1. Ninziwa dhavi wi Yehova onofuna ofiyedheya na iyo?

 YEHOVA ononiwoba wi ninfiyedhe. (Tia. 4:8) Iyene onfuna akale Mulugu wehu, Babi wehu, vina Marho wehu. Yehova onowakula malobelo ehu vina ononikamihedha mudhidhi wa makattamiho. Iyene onolabihedha nikuru naye wi anisunzihe vina anibarele. Txini enfwanyelihu okosa wi nikale ofiyedheya na Yehova?

2. Ninawodhe dhavi okalavi ofiyedheya na Yehova?

² Iyo ninele okala ofiyedheya na Yehova modhela olobela, wengesa Nzu naye vina otanalela. Nigakosa dhawene ninele wunuwiha omukwela wehu, omutamaalela, omwiwelela vina omuttittimiha vowi ddi iyene onfwanyelela. (Ovuh. 4:11) Nigadhowagavi nunuwihaga omuziwa wehu Yehova, omukuluvela wehu onelege odhowavi wunuwaga vina ninelege okuluvelavi nikuru naye nisakuliliye wi ninikamihedhege.

3. Ddiabo ontamela dhavi onimwalaniha na Yehova, nanda txini enanikamihedhe odhowavi nimukuluvelaga Mulugu na nikuru naye? (Masalmo 31:14, 15.)

³ Ddiabo onotamela onimwalaniha na Yehova, makamaka mudhidhi ongumanihuna makattamiho. Iyene onkosa dhavi ejuwene? Vang’ono-vang’ono iyene onotamela ogwadda omukuluvela wehu Yehova vina nikuru naye. Mbwenye enowodheya iyo ovibarela mwa mirega eso. Nroromelo nehu nigaliba vina nimukuluvela Yehova, ninele odhowavi nimukuluvelaga Mulugu vina nikuru naye.—Kengesa Masalmo 31:14,  15 [Masalmo 31:13, 14, Tradução do Novo Mundo].

4. Txini enawone iyo mwari mwa nsunzo ntti?

⁴ Mwari mwa nsunzo ntti, ninele wona dhoweha ttaru dhingumanihuna otakulu wa mulogo; makattamiho ninga aba anodhaga weha omukuluvela wehu Yehova vina nikuru naye. Dhoweha esi dhigadhile dhavi onimwalaniha na Yehova? Nanda txini enfwanyelihu okosa wi nivibarele na mirega dha Satana?

5. Makattamiho agadhile dhavi weha omukuluvela wehu Yehova na nikuru naye?

⁵ Dila dhina, ninogumana na makattamiho—ninga ofwara-fwariwa na anamudhi obe oyelela ganyo. Makattamiho ninga aba agadhile dhavi weha okuluvela wehu nikuru na Yehova vina onimwalaniha na iyene? Akala ninodha nivilelaga makattamiho mwa mudhidhi mwinjene ninodhaga oyelela njedhelo vina okukumuwa. Satana onodhaga opura midhidhi eso wi anikosihe oroma waganyedha onikwela wa Yehova. Satana onfuna wi iyo nirome waganyedha, nubuwelaga wi makattamiho ehu atoteyile sabwa ya Yehova obe sabwa ya nikuru naye. Eji ehapadduwela ana Izrayel akalaga Mwijipitu. Vamaromo, awene ahirumeela wi ddi Yehova wamuttomile Mizé na Aroni wi aafurule mudharini. (Obud. 4:29-31) Mbwenye vasogorhova vattabwihile Faraó makattamiho awa, awene anpwatteliha Mizé na Aroni makattamihoya awaddelaga dhahi: “Nyuwo munitotela owali wa Faraó, wa emeleli aye vina; nyuwene muwavaha supadda anipena.” (Obud. 5:19-21) Awene ahamagedha alabeli a Yehova ororomeleya. Eji kiyakalile! Akala weyo onodhavi ovilelaga makattamiho mwa mudhidhi mwinjene, onawodhe dhavi odhowavi omukuluvelaga Yehova vina nikuru naye?

