1. Ninga munlogela Mateu 28:18-20, nlamulo gani nivahile Yezu?

MMALELE Yezu ovenyihiwa mukwani, wahifiya o Galileya wenewo watugumanile anamafwara aye. Iyene wahikana muselu munddimuwa wafuneye wawaddela. Wali muselu gani? Dhologadha dhinfwanyeya apa va Mateu 28:18-20.—Kengesa.

2. Mavuzo gani anasunzehu?

² Nlamulo nivahile Yezu na wakosa anamafwara ninowalabela emeleli a Mulugu a masaka abano. Nona nddowene noneni dhowakula dha mavuzo mararu aniwanana na mabasa anittiyedhi Yezu. Noroma, txini enfwanyelihu okosa, ottiya osunzihavi mazu a Mulugu abuwene ali mabasa a wakosa namafwara aswa? Nanawili, anamalaleya otene a mmulogoni anakamihedhe dhavi wunuwa wa namasunza a Bibilia? Naneraru, ninawodhe dhavi wakamihedha aroromeli akwehu akumuweli mabasa a wakosa anamafwara wiyelela wili mabasa awa?

3. Mazu gani ohipipiriha enjedhile Yezu mmalamuloni mwaye?

³ Maswagiho a Yezu kahiye opipiriheya. Iyo ninofwanyela wasunziha attu dhotene dhirumile Yezu. Mbwenye akalawo malago ahinfwanyelihu oduwala. Yezu kalogile wi: ‘Mwasunzihe dhetene dhulamulileni miyo.’ Iyene ologile: “Mwasunzihe ovirihamo dhetene dhulamulileni miyo.” Wila nivirihemo maswagiho aba nigasunzihaga attu Bibilia, ninofwanyela vina wasunziha mukaleloya wa weddana dhinsunzani. (Mer. 8:31) Ekaleleni yofuneya okosa dhawene?

4. Txini entapulela ovirihamo malamulo? Kavaha yotagiha.

⁴ “Ovirihamo” malamulo, kuloga wiwelela. Wi niladdanihe txini enfwanyelihu okosa wi nimusunzihe muttu ovirihamo  obe wiwelela dhotedhene dhinirumile Kristu, karoma woona yotagiha eji. Muttu onsunziha weddiha karo agamusunzihile dhavi namasunza waye wiwelelaga malamulo a murampani? Voroma, iyene onroma omwaddela malamuloya anfwanyela ovirihamo namasunza bali murampani. Mbwenye wi amusunzihe mwawakwana-mwene namasunza waye, iyene onofwanyela ottukula ttarho yina. Onofwanyela omuttukulela murampani, bamuttiya ovulantini, wi namasunzaya avirihemo dhotedhene dhisunziliye. Yotagiha eji enisunziha eni?

5. (a) Ninga munlogela Joau 14:15; 1 Joau 2:3, txini dhinfwanyelihu wasunziha anamasunza ehu? (b) Kaloga dhotagiha dha malago dhinfwayelihu okosa nigakala na anamasunza ehu.

⁵ Nigasunzihaga attu ena Bibilia, iyo ninasunziha esile dhinnifunana Mulugu. Mbwenye dhihikalawo dhina dhinfwanyelihu okosa. Iyo ninofwanyela wasunziha anamasunza ehu a Bibilia ovirihamo mwigumini mwawa esile dhinasunziya iyo. (Kengesa Joau 14:15; 1 Joau 2:3.) Nigatapulelamo anamasunza ehu txini enfwanyelani okosa wi avirihemo masunziho a mMaleboni anasunziha iyo, awene anele owodha weddana malagoya oskola, omabasani vina mmavegoni mwawa. Nawaddelege dhopadduwa dha mwigumini mwehu nawonihaga wi ovirihamo malago a Bibilia ohinirabeliha ngovi vina ohiniwodhiha osakula dha malago. Nigakala na namasunza wehu, ninofwanyela olobela wa Yehova nikumbirhaga muya wokoddela wi omukamihedhe.—Jo. 16:13.

6. Txini yina eniwanana na wasunziha attu ena ovirihamo malamulo a Yezu?

⁶ Txini yina eniwanana na wasunziha attu ena ovirihamo malamulo a Yezu? Iyo ninofwanyela wakamihedha anamasuza ehu wunuwiha efunelo ya wakosa anamafwara. Sabwani anamasunza ena anokana manyazo olaleya esile dhinsunzani. Nona ninofwanyela ovilela nigavahaga maswagiho anenjedha vang’ono-vang’no ononelamo wawa, amfiya mmirimani mwawa vina anattukulela okosa elobo-txilobo. Txini dhinfwanyelihu okosa wi nimukamihedhe namasunza wunuwiha efunelo ya wawaddela attu ena miselu dhapama?

