1. Yehova onittiya okosa eni?

 YEHOVA ononittiya osakula mukalelo enfunihu okala. Iyene ononisunziha okosa dhosakula dhapama, vina ononikamihedha opemberha nigakosa yosakula enimwagalaliha. (Masal. 119:173) Nigavirihamo eziwelo ya malago ali Munzuni na Mulugu, ninowodha okosa dhosakula dhapama.—Aheb. 5:14.

2. Nigamala ogana yosakula ningumanana magudulano gani?

² Txino ninorutxiwaga wakwaniha eromilihu, masiki akala yosakulaya nikosile na eziwelo. Katanalela dhotagiha dhing’onovi: Mbali wa muzombwe onogana omwengesa Bibilia wotene. Iyene onoroma pama mwari mwa sumana dhing’onovi, mbwenye nomala onottiya. Murogora onogana olaba ninga pionera wa mudhidhi wotene mbwenye onolupiha malaboya anfuniye oroma. Nikuru na anddimuwa a mulogo ninogana wawaredhela abali a mmulogoni, vanovira myeri dhinjene mbwenye kanakwaniha. Dhopadduwa esi s’ottiyana, mbwenye vahikala elobo eniwanana. Awene kakwanihile dhogana dhawa. Vyaka zana dhoroma mulogo w’o Korinto wahigumanana magudulano akene. Ndoweni none enfunihu osunza na yotagiha yawa.

3. Yosakula gani y’aganile Akristu o Korinto, mbwenye txini yapadduwile?

³ Nsaka na 55 EC., Akristu o Korinto ahigana okosa yosakula yapama. Awene ahiwa wi abalawa o Jeruzalemi vina o Judeya antabuwa na oyelega vina dhojombeliwa, nanda ahiwa wi abali a milogo dhina ela otaganyiha kobiri wi akamihedhena. Sabwa ya oderetu na efunelo yovaha, Akristu o Korinto ahigana okosa mivaho dhawa nona ahinvuza murumiwi Paulo mukalelo ogawodhilani okamihedhawa. Iyene wahavaha malago vina wahimuttoma Tito wi akamihedhe otaganyiha mivahodha.  (1 Kor. 16:1; 2 Kor. 8:6) Mbwenye mvireli myeri dhing’onovi, Paulo wahiwa wi Akristu o Korinto ali ahinaroma okosa mivaho. Yodhelavoya jawi, mivaho esile kadhigafiyile na mudhidhi wi dhiperhengezeliwe abali o Jeruzalemi vamodha na mivaho dha milogo dhina.—2 Kor. 9:4, 5.

4. Mowiwanana na 2 Korinto 8:7, 10, 11, Paulo wakokomezile Akristu o Korinto okosa eni?

⁴ Akristu o Korinto ahikosa yosakula yapama, vina Paulo wahisiba nroromelo nawa noliba vina efunelo yawa yokala anamavaha. Mbwenye iyene wahakokomeza awene opuliha yaromilani. (Kengesa 2 Korinto 8:7, 10, 11.) Yotagiha yawa enonisunziha wi masiki nikalevi Akristu ororomeleya txino ninorutxiwaga ovirihamo dhogana dhapama.

5. Mavuzo gani anfunihu wakula?

⁵ Ninga Akristu o Korinto, iyo txino ninorutxiwaga odhowanavi vasogorho dhogana dhehu. Sabwaya? Sabwani nili athu ohakwana, nona efunelo yehu ja ottiya dhilobodha mpaka mudhidhi mwina. Obe txino sabwa yopadduwa dhilobo dhahajedhelihu esuwene dhinnirutxiha okosa dhiganilehu. (Koh. 9:11; Rom. 7:18) Ninawodhe dhavi oziwa akala ninofwanyela osaddula dhogana dhisakulilehu? Nanda ninawodhe dhavi ovilibihedha wakwanihedha dhiromelihu?

6. Sabwaya jani enfanyeelelihu otxinja dhogana dhina?

⁶ Dhogana dhina dhamakamaka dhinsakulihu kadhinfanyeela otxinjiwa. Motagiha, iyo kaninattiye omulabela Yehova, vina ninovilibihedha okala ororomeleya vamateloni vehu. (Mt. 16:24; 19:6) Mbwenye dhogana dhina txino dhinofanyeelela otxinjiwa. Sabwaya? Sabwani dhilobodha dhinotxinja. Ttarho gani dhinanikamihedhe osakula dhogana dhamakamaka?