6. Txini ensunzihu na namavuhulela Habakuk sabwa ya ovilela makattamiho? (Habakuk 3:17-19)

⁶ Onfugulele murima wawo Yehova na nlobelo vina ojeedhe nikamihedho naye. Namavuhulela Habakuk wahigumana na makattamiho menjene. Sabwa ya ejuwene wahiroma waganyedha akala Yehova onomutanaala. Nona wahimwaddela Yehova dhotene dhali mmurimani mwaye na nlobelo. Iyene ohiloga dhahi: ‘Nyuwo Yehova, wunla waga munatanale mudhidhi gani? . . . Munddonihedhetxa nni dhabure, oku nyuwo mukalelaga wang’anavi?’ (Hab. 1:2, 3) Yehova wahakula nlobelo na mwimeleli waye wororomeleya, nakosiliye na murima waye wotene. (Hab. 2:2, 3) Mumalile Habakuk otanalela merelo avunilena Yehova nlogo naye wahikana wili wagalala. Iyene wahikana nikuluvelo nawi Yehova onomutanaala vina agahimukamihedha ovilela makattamiho-makattamihovi. (Kengesa Habakuk 3:17-19.) Eji ennisunziha nni? Ogafanyiwa makattamiho, kamulobelele Yehova vina omwaddele dhotene dhiniwamo weyo. Ogamala ojedhele nikamihedho naye. Ogakosa dhawene, onele okana nikuluvelo nawi Yehova onele wuvaha guru wi owodhe ovilela. Ogona nikamihedho naye, nroromelo nawo ninele oliba.

7. Elobo gani yatamela anamudhi a Shirley wi iyene arumele, nanda txini emukamihedhile odhowavi amukuluvelaga Yehova?

⁷ Ozuzumelegevi dhilobo dhomuyani. Eji ehimukamihedha murogora Shirley wo Nepal Nova Guiné, mudhidhi wana iyene makattamiho. b Anamudhi a Shirley ali ayelegi, dila dhina yanrutxa ofwanya oja wowakwana. Amudhaye antamela wobaniha omukuluvela waye Yehova. Awene ahiloga: “Weyo ohiloga wi muya wa Mulugu onowukamihedha,  nikamihedhona ttivi? Iyoya napanovi nayelegi. Weyo onnongela yovene mudhidhi wawo na olaleya.” Shirley ohiloga: “Miyo ddanivivuza: ‘Mulugu txibarene ononitanaala obe nne?’ Mwa venevo momaguva-mwene ddannimulobelela Yehova vina ddannimwaddela dhotene dhali mmurimani mwaga. Ddandhowavi ddimwengesaga Bibilia, mapublikasau ehu, odhowa mmabasani a olaleya vina wona matugumano.” Mohigonela iyene wahinonelamo wi Yehova wela wakamihedha amudhaye. Amudhaye katabuwile na dala, awene alivi owagalalene. Shirley ohiloga dhahi: “Ddahoona wi Yehova wela wakula malobelo aga.” (1 Tim. 6:6-8) Weyo vina ogadhowavi ozuzumelaga dhilobo dhomuyani, kunattiye makattamiho obe waganyedha wumwalaniha na Yehova.

8. Txini endhaga opadduwa na abali ansogorhela nikuru na Yehova?

⁸ Amwiddani ehu anolabihedha TV, radiyo na redes sociais wi avuwihena ottambi na miselu dhopela malago mwaha wa abali attomiwe na Yehova wi asogorhele nikuru naye. (Masal. 31:14) [Masal. 31:13, Tradução do Novo Mundo] Abali ehu anofugeliwa mukamburha amagedhiwaga muladdu wa opanga. Mbwenye ejo kinnitikiniha, sabwani Akristu a nsaka zana n’oroma ahigumana na makattamiho oladdana. Motagiha, murumiwi Paulo wahimageedhiwa se muladdu bafugeliwa mukambura. Awene ewilemo dhavi?

9. Mufugeliwe murumiwi Paulo mukambura, txini ekosile abali ena?

⁹ Akristu ena a nsaka zana noroma, ahittiya omukamihedha murumiwi Paulo vafugeliwiye mukambura o Roma. (2 Tim. 1:8, 15) Sabwaya? Koddi awene animukaanela manyazo Paulo vowi attu ena amoona ninga nvuti? (2 Tim. 2:8, 9) Obe awene ova anadhe ofwara-fwariwa? Kintanala mwahaya, karoma otanalela mukalelo wewilemo Paulo. Iyene wahigumana na makattamiho menjene vina wahika egumi yaye vang’ovini sabwa ya abali abale. (Mer. 20:18-21; 2 Kor. 1:8) Txibarene iyo kaninfuna okala ninga abale amunyanyalile  murumiwi Paulo mudhidhi worutxa! Txini enfwanyelihu wubuwela akala abali ansogorhela anofwara-fwariwa?