7. Txini dhinfwanyelihu okosa wi nimukamihedhe namasunza wunuwiha efunelo ya wawaddela attu ena miselu dhapama?

⁷ Txino enofuneya omukosa namasunza mavuzo ninga aba: “Orumela miselu dha Omwene osaddule dhavi egumi yawo? Onona wi enofuneya wi ena ewe miselu esi? Weyo onakamihedhe dhavi?” (Gano 3:27; Mt. 9:37, 38) Kamulagihe namasunzaya folhetu dhili Mbudduni Mwehu mwa Vipano Dhosunzihana ogamala omukumbirhe asakulevo mutoma ogaziveliwe iyene ologa na amarho aye obe akwaye omabasani. * Ogamala omvahe namasunzaya folhetudha dhisakuliye. Omusunzihe malago a ovahedhana mafolhetuya. Anamasunza ehu agamala orumelihiwa okala anamalaleya ohibatiziwa, jofuneya olaleya na awene wi naswagihe.—Koh. 4:9, 10; Lk. 6:40.

8. Ekaleleni yofuneya anamasunza ehu wunuwiha omukwela wawa Mulugu na anamanddamaniya? (Kang’ana vina kasha “ Dhifwanyelihu Okosa wi Nimukamihedhe Namasunza Wunuwiha Omukwela Waye Mulugu.”)

⁸ Okane muyubuweloni wi Yezu ohiniswagiha n’efulo ya wasunziha ena “ovirihamo dhetene” dhinilamulele iyene. Txibarene okosa mabasa aba eniwanana na ovirihamo malamulo meli manddimuwaya—omukwela Mulugu vina omukwela mwanddamani—malamulo aba omeli anovahana na mabasa a olaleya vina wakosa anamasunza. (Mt. 22:37-39)  Aniwanana dhavi? Ennittukuleletxa olaleya ku okwela—omukwela wehu Mulugu na wakwela anamwanddamani. Enoziweya wila akalawo anamasunza a Bibilia anddeliwa wova agobuwela dha odhowa olaleya. Mbwenye ninofwanyela walibiha anamasuza aba wi Yehova onele wakamihedha vang’ono-vang’ono owodha okwaranya wawova wawa attu. (Masal. 18:1-3; Gano 29:25) Kasha ennonihedhamo masunzo aba, enologa ttarho dhifwanyelihu okosa wi nimukamihedhe namasunza wunuwiha omukwela waye Mulugu. Veli-veli txini dhinfwanyela okosa abali a mmulogoni wi akamihedhe anamafwara aswa wunuwiha okwela wawa?

9. Dhotagiha dhinkosa namasunziha onimusunziha muttu weddiha karo, dhinimukamihedha dhavi namasunza waye ovirihamo masunzo amvahiwiye?

⁹ Nddoweni none wili yotagiha ya muttu onsunzihiwa weddiha karo. Iyene onawodhe dhavi osunza mudhidhi oneddihiye mukukuttaya murampani, oku namasunziha waye amwang’anaga? Mwa omvuruwana n’ofwaseya namasunziha waye vina mwa wakalela txenjewa anameddiha ena. Txino namasunzihaya onodha omutonya nameddiha mukukutta mwina oneddiha pama murampanimwa. Obe onodha omutonya nameddiha mwina omvugula txeza ya karo yaye wi awodhihe anameddiha akwaye wona pama rampaya. Dhotagiha esi dhinomukamihedha namasunzaya ovirihamo malago amvahiweye.

10. Txini dhinamukamihedhe namasunza wunuwa mpaddi womuyani?

¹⁰ Na mukalelo wakakene, namasunza wa Bibilia oromile wedda dila ya egumi kansunza bahi na namasunziha waye, onosunza vina na dhotagiha dhina dha emeleli a Yehova. Txini yina enamukamihedhe namasunza Bibilia wunuwavi mpaddi womuyani? Mwa wona matugumano ehu a Okristu. Ekalele nni yofuneya? Masunziho a Mmaleboni amvahiwehu mmatugumanoni anoniwodhiha winjiviha ononelamo wehu, anowaraliha nroromelo nehu vina anowenjedha omukwela wehu Mulugu. (Mer. 15:30-32) Nona mmatugumanoni namasunziha wa Bibilia onofwanyela waziwiha abali na arogora ena a mmulogoni agumanilena makattamiho anligana na a namasunzaya. Dhotagiha gani dha okwela wa Okristu dhinfwanyela wona namasunza mmulogoni? Karoma woona dhopadduwa esi.

