1-2. Akristu anfanyeelela eni osunza nivuru na Onamakutha?

 MURUMIWI Paulo omubutxedha Timóteo wi “Dhetene dhilebiwe mBíbliani, wobuweliha ddi Mulugu; dhilebeliwé osunziha ebaribari.” (2 Tim. 3:16) Otaganyiha na nivuru na Onamakutha. Ononamo dhavi nivuru ntti? Ena anubuwela wi ntti nivuru nina muddonddonddo a malamulo ahinlabihedhiwa masaka abano, mbwenye Akristu ebaribari akana monelo wottiyana.

² Nivuru na Onamakutha nilebiwe okwaranya vyaka 3.500 mundduni, masiki dhawene Yehova okoya sabwani “dhilebeliwé onisunziha.” (Rom. 15:4) Nivuru na Onamakutha ninokamihedha ononelamo dhubuwelo dha Yehova, nona ninofwanyela osunza. Txibarene, nivuru ntti novudheeleliwa nikana masunziho menjene anawodhihu opurelamo. Ndoweni nisekeserhe masunziho manayi.

3. Sabwaya jani yaperhekeliwa mikutto Siku na Oleveleliwa Dhottega?

³ Yosunziha yoroma: Wila mukutto wehu wakeliwe na Yehova ninofwanyela orumeliwa na iyene. Siku nimodha vayakani ana Izrayel vamodha namakutta munddimuwa, amperheka mukutho wa Oleveleliwana Dhottega. Mikutho esi dhannakamihedha ana Izrayel wubuwela wi awene anfwanyela okuputta dhottega dhawa! Mbwenye namakutta munddimuwa ahinatti ohelela nikami omburoni Wokoddela-koddela wankosa mabasa mena a makamaka opitta abale oleveleliwa wa dhottega dha nlogo.

4. Mowiwanana na Onamakutha 16:12, 13, txini yakosa namakutta munddimuwa dila yoroma yavolowiye omburoni Wokoddela-koddela? (Koona foto ya kapa.)

 ⁴ Kengesa Onamakutha 16:12, 13. Katanalela yapadduwa Siku na Oleveleliwa Dhottega: Namakutta munddimuwa wanvolowa mmusanani. Eji yakala dila yoroma mwa dila ttaru dhavolowiye omburoni Wokoddela-koddela valaboni. Mono mmodha, wattiddela nakoma wana lubani wonukela, mono mwina wattukula yobo ya nddarhama yana makarha ottidda. Iyene wanroma wimela osogorho wa guwo yakunela omavolowelo wa mburo Wokoddela-koddela. Na nriho, iyene wanvolowa omburoni Wokoddela-koddela vina wannimela osogorho wa yobo ya nipagano. Nladdaniho ntti, nakala ninga iyene wemela vamentoni va Yehova Mulugu! Nofwaseya namakuthaya wankuttulela lubani vamakarhani ottidda, vina mburoya wannukela pama. * Osogorhowa, iyene wanvolowa wili omburoni Wokoddela-koddela na nikami noleveleliwana dhottega. Iyene wanddumeya lubani ahinatti operheka nikami noleveleliwana dhottega.

5. Ninsunzavo eni na lubani walabihedhiwa Siku na Oleveleliwa Dhottega?

⁵ Ninsunzavo eni na lubani walabihedhiwa Siku na Oleveleliwa Dhotega? Bibilia ononiha wi malobelo a emeleli ororomeleya a Yehova ali ninga lubani. (Masal. 141:2; Ovuh. 5:8) Kobuwela wi namakutta munddimuwa wantonyihedha nriho ninddimuwa avolowagana lubani vamentoni va Yehova. Na mukalelo wakakene, niganfiyedhaga Yehova na malobelo, nikosege na nriho ninddimuwa. Iyo ninomutamaalela Muttanddi wa dhilobo dhotene, sabwani ninowodha onfiyedha dhahene ninga munkosela mwana na babe. (Tia. 4:8) Iyene onnona ninga akwaye! (Masal. 25:14) Eji gari enddimuwa enihuna nona kaninfuna omunyimula Yehova.

