1. Txini enanikamihedhe nigavyonaga ninga nili nooka obe wozuzumene na makattamiho ehu? (Masalmo 118:5-7)

WEYO wahiromaga ovoona ninga oli weka-wene, ofiyedha wubuwela wi kunna yokosa wi orabelena makattamiho anufwanya? Enjene avyona dhahene, masiki na emeleliya a Yehova. (1 Amwe. 19:14) Akala ejuwene eupadduwela kobuwela nipikirhelo nikosile Yehova: “Miyo kaddinauthiye weka, kaddinaunyanyale.” Nona muttu-muttu wa iyo onofwanyela okana nikuluvelo nawi: “Nabuya ddinddikoya, kaddinova elo.” (Aheb. 13:5, 6) Murumiwi Paulo walebele mazu aba Akristu akwaye akala o Judeya yaka ya 61 N.K. [Nsaka na Kristu]. Mazu aba abudduwile mwari mwa mazu anfwanyeya va Masalmo 118:5-7.—Kengesa.

2. Txini enfunihu osekeserha mwari mwa nsunzo ntti, nanda sabwaya jani?

² Dhahene ninga Munasalmo, Paulo mwinyene wahiziwa wi Yehova mukamihedhi waye. Motagiha, vyaka bili balebeli karta Ahebreu Paulo wahigumana dhawopiha mwaha wa otagala wa mbara. (Mer. 27:4, 15, 20) Mwari mwa vyaka dhinjidhene musogorhomwa, Yehova ohoniha okala Mukamihedhi wa murumiwi Paulo na mikalelo dhottiyana. Ninela osekeserha mikalelo miraru bahi. Yehova onovaha nikamihedho amulabihedhaga Yezu na anju, attu anna ettomo na abali akwehu omuyani. Osunza mapadduwo aba a mwigumini mwa murumiwi Paulo enele wenjedha nikuluvelo nehu nawi Mulugu onele onakula nigalobela nikumbiraga nikamihedho.

3. Txino Paulo wadhile ovivuza eni, vina sabwaya jani?

³ Paulo wanfuna nikamihedho. Yaka ya 56 N.K., muttitti wa attu otakala murima ahimbubudda bamburutela otakulu wa mparha wa Jeruzalemi, na efunelo ya ompa. Siku nanewilina Paulo afunaga odhiwana vanamwinjini o Sinédrio amwiddani aye amuja engurhe. (Mer. 21:30-32; 22:30; 23:6-10) Txino na mudhidhiya Paulo wahifiyedha ovivuza, ‘Ddinavilele makattamihoya aba ofiyedha mudhidhi gani?’

4. Yehova omukamihedhi dhavi Paulo amulabihedhaga Yezu?

⁴ Nikamihedho gani nakelile Paulo? Omattiyuwa obule Paulo ahinatti olupeliwa na awogo, “Nabuya,” Yezu wahimela osogorho waye bamwaddela dhahi: “Maga murima! Weyo mu Jeruzalemi ohiziwiha elimi; enofuneya were yakakene o Roma.” (Mer. 23:11) Nipikirhelo ntti nahimulibiha murumiwi Paulo! Yezu wahiloga mwaha wa onamoona wavahile Paulo o Jeruzalemi. Wahimwaddela vina wila agahivuneya adhowe o Roma, wenewo ogawodhileyi ovaha onamoona onddimuwa. Mwakeleliye nipikirhelo ntti, Paulo wahikala wobareleya dhahene ninga munkalela mwana na babi wofiyedheya.

5. Yehova omukamihedhi dhavi Paulo modhela anju? (Kang’ana foto ya kapa.)

⁵ Makattamiho gani mena agumanilena Paulo? Mvireli vyaka bili mapadduwo aba bakoseyile o Jeruzalemi, Paulo wali mpangayani adhowaga o Itália, venevo pangayaya wahifwanyiwa otagala onddimuwa wa mwiko ofiyedha anyaya vamodha na abale alimo wubuwela wila anela okwa. Mbwenye Paulo koovile. Sabwaya jani? Iyene wahawaddela otene ali mpangayanimwa: “Mathiyu avirile anju wa Mulugu, mwinya waga onimulabimi oddoneyela addaddelaga: ‘Kuwove Paulo! Enofuneya ofiye vali Sézari. Wone: Mulugu ouvaha gari y’ovuneya wa etene ali na weyo muleddoni.’” Yehova wahimulabihedha anju wila amulibihe wili Paulo na mazu akakene addeliweyi mundduni na Yezu. Nanda Paulo wahifiya-wene o Roma.—Mer. 27:20-25; 28:16.

