1-2. Ninawodhe dhavi ofwara malago ali va Gano 4:25? Kavaha yotagiha.

KATANALELA dhotagiha esi dhinfwarela. Murogora wa Mukristu onowubuwela mudhidhdi dhapama dhakaniliye mundduni. Masiki bagumanilenavi makattamiho menjene mwigumini mwaye, onodhowavi akosaga dhinwodhiye mmabasani mwa Yehova. (1 Kor. 15:58) Masiku otene iyene onotanalela bali na munammudhi onimukweliye, mwilaboni eswa. Murogora mwina onowubuwela wakulana wakanilani na murogora mukwaye, mbwenye iyene onosakula ohimukoyela ntxiga mukwayeya. (Kol. 3:13) Mbali onotamela ohubuwela dhovonya dhaniye mundduni, oku atanalelaga olibiha nroromelo naye.—Masal. 51:10.

² Akristu aba araru anna dhilobo gani dholigana? Otene aba anowubuwela esile dhapadduweli mundduni, mbwenye kanzuzumiheya na esuwene. Ottiya ejo awene ‘kanttiya wang’ana’ munvirani.—Kengesa Gano 4:25.

3. Iyo ninfwanyelela nni ‘ohittiya wang’ana’ dha musongorho?

³ Ekaleleni yofuneya ‘ohittiya wang’ana’ dha musongorho? Kinwodheya muttu wedda ddila yovara oku ang’anaga mundduni; n’ekalelo yakakene iyo kaninwodha omulaba Yehova oku nobuwelaga mudhidhi wotene dhikosilehu wale.—Lk. 9:62.

4. Txini enasunzehu mwari mwa mutoma obu?

⁴ Mwari mwa mutoma obu ninela osunza mirega miraru dhigadhile onittukulela wubuwela dha mundduni. * Miregadha  sisi: (1) wubuwela dhapama dha mundduni (2) wakanela attu akwihu ntxiga (3) ovisumulela wottabwa. Mwari mwa dhawireya esi ttaru ninela woona nikamihedho nivaha malago a Bibilia, kahiyo nikamihedhovi niniwodhiha ‘odduwalavi dha mundduni,’ mbwenye ninoniwodhiha vina ‘otamagela dhosogorho.’—Fil. 3:13.

5. Kohelet 7:10 onloga murega gani ogadhile onipupurutxa?

⁵ Kengesa Kohélet 7:10. Noneni wi versu eji kinloga wi jabure ovivuza: “Nsaka nawale nakalele nni napama opitha nthino?” Ewodhelo ya wubuwela, mvaho wa Yehova. Ottiya ejo versu eji enloga wi: “Kuloge: ‘Nsaka nawale nakalele nni napama opitha nthino?’” Yononelamoya jawi, Satana ononittukulela wubuwela dhalihu wale banidha oladdaniha na dhovanene, nigwelaga vamuregani wawi elihu ovanene ehittabwa. Bibilia mwina otapulele versu eji dhahi: “Txipo kuvivuze, ‘Ngani, nsaka nawale nakalele nni napama opitha nthino?’ Nivuzo ntti kaninkosiwa na anoni.”

6. Ekalele nni yotowa malago wubuwela wila dhamwigumini mwehu dhawale salitxi dhapama? Kavaha yotagiha.

⁶ Ekaleleni yotowa malago wubuwela wi masaka a wale ali apama opitta a ovanene? Murega obu ononittukulela wubuwelaga dhapama bahi dhinipadduwele mundduni. Obe ononittukulela ohubuwela dhorutxa dhinipadduwele. Ndoweni nirome woona yapadduwele ana Izrayel. Mmalelani obudduwa mwilaboni ya Ejiptu momaguva awene ahidduwala goyi yanani mwilaboni mpule. Awene kobuwela goi dhapadduwela, obuwela bahi dhoja dhoziva dhajani. Ahifiyedha ologa: “Ninoubuwela dhaja iyo mw’Ejipitu: Oba, misawa, mavudhe, maporo, sabola na alo, nihinongaga nne korowa!” (Oleb. 11:5) Txibarene-wene oja okule ‘kapitxela korowa’? Kahiye mwenemo. Ana Izrayel ampitxela muttengo munddimuwa vaddiddi oja okule, awene ansosiwa ofiyedha okosiwa adhari na akadda Ejiptu. (Obud. 1:13, 14; 3:6-9) Mbwenye musongorhomwa ahidduwala dhapadduwele mundduni. Awene  atameletxa wubuwela ‘nsaka napama nawale’, ottiya wubuwela dhapama dhakoseliwani na Yehova. Yehova kaziveliwena merelo abale.—Oleb. 11:10.