7. Ninfwanyelela olobela nikumbiraga eni, nanda sabwaya jani?

⁷ Kalobela okumbirhaga eziwelo. Tiago wahileba: “Akala mmodhavo wenyu onotowa ononélamo, amulobe Mulugu; onovahiwa, vowi iyene onowatanala na murima athu etene.” (Tia. 1:5) Dila dhina notene “ninoyeveliwaga eziwelo,” mwa dhilobo dhina. Nona kamukuluvele Yehova ogakosaga yosakula vina ogafunaga otxinja yosakulaya. Yehova onele wukamihedha okosa yosakula na eziwelo.

8. Ninfwanyelela nni opepesa nihinatti okosa yosakula?

⁸ Kapepesa mowakwana. Kapepesa Mazu a Mulugu, kengesa manivuru a nikuru na Yehova, vina kaziwihe athu abale anakuluveliwe. (Gano 20:18) Opepesa kwamakamaka ohinatti ogana otxinja ganyo, omwalela wego wina, obe ohinatti osakula kursu enawuvahe mudhidhi wolaba mmabasani a Yehova.

9. Ninapurelemo dhavi akala nili attu ovikuluvela?

⁹ Otanaalele dhogana dhawo. Yehova onopima mwahaya onittukulela okosa yogana. (Gano 16:2) Iyene ofuna wi nikale attu okuluveleya mwa dhilobo dhotedhene. Nona nigakosa yosakula, ninofwanyela ovikuluvela vina okuluveliwa na attu ena mwa dhosakula dhehu. Akala kanilitxi okuluveleya, txino ninele orutxiwa okosa dhiganilihu. Motagiha, txino muzombwe onogana okala pionero wa mudhidhi wotene. Mbwenye, na mudhidhiya, onorutxiwa wakwaniha mawora apimeleliwiye vina kanziveliwa na mabasa aye olaleya. Txino iyene wobuwela wi yamuttukulele okala pionero yali efunelo ya omwagalaliha Yehova. Txino mwahaya wamakamaka wamuttukulele olaba ninga pionero yali efunelo ya wawagalaliha amambali aye obe muttu mwina.

10. Txini enfuneya wi muttu akose matxinjo?

 ¹⁰ Katanalela nipadduwo ntti, namasunza wa Bibilia onogana ottiya okobola fola. Vamaromo, na goi-dhene iyene onokala s’okobola fola mwari mwa sumana modha obe bili, mbwenye onorutxiwa nona ommalela okobola. Omagomelowa, iyene onowodha opemberha ekarhoya! Omukwela Yehova na efunelo yaniyena ya omwagalaliha ehimukamihedha otxinja elemelelo ejile.—Kol. 1:10; 3:23.

11. Ekalele nni yofuneya okana dhogana dhofwanyelela?

¹¹ Kakana dhogana dhofwanyelela. Dhogana dhawo dhigakala dhofwanyelela, kunarutxiwe opuliha eromiliwe. Motagiha, txino weyo onogana omwengesa Bibilia malabo otene. Mbwenye akala kukosile masasanyedho ofanyelela, enele wurutxa wakwaniha eganiliwe. * Obe anddimuwa a mulogo anogana wawaredhela abali dila dhotene, mbwenye dila dhina, awene kanvirihamo yogana ekosilani. Wila akwaranye, awene anofwanyela ovivuza dhahi: “Iyo nimala waziwa abali vina arogora anfanyeelela waredheliwa? Nihikosa masasanyedho vina mudhidhiya onfunihu odhowa wawaredhela?”

12. Txini enfwanyelihu okosa, nanda sabwa jani?

¹² Kakana ebaribari. Kawo muttu wa iyo onna mudhidhi, dhilobo, obe guru dha wakwanihedha dhotene dhinfuniye. Nona okaane ebaribari na dhogana dhawo vina ovipimelelege. Egakala yofuneya, onofanyeelela otxinja yogana yasakuleliwe enoniwe wi kunawodhe wakwanihedha. (Koh. 3:6) Kobuwela wi weyo ovugula dhogana dhawo, mmaleliwe, ohona wi onele ovirihamo. Egali dhawene onawodhe dhavi wakwanihedha? Koona ttarho tanu dhinawukamihedhe wakwaniha dhogana dhawo.

13. Ninawodhe dhavi okana guru dha wakwanihana dhogana dhehu?

¹³ Kalobela okumbirhaga guru dhawirana mabasa. Mulugu onowuvaha guru ‘dhawirana mabasa’ vina wakwanihedha dhogana dhawo. (Fil. 2:13) Nona kamukumbirhe Yehova wi awuvahe muya waye wokoddela wi okaane guru dhinfuniwe. Kalobelagavi masiki akala onowubuwela wi malobelo awo anogonela wakuliwa. Yezu wahiloga: ‘Lobaní [muya wokoddela], munovahiwa.’—Lk. 11:9, 13.