6. Nipikirhelo gani nikosile Yezu ninnilibiha, nanda sabwaya jani?

⁶ Nikamihedho gani ninvahiwa iyo? Yezu ononikamihedha dhahene ninga mwalogeliye na Paulo. Motagiha, Yezu wahapikirela anamafwara aye otene wi: “Onani, miyo ddili na nyuwo masiku otene ofiyedha omagomelo wa elabo.” (Mt. 28:20) Mazu a Yezu anonipangarhaza vina anonilibiha iyo notene. Dhavi? Sabwani masiku mena ankalaga orutxa ovilelawa. Motagiha akala ninomuyelela mwanamudhi wokweleya iyo ninovilela opa oku  mwari mwa malabo menji obe ofiyedha vyaka dhinjene. Enagu anogumanana masiku orutxa makamaka sabwa ya saize yawa, kuloga wuluvala. Oku enaya makattamiho anafwanya siku na siku ba owanana dhubuwelo dha wobana. Masiki dhawene iyo ninowodha ovilela na njedhelo sabwani ninoziwa wila Yezu ologile wi oli na iyo “masiku otene” vamodha na masikuya okumula a mwigumini mwehu.—Mt. 11:28-30.

7. Ninga munlogela Ovuhulela 14:6, na mukalelo gani onikamihedha Yehova masaka abano?

⁷ Mazu a Mulugu anonaddela wi Yehova ononikamihedha alabihedhaga anju aye. (Aheb. 1:7, 14) Motagiha anju anonivaha nikamihedho na malago okosana mabasa a walaleyela “miselu dhapama dha Omwene” attu a “vilabo dhotene, a mahimo, a vilogelo, na malogo etene.”—Mt. 24:13, 14; kengesa Ovuhulela 14:6.

8. Yehova omukamihedhi dhavi Paulo alabihedhaga anddimuwa a anyakoddo?

⁸ Nikamihedho gani nakelile Paulo? Oromana Yaka ya 56 N.K., Yezu wahimwaddela Paulo wila egahifuneya ofiya o Roma. Mbwenye Ayuda ena o Jeruzalemi ahilaganela omuttidda Paulo wila ampe. Muziwele anyakoddo o Roma asogorheliwa na Kláudio Lísia yogana eji ya ompa, awene ahimukamihedha Paulo. Momaguva-mwene, Kláudio omuruma Paulo—o Sesareya wobareliwene na anyakoddo adhowaga o Jeruzalemi wali olapelana makilometru 105. O Sesareya guvernadoro Félix olamula wila Paulo “akoyiwe okathi wa Herodi.” Paulo wali wobareleya na amwiddani abale atamela ompa.—Mer. 23:12-35.

9. Guvernadoro Festo omukamihedhe dhavi Paulo?

⁹ Vyaka bili musogorhomwa Paulo wali mukamburha o Sesareya. Olamulela wa Félix wahigoma, bahabiwa mpaddo na guvernadoro Festo. Venevo Ayuda aroma omutuzela Festo wila amurume Paulo o Jeruzalemi wi amusumele, mbwenye Festoyá karumelile. Enkala ninga guvernadoro ole wamala oziwa wila Ayuda afuna “amvitalele mudila, ampe.”—Mer. 24:27–25:5.

10. Guvernadoro Festo wakulile dhavi yogana ya Paulo ya odhowa ottongiwa na Sézari?

¹⁰ Vasogorhova Paulo wahigumanana makattamiho, masiki bali o Sesareya wobareliwene. Festo “afunaga waziveliha Ayuda” ohinvuza Paulo: “Onofuna odhowe o Jeruzalemi wi wathongiwe wenewo muladdu obu vamentoni vaga?” Paulo wanziwa wila kodhowa o Jeruzalemi Ayuda agahimpa, mwa mpaddi mwina, iyene wanubuwela wila enofuneya wi afiye o Roma wila alaleyewo. Iyene wahiloga: “Muladdu waga wamalele wa Sézari!” Mmalele Festo otanalela muladdu obu na anameluza aye, iyene omwaddela Paulo dhahi: “Bahito, weyo ofunilé othongiwa wa Sézari, onere odhowawo.” Festo wahigana omuruma Paulo o Roma, attiyaga yogana ya amwiddani aye. O Roma, Paulo agaali wolapelana na amwiddani abale atamela ompa.—Mer. 25:6-12.