7. Txini emukamihedhile murogora dhahi ohubuweletxa dhapama dha mundduni mwaye?

⁷ Ninawodhe dhavi orabela murega wawubuweletxa dhapama dha mundduni? Karoma woona yotagiha ya murogora oromile olaba o Betel y’o Brooklyn yaka ya 1945. Vasogorhova iyene ohiteliwa na Betelita mukwaye, vina ahilaba vamodha mwari mwa vyaka dhinjene. Mbwenye omamalelo wa yaka ya 1970, mamune ohifwanyiwa makattamiho eredda enddimuwa vaddiddi. Iyene ohiloga wi, muziwele mamunaga wi okwa waye wela omwaddamela, wahiddilaga na malago agaddikamihedhi muziyeni mwaga. Iyene ohiddaddela: “Matelo ehu ali ohagalala vaddiddi. Attu enjene kanwodha okana matelo ohagalala dhahene.” Mbwenye iyene vina ohimututela eji: “Kawubuweletxe dha mundduni—masiki dhihidduwaleyaga. Ovira wa mudhidhi murobwe wapama. Kuvikubanyedhetxe nne vina kuttiye murimawo ososeyetxa. Tamalela wagalala waniwe vina na marurihoya. . . . Yubuwelo mvaho wa Mulugu.” Kunubuwela wi aba ali malago apama vaddiddi?

8. Txini dhipurelemo murogorihu mwa ohubuweletxa dha mundduni?

⁸ Murogora oddu waheka mazu aba mmurimani mwaye. Iyene ohimulabela Yehova na ororomeleya, mpaka okwa waye na vyaka 92. Iyene ohiloga dhahi: “Ddigobuwela dhiddipadduwele vyaka 63 mundduni, esuwene dhali vyaka dhamulabelimi Yehova, ddinowodha ologa wi dhali vyaka dhottabiha vaddiddi.” Iyene ologele nni dhahene? Mwinya ohakula na dhologa dhawi: “Enkosiha egumi yehu okana ttima ja okala mumodhani na abalihu vamodha na arogoraya orugunuwa elabo yotene; na njedhelona n’okala na awene mwilaboni eswa, nimulabaga Muttanddi wehu Munddimuwa, Mulugu webaribari Yehova, okala  nokala-wene.” * Esi dhologa dha malago vaddiddi dha attu abale anang’ana dha musogorho!

9. Ninga munlogela Onamakutha 19:18 masaka meena ninrutxeliwaga nni odduwala obure wireliwehu?

⁹ Kengesa Onamakutha 19:18. Masaka mena ninorutxiwaga odduwala obure wireliwehu, ttabwa-ttabwa nameraya agakala muroromeli mukwehu, marho wehu obe mmudhihu. Ninga motagiha, murogora dhahi wahimmagedha murogora mukwaye wi ohimwiyela kobiri yaye. Vasogorhova murogoraya walogile wi mukwaye ohimwiyela, wahizinddiyela wi weyile kahiye iyene, venevo wahidhowa omukumbirha nlevelelo, mbwenye namamagedhiwaya wahikanavi ya mmirimani. Wahiromaga opadduweliwa yakene? Keliwe wi yawireya eji enowapadduwela abali otene, mbwenye enoziweya wi muttu-muttu wa iyo onodha okana ya mmirimani na mbali mukwaye enoniye wi kanwodha okutxamo.

10. Txini enaniwodhihe wurudha ntxiga?

¹⁰ Txini enaniwodhihe wurudha ntxiga? Yoroma ja wubuwela wi Yehova onowoona dhotedhene dhimpadduwa. Iyene kanvonyiwa wona nne elobo modha enireliwehu, onowona vina opujiwa wehu. (Aheb. 4:13) Iyene onokubanya iyo nigatabuwaga. (Iza. 63:9) Vina ohimala opikirela wi onela ogomiha obure wetene onireya otaganyiha na opujiwawa wehu.—Ovuh. 21:3, 4.

