6:10-12) Obarela ebarelo ya nroromelo nawo elobo yomwinya. Onaziwe dhavi akala oli womala nawale wi ovilele dhoweha? Voroma, onofanyeelela olobela okumbirhaga nikamihedho na Mulugu. Ogamala, onofwanyela olabihedha Mazu a Mulugu wi awukamihedhe ovyona ninga munuwonela Mulugu. (Aheb. 4:12) Bibilia onologa: “Omuroromele Nabuya na murima wawo wotene, kunyinddele malago.” (Gano 3:5, 6) Otanaalelaga versu eji, katamela wubuwela dhogana dhikosiliwe ovanenevi mwigumini mwawo. Motagiha, weyo wahigumanana makattamiho otowa kobiri? Onowubuwelaga nipikirhelo na Yehova nili va Ahebreu 13:5 ninloga: “Miyo kaddinauthiye weka, kaddinaunyanyale”? Nipikirelo ntti ninowuvaha nikuluvelo nawi Yehova onele wukamihedha? Akala pumwenemo, entonyihedha wi nroromelo nawo nili ebarelo, ttolibanene.

5. Txini enazinddiyeliwe ogapepesaga mukalelo oli nroromelo nawo?

⁵ Ogapepesa nofwaseya mukalelo oli nroromelo nawo, onele otikina. Txino onele wona dhawobana dhahazinddiyeliwe. Motagiha, onele ononelamo wi dhozuzumeletxa, dhottambi vina okumuwa dhilobo dhobanihile nroromelo nawo. Akala eji ehupadduwela, onawodhe dhavi obarela nroromelo nawo modhela dhawopiha esi?

6. Dhotagiha gani dhinoniha wi dhozuzumela dhina sapama?

⁶ Dhozuzumela dhina sapama. Motagiha, japama ozuzumela omwagalaliha Yehova vamodha na Yezu. (1 Kor. 7:32) Akala nihira yottega enddimuwa, ninozuzumela wiyelela mandano ehu na Mulugu. (Masal. 38:19) Ottiya ejo, ninozuzumela omwagalaliha mwadhihu obe mamunihu, wasapela amudhihu vina opama wa abali na arogora ehu.—1 Kor. 7:33; 2 Kor. 11:28.

7. Mowiwanana na Gano 29:25, ninkooddela nni wawova attu?

⁷ Mwa mpaddi mwina, dhozuzumeletxa dhinowobaniha nroromelo nehu. Motagiha, txino dila dhinjene ninozuzumela okana dhoja na dhowabala dhowakwana. (Mt. 6:31, 32) Nona, txino ninozuzumela wugela dhilobo dhinjidhene. Dhawene ninodha okwela kobiri. Eji egapadduwa, nroromelo ninihuna na Yehova ninele wobana vina ninele wika mandano ehu vangovini. (Mk. 4:19; 1 Tim. 6:10) Elobo yina eganizuzumihile ja mukalelo—ompattiwa nroromelo nehu na dhubuwelo dha attu ena. Txino ninowova obeddiwa obe ofwara-fwariwa na attu ottiya wova omunyimula Yehova. Wi nivibarele, ninofwanyela omunlela Yehova wila anivahe nroromelo vina oliba murima wi niwodhe okwaranya makattamiho aba.—Kengesa Gano 29:25; Lk. 17:5.

8. Ninakose dhavi nigewa dhottambi?

⁸ Satana, ‘babi wottambi,’ onowalabihedha abale anawang’aneliye wi awaze dhottambi mwaha wa Yehova vina mwaha wa abali na arogora ehu. (Jo. 8:44) Motagiha, asadduweli anovuwiha dhottambi mwaha wa nikuru na Yehova, alabihedhaga interneti, televizau, radiyo, majornale vina manivuru mena. Dhottambi esi dhinokosa mpaddi wa “mathere a motho” a Satana. (Ef. 6:16) Ninakose dhavi akala muttu onoroma ologa na iyo mwaha wa dhottambi ninga esi? Kanivuruwane! Sabwaya? Sabwani ninomuroromela  Yehova vina iyo ninowakuluvela abalihu. Nona, jofuneya warabela asadduweli. Kanittiye wi muttu obe elobo-txilobo, enittukulele ologa nawene.