11. Txino Paulo wadhile otanalela mazu gani ali va nleboni na Izaiya?

¹¹ Oku Paulo ajeedhaga okosa oleddo waye wodhowa o Itália, iyene txino wahubuwela-wene dhologa dhavuhuleliwe Izaiya walebela abale animusadduwela Yehova: “Masiki mwiwananele mobuwelo enyu, kanasogorhe; muloge vina dhinfunenyu, kadhimp’elo, sabwa Mulugu oli na iyo.” (Iza. 8:10) Paulo wanziwa wila Yehova wanimukamihedha iyene, eji vina yanimulibiha wila awodhe ovilela dhorutxa dhigagumanilena iyene musogorho.

12. Na mukalelo gani weddihiwa Paulo na Júlio, vina Paulo wadhile ononelamo eni na mweddihedhiwo obu?

 ¹² Yaka ya 58 N.K., Paulo wahiroma oleddo wa odhowa o Itália. Ninga mfugeliwi iyene wang’aneliwa na kazembe w’o Roma wettaniwa Júlio. Nsaka nttile Júlio wahikaana owodha wa omweddiha Paulo na opama obe omwirela yabure. Iyene walabihedhi dhavi owodha waye? Mmangwananimwa mufiyedhani mburho wosama, “Júlio wahimuriha Paulo, omurumeliha odhowa ogumana na akwaye.” Musogorhomwa Júlio wahinvuna Paulo. Na mukalelo gani? Anyakoddo afuna ape afugeliwi etene ali mpangayani, mbwenye Júlio wahakodiha okosa ejuwene, mwa wavaha malago. Sabwaya? Iyene “wafuna onvuna Paulo.” Kavali waganyedha wila Paulo wahinonelamo yawi wali Yehova weddiha merelo a kazembe oddu wapama.—Mer. 27:1-3, 42-44.

13. Yehova onalabihedhaga dhavi attu anna ettomo?

¹³ Nikamihedho gani ninakela iyo? Egakala mowiwanana na efunelo ya Yehova, iyene onolabihedha guru dha muya waye wokoddela wila akosihe attu anna ettomo wi akwanihe ejile enganeleyi. Nona Mwene Salomau wahileba: “Nabuya onoweddiha murima wa mwene bari munfuneliye, ninga munkosana iyene manje a munyaza.” (Gano 21:1) Nlebo ntti na gano ninsunziha eni? Attu anowodha otiba mukulekule wila manje aviregemo ninga muntadelani. Na mukalelo wakakene Yehova onowodha olabihedha muya waye wila waweddihe alamuleli awodhe wakwaniha efunelo yaye. Ejo agapadduwa, attu anna ettomo anottukuleleya okosa dhogana dhinapuriha attu a nlogo na Mulugu.—Kaladdaniha na Ezdra 7:21, 25, 26.

14. . Ninga mulogela Merelo 12:5, bani anfwanyelelihu walobelela?

¹⁴ Txini enfwanyelihu okosa? Nilobelege, “enofuneya walobelela amwene, anddimuwa etene a elabo” akala attu aba anowittaneliwa okosa dhosakula dhinpatta okalawo wa Akristu obe mabasa olaleya. (1 Tim. 2:1, 2; Neh. 1:11) Akristu a nsaka zana noroma ankosa dhawene, awene animulobelela Mulugu na murima wetene amunlelaga mwaha wa abali na arogora awa ali mukambura. (Kengesa Merelo 12:5; Aheb. 13:3) Dhahene iyo ninofwanyeela walobelela ang’anali a mmakambura abuwene anasogorhela abali na arogora ehu. Ninofwanyela omukumbirha Yehova wila alabihedhe attu anna ettomo wi akose merelo akakene a Júlio, a waweddiha abali ehu afugeliwe na “mukalelo wa wariha.”—Kang’ana nota na Merelo 27:3, mBibiliani wa Tradução do Novo Mundo.

15-16. Yehova omukamihedhi dhavi Paulo amulabihedhaga Aristarko na Luka?

¹⁵ Nikamihedho gani nakelile Paulo? Akosaga oleddo waye wodhowa o Roma, Paulo wahakela wili nikamihedho nanvahile Yehova alabihedhaga abali na arogora. Ndoweni none dhotagiha esi.

