1. Ninga munlogela Mateu 7:13, 14, iyo nili dhavi muleddoni?

NOTENE nili muleddoni. Yogana yehu ja ofiya mwilaboni munalamuleliwege na Yehova, odduwene oli Mulugu wa okwela. Siku na siku iyo ninokosa guru ya wedda dila ya egumi. Mbwenye Yezu ohiloga wi ddilaya eji jokattamiha vina enorutxa weddamowa. (Kengesa Mateu 7:13, 14.) Sabwa ya iyo okala attu ohiligana masaka meena ninopupuruwaga.—Gal. 6:1.

2. Txini enonihu mwari mwa nsunzo ntti? (Kang’ana Kasha “ Ovyeviha Ononikamihedha Wogolela Ttarho Dhehu.”)

² Akala iyo ninfuna neddegevi ddila yokatamiha ennittukulela wigumini ninofwanyela osaddulela merelo ehu, mobuwelo na dhokosa dhehu. Murumiwi Paulo wahalaga Akristu akala o Korinto na mazu awi ‘rumelaní wogoleliwa.’ (2 Kor. 13:11) Malago aba anonilabela iyo vina. Mwari mwa mutomo obu ninile ologa nikamihedho ninivaha Bibilia wi niwodhe osaddulela ttarho dhehu, vina ninela wona txini enfwanyelihu okosa wi natamele amarho anawodhe onikamihedha weddagavi dila ya egumi. Ninele ologa vina murutxelo wa wiwelela malago annivaha nikuru na Yehova. Ninela woona wi oviyeviha ekalelo enaniwodhihe osaddulela ttarho dhehu nihíyelelaga wagalala mumwebedhani mwehu Yehova.

3. Txini enwodha wukosana Mazu a Mulugu?

³ Nigafwaseyela opepesa dhili muyubuweloni mwehu ninozinddiyela wi nihikana vofuna wogolela. Murima wehu wohilageya, ononirutxihaga oziwa mwahaya onittukulela okosa dhilobo na mukalelo wottiyana. (Jer. 17:9) Kinrutxa ogwela mmuregani mwa ‘ovipela malago nanya.’ (Tia. 1:22) Nona ninofwanyela ovipima na Mazu a Mulugu. Nzu na Mulugu nihikana ewodhelo ya oniziwiha elihu, “ninobeddegela dhinubuwela muthu mmirimani mwaye na dhinfuneyi.” (Aheb. 4:12, 13) Mazu  a Mulugu anoladdanihiwana na epano ya rayu-X eniwodhiha woona eli mmaningoni mwehu. Mbwenye enofuneya oviyeviha wi nipurelemo malago anvahiwehu mBibiliani vina na emeleliya a Mulugu.

4. Txini yonihile wi Mwene Saul wali muttu wovittukulela?

⁴ Yotagiha ya Mwene Saul enowoniha txini empadduwa iyo nigatowiwa oviyeviha. Ovitukulela wahimuroddowela Saul ofiyedha iyene ohikana ekalelo yawona wi dhubuwelo na dhawira dhaye dhanfwanyela wogoleliwa. (Masal. 36:1, 2; Hab. 2:4) Otowa malago waye woneyiletxe vaddeliwiye na Yehova, txini yafwanyeliye okosa mukoddoni yadhowiliye oraba na Amalekita. Oddiyamaru waye ohimuttukulela ohiwelela dhamulamulele Yehova. Yottabwaya yali yawi, monihedhiwiye ovonya waye na Samuel, Saul ohiruna. Iyene wanfwanyela okumbira nlevelelo, mbwenye kakosile. Ottiya ejo, iyene wamaguvele ologa mazu amoniha ninga muligani, apwattelihaga akwaye muladduya. (1 Sam. 15:13-24) Muvirele mudhidhi mung’onovi, Samuel ohoniha otowa malago wakakene. (1 Sam. 13:10-14) Mokubanyiha-mwene, iyene korudhile ovittukulela okule watepuwa mmirimani mwaye. Nne kogolele ovittukulela waye, nona Yehova ohimunyanyala.