6. Txini ensunzihu mwaha wa namakutta munddimuwa omuddumeya lubani ahinatti operheka mikutto?

⁶ Kobuwela wi namakutta munddimuwa wanddumeya lubani ahinatti operheka mikutto. Dhahene, iyene wankuluvela wi Mulugu agahirumeela mikutto dhigakosiliye. Txini ensunzavo iyo? Yezu bali velaboni ya vati, wahikosa elobo yamakamaka—yamakamaka vaddiddi opitta odhana ovuneya wa nlogo na attu—ahinatti operheka egumi yaye ninga mukutto. Elobo gani? Modhela okalawo nororomeleya vina weddeyana, Yezu osasanyedha dila wi Yehova arumeele mukutto waye. Dhahene, Yezu agahilagiha wi okalawo mowiwanana na efunelo Yehova mukalelo wapama. Yezu agahoniha—obe agahitonyihedha wi olamulela wa—Babe kwa pama vina komyala.

7. Sabwaya jani enoniha wi okalawo wa Yezu ohimwagalaliha Babe?

⁷ Valiye velaboni ya vati, Yezu ovirihamo noligana magano apama a Yehova. Masiki na dhoweha obe makattamiho—vina ajedhelaga opiwa—kattiyile obarela olamulela wa Babe. (Fil. 2:8) Mfwanyiwiye dhoweha, Yezu wahimuloba Mulugu “amunlelaga na nzu noliba, ahabaga mintori.” (Aheb. 5:7) Malobelo aye ahilagiha wi murima waye wali woweddeyana na Yehova vina wahifuna-wene omwiwelela. Malobelo a Yezu ali ninga lubani wonukela vamentoni va Yehova.  Mwigumini mwaye, Yezu ohimwagalaliha Babe vina okoddeliha onddimuwa Waye.

8. Ninawodhe dhavi omutagiha Yezu?

⁸ Enowodheya omutagiha Yezu modhela ovilibihedha omwiwelela Yehova vina weddeyana na iyene. Nigagumanana dhoweha, nimulobelele Yehova wi anikamihedhe omwiwelela. Dhahene, ninotonyihedha wi ninokamihedha olamulela wa Yehova. Kanidduwale wi Yehova kanakule malobelo ehu akala ninofara mweddelo wabure. Mwa mpaddi mwina, akala ninokalawo mowiwanana na magano a Yehova, ninokuluvela wi malobelo ehu a murima wotene anela okala ninga lubani wonukela vamentoni va Yehova. Nikaane ebaribari wi ororomeleya na wiwelela wehu onomwagalaliha Babihu wa wirimu.—Gano 27:11.

9. Sabwaya jani yakosela ana Izrayel mikutto dholuwelana?

⁹ Yosunziha yanawili: Ninomulabela Yehova sabwani ninomutamalela. Wila ninonelemo, ndoweni nisekeserhe mwaha wa mikutto dholuwelana, dhakosa mpaddi wamakamaka wa webedha webaribari wa ana Izrayel. * Nivuru na Onamakutta, ninologa wi mukadda Izrayel wanwodha operheka “mukutto womutamelelana Nabuya.” (Onam. 7:11-13, 16-18) Iyene kakosela mukuttoya sabwa ya odideliwa, mbwenye wakosela ofuru. Obu wali mukutto wovilevela wakosiye sabwani wanimukwela Mulugu  waye, Yehova. Namakutta mukutto vamodha na amudhaye vina anamakutta anja dhipaddi dhina dha enama ejile ekutteliwe. Mbwenye dhipaddi dhina dha enamaya dhaperhekeliwa Yehova. Dhipaddi gani?

10. Mikutto dholuwelana dhinlogiwa va Onamakutha 3:6, 12, 14-16, dhinladdana dhavi na efunelo yanna Yezu yomulabela Babe?