10. Txini enfwanyelihu wubuwela akala abali ansogorhela anofwara-fwariwa, nanda sabwaya jani?

¹⁰ Kudduwale enfwara-fwareliwa iyo vina entota ofwara-fwariwa oku. 2 Timóteo 3:12 onloga dhahi: ‘Etene anfuna wiwananeyana na Mulugu, aluwelana na Yezu Kristu, anele ofwara-fwariwa.’ Nona iyo kanintikina, efunelo ya Satana ja walupela makamaka abale ansogorhela nikuru na Yehova. Yogana yaye jawi abali abo attiye weddeyana na Yehova, ottiya ejo onfuna anigonjihe na wova vina okukumuwa.—1 Ped. 5:8.

11. Txini ensunzihu na yotagiha ya Onezíforo? (2 Timóteo 1:16-18)

¹¹ Okalegevi oweddeyana vina wakamihedhe abalawo. (Kengesa 2 Timóteo 1:16-18.) Nsaka zana noroma, Mukristu wakuweliwa Onezíforo kakosile ninga abale attiyile omukamihedha Paulo. ‘Iyene kakaneli manyazo ofugeliwa wa Paulo.’ Onezíforo wahimutamela Paulo, munfanyeliye wahimukamihedha mpaka vawodhiliye. Onezíforo wahika vangovini egumi yaye. Eji ennisunziha eni? Kanittiye wova onigonjiha ofiyedha ottiya wakamihedha abalihu anfwara-fwariwa. Ottiya ejo, nabarele vina navahe nikamihedho ninvedani. (Gano 17:17) Awene anofuna venjene nikamihedho nehu vina wakwela wehu.

12. Txini ensunzihu na abalihu vina arogora o Rússia?

¹² Kawubuwele abalihu na arogora ankala o Rússia, awene kanttiya wakamihedha abali na arogora ali mukambura. Abali ehu agattukuleliwa mmuttegoni wi attongiwe, abali na arogora anokosa muli mwetemwene wi adhowe akamihedhe. Eji ennisunziha eni? Abali ansogorhela, agaroma ofwara-fwariwa vina wikiwa mukambura, kuniwove, nalobelele vinagu nakamihedhe amudhawa. Nitamele marhe mena awakamihedhana.—Mer. 12:5; 2 Kor. 1:10, 11.

13. Obeddiwa ompatta dhavi omukuluvela wehu Yehova vina nikuru naye?

¹³ Anamudhi ahili Akristu, attu anlaba na iyo vina abale ansunzihuna oskola anodhaga onibedda sabwa ya iyo olaleya vina weddana magano a Yehova. (1 Ped. 4:4) Awene txino anodhaga ologa dhahi: “Miyo ddinoziveliwa na weyo, mbwenye makaniya ali na relijiau yawo, kinuttiya weyo okosa elobo-txilobo oku relijiauya bimalile okwela.” Elobo enattukulela attu ena ologa bure, oburutxiwa mmulogoni, awene anloga dhahi: “Nyuwo munolaleya okwela mbwenye koonani mukalelo onaweddiha nyuwo attu aburutxiwe mmulogoni?” Mazu ninga aba anodhaga onittukulela waganyedha. Venevo baniroma ovivuza: ‘Yehova kanoddikumbirha vopitta? Koddi nikuru na Yehova kaninottabwiha dhilobodha?’ Akala onogumana na makattamiho ninga aba onawodhe dhavi okalavi ofiyedheya na Yehova vina nikuru naye?

14. Txini enfwanyela iyo okosa akala ninobeddiwa sabwa ya weddana magano a Yehova? (Masalmo 119:50-52)

¹⁴ Ogane weddana magano a Yehova. Job kattiyile wedda na magano a Yehova masiki vabeddiwiye. Marho waye mmodha wopela malago, wahitamela omukwekwetta na ottambi, iyene ohiloga wi Yehova kantanaala akala Job onokosa dhapama obe dhabure. (Job 4:17, 18; 22:3) Mbwenye Job karumelile ottambi oku. Iyene wanziwa wi magano a Yehova boligana, wahigana okalawo mowiwanana na magano abo. Kattiyile wi elobo-elobovi obe muttu mwina atxinje mubuwelo waye. (Job 27:5, 6) Eji ennisunziha eni? Kuttiye obeddiwa na attu ena,  wuttukulela waganyedha magano a Yehova. Kobuwela dhotene dhipadduwile mwigumini mwawo. Weyo ohinonelamo wi magano otene a Yehova ahikana mwahaya vina anonipuriha. Nona kagana okamihedha nikuru na Yehova nttuwene ninfara magano aba. Kintanala akala attu anonibedda, kaninarumele elobo-txilobo obe muttu onimwalaniha na Yehova.—Kengesa Masalmo 119:50-52.