¹⁶ Amarho eli ororomeleya a Paulo, Aristarko na Luka ahigana odhowa vamodha na iyene o Roma. * Awene ahika egumi yawa vangovini wi akale vamodha na Paulo, masiki vahadeliwani na Yezu wila agahifiya o Roma obareleyene. Akosaga oleddo wawa, padhilani oziwa wila awene vina agahiviluwa. Musongorhomwa Aristarko na Luka asama o Sesareya, Paulo wahimulobelela Yehova na murima wetene atamaalelaga mwaha wa nikamihedho navahiwiye na abali aba ororomeleya vina oliba murima.—Mer. 27:1, 2, 20-25.

17. Yehova omukamihedhi dhavi Paulo alabihedhaga abali a mmulogoni?

¹⁷ Mwari mwa oleddo waye Paulo wahikamihedhiwa dila dhinjene na abali a mmulogoni. Valiye muttette w’o Sidónia, Júlio wahimuttiya Paulo “odhowa ogumana na akwaye, awene amwakela, amvaha dhomukalihana.” Vasogorhova o sidadi ya Putéoli, Paulo vamodha na akamihedhi aye ‘ahafwanyawo Akristu ena akumbirile okala na awene sumana. Akristu akala mirudda esi ahakwaniha dhojombeliwa dha Paulo vamodha na akwaye a muleddoni, Mohaganyedha Paulo wahattabiha venjene anamuralaya awaddelaga dhotagiha dhaye. (Kaladdaniha na Merelo 15:2, 3.) Mmalelani olibihiwa, Paulo na akwaye adhowanavi oleddo wawa.—Mer. 27:3; 28:13, 14.

18. Txini yamuttukulele Paulo omutamaalela Mulugu vina oliba murima?

¹⁸ Paulo Bali mudila y’o Roma iyene txino wahikana ebaribari ya esile dhalebileyi vyaka ttaru mundduni, alebelaga mulogo wa kwatti y’o Roma: “Ddinodha wenewo dduwoneniwo ninga muromile miyo wubuwela wale.”  (Rom. 15:23) Mbwenye iyene kaaziwile yawi agafilewo ninga nfugeliwi. Iyene wahilibiheya venjene muziweleyi wila abali o Roma ela omujeedhela mudila wi ammoyele! “Paulo vawonileyi omutamaalela Mulugu, murima omuliba.” (Mer. 28:15) Ninowona wila Paulo wahimutamaalela Mulugu mwawoneliye abali. Sabwaya? Sabwani Paulo wahizinddiyela wili yawi Yehova wela omukamihedha alabihedhaga abali na arogora.

19. Mowiwanana na 1 Pedro 4:10, Yehova onnilabihedha dhavi wi nakamihedhe abalihu?

¹⁹ Txini enfwanyelihu okosa? Weyo onowaziwa abali na arogora a mmulogoni antabuwa na dhifoyo, na eredda obe angumanana makattamiho mena anazuzumiha? Obe txino awene antabuwa sabwa ya omuyelela mwanamudhi wokweleya. Nigaziwa wila okala mbali onjombeliwa elabo yovikalihana, ninofwanyela omuloba Yehova na nlobelo wila niziwe txini enakosehu wi nimukamihedhe muttu oddo wokweleya ontabuwa. Mazu ehu na mereloya anodha okala nikamihedho nintamela mbali obe murogora. (Kengesa 1 Pedro 4:10.) * Nigakosa dhawene txino ninela okamihedha wakwanihedheya wa mazu aba apikirheli Yehova awi, “Miyo kaddinauthiye weka, kaddinauyayale.” Okosa ejo enela odhana ottaba onddimuwa!

20. Ninlogelani na nikuluvelo nawi “Yehova ddi mukamihedhi waga”?

²⁰ Dhahene ninga esile dhimpadduwele Paulo vamodha na attu ena, muleddoni mwehu mpaka elabo eswa, ninogumanana makattamiho menjene. Na mudhidhiya, iyo ninolibiheya sabwani ninoziwa wi Yehova oli na iyo. Yehova ononivaha nikamihedho amulabihedhaga Yezu vina anju. Masaka mena, egakala efunelo yaye, Yehova onowalabihedha attu anna ettomo wila anikamihedhe. Vina ninokaanaga dhotagiha dhinoniha wi, Yehova onolabihedha muya wokoddela wila addiginyena mirima dha emeleli aye wi awodhe wakamihedha Akristu akwawa. Dhahene, ninokaana nikuluvelo ninga Paulo ologile: “Nabuya ddinddikoya, kaddinova elo. Txini enawodhe athu oddirana?”—Aheb. 13:6.