11. Dhotagiha gani dhinda ofwanya namasunza mmulogoni, vina dhotagihadha esi dhinamukamihedhe dhavi namasunzaya?

¹¹ Namasunza wa muziye onomona mmulogoni murogora wa Mukristu oli muziye vina. Namasunzaya agonaga guru dhinkosa murogora dha odhana anaye omatugumanoni vina okala mwiyana onzuzumela mabasa a Mulugu, iyene onela osunzavo malago vaddiddi. Namasunza onwana na ekarho ya oja fola, onomuziwa namalaleya mwina wali mmakattamihoni akakene nanda bawodha okwaranya. Namalaleyaya onomwaddela namasunzaya wi omukwela waye Yehova ohimukamihedha wiwelela malamulo aye. (2 Kor. 7:1; Fil. 4:13) Agamala wiwa dhimpadduwele namalaleyaya, iyene onela okana nikuluvelo agaddeliwa wi, “Weyo onela owodha vina.” Namwali oli namasunza wa Bibilia onomoona namwali mukwaye wa murogora onagalala sabwa ya okala Munamoona wa Yehova. Mudhidhi onimona namasunza wa Bibilia namwali mukwaye bali wohagalalene, iyene onela ofuna osunzavi wi azinddiyele txini enimuttukulela murogora ole okala wohagalalene.

12. Ninlogela nni wi muttu-muttu wa mmulogoni ohikana mabasa a okamihedha wunuwa wa anamasunza a Bibilia?

¹² Namasunza wa Bibilia agona nroromelo na anamalaleya ottiyana-ttiyana, onela osunza txini entapulela ovirihamo malamulo a Kristu vina onela wenjedha omukwela waye Mulugu  na anamwanddamaniya. (Jo. 13:35; 1 Tim. 4:12) Nona, dhahene ninga mulogeliwani vamaromo, namasunza wa Bibilia onodha osunza dhinjene mwaha wa anamalaleya ena afwanyiwe makattamiho anligana na aye. Iyene onosunza wi enowodheya okosa matxinjo a mweddelo waye badha okala namafwara wa Kristu. (Olib. 30:11) Muttu-muttu wa mmulogoni onofwanyela okosa ofiyedha vawondhiye wi akamihedhe wunuwa wa anamasunza a Bibilia. (Mt. 5:16) Guru gani dhinkosiwe wi walibihe anamasunza a Bibilia anda omatugumanoni?

13-14. Yezu waweddihile dhavi anamafwara aye akumuwile?

¹³ Iyo nihikana efunelo ya wakamihedha abali na arogoraya ehu wiyelela mabasa akumuwelani, abuwene anittiyedhe Kristu a wakosa anamafwara. Mweddihedho waweddihile Yezu arumiwi aye onowoniha txini enfwanyelihu okosa masaka abano.

¹⁴ Mugomihedhe Yezu mabasa aye velaboni ya vati vina okwa waye buli vakuvi, anamafwara aye “otene amuleva, amuthawa.” (Mk. 14:50; Jo. 16:32) Iyene waweddihile dhavi anamafwara aye abuwene ali a wobana vang’onovi? Mmaleliye-wene ovenyihiwa mukwani, iyene ohawaddela dhahi anamafwara aye, “Kamove! Dhowani mwawaddele abalaga [wi miyo ddivenyihiwa mukwani].” (Mt. 28:10a) Yezu kanyanyale anamafwara aye. Masiki anamafwara aye amuttawilevi, iyene wahidhowa akuwelagavi, wahifiyedha ologa wi nyuwo “muli abalaga.” Dhahene ninga Yehova, Yezu muliba ttagaraga, vina namalevelela.—2 Amwe. 13:23.

15. Iyo ninawona dhavi abale akumuwele mabasa olaleya?

¹⁵ Yakakene jinnipadduwela, nigaubuwela anamalaba akwihu akumuwele mabasa a olaleya. Awene babalihu vina barogorihu; iyo ninowakwela! Ninoubuwela n’okwela mabasa akosa anamalaba aba akwihu—akalawo abale akumuwele mabasaya wale vaddiddi. (Aheb. 6:10) Iyo txibarene ninofuna vaddiddi okala na awene! (Lk. 15:4-7) Txini dhinfwanyelihu okosa wi nawonihe okwela wehu vina nonihe omutagiha wehu Yezu?