5. Ninsunza elobo gani na ejile empadduwele Saul?

⁵ Wi nisunze pama empadduweli Saul, ninofwanyeela ovivuza: ‘Ddigengesa malago a Mazu a mBibiliani ddinotamelaga wogolela mobuwelo waga? Ddinowubuwelaga wila dhikosilemi kadhittabwiletxe otakala? Ddinotamelaga wamagedha attu ena muladdu oligilemi?’ Akala mwari mwa mavuzo aba nihikalamo nimodha ninakulihu ndde, jofuneya wogolela dhubuwelo na mereloya ehu. Nigahikose ejuwene Murima wehu onela winjiva ovittukulela ofiyedha Yehova onikodda ninga amarho aye.—Tia. 4:6.

6. Kaloga ottiyana waana Mwene Saul na Mwene David.

⁶ Ovano katananela otiyana olivo wa Mwene Saul na ole odhile omuhaba mpaddo, Mwene David; iyene wali muttu wakwela “magano a Nabuya.” (Masal. 1:1-3) David wanziwa wila Yehova onowavuna attu okurumuwa oku awiddaga aliba ovittukulela. (2 Sam. 22:28) Iyene vina wanziwa wila malamulo a Mulugu anowodha wogolela dhubuwelo. Nona ohileba dhahi: “Ddinomutamalela Nabuya onddivaha malago, na mathiyu vina onoddubutxedha mmurimani mwaga.”—Masal. 16:7.

7. Txini enakosihu nigakala attu a oviyeviha?

⁷ Nigakala attu oviyeviha, ninela ottiya mazu a Mulugu wogolela dhubuwelo dhehu dhohifwanyela, nihinatti okosa merelo aniwanana na dhubuwelodha. Mazu a Mulugu aganikalela ninga lizu ninnipanga wi: “Dila jiji: virani ejene.” Anele onaddela akala ninoroma oteddemanela omononi woja peno wemara. (Iza. 30:21) Omvuruwana Yehova onela opurihamo egumi yehu na mukalelo wottiyana. (Iza. 48:17) Ninga motagiha, iyo kaninove ototeya manyazo akala muttu ononisisigula mwaha wa obure okosilehu. Ottiya ejo, ninela okala wofiyedheya na Yehova sabwani ninela oziwa wila iyene onneddiha ninga anaye okweleya.—Aheb. 12:7.

8. Ninga munlogela Tiago 1:22-25, ninalabihedhe dhavi Mazu a Mulugu ninga supeyo?

⁸ Nzu na Mulugu ninonikalela ninga supeyo. (Kengesa Tiago 1:22-25.) Masiku otene na membesi nigafunaga odhowa wego iyo ninovyang’ana musupeyoni. Na mukalelo obu, ninoziwa akala jofuneya okosa matxinjo nihinatti ogumana na attu ena. Jakakene empadduwa na iyo, nigamwengesaga Bibilia masiku otene, ninela woona mukalelo gani onfwanyelihu wogolela mobuwelo wehu na mereloya. Enjene anofwanya nikamihedho agengesa nlebo na siku-siku na membesi ahinatti odhowa  wego. Awene anottiya wila esile dhinengesani dhipatte mobuwelo wawa. Dhayene mwari mwa sikuna, anotamela woona mukalelo wa olabihedha magano a Nzu na Mulugu. Mwawenjedha, ninofwanyela okana elemelelo ya osunzaga siku-siku, eji eniwanana na wengesa vina otanalela Mazu a Mulugu masiku otene. Enoneya ninga elobo eng’ono, mbwenye dhilobo esi sofuneya wila dhinikamihedhe okalavi dila ya egumi.

9. Mudhidhi gani onfwanyela marho wawo wulaga?

⁹ Weyo wahiromaga wedda dila yoniwe wila egahutukulela ogwadda manddano awo na Yehova? (Masal. 73:2, 3) Akala ejo yahiromaga wupadduwela nanda marho wawo alibiha murima adha wulaga, ohinvuruwana vina olabihedha malagoya? Akala pumwenemo ekosilewi ja malago vina mohaganyedha ohoniha omutamalela marho oddu wawo mwaha wa wuwoniha ngovi yafuna wupadduwela.—Gano 1:5.