11. Txini empurelamo iyo nigavilibihedha okutxamo mmirimani mwehu ekalelo ya otxigana?

¹¹ Nubuweleni wi nigaburutxamo mmirimani mwehu ntxiga, iyo nanya ninopurelamo. Jijuwene yadhile ononelamo murogora ole wamagedhiwe wi owiya kobiri. Mwa ovira wa mudhidhi iyene wahidha odduwala ntxiga nali mmirimani mwaye. Venevo ohidha ozinddiyela wi, iyo nigalevelela attu akwehu, Yehova ononilevelela vina. (Mt. 6:14) Keliwe wi iyene wil’ovuluvyiha obe wil’okosa ninga odduwale, nne, iyene wil’okuputtamo-wene ntxiga nali mmirimani mwaye. Murogora ole opurelamo venjene, iyene wahiroma wona wagalala mumulabelani mwaye Yehova.

12. Txini dhinnisunziha 1 Joau 3:19, 20?

¹² Kengesa 1 Joau 3:19, 20. Enopadduwa attu okubanya mwaha wa wira dhahafunani. Ninga motagiha, ahikalawo abale ankubanya venjene sabwa ya wira obure ahinatti osunza ebaribari. Ena anokubanya vina sabwa ya obure wirilani mmalelani obatiziwa. Esi dhinowapadduwela attu otene. (Rom. 3:23) Txibarene iyo nihikana efunelo enddimuwa ya wira dhili dhapama. Mbwenye “ninovirigana venjene.” (Tia. 3:2; Rom. 7:21-23) Mwa mpaddi mwina, enowodheya ologa wi okubanya kwa pama, masiki eziweyaga wi onosuva murima wehu. Okalele nni wapama? Sabwaya jawi okubanya ononittukulela wogolela obure wehu vina ononivaha guru dha ogana ohira vina obure wirilehu.—Aheb. 12:12, 13.

13. Ekalele nni yofuneya orabela okubanya wottabwa?

¹³ Elobo yina enziweya, jawila ninopadduweliwa dhottabwa onikubanyiha—dhonikubanyiha esi dhinofiyedha ogonela mudhidhi mwinjene muyubuweloni mwehu, masiki Nabuya Yehova anonihe onilevela waye. Okubanya ninga oku ononittukulela ogwela vamuregani. (Masal. 31:10; 38:3, 4) Ejiya empadduwa dhavi? Karoma woona empadduwele murogora dhahi wakubanya venjene sabwa ya ottega waye wa wale. Iyene bela: “Miyo ddoona wi mabasa amukoselimi Yehova ddamukosela ebewene, sabwani ddobuwela wi iyene nne  kandditanala vina kanaddivune musogorho.” Notene iyo ninorumela dhologa dha murogora oddu. Mbwenye voroma, nubuweleni eji: Satana onottaba venjene iyo niganyanyala omulaba Yehova—masiki mwinyaya Yehova ahininyanyale!—Kaladdaniha na 2 Korinto 2:5-7, 11.

14. Ninawodhe dhavi okana ebaribari wi Yehova kaninyanyale?

¹⁴ Veneva ninoroma wubuwela dhahi, ‘Ddinawodhe dhavi okana ebaribari wi Yehova kaddinyanyale? Mwebaribari, yowakula ya nivuzo ntti, kinrutxa. Vyaka dha mundduni, Mwang’aneli ohiloga dhahi: “Iyo ninodha okwakwattuwa mwa wira yabure, ofiyedha wubuwela wi nihittabwiha. . . . Kanirimeliwe ohagalala. Kanubuweleni wi dhottega dhehu kadhinleveleleya. Satana onfuna wi iyo nubuwele dhawene. Mwaha wa weyo okosa obure obo nanda oroma okubanya, ejo enoniha wi weyo kuli muttu wa bure. Kala muttu woviyeviha vina kamulobelelege Yehova wi akuputte omuttu na etanalelo yawo vina aulevelele. Kamususele Yehova dhahene ninga mwana onimususela babe agagogoddeya; Yehova onela wulevelela, kintanala mudhidhi okaliwe okosaga obure wakakene, nona egalogiwa wi nlevelelo mahala a Mulugu.” *

15-16. Txini dhikosile attu ena venevo vobuwelani wi Yehova kalevelele?