16. Ninawodhe dhavi woniha wi ninowazuzumela abali vamodha na arogoraya akumuwele mabasa a Mulugu?

¹⁶ Wawobelege odha omatugumanoni. Elobo yoroma ekosile Yezu na anamafwara aye akumuwile yali ya wawobela matugumano. (Mt. 28:10b; 1 Kor. 15:6) N’ekalelo yakakene, masaka abano iyo ninofwanyela wawobela omatugumanoni abale akumuwele mabasa a Mulugu, akala awene kandowawo omatugumanoniwa. Ninofwanyela wawoba dila dhinjene, akala ninowawoba ahidhaga. Kavali yowaganyedha wi Yezu wahagalala vaddiddi murumelele anamafwara aye muwobo waye.—Kaladdaniha na Mateu 28:16 vina na Luka 15:6.

17. Txini enfwanyelihu okosa akala ole okumuwele mabasa a Mulugu onodha omatugumanoni?

¹⁷ Wamoyelege na murima wetene. Yezu mugumaneliye na anamafwara aye, iyene ohoniha wi onowazuzumela; ddi iyene oromile ologa na awene. (Mt. 28:18) Muttu okumuwele mabasa a Mulugu agadha Onumbani ya Omwene, iyo ninimwakela dhavi? Iyo ninofwanyela ommoyela na mada omeli. Voroma-vene, enodha opadduwa iyo ohikana yologa. Ninofwanyela omwaddela wi nihagalala vaddiddi omona iyene omatugumanoni, mbwenye niloge na malago wi ninamutote manyanzo.

18. Niwodhe dhavi walibiha anamalaleya akumuwele mabasa a Mulugu?

¹⁸ Walogele mazu olibiha. Anamafwara a Yezu ahikana dhubuwelo dhawi awene kagawodhele olaleya mazu alamulele iyene. Mbwenye Yezu wahalibiha anamafwara aye na mazu  awi: “Miyo ddili na nyuwo masiku otene.” (Mt. 28:20) Dhologa dhaye dhahittidda mpirha? Txibarene. Mmalele Yezu ologa mazu aba anamafwara aye ahizuzumela venjene “osunziha [vina] olaleya muthaka onthabiha.” (Mer. 5:42) Anamalaleya akumuwele mabasa awa anofuna vina olibihiwa. Awene anodha okanela manyazo wiyelela mabasa awa olaleya. Iyo ninofwanyela walibiha na mazu awi, awene kanalaleye oka. Akala anokala omala na wale iyo ninofwanyela odhowa vamodha mmabasani a olalaye. Awene txibarene anela otamalela nikamihedho nehu na wavaha guru dha wiyelela wili mabasa a olaleya muttaka wapama. Iyo nigaweddiha abalihu vamodha na arogoraya akumuwele mabasa a Mulugu n’ekalelo ya okwela, ninela wona wunuwa wa mulogo wehu.

19. Yofuna ya mmirimani mwehu jivi, vina sabwaya jani?

¹⁹ Mabasa aba a wakosa anamafwara anamale mudhidhi gani? Ofiyedha omagomelo wa elabo ejino. (Mt. 28:20; kang’ana Glossário, “Final do sistema de coisas,” wa Bibilia Tradução do Novo Mundo.) Ninela owodha ogomiha mabasa aba anittiyedhe Yezu? Nihimala ogana okosa! Iyo ninohagalala nilabaga na murima wetene, na guru dhotene vina na ewodheloya yotene, natamelaga “abale athomeliwe egumi ya mukala-kala.” (Mer. 13:48) Nigakosa dhahene, nintagiha merelo a Yezu. Iyene wahiloga: “Oja waga ku ovirihamo enddifunana Mulugu oddirumile, kupuliha mabasaye addivahileye.” (Jo. 4:34; 17:4) Jijene vina enunlelihu. Iyo ninfuna nigomihe mabasa aromilehu. (Jo. 20:21) Vina ninfuna wi eena, vamodha na abaleya okumuwile nilabe mumodhani wi niwodhe opuliha mabasa aba.—Mt. 24:13.

20. Ninga munlogela Filipi 4:13, iyo ninfunela nni ogomiha mabasa anittiyedhe Yezu?

²⁰ Enoziweya wi enorutxa vaddiddi ottidda mabasa anittiyedhe Yezu. Mbwenye iyo kaninttidda mabasaya aba noka. Yezu ohinikuluveliha wi iyene onela okala na iyo. Iyo ninokosa mabasa aba a wakosa anamafwara, vowi “ninlaba vamodha mabasa a Mulugu” vina nirumiwe na “nzina na Yezu Kristu.” (1 Kor. 3:9; 2 Kor. 2:17) Noona, enowodheya iyo opuliha mabasa aba. Gari enddimuwa vaddiddi okosa mabasa aba vina wakamihedha attu akwihu ovolowa mmabasani akakene!—Kengesa Filipi 4:13.