¹⁰ Yosunziha yaneraru: Ninomulabela Yehova na guru dhehu dhotene sabwani ninomukwela. Yehova wona manuna ninga epaddi yapama wa enama. Iyene wahooniha wi vyano dhina dhamakamaka, otaganyiha na belebedhu, dhahikaana ttima yavawoka. (Kengesa Onamakutha 3:6, 12, 14-16.) Nona, Yehova wanagalala na mukadda Izrayel wamperhekela novilevela manuna vina vyano dhina dhamakamaka. Mukadda Izrayel wakosa dhawene walagiha wi iyene wanfuna omperhekela Mulugu dhapama dhaniye. Na mukalelo wakene, Yezu wali womala nawale wi aviperhekele Yehova modhela omulabela Iyene na murima wotene sabwani wanimukwela. (Jo. 14:31) Yezu wanziveliwa okosa efunelo ya Mulugu; vowi iyene wankwela malamulo a Mulugu. (Masal. 40:9) Kavali waganyedha wi Yehova wahagalala vaddiddi na efunelo yanna Yezu ya omulabela!

11. Mabasa animukoselihu Yehova akalile dhavi ninga mikutto dholuwelana, nanda eji enipangarhaza dhavi?

¹¹ Dhahene ninga mikutto esile, mabasa ovilevela animukoselihu Yehova anolagiha mukalelo onimukwelihu. Iyo ninimulabela Yehova na guru dhehu dhotene, sabwani ninomukwela na murima wehu wotene. Onowubuwela mukalelo onagalala Yehova agawonaga attu enjene amulabelaga novilevela sabwa yomukwela iyene na malamulo aye! Ninopangarhazeya nigobuwela wi Yehova onovaha ttima merelo vina efunelo yehu yomulabela. Motagiha, akala weyo wa mwanakalaba vina kunwodha okosa mabasa ninga mwakoseliwe, kakuluvela wi Yehova onononelamo. Txino weyo onubuwela wi onomulabela Yehova vang’onovi, mbwenye iyene onowona okwela wawo onuttukulela okosa mabasa mpaka vanwodheliwe. Iyene onowagalala modhela orumela mabasa anwodhiwe omperhekela.

12. Yehova wonamo dhavi mikutto dholuwelana, nanda eji ennilibiha dhavi?

¹² Ninsunzavo eni na mikutto dholuwelana? Vaddumeyiwa vyano esile dhamakamaka dha enama, witxiya wadhowa odhulu vina Yehova wanziveliwa. Nona, kakuluvela wi Yehova onoziveliwa mabasa ovilevela ankosiwe na murima wotene. (Kol. 3:23) Katanalela mukalelo onziveliwiye. Yehova onowona okwela wawo wovilibihedha mmabasani mwaye, neji kakana ebaribari wi iyene kanadduwale mabasawo.—Mt. 6:20; Aheb. 6:10.

13. Mowiwanana na Onamakutha 9:23, 24, Yehova otonyihedhi dhavi wi wahirumela onamakutta obule wetiwe?

¹³ Yosunziha yanonai: Yehova onoruriha nikuru naye nili velaboni ya vati. Katanalela epadduwile yaka ya 1512 Kristu ahinabaliwa, vemetxiwe musana seresere ya Mwango Sinai. (Obud. 40:17) Mizé wali mwimeleli wa mattanga a okutteliwa wa Aroni na anaye. Nlogo notene na ana Izrayel nahawoona anamakutta abale akuttaga mikutto dhoroma dha dhinama. (Onam. 9:1-5) Yehova otonyihedhi dhavi wi wahirumela onamakutta oswa wetiwe? Aroni na Mizé  arurihaga nlogo, Yehova wahidhana motto waddumeyile mikutto dhotene dhali vebuwani.—Kengesa Onamakutha 9:23, 24.