14. Malago ali va Gano 21:5, anawukamihedhe dhavi wakwaniha yogana yawo?

¹⁴ Otanaalele pama. (Kengesa Gano 21:5.) Wila wakwanihe matadelo aromiliwe, onofanyela okosa masasanyedho. Ogamala onofwanyela olaba mowiwanana na masasanyedho akosiliwe. Yakakene, ogasakulaga yogana, kakosa muddonddonddo wa tharho dhinfuniwe ofwara wi ovirihemo dhogana dhawo. Katamela ogawa mabasa manddimuwa mwa mpaddi dhing’ono wi owodhe wakwaniha yogana yawo. Paulo wahakokomeza Akristu o Korinto okoya mpaddi mmodha wa nvaho “siku noroma na sumana” dhaene kigakalile yofuneya ozuzumela osokela mudhidhi ogadhowile iyene. (1 Kor. 16:2) Ogawa mabasa manddimuwa mpaddi dhing’ono enokamihedha owodha opuliha mabasaya s’ohilemana.

15. Ogamala olebela yogana, txini enfanyeliwe okosa?

¹⁵ Olebela dhogana dhawo enele wukamihedha wakwanihedha. (1 Kor. 14:40) Motagiha, nikuru na anddimuwa a mulogo nihakela malago a omuttoma munddimuwa mmodha wi alebelege dhogana dhawa, oddoya ottomiwe onomulebela osakuliwe wila akwanihedhe yoganaya vina sikuna. Anddimuwa agafaraga malago aba anele owodha wakwanihedha  dhogana dhawa. (1 Kor. 9:26) Katamela okosa elobo yoligana na dhogana dhawo dhomwinya. Motagiha, kakosa muddonddonddo wa dhilobo dhinfuniwe okosa siku-siku, nomala olebele esile dhinfuniwe okosa vamaromo. Eji enele wukamihedha opuliha eromiliwe vina okosa dhilobo dhinji na mudhidhi mung’onovi.

16. Txini enfwanyeliwe okosa wi ovirihemo eganiliwe, nanda Roma 12:11 onkamihedha dhavi?

¹⁶ Kavilibihedhe. Ofwara eganiliwe vina wakwaniha eromiliwe enofuneya ovilibihedha. (Kengesa Roma 12:11.) Paulo wahimwaddela Timóteo wi “vilevelé wawengeselela” vina “kalelá ntidi” okala namasunziha wapama. Malago aba anolabihedhiwa na yogana yottiyana-ttiyana mmabasani a Yehova.—1 Tim. 4:13, 16.

17. Éfeso 5:15, 16 onnikamihedha dhavi ovirihamo eganilihu?

¹⁷ Kalabihedha mudhidhi wawo na malago. (Kengesa Éfeso 5:15, 16.) Kasakula mudhidhi wila ovirihemo eganiliwe vina kutxinje. Kujeedhe mudhidhi wowakwana wi ottidde mabasa; mudhidhi wowakwana txipo kunafiye. (Koh. 11:4) Porhe-porhe kuttiye wi dhilobo dhihilitxi dhamakamaka dhije guru na mudhidhi wafuniwe ozuzumelana dhilobo dhamakamaka. (Fil. 1:10) Egakala yofuneya, kasakula okosa mabasa mudhidhi wofwasa. Kawaddele attu ena wi weyo onfuna ofwaseye. Wafuna kattimiha mutxitto wawo vina vipano dhina dhinvaviha miselu wila dhinawuzuzumihe ogakosaga nsunzo nawo. *

18-19. Txini enawukamihedhe ohiyelela mundduni na yogana yawo masiki ogafwanya mazuzumo?

¹⁸ Kazuzumela dhopurelamodha. Dhopurelamo dha yogana dhili ninga ofiya vamburoni va oleddo. Akala weyo onfuna ofiye muleddoni mwawo, onelege odhowavi masiki akala onfanya dilaya jifugehile, onele ofwara dila yina enawuttukulele ofiya. Ogafwaseyela dhopurelamo dha dhogana dhawo, kuneyelele mundduni nomaguva ogafanya elobo enafune wuzuzumiha obe enawuttukulele opottowela wego wina.—Gal. 6:9.

¹⁹ Kahiyo elobo yovevuwa okosa dhosakula dhapama, vina ovirihamo dhosakuladha enorutxa. Mbwenye na nikamihedho na Yehova, weyo onele owodha okana eziwelo na guru dhinfuniwe wi opulihe dhotene dhiromiliwe.