MASAKA a Bibilia, mwimeleli anttomeliwa osogorhela numba obe dhilobo dha muttu mwina. Nzu thi “mwimeleli” na elogelo ya Ebraiko vina Egrego dila dhina enaddiwana musogorheli obe muttu wattiyedhiwa wang’anela mabasa.

José mwana Jakobi, wali mudhari mwi’Ejipitu, nomala wahikala mwimeleli vatakulu va nabuye, Putifar. Mwebaribari, nabuye Putifar “omuthiyedha mmadani mwaye dhaye dhetedhene.” (Wita 39:2-6) Osogorhowa, José valiye mulamuleli wovuwa w’Ejipitu, iyene wahimuttoma mwimeleli wi asogorhele numba yaye.—Wita 44:4.

Nsaka na Yezu, anya a maddabo makamaka akala mmuthetheni wolapelana na mindda dhawa. Nona emeleli baattomeliwa wang’anela mabasa akosiwa siku na siku mmaminddani mwawa.

Txini yafuniwana muttu wattomeliwa okala mwimeleli? Namaleba o Roma wakuweliwa Columela okalilewo vyaka zana dhoroma, ologa wi mudhari wattomiwa okala mwimeleli obe namasogorhela, wanfwanyela okala muttu “onziwa pama mabasaya.” Iyene wanfwanyela okana mikalelo dha “osogorhela pama mabasaya s’ohipwaza vina ohili mutabala.” Iyene ohiloga: “Yamakamakaya yajedheliwana muttuya jiji—ahikale muttu onubuwela wi onoziwa ehinziwiye, mbwenye akale womala nawale wi asunzegevi.”

Mazu a Mulugu anolabihedha nzu ntti mwimeleli wi nitonyihedhe mabasa ankosiwa mmulogoni mwa Akristu. Motagiha, murumiwi Pedro ohalibiha Akristu wi alabihedhe mivaho dha Mulugu “muthu-muthu àkamyedhegena akwaye mahalayá akelileye.”—1 Ped. 4:10.

Yezu ohilabihedha yotagiha ya mwimeleli alogaga musibo onfwanyeya va Luka 16:1-8. Ottiya ejo, mu nivuhulo naye mwaha wa ezinddiyelo ya odha waye ninga Mwene, Yezu wahapikirela anamafwara aye wila agahimuttoma “Mwimeleli wororomeleya, wamalago” obe “mudhari wororomeleya.” Mabasa amakamaka a mwimeleli oddu ba wagawela poso na mudhidhiya anamafara a Kristu mwari mwa masaka omariha. (Mt. 24:45-47; Lk. 12:42) Ninotamaalela vaddiddi sabwa yokala na abale anakela manivuru ansasanyedhiwa vina anvuwihiwa na mwimeleli oddu orugunuwa elabo yotene.