14. Orumela wa Yehova onamakutta wa Aroni na anaye ekalele nni yamakamaka masaka abano?

¹⁴ Txibarene, nttile nali nipadduwo notikiniha, koddi motto obule wadhile odhulu watonyihedha eni? Watonyihedha wi Yehova wankamihedha onamakutta wa Aroni na anaye. Moonile ana Izrayel nlagiho nttile wi Yehova wannakamihedha anamakutta abale, awene vina ahiroma wakamihedha. Eji enisunziha eni? Enisunziha wi, anamakutta abale a ana Izrayel ali ezinddiyelo ya onamakutta onddimuwa. Kristu ddi Namakutta wehu Munddimuwa, iyene onele okala na attikitteliwe 144.000, abuwene anakale amwene na anamakutta wirimu.—Aheb. 4:14; 8:3-5; 10:1.

15-16. Txini enoniha wi “Mwimeleli wororomeleya, wamalago” onokamihedhiwa na Yehova?

¹⁵ Yaka ya 1919, Yezu wahittoma nikuru ning’ono na Akristu ottikitteliwa ninga “Mwimeleli wororomeleya, wamalago.” Mwimeleli oddu onosogorhela mabasa a olaleya vina onowagawela anamafwara a Kristu “poso mudhidhiya ogafiya.” (Mt. 24:45) Nikaana nlagiho nawi mudhari wororomeleya vina wamalago onoweeddihiwa na Mulugu?

¹⁶ Satana na elabo yaye anotamela ozuzumiha mabasa a mudhari wororomeleya, vamentoni va attu yakala ninga mudhariya agahirutxiwa wakaniha mabasa attomeliwiye. Masiki na koddo bili dha mulimau, ofwara-fwariwa wawopiha, mayelego a mwilaboni, vina weddihiwa nobure, mudhari wororomeleya onodhowavi avahaga anamafwara Akristu yoja yomuyani vansakaniva.  Kobuwela winjiva wa manivuru anihuna ahimpitxeliwa elo masaka abano, a dhilogelo dhokwaranya 900! Eji enowooniha kakamwe wi mudhari oddu, okana nikamihedho na Mulugu. Katanalela mukalelo onruriha Yehova: mabasa a olaleya. Miselu dhapama dhinolaleyiwa “mwilaboni mwetemwene.” (Mt. 24:14) Kavali waganyedha, wi Yehova onoweeddiha vina onoruriha nikuru naye masaka abano.

17. Ninawodhe dhavi otonyihedha wi ninokamihedha nikuru ninlabihedha Yehova?

¹⁷ Japama ovivuza, ‘Miyo ddinotamaalela sabwa yokosa mpaddi wa nikuru na Yehova?’ Vizinddiyelo dhinnivaha Yehova dhinowooneya dhahene ninga motto wa masiku a Mizé na Aroni. Mwebaribari nikaana mwaha dhinjidhene dhinfwanyelelihu otamalela. (1 Tes. 5:18, 19) Ninawodhe dhavi otonyihedha wi ninokamihedha nikuru ninlabihedha Yehova? Modhela ofwara malago otene andela mBibiliani anakelihu mmanivuruni ehu, mmatugumanoni a mmulogoni, a murudda vina a ttattamwa. Ottiya ejo, enowodheya otonyihedha nikamihedho modhela ovilibihedha mowakwana mmabasani a olaleya na osunziha.—1 Kor. 15:58.

18. Txini eganiliwe okosa?

¹⁸ Nigane ovirihamo malago otene asunzilehu munivuruni na Onamakutha. Nitamele orumeliwa na Yehova wi mikutto dhehu dhakeliwe. Nimulabelege Yehova sabwa yomutamaalela. Nimulabele Yehova na guru dhehu dhotene sabwa yomukwela na murima wotene. Vina nikamihedhe nikuru ninrurihiye masaka abano. Akala ninofara ttarho esi dhetene, ninele otonyihedha wi ninovaha ttima gari yokala Anamoona a Yehova!