15. Brizit wabeddeliwa nni?

¹⁵ Koona epadduwile na Brizit, murogora wo Indiya wabeddiwa na amudhaye. Vamaliliye obatiziwa yaka ya 1997 movira wa mudhidhi mung’onvi, mamunaye wahali munamoona wa Yehova wayelela ganyo. Sabwa ya ejuwene, iyene, mamunaye na mwaniwa ahimwalela sidadi yina wi akalege na amambali awa. Wenewo Brizit wahitabuwa venjene na obeddiwa. Motagiha, vowi mamunaye wahiyelela ganyo iyene wahiroma olaba labo notene wi asapele anamudhi. Ottiya ejo, numba ya omwene yakala wolapela makilometru 350. Mokubanyiha-mwene mamune wahikwa, vasogorhova mwanaye wahikwa na kanseri bana vyaka 12. Edhile ottabwiha makaniya jowi anamudhi a Brizit ahiloga wi iyene kohikala Munamoona wa Yehova nne elobo mmodha ninga esi kadhigapadduwile. Kuloga iyene wahikana muladdu sabwa ya makattamiho abale otene. Masiki dhawene wahidhowavi amukuluvelaga Yehova vina kali wolapela na nikuru naye.

16. Brizit orurihiwe dhavi sabwa ya weddeyana waye na Yehova vina nikuru naye?

¹⁶ Vowi Brizit wakala wolapela vaddiddi na mulogo, nameddelela milogo wahimukokomeza wi alaleyege murudda wakaliye vina akosege matugumano vanivaye. Vamaromo, iyene obuwela wila eji egahimurutxa vaddiddi. Masiki dhawene wahigana ofwara malagoya. Brizit wandhowa mmabasani a olaleya, wannoona matugumano vanivaye vina wankosa webedha wantakulu. Txini epurilemo Brizit? Iyene ohiwodha okana masunzo menjene a Bibilia, anamasunza aye enjene ahibatiziwa. Yaka ya 2005 wahiroma olaba ninga pionera wa mudhidhi wotene. Brizit ohirurihiwa sabwa ya omukuluvela Yehova vina weddeyana  na nikuru naye. Anaye anomulabela Yehova na murima wotene, murudda walaleyiye ovano onofanyeya milogo minli! Brizit ohikana ebaribari wi Yehova ohinvaha guru yafuniye wi awodhe owana na makattamiho vina awodhe ovilela masiki na obeddiwa.

17. Txini enfwanyela iyo ogana okosa?

¹⁷ Satana onfuna wi iyo nirome wubuwela wi Yehova ononinyanyala nigagumanaga na makattamiho mwigumini vina nigadhowavi nikuluvelaga nikuru na Yehova makattamiho anelege ottabwavi. Iyene onfuna wi iyo nirome wova akala abali ansogorhela anoruwaniwa, anofwara-fwariwa vina anowikiwa mukambura. Nigabeddiwaga, iyene onfuna wi nittiye ofwara magano a Yehova vina nikuru Naye. Iyo ninoziwa pama mirega dha Satana, nona kaninyengettiwa. (2 Kor. 2:11) Ogane orabela mirega dha Satana vina odhowegevi omukuluvela Yehova vina nikuru Naye. Kudduwale, Yehova txipo kanawunyanyale. (Masal. 28:7) Kuttiye elobo-txilobo obe muttu-muttuvi wumwalaniha na Yehova!—Rom. 8:35-39.

18. Txini enawone iyo nsunzo ninfwarela?

¹⁸ Mwari mwa nsunzo ntti, iyo nihoona makattamiho andaga onipadduwela otakulu wa mulogo. Mbwenye omukuluvela wehu Yehova vina nikuru naye enodhaga weyiwa na makattamiho anda witeya mmulogoni. Ninawodhe dhavi owanana makattamiho aba? Nivuzo ntti ninele wakuliwa nsunzo ninfwarela.