¹⁵ Alabeli enjene a Yehova ahidheliwa embwanye-mbwenye mwa oziwa wi Yehova kaanyanyale. Ninga motagiha, vyaka dhivirile mbali dhahi ohisunza venjene na mitoma dha mpaddi wa “A Bíblia Muda Vidas.” Mutoma obo wamuloga murogora wobuwela wi yali yorutxa vaddiddi oleveleliwa na Yehova, onaga wi dhakosileye dhahittabwa. Iyene wantabuwavi na dhubuwelo esi mmirimani mwaye, masiki mmaleliye obatiziwa. Mbwenye muromele iyene wubuwela mwaha wa mukutto wa Yezu, embwenye-mbwenye ehiroma omudhela. *

¹⁶ Txini esunzile mbali ole na yopadduwa ya murogora wobuwela wi kanaleveleliwe? Iyene ohileba dhahi: “Valimi mwana ddahikana ekalelo yabure vaddiddi ya wawona attu bali yovi. Ovanenevi ddihikosa yakakene. Ddihitamela nikamihedho na anddimuwa a mmulogoni,  vina ddihikosa guru wi ddigonjihe dhubuwelo dhaga. Anddimuwa a mmulogoni ahiddoniha okwela na nttebwana na Yehova. Txibarene, miyo ddobuwela wi Yehova kagaddikwele. Mwengeselimi yotagiha ya [murogora oddu], ddihilibiheya venjene. Ovanene miyo ddinona wi ddigobuwela yawi Mulugu kanaddilevelele, kuloga ddinkanamo wi mukutto wa Mwanaye kuwakwanile wi ddileveleliwena dhoddawa dhaga. Miyo ddihikweye mutoma obu, nona mudhidhi-mudhidhivi onkanimi dhubuwelo dhososa, ddinowengesaga.”

17. Txini ekosile murumiwi Paulo wi arabelena wubuwela dhososa?

¹⁷ Dhotagiha ninga esi ddinonubutxedha ejile empadduwele murumiwi Paulo. Iyene ahinatti okala Mukristu ohira obure winjene. (1 Tim. 1:12-15) Iyene wona mukutto ninga mvaho omvahile Mulugu. (Gal. 2:20) Noona Paulo ohirabela wubuwela wososa, mwa omulabela Yehova venjene vina ovilibihedha ofiyedha okosa mpaka apale vawodheliye.

18. Txini dhisunzilihu mwari mwa mutoma obu?

¹⁸ Dhotedhene dhilogiwe mwari mwa mutoma obu dhinisunzihile nni? (1) Yubuwelo yapama mvaho vina mareliho a Yehova; mbwenye kintanala ekalelo yali egumi yehu wale, musogorho mundowihu, mwilaboni eswa egumi yehu enela okala pama opitta ya wale. (2) Akwihu anodha oninyimula, mbwenye nigakala attu anziwa olevelela ninela odheliwa murenddele. (3) Ovisumela venjene onotximiha omulabela wehu Yehova. Noona, dhahene ninga Paulo, iyo ninfuna nikaane ebaribari wi Yehova ononilevelela.

19. Iyo ninziwa dhavi wi mwilaboni eswa kaninobuwele dhawale?

¹⁹ Iyo nihikana njedhelo na okalawo na mukala-kala. Vina mwilaboni eswa ya Mulugu iyo kaninatxinuwe mwaha wa oladdaniha dha wale na dhinafwanyihu. Bibilia onologa wi nsaka ntto: “Dhawale kadhinobuweliwe vina.” (Iza. 65:17) Karoma wubuwela: Ena mwa iyo niromile omulaba Yehova muhimani, ovano nihimala wunuwa, mbwenye mwilaboni eswa notene ninakale azombwe. (Job 33:25) Ndoweni niganeni oduwala dhawale. Nizuzumeleni wubuwela dha musogorho!