10. Txini enakosiwe akala marho wawo onoulaga?

¹⁰ Mazu a Mulugu anonubutxedha wi: “Olata wa muthu onukwela kumvoreya.” (Gano 27:6) Dhologa esi dhinfuna dhinitapulelemo nni? Koona yotagiha eji: Karoma wubuwela weyo ofunaga olupa dila munvira karo dhinjidhene, venevo okala wozuzumene. Oroma weddela makome mena a dila ohiromile wang’ana oku-n’oku. Bugafuna ovadiwa karo, mukwawo wuttidda moono wuwetela mundduni. Iyene onouweta na guru ofiyedha weyo wiwa opa, mbwenye masiki wiwalevi opa, ekosiliye ehuvuna. Masiki akala moonoya onoupa mwari mwa malabo menjene, onela onyaguleya na mukwawoya sabwa ya iyene wuweta na guru wi onavadiwe karo? Txibarene ejo kinpadduwa! Ottiya onyaguleya, weyo onela omutamalela sabwa ya iyene wuvuna. Yakakene jimpadduwa akala marho wehu ononaddela wi dhologa dhehu peno merelo ehu anogudulana na magano vamodha na malagoya a Mulugu, voroma-vene ninodha onyaguleya vang’onovi. Weyo kunakoye ya mmirimani nne vina kunasiridhiwe na iyene. Okoya dha mmirimani, otowa malago. (Koh. 7:9) Ottiya ejo weyo onela otamalela sabwa ya marho wawo wuwogolela.

11. Txini egadhile omuttukulela muttu opwaza malago apama amvahiwiye na mukwaye?

¹¹ Txini enattukulela attu ena okodda malago anvahiwani na marho okwela? Ovittukulela. Attu ovittukulela anoladdanihiwa na abale ahinvuruwana “masunziho awakwana.” Awene “anothiya wedda na ebaribari.” (2 Tim. 4:3, 4) Awene anona ninga kawo attu anwodha wavaha malago, sabwani anovonana ttima empitta ejile elani. Mbwenye murumiwi Paulo ohiloga wi: “[Onivigwarula] mwinyene, oku ahile elo, onovipela malago yeka.” Mwene Salomau ohigwadda makani aba pama. Iyene bela: “Ddwa thima muzombwe woyelega onna malago, opitha mwene wa kalaba ohinna zelu, ohinrumela malago a akwaye.”—Koh. 4:13.

12. Ninsunzavo nni na yottagiha ya murumiwi Pedro eli va kartani ya Galásia 2:11-14?

¹² Koona ekosile murumiwi Pedro mudhidhi wasaddeyiwiye vanamwinjini na murumiwi mukwaye Paulo. (Kengesa Galásia 2:11-14.) Pedro kokala mwina, agahimukanela yammirimani Paulo, sabwa ya mulagelo waye vina mburoya walagiwiye. Mbwenye Pedro wali muttu wa ovyeviha. Iyene ohona wi wahivonya vina ohivirihamo malago a Paulo. Vasogorhova iyene ohilogo wi Paulo wali mbalaye “wokweleya.”—2 Ped. 3:15.

13. Dhilobo gani dhinfwanyelihu wubuwela nigafunaga omulaga marho wehu?

¹³ Akala weyo ohikana marho onfuniwe omulaga, txini enfwanyeliwe oziwa voroma?  Ohinatti oroma ologa na iyene orome ovivuza wamwinya, ‘Veneva kaddintamela “winjivihetxa” opama na ononawa waga?’ (Koh. 7:16) Muttu onivona ninga ddapama, kanasisigula attu na malago, nne vina na magano a Yehova, onasisigula na dhubuwelo dhaye, nona malago a muttu ninga oddu kanlaba. Akala weyo onowona-wene wi mukwawoya onofuna wogoleliwa, ogadhowa ologa na iyene, kupipirhe makaniya, omukosege mavuzo awubuweleya wi omonihe ovonya waye. Okaane ebaribari wi malago awo ba Mmaleboni, omubutxedhe marho wawo wi weyo vamodha na Yehova munomukwela vaddiddi. (Rom. 14:10) Nigalabihedha eziwelo enfwanyeya mu Nzuni na Mulugu nigamulagaga muttu ninela otagiha supaje yana Yezu. (Gano 3:5; Mt. 12:20) Sabwaya jani? Sabwani Yehova onela oneddiha iyo dhahene ninga munaweddihedha iyo attu akwihu.—Tia. 2:13.