9. Okumuwa onipatha dhavi?

⁹ Okumuwa onowobaniha nroromelo nehu. Kinwodheya opwaza makattamiho ehu. Okosa dhahene, egali ottawa muthorho wehu. Mbwenye kanittiye wi makattamiho azuzumihe mubuwelo wehu. Sabwani nigakumuwa, ninele orimeliwa njedhelo napama ninfuna onivaha Yehova. (Ovuh. 21:3, 4) Dhubuwelo dhokumula dhinele wunda guru dhehu vina dhinonitotela wiyelela mundduni. (Gano 24:10) Mbwenye iyo kanninfuna opadduweliwa dhilobo esi.

10. Txini esunziliwe na karta elebile murogora dhahi?

¹⁰ Koona mukalelo wawodhile murogora dhahi wa Estados Unidos okalavi ororomeleyene amuzuzumelaga mamune wali muredda. Mukartani yalebeliye o Betel, wahiloga: “Makattamiho ehu dila dhina anonidhugudhaga vina anonikumulaga, mbwenye njedhelo nehu ttolibanene. Ddinotamaalela vaddiddi na miselu dhinjene dhinvaddiha nroromelo nehu vina dhinnilibiha omuyani. Txibarene iyo ninofuna malago aba vina opangarhaziwa. Esi dhinonikamihedha odhowavi osogorho vina owodha ovilela dhoweha dhinnitotela Satana.” Dhologa dha murogora oddu dhinosunziha wi enowodheya okwaranya okumuwa! Dhavi? Kobuwela wi makattamiho awo dhoweha dha Satana. Kakuluvela wi Yehova Nipara na nipangarhazo. Vina kavaha ttima yoja yomuyani onuvahiye.

11. Wila niziwe mukalelo oli nroromelo nehu, mavuzo gani anfwanyelihu ovikosa?

¹¹ Mpaddi gani wa nroromelo nawo onfanyeeliwe osisigula? Mwari mwa myeri dhing’onovi dhivirile, ohiwodha orabela dhozuzumeletxa? Wahiwodha okoodda ologa na asadduweli vina ovuruwana ottambi onvavihani? Wahiwodha owanana okumuwa? Akala pumwenemo, nroromelo nawo ttolibanene. Mbwenye ninofwanyela okala txenjewa sabwani Satana okana mirega dhina dhinlabihedhiye  wila anipupuretxena. Ndoweni none murega mmodha.

12. Txini enanipadduwele nigazuzumela ofunetxa dhokaana?

¹² Ofunetxa dhokaana onodha onizuzumiha vina onyapwarhiha ebarelo ya nroromelo nehu. Murumiwi Paulo ohiloga: “Ole oli okóddoni, agafuna omuziveliha munddimuwa waye, kanzuzumela mabasa mena.” (2 Tim. 2:4) Txibarene, anyakoddo o Roma karumelihiwa odhowa okosa mabasa mena. Txini yampadduwela munyakoddo wakodda ovirihamo malamulo aba?

13. Sabwaya jani munyakoddo kanfanyeela ozuzumela marhondda?

¹³ Katanalela nipadduwo ntti. Nikuru na anyakoddo ninokosa nikuruta omembesi wotene na masupadda awa, mbwenye mmodhaya kandhowawo. Iyene ondowa omusika oguliha dhoja. Anyakoddo abale anopura mudhidhi na mattiyu wi ang’ane dhibarelo dhawa vina anoze masupaddawa. Mbwenye na mattiyu munyakoddo oddule onsasanyedha marhonddaye wi agulihe labo nina. Mohijeedheleya, vati voya amwiddani awa anodha warija. Munyakoddo gani agawodhile oraba koddo mpaka opemberha wi amuzivelihe munddimuwa waye? Munyakoddo gani agafuniliwe okalana vamodha—ole wavisasanyedha obe ole wazuzumeli marhondda?

14. Velani nili anyakoddo a Kristu, txini enfwanyelihu ozuzumela?

¹⁴ Ninga anyakoddo a Kristu, iyo kanindduwala yogana yehu yamakamaka—orumeliwa na Munddimuwa wehu, Yehova vamodha na Kristu. Orumeliwa na Mulugu elobo ya makamaka opitta elobo-elobovi envaha elabo eji ya Satana. Nona ninolabihedha mudhidhi na guru dhehu wila nimulabele Yehova, wang’anela ebarelo yomuyani vina ozuzumela nroromelo nehu.

15. Malago gani anivahile Paulo, nanda sabwaya jani?

¹⁵ Iyo txipo kannithiya oviyang’anela! Sabwaya? Murumiwi Paulo ohivaha malago awi “abale anunlela orela” anele ‘orimeliwa  nroromelo.’ (1 Tim. 6:9, 10) Nzu ntti ‘orimeliwa’ ninlagiha wi nigatamela ofunetxa dhokaana dhihilitxi dhofuneya dhindaga onizuzumiha. Murima wehu onodha omageya “na murega wa monlelo ebewene anpúthula.” Wila nihittiye dhifunelo esi osapwa mmirimani mwehu, ninofwanyela oziwa wi—esi mirega dha Satana dhinfuna wobaniha nroromelo nehu.

16. Nipadduwo eli va Marko 10:17-22 ninnittukulela wubuwela mavuzo gani?

¹⁶ Txino iyo nikana kobiri enakwanela ogulana dhilobo dhinjene. Jabure ogula dhilobo dhinganihu mbwenye dhihilitxi dhofuneya? Nne kilitxi yabure. Mbwenye nitanaalele mavuzo aba: Masiki akala ninowodha ogula elobo-txilobo, nikana mudhidhi vina guru dha olabihedhana eloboya? Ninoroma okwela okana dhilobo dhinjene? Egawodheyile dhavi okwela dhorela onirabeliha omulabela Mulugu dhahene ninga yampadduweli muzombwe oddule wakooddile niwobo na Yezu? (Kengesa Marko 10:17-22.) Japama okana egumi yovevuwa nilabihedhaga mudhidhi vina guru dhehu nikosaga mabasa a Mulugu!

17. Txini ehinfwanyelelihu odduwala?

¹⁷ Kanidduwale wi iyo nili mukoddoni nona  ninofwanyela ovisasanyedha siku na siku. (Ovuh. 12:17) Abali na arogora ehu kanawodhe onittukulela ebarelo ya nroromelo nehu. Muthu-muthu wa iyo okana muthorho wolibiha nroromelo naye.

18. Sabwaya jani yattukulela anyakoddo awale ottiddelavi ebarelo yawa novikomene?

¹⁸ Masaka awale, munyakoddo walagiha oliba murima mukoddoni wannakela nttittimiho. Mbwenye iyene kowiyelela vatakulu ahina ebarelo wanyapwarhihiwa. Namaleba dhopadduwa w’o Roma oniliwa Tácito oleba: “Munyakoddo wattiya ebarelo naye, wanyapwarhihiwa vaddiddi.” Egali dhahene anyakoddo anttiddelavi ebarelo yawa novikomene.

19. Ninawodhe dhavi ottiddelavi novikoma ebarelo yehu ya nroromelo?

¹⁹ Ninga Akristu ninofwanyela ottiddelavi ebarelo yehu ya nroromelo modhela odhowavi omatugumanoni vina omalaleyoni. (Aheb. 10:23-25) Ottiya esi, negensege Mazu a Mulugu masiku otene vina nimulobelelege Yehova wi anikamihedhe ovirihamo esile dhinsunzihu. (2 Tim. 3:16, 17) Nigavirihamo malago aba otene, Satana kanawodhe olabihedha mirega dhaye wila dhiniputtule. (Iza. 54:17) ‘Nroromelo nehu’ ninele onikalela ebarelo. Ninele okalavi ovikomene nilabaga vamodha na abali vina arogora ehu. Ottiya opemberha koddo dhinjene dhinwanihu labo na labo—ninele wagalala omoona Yezu apemberhaga koddo enarabiye na Satana na anamafwara aye.—Ovuh. 17:14; 20:10.