14. Txini dhinnivaha nikuru na Mulugu?

¹⁴ Yehova ononeddiha dila ya egumi mwa olabihedha mpaddi wa nikuru naye na vati ninnivaha mavidiyu na manivuru ottiyana-ttiyana vina na matugumanoya, annikamihedha iyo notene weddana magano anfwanyeya Munzuni na Mulugu. Malago aba anolaba sabwani anda mu Nzuni naye. Abali a Nikuru Nolamulela agasasanyedhaga mabasa olaleya, awene ankuluvela muya wokoddela. Noona, Nikuru Nolamulela ninodha nisaddulelaga malago amvahani mwaha wa mukalelo onfwanyela weddihiwa mabasaya. Sabwaya jani? Sabwaya jawi dha ‘elabo ejino dhinovira’, noona nikuru na Mulugu ninofwanyela ovisaddulelaga mowiwanana na mikalelo dha nsakana.—1 Kor. 7:31.

15. Anamalaleya ena angumanana dhorutxa gani?

¹⁵ Iyo kaninaganyedha wi ninovahiwaga malago menjene a Mbibiliani anloga mwaha wa okoddelihana omuttu wehu. Kito txini dhinkosihu akala nikuru na Mulugu ninosaddulela dhilobo dhimpatta egumi yehu kakamwe? Ninga motagiha, vyaka esi dha ovanene mabasa a omaga na ovenyihedha Numba dha Omwene ahinjivihiwa venjene. Noona abali a Nikuru Nolamulela ahivaha malago awi Numba ya Omwene modha mutugumaniwege na milogo dhottiyana-ttiyana. Mwaha wa masasanyedho aba, milogo dhinjidhene dhinotugumanaga Numba ya Omwene modhene vina dhina dhinogulihiwaga. Kobiriya enlabihedhiwaga  wi dhimagiwena Numba dhina dha Omwene mmiruddani muli ofuneya onddimuwa vaddiddi wa okalamo Numba dha Omwene. Akala weyo onkala murudda ogulihiwe Numba dha Omwene nanda mulogo wawo ovirela Numba yina ya Omwene, enoneya ninga onofwanyela ovisaddulela masasanyedho abo maswa. Anamalaleya ena anokosa oleddo wolapa wi afiye omatugumanoni. Ena alabile na guru wi amage Numba ya Omwene egulihiwe, anodha ovivuza, egulihedhiwe nni? Awene anodha wubuwela wi anongele yovi guru dhawa vamodha na mudhidhiya. Mbwenye masiki dhawene awene, anokamihedha masasanyedho aba, noona anofwanyela otamaleliwa venjene.

16. Ofwara malago anfwanyeya va Kolosi 3:23, 24, enikamihedha dhavi okanavi ottaba wehu?

¹⁶ Ninile okanavi ottaba wehu nigobuwela wila nili anamalaba a Yehova vina a nikuru naye. (Kengesa Kolosi 3:23, 24.) Mwene David ohinittiyedha yotagiha yapama mwa opereka mivaho wila dhimagiwena mparha. Iyene bela: “Miyo na nlogo naga-nthi nili nni, ofiyedha owodha ouperhekelani mivaho dhinjene ninga eso? Dhetene dhinda mwa nyuwo; apa iyo ninowiyihedhani dhinivahilenyu.” (1 Map. 29:14) Akala iyo ninoperheka mivaho, iyo ninimwiyihedha Yehova esile dhinivahiliye. Masiki dhawene Yehova onotamalela akala ninolabihedha mudhidhi na guru dhehu vamodha na dhinihuna, niperekelaga wakwanihedhiwana mabasa anfuneya.—2 Kor. 9:7.

17. Ninakoddeleni okumuwa akala ninowona wila jofuneya wogolela ttarho dhehu?

¹⁷ Wila nikalevi dila ya egumi, iyo notene ninofwanyela ofwara ttarho dha Yezu. (1 Ped. 2:21) Akala onowona wila jofuneya wogolela ttarho dhawo kukumuwe. Ejo elobo yapama enoniha wila weyo onorumela olagiwa na magano a Yehova. Kanidduwale wi Yehova onoziwa wila iyo nili attu ohakwana—nona enjedheliye wi iyo nikose—ja ofwara yotagiha yawakwana ya Yezu.

18. Txini enfwanyelihu okosa wila nifiyedhe yogana yehu?

¹⁸ Oku nang’anaga musongorho ninofwanyela wogolela mobuwelo, merelo na dhawira dhehu. (Gano 4:25; Lk. 9:62) Nikalevi oviyeviha, ‘nihagalale; nirumelaganí wogoleliwa.’ (2 Kor. 13:11) Nigakosa dhawene “Mulugu omvaha okwela na murenddela onokalavi na [iyo].” Vina kaninakalele ofiyavi muleddoni mwehu, ninela ottabwa mudilamwa.